政府發資詢文件，建議將未經授權而上下載版權物品列為刑事罪行。當政府說對立法「冇既定立場」既同時，那個甚麼國際唱片業協會香港主席馮先生就說，堅持將此行為列作刑事罪行。

咪咁口響住。

正所謂唔講由自可，一出聲，就俾人知道閣下對「上網」呢個term既認識有幾多。幾乎求求其其搵一個香港中小學生都應該知道，部腦係會自動download閣下瀏覽既網站既資料，例如圖片。照該法例列明，己經犯左刑事罪行。

然則閣下「堅持」刑事化，就等於「堅持」將全香港上網人士作出檢控，當然了，刑事罪行，以後不用閣下掏自己荷包打官司了。政府打擊翻版有功，下年年尾溫家寶可能又會公開讚阿特首(唔知姓梁定姓曾)辦事得力，「成績好」，然後心頭一喜，又俾十件八件「聖誕禮物」予港人。這樣全港人士受惠，閣下亦解決多年來的心腹大患，是為「雙贏」。

不過要小心喎，萬一閣下唔知邊日忽然「手痕」，上左網，然後唔小心入左唔知邊個網站，俾阿sir捉到，法庭排期審理，則閣下肯定可以霸佔該日全港各大報章新聞頭條，此等威風事迹，一傳十十傳百，到時弄得整個珠三角街知港聞，香港又出一個時代雜誌年度風雲人物，咁就皆大歡喜喇。

甚麼「港產片咁垃圾，download叫做俾面你，唔download都唔會入戲院睇戲」呢d咁人身攻擊既說話就唔好提喇，「打擊bt等於助長旺角翻版事業」呢d有可能構成誹謗既說話都唔好提喇，閣下只要睇下各位歌星一年出幾多隻碟，買幾多層豪宅，渣幾多架靚車，平時食乜野野，就大概估到香港歌影視行業係幾咁「慘淡」。

係香港呢個商業社會，講大話唔係問題，落井下石都唔係問題，但成日講到自己好似俾bt搞到飯都冇得開咁既款，就實在係有d過份喇，香港地有好多人，真係三餐食唔飽架，你咁樣講野，分明係影射佢地o者。

阿馮生，不如你唔好叫「添枝」，改名叫「添足」啦。畫蛇而添足，無聊至極。

番左七個月工，我總算明白，點解而家做老細既會覺得香港人英文水準低落。

話說小弟收到一封formal既email入面(今次唔係我老細，係vendor既作品)，竟然有咁樣既一句：Please advice.

震撼程度比台灣大地震更甚(反正o個日我乜都feel唔到)。而呢位仁兄係負責同敝公司提供GIS system上既technical solution同埋一般consultation既。呢d算唔算係蜀中無大將﹖我亦終於明白點解明明你份工係唔關英文事，但個個老細都鍾意睇你既英文水平。當你連咁白痴既grammatical mistake都可以犯既時候，我點信你有料到呀哥哥﹖

又講下個地震。

比起兩年前地震引發既南亞海嘯，今次死兩個，算係不幸中之大幸喇。嗯......咁樣講好似有d冷血，唯有希望小朋友大個生生性性啦。

至於中港台三地既人嘛，當然擔心既就唔會係小朋友快高長大呢d咁長遠既事。呢幾日冇網上，d人仲慘過牙痛咁。有大陸白痴網民竟然問冇網上，日子點過。

呢條問題問得好。閣下可以先問下係國內偏僻山區一日行幾個鐘番學放學然後要點蠟燭做照明o來做功課既小朋友，佢地既日子係點過既。

年前紐約公共交通大罷工，包括市長彭博在內，全市市民要步行番工。日子點過﹖冇車塔，咪行路番工囉。冇網上，咪唔好成q日對住部電腦囉。你話你係d大公司主管一日幾百萬上落我同情你，不過睇你咁得閒上得forum留言表示你都係閒人一個o者，邊有資格問d咁既問題﹖同「何不食肉糜」的問題一樣，只表示出問問題既人愚昧無知。

冇網上做乜好﹖拿拿臨打個電話約女朋友出o來先再諗做乜啦！

台灣地震，香港對外通訊幾乎完全中斷。小弟亦身受其害，google上唔到，xanga寫唔到。昨日因此冇update blog。

嗯......

今日想探討下既係小弟既team leader既英文，只能用高深莫測o來形容。首先要聲明，好似百佳賣既魚生咁，本blog所選述之英文句子均為每日新鮮出爐，絕不隔夜。

例句1：The expected delivery of new server would be beginning of January 2007.

例句2(比較長)：Regard to the GIS enhancement project, all Microstation symbols using in the FRAMME must be converted to Microsoft True Type font (TTF). However, there is no any conversion product provided on the market. As per our study, we have implemented a series of procedures to convert all our Microstation fonts to True Type Font.

如此英語，係咪令大家嘆為觀止呢﹖

事實証明，係一個有眾多教徒觀看的blog內談及宗教問題是極為不智的，和在維園內討論共產黨是否廉潔的問題一樣。

well, 幾日聖誕假就咁過左。番左咁多個月工，都係第一次放長假(之前o個d全部都得一日半日=.=)。雖然話就話番工一d都唔忙，但準時起身番工其實都唔係一件容易做到既事。加上一日訓得六個鐘(唔想花咁多時間訓)，幾眼訓就可想而知。

蓋因女友事忙，小弟獨守空房，為期四日，就咁過左個假期。原本想同佢玩兩三日，唉......

聖誕節時興倒數。女友認為很無聊。

不可以這樣說的。

倒數，為的是準時。像在戶外受訓的軍人，圍在一起，然後長官說：「而家對錶，三十六小時後原地集合。Action！」當全香港人都慣了遲到，倒數就成了應該被鼓勵的習俗。連閣下拍照片按快門這等小事，都會有倒數的習慣，耶穌降生，為了隆重其事，當踏入十二月二十五日，時鐘的時分秒針都剛好疊在一起的時候，大家互相祝賀，說一句Merry christmas。既然大家每逢聖誕崇拜都會唱一曲「普世歡騰」，那就不該阻止此等活動。只圍在一起禱告品神，何來歡騰之有﹖一個「騰」字，說明慶祝聖誕節，應該有一點點激烈的肢體動作，而不是寂靜的默禱。

耶穌生在伯利恆這個毫不起眼的小鎮，誕在在一個簡陃的馬糟，生長於一個窮困的家庭，出自一個卑微的處女。耶穌出世，一切從簡，約瑟和瑪莉亞沒有暗暗地開香檳，「啵」的一聲，然後大叫：「Yeah! Merry Christmas」，灌小耶穌也喝了兩口，再唱一首哈利路亞，開開心心過一個聖誕節。當然更不會大悲大痛，想起「這孩子將來是要死的」這等慘事，然後痛哭一場作呼天嗆地狀。

那麼怪事就來了。耶穌希望低調，可幾千年後的今天，全世界基督徒卻大肆宣揚，唱聖詩報佳音，唯恐天下不知。但仔細想清楚：衪才剛剛出世，不懂步行，說話，讀書，認字，更不用說講道傳教。在耶穌三十多年的生平裏，這一章顯得最平平無奇：沒有神蹟，沒有道理，也沒有顯現。像小說的開首，雖然關鍵，但畢竟未到劇情最緊湊處，起乘轉合，才剛剛起了個開頭，只宜輕輕帶過，不值得花太多筆墨。

比起倒數，更搞笑的情祝，是很多牧師在聖誕崇拜裏講耶穌釘十字架的經過。正如閣下的朋友生日，買禮物造蛋糕的時候，也不會時時想起這個朋友將來是要死的，然後順便也送上一個花牌，上書英年早逝，浩氣長存；或是送上一大堆講述如何防治肝癌，肺癌，乳癌和子宮頸癌等絕症的醫學catelog作為壽禮。

只要記住，耶穌在十字架上離留之際，可沒有說：「你們要記住我是在x月y日出世的，要記在聖經裏......」，當然更沒有說：「把天下的火雞給我殺盡！」。但既然大家依然在一年中選了一日慶祝聖誕，依然在這一日大吃火雞肉，那就不要執著於倒數這等小事了。

背一個十字架己經很沉重，勿要衪再背上大家的心理包袱。聖誕嘛，大家開開心心過就是了，一切的負擔都是多餘。當慶祝二千年後，聖誕的精神仍在，像大草原上一片永恆的星空。

女友的母親叫她讀MBA。

香港人就係咁，邊樣野當紅，就一窩蜂走去做。當股市暢旺，就人人都想做金融業，連那位所謂亞洲股神，也說金融業要取代地產，成為香港的經濟命脈。就像當年IT概念興起，香港所有AL成績最好的學生，紛紛選讀資訊科技。今天熱潮己過，看看各科技科目的收生成績，就知呢行有幾慘淡。

猶太人既營商哲學，就係一間舖頭搵到大錢，就唔會係同一個地區開第二間同人頂爛市。中國人則相反，見人地生意好，即刻就係隔離開第二間，然後個個咁做，越開越多，到最後就係割價求存，自相殘殺，形成Vicious Spiral，彷彿開舖頭的目的不是要自己做生意，而係令到人地做唔到生意。

雖然要一窩蜂都未必唔得，但最好睇清楚係咪真係自己想要既野先啦。一味聽人地話讀左就有用，同睇d財經節目聽到阿彭生(或者郭生)講個number就跟住買一樣，都係非常不智既行為。

「不知三軍之事，而同三軍之政」。雖然讀mba唔係唔得，我都考慮緊下年讀。但做呢d咁緊要既決定之前(大拿拿十幾皮野架個course)，係咪應該至少交代下係邊個既suggestion，點解有咁既motivation，同埋分析下pros and cons﹖呢個世界，唔係進修就一定係好，唔係個進修好，就一定岩佢既。正如我成日話，駛乜諗都唔諗就急急腳同人爭抽新股﹖隻股真係好既，你等低少少價先入貨，都實會有得賺啦。做人，都係一樣既o者。

香港人嘛......

藝人徐子淇出嫁，報章大肆報導，說這是一場童話式婚禮。

可除了「童話」二字，其餘報導可跟童話完全沾不上邊。一張詳細的婚禮花費清單，宛如一場滿漢全席菜餚，鮑蔘翅肚，琳瑯滿目，盡皆奢華。

童話﹖不知這一堆編輯小時候是看甚麼樣的童話長大的。小弟才疏學淺，勉為其難只能聯想到蘇格蘭作家Stevenson的"Treasure island"，中文譯作「金銀島」。但這本好像也不算是童話。

總結一下，家翁為人除左有錢，似乎冇乜特別。當新郎的除左個老豆好有錢，亦係一無是處。咁呢位女明星嫁入去係為左乜﹖好直觀地，都係o個個答案。

再加上女主角說出這句對白：「好好彩可以做到李太」既時候，大家就明白喇。何謂「好好彩」﹖六合彩中獎機會係千萬分之一，偏偏閣下買中了，於極低的機會率下命中目標，就叫做好彩。像古代的皇帝召集後宮佳麗三千，觀賞一輪，然後手一指，說：「就是這個了。」。這時這個被召入宮只有三個月，剛學好宮廷禮儀的年幼處女，能在三千宮女中脫穎而出，得蒙寵幸，她覺得自己「好好彩」。

此情此景，大概大家也不會覺得這個皇帝跟宮女之間存在著甚麼所謂「愛情」吧﹖尤其當女主角洞房花燭之後帶著的那個值萬元的金光閃閃的新版LV手袋，跟其家翁的一句：「唔好問呢d小數目，我一日都賺到啦！」，的確雙映成趣。

真是糟糕，他日小弟若然有幸生了女兒，當她興致勃勃地要我讀一本叫「灰姑娘」的童話故事書的時候，該不該教她這個現實版﹖

繼月頭有同事辭職，月尾又多一個，今次呢個仲係中學既師兄。

番工近七個月，叫做熟習左環境，偏偏熟左既同事就一個個係咁走，其實都真係幾唔開心。但人各有志，辭職轉工，搵更好既待遇，實在係情理之中，對敝公司既同事o來講，亦係絕對正確既決定。但正確還正確，心情低落亦係在所難免。你話喇，有乜野事暢快得過可以兩條友肆無忌憚咁係條街度係咁問候個中學校長丫﹖

敝公司既情況，唉......

新入職既同事(ce既同學)係我飲醉酒o個晚(我未飲醉既時候)問我點解唔話俾佢知，等佢唔好揀呢份工。我想講既係，阿哥哥你五月畢業，十月先搵到份工。喂，你話你好搶手幾十間公司等住請你，我就更係唔會叫你揀呢間啦。你又唔係，自己工都未揀到就嫌三嫌四。再講啦，我又唔係同你好熟，我o個陣咁講，阿先生你會信咩﹖

雖然我o個晚係醉醉地，不過你o個隻中指，我會銘記於心既。


話說於敝公司宣布加電費後，今日都市日報有中電的一個全版廣告，說該公司己經連續九年凍結電費。

提出登呢個廣告既人，真係好醒。係最適當既時候做左適當既野，大家一眼望落去，自自然會諗到既，唔係中電九年冇減電費，而係港燈年年都加左電費(even其實港燈唔係九年都加)。心理戰運用一流，絕對做到打擊對手既目的。呢個廣告遲一日登效果己經冇咁大，今日登，打鐵趁熱。偏偏敝公司既管理層......咪gou一聲吞左佢囉。

當隔離屋成日家嘈屋閉，個大婆話個老公日日出去花天酒地既時候，這邊廂呢個男人同自己老婆講：「我呢九日都冇出去滾架喇！」

駛唔駛起個貞節牌坊過你呀。

尋晚約左女朋友食晚飯，由於去旺角去得太多，今次去左九龍城。

唔係話冇野食，不過得兩個人，係九龍城其實係冇乜選擇。加上佢又話要食辣野，又唔食得蝦，咁諗o來諗去，都係得間小曼谷。

是日餐單如下：

泰式炒蜆
串燒3串
馬拉盞炒通菜
泰式炒金邊粉

再加多兩杯飲品

算係食左幾多野(因為埋單都唔平)，下次不如去重慶大廈試下咖喱。

雜誌大大隻字報道，李兆基投資股票，兩年內賺了五百億。然後大家都看的眼紅了，兩年賺五百億﹖點賺架﹖於是大家就一起掏荷包買雜誌學做「股神」。

編輯先生真聰明。

一般師奶阿伯，尤其係呢期成日「部」係部匯豐股票機前的一班，肯定諗都唔諗就買左本雜誌，睇下阿李四叔係買邊隻既，然後一於死跟。於是首先賺大錢既，就係本雜誌。但大家似乎忽略左一樣好重要既野。一，到底係連本帶利五百億，定係純利五百億呢﹖咁就引伸出一個更加重要既問題：請問，閣下既本金係幾多﹖

同樣係賺五百億，你打本原來係一萬億，咁即係話兩年內你賺到既係5%，好似冇乜了不起。但如果你打本原來係五十億，咁你兩年內賺到9倍，咁你就梗係股神啦。但偏偏呢個最重要既information，雜誌冇提，咁即係點﹖

即係同樣道理，閣下話我知新溝左個女朋友，胸圍三十六吋。So what﹖佢到底係三十六吋既A Cup，B Cup，C Cup定係D Cup(或者再更上一層樓)﹖冇左呢個最重要既資料，你講左就等於冇講，需知道如果小姐係36C或者36D，我會好高興可以認識到佢，但如果呢位小姐原來係36A，咁我勸閣下就無謂獻醜喇。

所以本雜誌我冇買，分明睇完你得出既答案都係：「車，咪又係咁」。然後個個睇完之後都「忽然股神」，個個覺得自己好勁，又對李四叔有投資既股票大加追捧，咁最受惠既係邊個丫﹖

再講啦，我當你係由一百幾億開始，兩年內連本帶利五百億，升值四倍，好似好勁。我想講既係，今年個市係喪升既，只要大家唔係白痴，求求其其買隻大紅壽或者藍壽，基本上幾十%既升幅唔難達到。而且只要大家平時有留意下個股市，單單一隻2628中國人壽兩年前既價位大約5蚊，今時今日升到過22蚊，升幅都有四倍幾。全香港有幾多人手渣住隻中人壽﹖我想講，我公司幾個同事手上既中國人壽，都係新股認購番o來既，然則兩年內，佢地人人手上既股票都升值左四倍。咁講法，香港咪即係一地都係股神﹖敝公司就更加係臥虎藏龍添啦。

咪玩啦，Warren Buffett的旗艦公司Berkshire Hathaway於一九六五年上市，每股值十八美元，今時今日升到近十萬美元一股，其中經歷股災，經濟衰退，越戰，石油危機等等。四十個年頭，驀然回首，始得一個「股神」既名銜。阿四叔玩既呢兩年正值牛市，大把散戶買期指炒窩輪都唔止四倍添啦！

個「神」字，唔係咁解既。正如唔係唱歌一味大聲就可以做歌神，胸大就可以做胸神。唔係個PAT PAT大，就可以做股神。

政府清拆中環碼頭，十幾個示威者靜坐抗議，絕食四十九小時。

絕食這種玩意，不知是由誰發明的。這種示威方式，橫睇掂睇，似乎都只有視覺上的效果，而且只係懦弱既表現。

絕食副作用多多，最明顯的一點，就係明明你去示威，係去同人討價還價，卻偏偏先搞得自己奄奄一息，冇氣冇力，諗住「博同情」，等人地睇住你就死就死咁既樣，一下子心軟，就放你一馬，「順下你意」。但鏡頭所見，全世界的絕食示威者都只有一個下場，就係俾一班肯定有食飽飯既警察一個個好似抬死豬咁抬走。

情形就好似d細路仔扭買玩具咁。個細路喊哂lur埋地咁，個阿媽都唔肯買，咁點﹖「哼，我唔食飯呀！」，然後賭氣收埋自己係一二邊，一味作狀扮哂可憐咁款，恃住自己係你老豆老母親生，血濃於水，實唔捨得既，梗會有心慈手軟既一刻。所謂「輸錢皆因贏錢起」，今次絕食靜坐，皆因之前成功過。全部都係俾人縱壞。

只要比較一下就知道了。外國的所有示威遊行，永遠只嫌滋事分子太多，燒車劈店，擲石飛刀，分明係「搞破壞」，搞到七國咁亂。但遊行的目的，就係對現狀有所不滿，破壞建制，逼主政者收會成命，亦是搞破壞的一種。邊有人得個坐字架﹖絕食﹖多麼的孩子氣。

正如「墨政」裏的梁王，就算再無能，總不會在趙軍兵臨城下時登上城樓高呼：「為左表示我國對趙國霸權侵略的不滿，我梁城軍民上下由現在起全體絕食二十四個時辰！」。白痴也不會這樣說的，馬上研究對策才是正經。那是一個弱肉強食的時代，沒有人會嫌命長，你絕食，也絕不會有人可憐你，那趙國將軍只會哈哈大笑，然後等閣下筋疲力盡之時把整個梁城一窩端掉。

不說那麼遠，就講幾十年前，香港制水停電，資源匱乏，閣下唔想食飯﹖咁就岩哂。反正當時人人多生，加上醫學並不昌明，生落十幾個，夭拆後可能己經得番五六個，你要絕食﹖「咪當生少個」囉。就算今時今日，憑曾特首「強政勵治」四字，就沒有妥協的可能。要強政勵治，就不可能事事「順應民意」。這麼給你們十幾個人一哭二鬧，他就收回成命，拆個鐘樓都要你管﹖請問顏面何存。

當整個社會人人都以絕食為手段，以懦弱為標誌，而閣下見到個個去絕食既其實都係d二十幾三十歲既人，你望住呢一班應該係「社會既棟樑」，同埋社會「未來既棟樑」。你抬頭眺望，可會感到，香港的未來，就像北方珠三角的天邊一樣。

徐子淇出嫁李家誠，做老爺既「李四叔」心裏高興，集團旗下人人分得利是一萬大元。

此時此刻，恆基集團的員工心中想的，應該係盼李四叔剩下的幾位公子小姐幾時又「拉埋天窗」，或是李二公子幾時離婚另娶，再離婚再娶，總之最緊要係李四叔每次都咁豪，反正佢今次派開，下次冇理由唔派，最多經濟不景就好似滙控咁派息派少d既o者。如此人人一萬，永不落空，集團仝人無本而生利，比起其老闆投資有道，更加高明。

相比之下，長和系既員工(即包括小弟)，就好似前幾年相信李嘉誠投資3G會賺大錢既長江實業股東一樣，係咁呻笨。大仔李澤鉅結婚多年，亦無再娶既動向。至於另外o個個，唉......

大家記唔記得上次李嘉誠出席記者會，澄清冇介入電盈收購既時候有咁既一句：「阿Richard(李澤階)今年四十歲喇......」。你睇阿李生講呢野既時候「拿」埋口面咁，邊似係澄清咁簡單丫，佢一生人見過咁多風浪，呢d少少事算得d乜﹖所以呢，分明就留左半句係心度冇講埋出o來：「阿Richard今年四十歲喇......都仲未娶老婆呀，頂！」。拿，配合埋佢當時既語氣，表情，同呢句內容，係咪成件事都match好多呢﹖所以唔好怪佢講大話喇，佢o個陣心亂如麻，未做過人老豆既，你點會明丫﹖

所以阿李生，作為長和系員工之一，我都好明白你既感受。不過都係o個句啦，你有眼見李四叔豪辦喜宴，上哂報紙，仲要阿乖新抱大大聲咁係度話：「好好彩做到李太」，最近阿李四叔又多出個乜野「特區股神」既頭銜，但事實你有錢過佢嘛！呢d面子問題，到時閣下迎娶新抱，記緊亡羊補牢，唔會得一萬咁少既，係咪﹖

「道者，令民與上同意」。阿李生己經「得道」喇。勿令吾等失望，切記，切記。

大家或者會好奇怪點解而家五點幾我仲會打日記，唔駛估喇，在下今晚飲醉酒。兩點幾落床，然後關埋門著住燈咁訓，到而家終於醒少少(應該掛，冇乜自信)。

係第一次真真正正飲醉酒，頭仲有d暈暈地，但我想而家打日記，等自己仲記得飲醉酒自己做過乜既時候記低自己記得既野，我覺得，當我聽朝請左上晝假，個頭完全唔痛既時候，應該就會唔記得哂自己做過乜，老實講，而家都係盡量記，隔離有杯水，係因為實在口乾得太緊要，同埋想等自己醒少少而「針」(實在係好辛苦，唔想諗正字喇)既。

朋友叫我寫專欄，我而家諗到既係，專欄作家每日一篇稿，肯定唔飲得酒，唔係好似小弟咁樣一個唔覺意飲到咁high，交唔到稿，就己經唔合格。雖然其實係公司食lunch既時間己經打好一篇，不過算喇，反正而家又有好多野想寫，唔緊要啦。

我主要係想記低，飲醉左既人係諗d乜。

我飲到wing wing地o個下，個人暈暈地，其實己經知自己大鑊，然後拿拿臨話俾個fd知：「喂，我飲醉酒」叫佢睇實我，我知我自己冇講過「我冇醉」之類既白痴野，最多都係「我仲頂得住」(雖然其實己經頂唔住)，老實講，今晚飲醉係我既目的，因為我想知道飲醉酒既人諗乜，好耐架喇。

講「我冇醉」實在係情有可原，情因每個飲醉酒既人，心裏面唯一諗到既野，一定係想証明自己冇醉既，然後又想做好多野出o來証明自己冇醉。「我仲行到架」之類既話我一定講過唔知幾多次。但最後仲要勞煩父母特登到銅鑼灣車我番屋企，咁大個人，最敗家(會唔會誇張左d)都算係今次。

又唔好話我酒量差，我今晚係飲左四杯「滋華士」，每杯成70度(大家可以睇下閣下屋企用開既燒毒火酒，應該都係大約咁既度數)，一般啤酒只係4度，一杯滋華士，雖然己經係咁溝冰溝淡，食野飲水，但等於二百八十杯(飛機上既餐飲杯咁上下大細)啤酒，係不爭既事實。會係咁飲既原因，係因為k房內既裝飾係用「黑牌威士忌」，都係70度，未見過既阿公最鍾意飲o個隻。我想試下，飲咁高度數既酒，係乜野滋味。其實加左冰仲大鑊，因為易入口左好多，跟住就會係咁飲。
仲記得千叮萬囑阿媽唔好話俾阿妹同舅父知(雖然而家己經打哂出o來)，同埋係咁同d k吧職員講對唔住，唔該借借，小弟飲醉左之類既話，朋友又同我講：「其實你唔駛係咁話俾人知自己飲醉架」，好搞笑。

朋友送我落街，行唔到直線，見到柱就攬住先，唔想「訓街」，朋友去搵父母架車，問我：你得唔得架﹖我當時諗既野，又只係死攬住條柱(放心，應該冇攬過女，如果唔係我應該會係係差館打緊日記)，有冇支持唔住，唔知。

send 左好多sms俾女友，大約又係唔駛擔心之類既話(呢樣就好肯定，有手機sms record為証)，搞到佢咁擔心，真係唔好意思，不過o個陣，邊考慮到咁多丫。

丫，仲有，就係係咁深呼吸想溝淡d酒精，當然都係冇用，唔係就唔駛咁夜先打到日記。訓左上床後手腳亂咁fing，唔知為乜。沖涼係咁將水淋落自己塊面度都冇用，冇係浴缸pk己經偷笑。
一切都係要番公司問下同事先可以作實，但我真係記得同送我番o來既朋友話欠佢一餐飯，不過朋友似乎都好明白飲醉酒既人講既任何野都唔好信呢個道理，係咁同我講「得啦，得啦」。哈，你仲記得既話，就問番我拎番餐飯啦，有日記為証。

sry，真係飲醉酒，有乜打錯字既地方，還請見諒。訓陣先，我唔想聽朝真係要請假，都唔知請唔請病假好。

大陸人來港生仔成潮，周局長北上談判，無功而還。

雖然周局長每次北上談判，十之有九都係傾唔掂，但唔可以怪佢。在大陸當官，入職試第一關，就是考太極推手。把一個乾坤推得渾圓練熟，是在中國為官的基本入門功。當然還有各個門派的拿手絕活，護身殺敵，然後才有資格受帥印，領一道護官符上任。可惜周局長生於港英時代，受業於西洋鬼子，哪看得出中華太極之奧妙處，於是接連敗北，也是情理之中，非戰之罪。

其實不只來港生子的問題，遠一點的禽流感，沙士，近又有孔雀石綠。諸般問題，周局長自上任後不知上去談過多少次了，但形勢比人強，北上前無去路，後有香港孕婦追兵殺至。設身處地，若閣下是周處長，除了學楚霸王烏江自刎，仲有乜計﹖

法國人很烏托邦，覺得世界大同，住得係法國，就係法國人，頗有墨子的兼愛精神。一般法國當局發現孤兒，都會給予孩子法國戶籍。以前發現有中國藉的流浪街童，也一視同仁，批核居留權。但越o來越多案例，就係孤兒得到戶籍後，他的父母親卻突然跳出來，然後要求法院也給父母親居留權好「照顧」孩子。如此一次，兩次，三次，越o來越多，法國政府覺得不對勁，這個冤大頭實在做不下去。於是修例，對中國孤兒特別處理，再不給予居留權。

閣下覺得被歧視﹖咁你應該先問，點解人地個個都唔歧視，甚至原本，人地其實都唔歧視你，落得如此下場，怪得邊個﹖還不是閣下咎由自取，自己攞o來既。人地基於人道立場，對你好d，你就濫用人地既同情心，謀取私利，人地保護自己，你就一哭二鬧三上吊，話「唔人道」，喊打喊殺，成何體統﹖孟曰：人必自侮而後人侮之。

正如大家愛貓愛狗，鍾意係屋企養番一兩隻，但同是哺乳類動物，大家唔會係屋企養老鼠既。偷食米糧不說，傳播疾病，搞得全家雞犬不寧，禍害深遠。香港新一代婦女嬌生慣養，今日粗身大細，依然上街遊行，可見老鼠橫行，己到不得不除的地步。動物學家會話俾大家知，最惡既老虎唔係肚餓既老虎，而係岩岩生完，佢d仔仔女女連眼都未開既時候，呢d老虎乸避之則吉。你仲要主動走埋去惹佢，就死左都唔抵可憐。

所以，修例咪修例，歧視就歧視，就算擺到明係唔妥你，咁又點﹖攘外必先安內，與其怕被指「傷害中國人民的感情」，似乎自家老虎乸發難，更加可怕。

吾豈好修例哉﹖吾不得已也。

話說在下於前日blog中稱讚女友，蓋因友人女友亦系出ie，閱後心有不甘，遂撰文反擊，逐鹿中原，說「天外有天人外有人」，自己的女友也不賴云云。

看到這位可愛的朋友的blog，不禁聯想到以下景像：

就係四個師奶岩岩夠腳，圍埋一齊打麻雀。師奶打牌，當然不會發表甚麼高深偉論，亦不會探討政經問題，都係閒話家常既多啦。見到其中一個手指戴住粒鬼咁火既鑽石戒指，亦理所當然會有這麼一句：「咦﹖你粒石好靚喎！」，這位太太心中得意，也回了一句：「嘻嘻！係呀，我同老公係南非買既。」

可講者無心，聽者有意，左首北位的那個師奶剛好接連出衝，聽了這句，心裏思前想後，呢個阿太擺明就特登戴隻戒指o來邪住哂，加上洗牌動作大，成日「殘」o來「殘」去，搞到我暈陀陀，分明係出術。越諗越興，於是酸溜溜的說：「車！好靚咩，我o個粒仲正呀！」，然後係個手袋入面拎左粒鑽石出o來，兩粒一比，然後好得戚咁講：「拿，我o個粒大d架！」

唉......

戒指買回來，當然是用來戴的。難道要係屋企後面塊草皮度挖個地洞，將隻戒指埋起佢然後再種棵菊花係上面，每逢過年過節就拎起棵花睇下隻戒指仲係唔係度咁樣﹖那麼鑽石太閃，難道還要用張紙包起佢，等佢冇咁「殘」眼﹖買得鑽戒，梗係有幾閃買幾閃架啦。咁買咁閃為乜﹖梗係流水附會之時用o來「演野」架嘛。周不時仲要特登作狀搖下隻手，或掩面或梳頭，等唔覺意又「殘」到唔知邊個既時候等佢又走過o來問：「咦﹖你隻戒指好靚喎」，買隻戒指番o來，唔係諗住用o來孤芳自賞架嘛。

同樣道理，咁女朋友溝回來，當然是要讚的。替女友隱惡揚善乃作為男友應有之義。一個女仔可不希望男友將自己的優點藏在心裏，或是聖誕生日等等先偶然提起一兩次咁樣。一有機會，閒話家常，向至交好友誇耀一兩句，也是同樣道理。她嘴裏雖然話尷尬，心中可受落得很。唔通又要金屋藏嬌，要阿女友從此三步不出家門，唔准見人，我又絕口不提咁樣﹖我又唔係o個d綁架左個女仔番o來綁係間房度慢慢虐待既變態佬。好喇，咁我有我讚，你有你讚，做乜又要話我o個個唔xx(嗱，我一向只話你，冇彈過alice架)

閣下大學畢業，飽讀詩書，何必學那些師奶八婆一樣爭風呷醋呢﹖男人嘛，一說到女人的頭上，就絕對不會認低威，自古英雄難過美人關，古人誠不欺我。

阿太太，鑽石呢，除左睇卡數，仲要睇形狀，切割同埋純度架。

特首選舉委員會誕生。八百票中，梁家傑估計能得到其中一百三十四票支持，再加上立法會泛民議員二十票，參選特首的入場券應該不成問題。

八百票兩個人爭，理所當然，得過四百票者能夠勝出。梁律師費盡九牛二虎之力，還不及曾特首輕輕鬆鬆，吹吹口哨就得到六百多票。可是看此君得知入場券「到手」一刻笑逐顏開，大家就知道，呢條友，邊係想選特首架。為乜﹖我估大家唔會天真到真係以為係為左「加強香港市民的民主意識」掛。

正如小姐今年二十出頭，身懷哈佛MBA一級榮譽畢業証書，在中環高薪厚職，如此一份覆歷，卻偏偏走去勾人老公，為乜﹖

只不過是一場逢場作興。你心知肚明，呢個男人有家有業，絕對唔會為左你而同而家個大婆離婚。但閣下好勝既性格，偏偏就係條氣唔順，點解呢個咁既黃面婆都做到既野，偏偏我就做唔到﹖或者係佢做野壓力太大，工作沉悶，或者係屋企班化骨龍日日嘈喧巴閉，佢只係想搵個心靈既避難所，跟你雖然說不上討厭，但也沒有多少愛。只係見閣下青春美麗，又自己投懷送抱，這種好事，十個男人九個都唔會拒絕。

於是兩位夜夜雲雨，日日笙歌，但這個男人做事謹慎，每次行房之時，必定做足安全措施，連買套子都事必躬親，以防閣下忽施暗手，在買回來的一堆套子中，用針刺了一個個小洞，肉眼難辨，到時米己成炊，豈不糟糕﹖還記得上一次閣下買了他用慣的香燈味，但他壞壞的笑了笑，然後從衣袋裏拿出另一包，輕輕搖頭，說：「不，這次我想試試士多啤梨味的。」

但意外，就是「意料之外」。這一次天可憐見，閣下終於有了身孕。然後某一日睇完醫生驗完孕，就走上這個男人的屋企，劈頭第一句，就要名份分身家。仲將張超聲波掃描圖用手一揚，說：「你睇個bb幾得意﹖兩個月大喇佢」，而且面露得色。這一刻，做男人的固然面目無光，做大婆的又何嘗好過﹖滿以為自己老公溫柔體貼，對自己呵護備至，況且自己嫁佢廿年，仲同佢生埋兩個，冇功都有勞。

但呢一次，就算你知道個老公「唔睇僧面睇佛面」，最終俾人踢走既都只會係o個隻狐狸精，但事實擺在眼前，個老公明明白白就係俾人撬左去，試問顏面何存﹖如此憂心如焚，一夜無眠，第二朝一早出街仲要俾d三姑六婆：「哎呀，阿曾師奶，乜搞到兩隻眼好似熊貓咁呀。」咁o來「潤」你既時候，真係眼火爆想一拳就打埋去。

節哀吧曾爵士，這一次百密一疏，怨不得人。「豈能盡如人意，但求無愧於心」，不是閣下說的嗎﹖

今日班聚，會中同學說，讀ie既女仔好似全部都好勁。我心中即時有d沾沾自喜，因為計今年grad既ie女仔入面，小弟既女友應該係最勁o個個。

因為fifi係讀女拔既。

多材多藝不特只，仲要識埋d唔知乜野剛果文，成日係你面前咯咯聲咁講d只有住係山卡啦地方既土人先識聽既唔知乜野嘰哩咕嚕文，係o個一刻，你就會好感受到，呢個世界係幾咁大。不過好可惜，我對拉丁語系既語文，實在係冇乜天份。而你又唔可以對佢講野一味點頭表示認同，萬一佢有心玩你，用剛果文講句「你係豬」，又或者「正烏龜」既時候，而你點頭，結果就只有俾佢恥笑。所以，都係老老實實話唔識算數。反正係香港，識呢d剛果文既應該都唔係好多人o者。好大壓力﹖我又唔覺。反正佢唔會好刻意咁係我面前show off。

好似我鍾意親既女仔，都係屬於叻既類別。但係叻既女仔，你又好難要求佢好小鳥依人，又偏偏其實世界上既男人，或多或少都會有d大男人性格，都會好想control everything。所以有d咁既性格，老實講，都幾茅盾。

偏偏fifi小姐兩樣都有d，雖然叻佢唔算最叻(抱歉，我又係用鄭小姐o來做比較，其能力之出眾實在令人側目)，計溫柔嘛，佢又唔算得係好溫柔。但勝在兩者兼備，深得中庸之道。即係咁，俾你搵你張al成績表，你要張拎AEEEE既成績單，定係一張BBBBB既﹖除非a o個科係英文啦，但係呢個世界上又有幾多張英文係a，而其他會e哂既成績表﹖最容易，咪俾你a科中文囉。

所以呢，呢幾日見你拿埋口面咁。喂，放心喎，我對你好滿意。

友人選擇南丫島為拍拖地點。

而我聽到後既第一個反應係：o下﹖o個度有發電站架喎。

雖然話旅遊點同發電站分別係南丫島既兩邊，但當你好享受咁同閣下既女友散步既時候，抬頭遠望，卻見到遠方濃霧一片，可會感到原本愉快既心情受到一點點的影響﹖

很對不起，南丫島在我心目中，就只有敝公司那座經常被立法會投訴的只會噴黑煙的發電站。畢竟在敝公司工作的人，都不會覺得南丫島是一個可以用romantic o來形容既地方。今朝番工要趕八點鐘既船，然後週圍冇商場，冇人，乜都冇，只有一個勁污糟既海景。好靜﹖西伯利亞大平原都好靜，唔知閣下有冇興趣去參加開墾西伯利亞大平原既工作﹖

至於o個座「風力發電機」，其實只係敝公司用o來扮環保「做様」既o者。咪傻啦，風力發電成本好高架，萬一真係搞風力發電，令敝公司盈利倒退，到時敝公司股價下跌，阿李生既資產繼3g呢個負資產之後又再縮水，邊個負責﹖所以都係老老實實，燒下煤咪算囉。而o個一座風扇發到幾多電，大家都心知肚明啦。

所以在下絕對唔會帶女友去南丫拍拖散步順便感受大自然，正如你唔會約會你女友係一間開正係垃圾房隔離既餐廳食晚飯一樣。雖然你食緊野既時候係睇唔到，餐廳亦做好左清新空氣既工作。但當你望住你隻碟上面o個條龍脷柳既時候，用力一吸諗住感受下d香味既時候，閣下既潛意識裏，總會感到陣陣既芝士香味之中，混雜著那麼一點點的垃圾味。

將類似呢d咁有潛在危機既地方定為拍拖地點，除非你係想「置之死地而後生」，另有後著，否則下次都係少選為妙。唔係萬一阿女友劈頭就問一句：
「南丫島唔係有發電站既咩﹖」
「係呀」
「o下﹖咁你帶我o來散步﹖」

子曰：君子不立於危牆之下。

今日小弟畢業禮，學習生涯算是正式告一段落。

崇基書院的畢業禮，其中有一部分係畢業優異生致詞，是一位姓蔡的女生。聽著聽著，我諗番起當年小學畢業，鄭小姐的同學錄撰文。

小學生寫畢業文，大約就係一d多謝母校，又有好多回億之類既野。估唔到一個大學畢業生既致詞，講既野，原來都係一樣。或者其實係女仔既思路都係咁上下，因為當年洪小姐(妹)致詞，好似都係大約咁既野。

但呢位蔡小姐回億不特只，仲要變本加厲，非得一花一草一木都要懷念一番。雖然閣下致詞，台上下眾人都唔會expect你會俾到d乜野驚喜，但係「行」到咁既地步，只令我覺得，閣下呢個優異生銜頭係點拎番o來既。反而不及伍牧師偶有佳作，今日一句「中大今日好多畢業禮，係得崇基有管風琴o者」，係串呀，不過你又吹佢唔脹，仲要係出自一個五十幾歲既牧師之口，真係夠抵死。崇基有個咁識得搞氣氛既牧師，好認真咁講，係崇基之福。

然後把聲又勁嗲，係我聽咁多人上台致詞，最嗲既一個。雖然聲係天生，不過既然書院對閣下委以重任，閣下的先生不足，自當後天補救，係屋企演練一番，練得把聲就算不能字字鏗鏘，都應該清脆利落，而唔係用同男朋友鴛鴦戲水既時候：「咦~~~唔好啦」咁既語氣o來演講。閣下既嗲聲嗲氣，用o來對付你男朋友或者好有用，用o來演講，你慳d啦。

只不知鄭小姐是否品學兼優依舊，然後係今年港大畢業禮致詞。如當年一對水汪汪的眼睛，清晰的輪廓，梳得一頭帶半點標桿的男兒氣色的短髮，當年說話雖然稚氣未脫，但咬字清楚而不拖泥帶水，再加上樣貌娟好，形像也給人成熟的感覺。論氣勢，獎多到要三個男仔幫佢托，再加上性格上的一點點冷傲，絕對夠壓場。論形像感覺，比起今天的這個崇基優異生，似乎當年的一個十二歲女孩，有過之而無不及。只可惜當年這位小女孩只係副會長，沒有致詞的機會。

忘不了﹖也不算是。因為從來冇刻意忘記。正如偶然掃視書架，都會記得小學同學錄中間掀開左手邊o個頁中間o個張相，就係屬於這位鄭小姐的。十年人事幾番新，只希望閣下今天仍然出類拔萃，如當年的天之驕女一樣。

p.s必須強調在下用情專一，現今對這位十二歲的女孩絕對沒有任何瑕想(我又唔係變態既羅莉控=.=)

俄羅斯變節特工中毒身亡後，普京宣稱「唔關佢事」，英國政府調查後也表示「初步排除普京為主謀的可能性」。

用毒暗殺，自古有之，本來並非新鮮事，實在冇必要好似發現新大陸咁。用毒殺人比用刀用槍容易，而且穩陣，亦冇任何技巧可言，只要落既時候唔俾人發覺，落完唔俾人捉到，就搞掂，同做賊冇乜分別，唔駛花幾十年練d乜野刀法槍法。而最重要既係，尤其係用慢性毒，你要查到係邊個落既毒，哈！難囉。

不過利特維年科身上中既係釙毒，咁就有文章喇。難唔難製造都係其次，最重要係，據講呢位仁兄身上既釙毒，價值二千萬英鎊(約三億港元)。呢個世界有三億既人唔少，但有幾多個除手就拎三億出o來殺人﹖

所以用意好明顯，擺到明就唔淨係殺人咁簡單，而係要立威：「我要殺你，多多錢都肯駛架喇，你有本事就繼續同我作對啦！」。即係好似以前粵語殘片「黑玫瑰」咁，寶珠姐每次偷完野都放朵黑玫瑰係度，意思就係：「係呀，又係我o來偷你野呀，你吹咩﹖」，擺到明就唔係怕你查到佢係邊個，而係「驚死你唔知佢係邊個」，咁之嘛。

國際上肯駛咁多錢殺人，有d咁難製造既毒藥，再加上阿利生既特殊身份，邊個毒死佢，仲駛查既﹖不過英國係一個好理智既民族，深知一旦「灘牌」，同俄羅斯佬鬥狠，絕冇著數。當年拿破崙攻俄，俄羅斯佬深知不敵，把心一橫，使出「焦土政策」，沿路搬得動的搬，搬不動的就燒，甚至退出首都莫斯科，硬是不留半點米糧給拿破崙。連拿破崙都吃敗仗，英國佬自知比他高明不了多少，無謂逼虎跳牆，萬一公開宣布普京是幕後黑手，此君下不了台，發起狠來，開個記者招待會，向全世界放下狠話：「條二五仔係我搵人隊冧既，咁點丫﹖」，然後再公開宣佈，將幾十支原本指住中國大陸既核彈對準英國各大城市諸如倫敦，伯明翰等，你英國佬到時死撐又唔係，縮沙又唔係，點算﹖

大家都係成年人，唔係細路仔玩泥沙，英國佬千算萬算，都無謂為左條遠道而來既二五仔而同人打第三次世界大戰。況且人地普京都識做，話唔關佢事，俾個落台階你，佢地自己鍾意狗咬狗骨，由得佢啦，無謂去趕這趟混水。至於中毒o個兩位仁兄咯，鬼叫你千得罪萬得罪，偏偏得罪一個有二百支核彈既人，算你唔好彩啦......唯有由貝理雅帶領國會議員一齊向你兩位默哀十五分鐘，以示掉念，俾足面你又點話﹖再叫蘇格蘭場裝模作樣，調查擾嚷一番，這場兩國互扯貓尾既鬧劇就圓滿結束。

此所謂「識時務者為俊傑也」。用毒，雖然無賴，不過都有好多智慧架。

枱面放著兩個綠色既信封(一個係我既，一個係老豆既)，我就知道......
唉，又要交稅喇......

都終於明白點解以前d大人一提起交稅就皺哂眉頭，無他既，要你眼睜睜睇住自己d錢dum落鹹水海，你係乜野感受丫﹖無錯，交稅係義務，而且香港稅率都好低。但盡唔盡義務係一個問題，盡完義務條氣順唔順，係另一個問題。

點解唔順氣﹖即係咁，一個個成日食野唔做野係屋企等攞綜緩既人可以一年去九次旅行(行得走得食得訓得，咁好明顯唔係冇工作能力啦)，而又有人可以一日做成十四五個鐘要之後收入岩岩好過左個threshold，然後就每年定時定候dum錢落鹹水海。

呢幾年我每次見到枱面封綠色信(其實今年先開始有我份，各位朋友唔好誤會)，我都會諗以上既野。點解人地國家福利制度咁好稅率咁高但係人地交稅毫無怨言，而香港人交親稅都牙痛咁聲，原因就係呢度。公道自在人心啦。

p.s聖誕老人派左聖誕禮物，然後一日就升左四十幾個%。表示d乜﹖梗係唔係david webb好眼光啦，佢真係咁神，咪仲勁過Warren Buffett﹖雖然阿david哥哥往績都幾好，都未至於神到咁既地步掛......

証明既係，大家而家買股票係求求其其聽到人地up邊隻好就係咁買亂咁買，唔係點會一日升咁多﹖一日呀大佬，個市run得o個幾個鐘咋。難為人地派禮物前做足功課俾足分析，你班ds睇都唔睇下就買，我做佢就真係呻笨喇，早知求其俾隻仙股算數啦。仲要幾日之後出o來話：「哎呀，唔好意思，俾錯number添」，咁你班契弟仲唔死﹖

尋日去剪髮，阿洗頭姐姐(廿幾歲啦大約，其實都未必係大過我)見到我手提電話上既wallpaper，跟住話：「咦﹖你張wallpaper幾靚喎」。阿姐姐真係識講野，張wallpaper係女朋友既近照。於是我又好條件反射咁回答：「唏，邊係丫，真人冇咁靚架」。

男人就係咁，就算幾咁認同人地讚你既野都好，講到出口，都一定會變成：「唏，邊係丫」。一般宴會，就唔難聽到呢d咁既對話：

「咦﹖阿陳生，你個仔讀書好叻喎」
「唏，邊係丫，個乞兒仔冇鬼用架」

「嘩！你個女生得好靚喎」
「唏，邊係丫，塊面茶野茶到一岩一崫咁」

「你個仔彈琴好好聽喎」
「唏，邊係丫，咪就係識o個一首咁大把囉」

「你個女唱歌好好聽喎」
「唏，邊係丫，朝朝晨咁早就係咁唱搞到你冇覺好訓o個陣你就知味道呀」

「喂，你幾家都咁好笑容，好幸福喎」
「唏，邊係丫，係屋企日日家嘈屋翳你唔知o者」

「咦﹖你近排好疊水喎」
「唏，邊係丫，個個又話加人工又話加津貼，賺左咪又係俾番出去」

「你就好啦，個女朋友咁千依百順」
「唏，邊係丫，成日嘈呢樣嘈o個樣好似我前世欠左佢咁呀」

「哇，你今次測驗好高分喎」
「唏，邊係丫，撞彩之嘛」

一句「唏，邊係丫」，用作回答的開首第一句，放諸四海，任何話題，似乎都適用。而且大部分男人都好堅持要用，幾乎出於一種本能反應。就算你個麻甩佬朋友眼甘甘咁望實你女朋友然後係咁話佢正，而你心諗：「駛乜講﹖你條蛋散呢世都唔駛恨架喇」既時候，你都會伸手一推，然後變左做：「唏，邊係丫，化粧化到成個馬騮xx咁」

做人就係咁，對住一d其實你唔係好想同佢講真話既人，你就好自然講大話講到底，將心裏面既說話一百八十度掉轉。所以呢，當下次你個男朋友係你話完佢：「至型係你喇，得未﹖」而佢答：「駛乜講」既時候，喂，呢句真話o來架。

話說尋晚同女友係深水涉行街，迎面而來三個十五至二十歲不等既mk look少女。然後行最右o個個女仔(對我o來講係最左)「卡two」一聲，當街當巷吐口水痰......

我當堂就呆左。因為如果我冇記錯既話，深水埗應該唔係屬於深圳地段。一個十幾歲既靚妹(操純正香港口音)竟然會失驚無神就地放飛劍，我真係唔識俾反應。其震撼處不下於行行下街見到有人使出一式「降龍十八掌」，然後「啵」的一聲，路旁一顆幾尺粗既大樹應聲倒地。

迪士尼卡通「花木蘭」既一幕：女主角扮男人入軍營，為左表現得豪邁一d，似男人一d，係軍營度公然吐痰，點知渡河未濟，一口痰一半吐左一半吐唔出，場面尷尬。咪就係囉，吐痰講求「快、恨、準」。憂柔寡斷，不乾不脆者免學。偏偏睇女俠使飛劍時非但招式學到十足十，而且顯得真傳，架輕就熟，收放自如，吐痰時既神態動作渾然天成，絕不拖泥帶水，顯然已有數年之功，非初學乍練，出o來「演o下野」咁簡單。街上其他人亦對此等招式視若等閒，好似理所當然，通街都係咁。有d似電影「少林足球」既最後一場：通街d OL一個個唔係識「獨孤九劍」，就係識「輕功水上飄」。彷彿時空逆轉，香港回到了金庸筆下的武俠年代。

有冇搞錯呀﹖中港文化交流咁快就到咁深層次﹖香港回歸左九年咋喎。小姐，你唔顧公德，自私d諗，都顧下自己既儀態丫。呢d咁失儀既行為，一個幾十歲既屋邨阿伯可以做，一個四十幾歲，操四川福建口音既師奶可以做，一個十幾歲，成身著到「爛dad dad」既飛仔都可以做。偏偏閣下就係唔可以做。喂，女仔人家o來架，執輸行頭，好學唔學，去學人放飛劍，邊係你學架。
而家港人時興北上消費尋歡作樂，導致中港文化大會合，水乳交融。大陸同胞南下，港人北上。當大家盡情享受自由行帶o來既經濟效益時，亦要同時承受呢劑經濟特效藥既side effect：當香港人人行走江湖都練就一身橫練功夫：搲鼻孔、吐口水、罵髒話。閣下如果大驚小怪，反而俾人覺得你「大鄉里」。

論劍該上華山，吐痰請往公廁。唔係萬一閣下一式六脈神劍馬失前蹄，誤中副車，到時搵交o來嗌，為乜呢。此等「阿媽係女人」既道德常識，come on，唔係要教呀話。

電視節目「一擲千金」的banker一角，據說由羅君佐擔任。

雖然如此答案也是意料之中：只不過是要一個人裝模作樣一番，適當時指手畫腳，要報價時係面前既電腦滑鼠click一下，讀番個數俾阿許生聽，隨隨便便搵個二打六都做到，就係咁。

但電視台很巧妙地在這位'banker'與鏡頭之間隔一層屏幕，情況就不同了。像水墨畫的留白，留給了看畫的人想像的空間。每個人看著同一張畫，也看著不同的畫。舅母就曾經問過：「呢個係咪真係banker o來架」。也許在部分人眼中，幕後之人真係某某投資大銀行的高級賓架。有甚麼關係呢﹖加一層屏幕，就係要閣下發揮一下小宇宙，睇呢條友成個節目就係咁坐係度，氣定神閒，運籌帷幄，手指篤一篤就幾十萬上落。在一個天真無邪的小女孩眼中，佢除左係banker，仲有可能係一眾靚仔明星諸如吳彥祖，陳冠希，劉德華和梁朝偉。

可偏偏現在爆了出來，這個「高級賓架」原來係羅君佐，是多麼令人心酸的一個答案。像歌劇「歌聲魅影」的一幕：女主角姬絲汀滿懷憧憬的掀開了男主角那純白色的面具，滿以為會看見心目中的音樂天使，卻發現藏在背後的只是一張爛面和一顆自私的黑心。現實就係如此殘酷。

因此，當閣下二十出頭，你身邊o個個傻仔男朋友失驚無神讚得你天上有地下無，自己幾咁幸運有咁既女朋友既時候，記緊唔好拆穿佢「講大話」。係，雖然呢條友仔把口「浪過油」，講野冇句真。不過你知道呢一刻佢呢一番話毫無惡意，佢既唔係要呃你既錢，更加唔係要氹你上床，只係輕輕的把你抬了一下，滿足一下閣下既虛榮心o者。既然佢願意自斷一臂做你既過兒，你咪順下佢意，做下小龍女囉。雖然一轉頭，你就睇見謊言既背後仲有金輪法王，全真五子，同埋o個個可恨既尹志平。唔好望喇，諗咁多做乜﹖雖然下一刻好可能就係你兩個齊齊萬劍穿心，但有乜所謂﹖「只不過是死罷了」

有風就要駛盡里，當你結婚之後，同呢位仁兄生埋兩個仔之時，就唔駛旨意佢再有d咁既閒情逸緻同你甜言蜜語。等待你既，就只有「反轉豬肚係屎」既婚姻生活。既然朝不保夕，何必偏偏一定非要知道真相不可﹖潘朵拉因為好奇打開了盒子，開啓了世界萬惡的根源；阿當吃下能令他分辨一切的果實，從此看清了世界。都沒有好下場。

如此所謂「真相」，見了不如不見。坐係幕後既呢個人，其實係阿rain。

前幾日係xanga度講日劇「一公升的眼淚」，女友說我只看了兩集，不該以篇蓋全，妄加評論。

一套劇集，目的係講一個故事。一齣日劇只有十幾集，如果睇左兩集，連佢想up乜都未知，咁呢套劇，好明顯係一套唔清唔楚既劇，同樣係不睇也罷。

但時下日劇不好此種自以為高深有型既拍攝風格，平心而論，故事倒是說得清楚的。連劇名都開宗明義，擺明係要睇到你「一殼眼淚」架喇，斷估都唔會係笑片掛：好笑到你流眼淚流到一公升出o來。係既話，諗呢個劇名既編劇都幾聰明。

如此一個老土到極既戲名，配合老土到極既劇情，此等雷雨式肥皂劇，整日價哭哭啼啼，拉拉扯扯，師奶小姐mk飛仔們依然看得一把鼻涕一把眼淚。唔怪得d電視評論員一路話無線劇集幾差幾唔掂，前線劇集收視率依然有三十幾點。根本呢d人睇電視好簡單既o者，你叫佢喊就喊，叫佢笑就笑。你講冷笑話同講好笑話，佢都係照樣對住部電視機傻笑，俾同一個反應。

冇錯，只係肥皂劇，唔係悲劇。莎士比亞作o個d叫悲劇，你呢套賣點講o來講去都仲係個女主角繪里知道自己病左o個陣個樣幾令人心碎，點樣真人真事發人深省，其實都只係帶o來純粹官能上既刺激(個名就出賣哂你啦)，咁都叫做悲劇，係對莎士比亞既最大侮辱。

都係o個句啦，套戲由始至終，賣點都係女主角一個o者，唔通大家真係會覺得阿亜也好可憐﹖換左係沈殿霞做，大家仲會唔會睇到咁呼天嗆地，好成疑問(其實我唔覺得攞肥姐做比喻係好笑，不過唔知點解個個都話好笑......)。好喇，咁同肥谷去灣仔做資料搜集，專揀日版stephy拍既先買o來睇，有乜分別﹖都係睇個女主角o者。女主角靚，就自然多人睇架啦。

睇呢d劇想我留眼淚，門都沒有。既然係咁，同睇套av但係阿細佬冇反應一樣，唔好哂時間喇。呢個世界上好書好戲多如繁星，何必單戀一個繪里香呢﹖

年前賢仔被斬傷，各界踴躍捐輸。尋晚電視引述社工說，捐款數目，令賢仔番工前「生活都唔成問題」。

何謂「生活唔成問題」﹖夠三餐溫飽，青菜豆腐鹹魚白菜咁様「唔成問題」﹖我估阿社工姐姐冇咁好幽默感。何況而家政府大撥資源發展全人教育，課外活動，窮人唔應該冇得玩，不然會「自尊心受創」，咁就出問題喇。

小朋友鍾意玩遊戲機，nds、psp、wii、ps3等，行出街梗有一部係左梗，佢話係生活必需，你話「唔成問題」。再大個d小朋友要學鋼琴小提琴大提琴結他長笛單雙簧管長號短號法國號畫畫跳舞唱歌英法德意俄西葡日韓文十八般武藝，自我進修，生活所需，你話「唔成問題」。又再大個d思想踏入青春期應酬交際，吃花酒玩婆娘，解決生理所需，你話「唔成問題」。然後溝埋女，實行左抱一個，右抱一雙，三妻四妾，仲要送禮物時時奉獻，Lu Lu Guinness、Kate Spade、Anya Hindmarch、Tod's、Patrick Cox、Westwood、stiletto、Land Crawford、Tiffany、Georg Jensen、Cartier、Lingerie，感情生活又「唔成問題」。今日話見劉德華陳慧琳你俾佢見，聽日又話想見碧咸施丹費高魯爾蘇斯克查傑斯朗拿度舒夫真高朗拿匈奴亨利托迪波歴克高路斯保方迪比亞路普科斯基，又或者羅拔迪尼路馬龍白蘭度阿爾柏仙奴奇洛李維斯湯告魯斯妮歌潔曼畢彼特麥迪文安祖蓮娜祖莉，你都話「唔成問題」。然後阿賢仔萬一學業有成，出國留學，攻讀博士，哈佛普林斯頓麻省理工哥倫比亞芝加哥加州州立史丹福劍橋牛津華威洛華洛定咸滑鐵盧多倫多溫哥華，總之一日未出o來「番工」，照你咁講，通通都「唔成問題」。

正所謂「人無信不立」，講過既野，最緊要算數。奥運金牌話養一個細路仔要四百萬。他朝一日捐款用盡，賢仔又未出o來做野，係咪阿社工姐姐你包底﹖唔係，就唔好咁大口氣。呢個世界你估真係：「錢解決到既問題，就唔係問題」﹖再講，佢有幾慘﹖被人斬傷，第一，隻手冇斷，佢唔係殘廢既、二，而家己經康復，只係唔拎得重野。理論上佢同一個普普通通既細路己經完全冇分別。但係就依然有咁多人捐錢。電視再次報道，微微煽動，大家就覺得佢「好慘」。捐到佢「生活唔成問題」。由此可証，香港人幾咁單純。

大家不妨上網check下，單計香港，有幾多單親家庭，幾多人無父無母，幾多人住板間房，幾多人食唔飽訓唔暖，幾多人傷殘，幾多人有缺陷，幾多人一日做十幾二十個鐘搵得o個幾千蚊，幾多人因傷失去工作能力。賢仔好慘﹖計慘，由倫敦排到o來佐敦，都未輪到佢。但係香港人唔理，人地一報出o來，左一句「好慘」，右一句「可憐」，然後個個母愛泛濫輪住安慰。咁大家就唔好問點解時下年輕人咁興自殺喇，係你地d做大人既思想單純，個細路話要乜你就俾佢乜，服侍周到，千依百順，三從四徳，廿四孝到可以起個牌坊o來表揚。咁心軟，你想d細路「埾強」﹖

條數咁計喎：斬傷一隻手臂捐四百萬，兩隻就八百萬，斬傷哂d手手腳腳一千六百萬，一個唔覺意落重左手隻手真係斬左落o來就一個double，四肢加埋最多總值三千二百萬。攞o來買滙豐食息夠過世啦，駛乜讀書打工捱世界﹖個仔唔做功課點算﹖唔駛氹唔駛鬧唔駛打更加唔駛除駛個仔d衫褲鞋襪要佢遊街既，抄一把牛肉刀，斬左佢隻手落o來啦，四百萬，咁就袋袋平安，好過阿老豆你打幾十年工呀。比我做個老豆，除左醫療費俾唔起要用捐款之外，其他一律唔要。人有錢就身痕，一朝暴富等同中六合彩，正所謂「賭仔冇發達」，d錢實唔留得耐，無謂縱壞個仔時又縱壞自己。

楊過得番一隻左手，抄起把玄鐵劍抱埋個小龍女就去片金輪法王。睇小說，唔係叫你學九陰真經玉女劍法，要學做人。一提起就心情低落﹖心情低落成年咁耐﹖我提起你心情仲低落呀，香港地平均打工仔一個月一萬蚊，你捱一刀值四百萬等於人地做四百個月。

正所謂捱一刀有輕如鴻毛，有重於泰山。不過家長們千祈唔好做傻事呀，寜願個仔窮，唔好教到個仔咁cheap。

蘇東坡說：「但願生兒愚且魯，無災無禍到公卿」