30 May 2008

狗跟熊貓

很多人看到四川災民跟熊貓在地震中的待遇差別,慨嘆做人,還不如做熊貓。還有很多人看見名人養著的貴婦狗竟然都穿金戴銀,住大屋,很羨慕,又感觸,做人還不如做狗。

你肯定﹖

正所謂「隔離飯香」,你睇人好,人睇你好,係考慮來生做一隻狗或者一隻熊貓之前,你應該仔細考慮以下的事項:

狗:

1. 你一出世,你的主人可能就會因為免卻麻煩,將你閹左。如果你自覺做太監係人生第一大愉快嘅事,咁我真係唔會阻止你去做狗。

2. 你以後無論幾有錢,日常食糧應該都只係狗糧,狗糧同埋狗糧。你開生日party嘅時候,食嘅唔再係生日蛋糕,而係生日狗糧,即係貴d,好味d嘅狗糧。但你要留意,呢d高級狗糧,全部係罐頭裝嘅。閣下如果真係咁羨慕做富豪隻狗,可以自己買下呢d狗糧唻食,日日幫自己開生日會,好唔好食我就唔知喇,但至少食你唔死,呢點我可以肯定。

3. 你以後再冇人生自由(或者狗生自由),你唔可以打電話番屋企同阿媽講「阿媽,我今晚同朋友出街食飯,唔駛等我」,因為你冇錢,你除左食你主人買番唻嘅狗糧之外根本毫無選擇,你甚至冇得揀今餐食邊隻狗糧。

4. 你再冇得享受溝女嘅樂趣。原因之一係因為養你嗰隻五十歲以上的暴龍睇見你同隻狗乸flirting,佢會呷醋,然後三日三夜唔俾飽飯你食。

5. 而且,你會發現你嘅生活其實好共產,共產到連配偶,都由政府分配。很可惜的是天下政府做事都是一塌湖塗,那個選狗女的通常都是盲的,總是把最醜的那隻分給自己。人類為甚麼總是分別不到漂亮的狗女跟醜樣的狗女呢﹖

6. 你會成日聽見一個幾十歲嘅八婆好嗲咁叫你做「仔仔」而自稱為「媽咪」,你會好奇怪,你以前做人嘅時候,son of a bitch呢個term乜唔係用唻鬧人嘅咩﹖

7. 你眼看著那個醜你一百倍嘅女人總是戴著GUCCI同LV,而天生麗質的自己卻衣不閉體,結了婚戒指也沒有一隻。當然,你亦永遠都唔可能擁有法拉利同埋陳法拉。

熊貓:

1. 比狗幸福的一點係,基本上所有生存緊嘅熊貓,都唔會有被閹的可能。再直接d講,一隻閹左嘅熊貓,對國家唻講毫無用處。但悲哀嘅係,做為熊貓,你嘅一生,無論吃喝拉睡,時時刻刻都要為國家服務,對國家效忠。其實比溫總胡總還要忙碌。

2. 無論你每天如何精神奕奕地上班,面對觀眾,大家都會繼續話你係「熊貓眼」,這令原本為了工作有好表現而一天睡八小時嘅你時刻感到沮喪。

3. 身為熊貓,你有交配繁殖的義務。於是三不五時,你就會被提到一個籠裏,和一隻雌性熊貓一起培養感情。這種生活想想就知有多累人,在不想做的時候被迫去做,跟做一個AV男優其實沒有分別,而且次次都要打真軍,可不像日本的色情電影那麼多把戲。想下輩子做熊貓的人,很有必要先去東瀛實習一下當男優的生活。

4. 可恨的是,熊貓女優可不像人類的那麼專業,經常東藏西躲,飯又識得照食,糧又照出,戲就唔照演。那麼飼養員也真是的,為甚麼每次都是要上演「純愛」的戲碼﹖下次搞一齣是拍強姦的,把那隻大熊貓五花八綁,老子樂得輕鬆交差嘛。

5. 更可恨的是,那幫飼養員書讀了一大堆卻都是書呆子,想出了甚麼拍熊貓AV給熊貓看來增進繁殖的屎橋,TMD,一個天天拍AV的人看AV還會有反應﹖希治閣睇恐怖片會唔會覺得驚丫﹖

6. 最可恨的是,那些AV千篇一律,一樣的場景,一樣的情節,用一樣的熊貓。喂,我幾鍾意夕樹舞子都好,睇一百次處女宮都唔可能有反應啦。

7. 但不要忘記,熊貓的那話兒,是螺旋型的,而不是像人類一樣是直直的,如何用螺旋型的XX順利做愛,是對智力跟體力的大考驗。論智力,閣下有人唔做想做熊貓,應該不會好到哪裏。但是你想只靠體力嘛,嗯......你先試試唔用螺絲批將一顆3CM長的螺絲釘打進牆裏再說。

---------------------------------------------------

睇到呢度,你仲想唔想做狗或者做熊貓﹖

想﹖好對唔住,閣下嘅智商連豬都不如,做狗同熊貓實在太抬舉閣下了。做好自己本份先諗點樣升LV啦。

28 May 2008

大過的價值

那位寫xanga的中一女生,被學校記了大過。

我一直認為,所謂「記過」,係全世界最不公平的事。因為你係學校被accused,你不受普通法保障,burden of proof永遠落在被告身上,你冇得請律師,你冇得係律師唔在場的時候保持緘默,冇陪審團,落口供的時候冇錄影,冇得上訴,冇得要求換法官,冇得要求引渡番屋企受審。最好笑係有教師會基於「有殺錯冇放過」嘅原則,將嫌疑人物一律處罰。正所謂「魔鬼誘惑世人之前都要熟讀聖經」,當年作為一個行為不檢的學生的我,當然有背誦校規的習慣,但我實在記不起手冊哪一頁有記載這條秦國的連坐之法。

然後當你升學,學校就睇住你呢張「覆歷」,判斷你以前的行為操守。我唔知呢個世界由幾時開始,俾做教師嘅有咁大權力。尤其係d訓導主任,佢一講唔過你就發橫,拳頭大過你個頭,做學生的,唯有一邊記住古有韓信受胯下之辱,大丈夫能屈能伸,然後就屈服係佢嘅淫威之下。

因為在網上幸災樂禍而記大過,小弟有疑問如下,想問問那位校長:

1. 我係網上嘅行為點解受校規約束﹖請問香港哪一條法例給與貴校這個權力﹖咁我係英國同個鬼仔打交俾一個同學見到,番到香港係咪都要記過﹖係英女皇定係Gordon Brown拜託過閣下﹖

2. 咁如果下次我見到邊個同學流蚊飯,我即刻表現得極度哀傷,瀟瀟雨歇,仰天長嘯,一面哭爹喊娘,繼而鎚胸頓足,阿校長你頹頹地係咪都應該俾番兩個小功我呢﹖

3. 人地笑四川災民,你又唔係四川災民,你有乜資格追究責任﹖我鬧緬甸軍國政府,胡錦濤都未會捉我去坐監丫,你間學校點解咁唔講道理﹖

4. 個女仔嘲笑災民係有問題,但關心熊貓其實亦值得褒獎。你識得因為佢笑災民記佢大過,點解唔表揚下佢關心熊貓嘅行為﹖係咪你覺得四川災民嘅生命就係生命,熊貓嘅生命就唔係生命﹖點解你身為校長咁唔尊重動物嘅生命﹖

5. 仲有,你唔好忘記,中國奧運五隻吉祥物中就有一隻係熊貓,中國十三億人口,一隻福娃代表緊至少二億五千萬嘅人民。救一個災民係救一個災民,救一隻熊貓,就等如救左二十五萬個人民(中國熊貓有一千隻)。乜話﹖唔可以咁計數﹖好,我問你,一個普通災民同一隻熊貓一齊俾舊大石壓住,d大陸救災隊會救邊個先丫﹖你同我記住,一隻熊貓拎去外國一年值七百萬,七百萬中國人走私去外國一日,人地就會用掃把趕,而且一蚊都唔會俾你。

那個「保良局董玉娣中學」的張家邦校長,冚家富貴,你係咪欠公眾一個合理的交代呢﹖

27 May 2008

又買書

中午飯後,路經三聯書店,雖然日前已有斬穫,但逛逛書店,總比回office無所事事說人是非為佳,遂入。

《我在伊朗長大》,這部幾個月前看了電影的書,一直覺得太貴捨不得買,今日發現三聯七折,二話不說就將四大本書抱回公司。同事都表示「唔知乜唻」,我很奇怪,公司係ifc,嗰陣ifc有上呢部戲架,你班友番工唔望下個戲院做乜架咩﹖

四本,$168,我開心得像出門口踢到舊金一樣。

原本仲想買多本易經導讀,但實在睇唔切,可以等下次減價再買。

26 May 2008

言論好自由

先有香港中一女生,後有大陸電車女,一起痛駡四川災民,引起輿論圍攻。

這是當然的事,因為這個世界絕大部分人,都只會同情災民,就算唔同情,至少不會落井下石。但結果這兩位女士,一個被迫寫悔過書,一個直接被公安找了去問話。大陸那邊咱們香港人管不著,但在香港,竟然會有人因為這種「政治取向不正確」而要公開道歉,寫悔過書,我不禁慨嘆,香港回歸十一年,跟祖國母親是越來越親近了。

寫悔過書這回事,從來只在大陸聽聞過,小弟實在是孤陋寡聞。然則大家經常掛在口邊的「言論自由」,在這「大是大非」的議題上,不知跑到西天哪一個角落遊埠去了。

所謂言論自由,不是指閣下罵四人幫的時候,可以自由選擇「漢奸」,「走狗」,或者「賣國賊」;又或者評論董特首的時候可以用「老懵董」,「白眉董」又或者「我挺董」。而是在諸如四川地震,納粹獨裁的重大問題上,你依然容得下少數的意見,你可以不認同,可以敬以中指,可以話佢質素低,甚至可以罵對方是豬,但你不可以用一支左輪指住人地個頭,要佢寫一封悔過書,表明關心四川同胞的心情,表明愛黨愛國的立場,站好了隊伍,要在中國最廣大的人民面前表態自己堅決擁護馬列毛思想,決志要持續不斷的進行階級鬥爭,打倒一切反黨反革命,反對修正主義和資本主義的腐朽思想。

而家文革呀﹖

你唔可以話佢講的是錯的就用「行政手段」要佢道歉。甚麼是「民主」﹖假如世界上真理只有一個,那麼在同一個議題上如果有超過一個意見,那麼至少其中一個是錯的(當然亦可能是兩個都錯),民主的出現,就是因為很多問題其實沒有所謂「對」與「錯」的分別,於是唯有用人數來解決,多數者勝,但這不代表少數的就是錯的。而假如世上的真理不只一個,你憑乜野斷定自己一定是對,而對方一定是錯呢﹖

請問呢個女仔幾多歲﹖識幾多野﹖做教師校長的首先想到的竟然不是循循善誘,慢慢教導她,而是要先保住學校的聲譽,絕不可以讓外界認為自己學校出了一個「敗類」,於是立即要佢寫悔過書。我實在很同情這個小女孩,因為我知道,中一寫悔過書,絕對唔係人生最愉快的經驗。

香港的民主派公民黨,這種平時口口聲聲話大陸箝制言論自由的人,請問有哪一個有站出來,維護一下這個剛升上中學的小女生呢﹖當然冇,因為站於政黨的立場,冇必要為左個三唔識七的女仔同全香港人作對,亦即同選民作對,因為這個女孩唔係叫王丹,柴玲,吾爾開希,李卓人,李柱銘,陳方安生,劉慧卿,梁家傑或者余若薇。

同人唔同命,事實証明所謂「普世價值觀」,只能套用於一少部分人的身上。

24 May 2008

雜記

朋友對於小弟在此博客關於宗教的言論,頗感不以為然。

我當然明白,直腸直肚會得罪人。子曰:「六十而耳順,七十從心所慾」,而我的朋友都是二十出頭的熱血青年,當然不能這樣要求,連我自己也不能。

但在自己博客說話還要左閃右避,跟做愛還要帶著安全套一樣,你想想就會知道這是一件多麼「冇癮」的事。

學黃子華咁講:「駛唔駛咁安全呀」。

--------------------------------------------------------

三聯又減價,先係春減,然後夏減,唔知會唔會仲有秋減同冬減。但小弟一於少理,又趁低吸納去也。買了兩本肥佬黎的著作,一新一舊,都是談創業的書藉,一來自己想創業而不得其法,二來就算最後創唔成,學學老闆的思維亦於君有益。

還看中一本叫《Competing in a flat world》,未及細閱,單見書名恐又是另一本老生常談,但見著者有馮國經及馮國綸博士,content一般不特別吸引,英文原版$266(Hard cover),中文繁體譯版$140(半Hard cover),我實在不知兩位教授如何解釋這個奇怪的經濟現象。

所以未買。

--------------------------------------------------------

四川地震至今13日,死亡人數過五萬,失踪約三萬,於此災情未定,災民屍骨未寒之際,大陸的輿論又開始歌功頌德起來,溫家寶大有機會成為第二個「人民的好總理」了。

過了13天,能救出活人己經機會渺茫,是開始清算豆腐渣和人渣的時候了吧﹖

23 May 2008

Cost Per Action

週三大佬標宣佈微軟發展live search cashback的計劃,提出cost per action的理念。

廣告的發展,最初的收費模式係唔理有冇人睇你個廣告,總之你登廣告,我就收錢。Google的cost per click更進一步,要有人對你嘅廣告有興趣,CLICK左入去先至收錢。cost per action則無異係呢段發展的終點,你因為賣廣告而賺到錢,我先至收錢。好多Wall Street嘅analyst唔睇好佢,當然,技術上有好多野要解決,尤其係你點樣知人地有冇做成單deal,點樣防止fake deal等等。但第二個唔敢包,MS咁鬼有錢,真係有乜問題會解決唔到﹖

呢個方法嘅好處,係將用戶的風險減到最低,於是可以將每個action的收費調高,profit margin可以好大,可以想像,MS如果掂左,GOOGLE一定跟。而且呢一著好聰明,跟住GOOGLE繼續做COST PER CLICK,人地己經食哂個MARKET,你根本唔夠佢打,唯一諗過另一個REVENUE MODEL,先至有著數(一如當初GOOGLE點打YAHOO一樣,又好似最近NINTENDO打贏SONY一樣)。一路以唻INTERNET嘅商業模式都係以CLICK RATE為準,呢個CPA的概念,無視CLICK RATE同人流量,嚴格唻講都可以算係一個突破,反樸歸真,同傳統中間人一樣,做成單DEAL先收佣。

另一個我咁BUY呢樣野嘅原因,係,我都有諗過呢條水囉。今舖Google冇反應至奇。

21 May 2008

考驗

緬甸風災,四川地震,於我心有戚戚,頓覺茫茫人間不知何物。

不知是否受心情影響,這幾天Ipod播來播去都是莫扎特的《Requiem》,對平日的摯愛《The marriage of Figaro》竟然完全提不起興趣。畢竟這種時勢,令我很難對喜劇有代入感。Introitus首段一沉一浮的音符,配上一前一後的步伐,瀟雨連綿,才是憂鬱心情的最好寫照。

但這種時候,還是會有中一女生寫xanga,仍會有人選播《Die Entführung aus dem Serail》或者唱《Halleluyah》,也會有人,認為從好的方面想,地震可以凝聚人心,諦造和諧社會,增強愛國教育,鞏固民族意識,係上天的考驗,等等。

古有百家爭鳴,閣下要說甚麼當然是閣下的自由,我就算想唔尊重都唔可以用泥封住你把口,但說來說去,又帶到了個天上,就有點兒問題。因為如果我係個天,我:

1. 根本唔係搞地震。
2. 就算地震,都唔會震四川呢個出名難出難入嘅地方。
3. 就算震四川,都唔會順便震壞哂d路。
4. 就算震爛d路,都唔會震爛咁多樓。
5. 就算震爛咁多樓,都唔會震學校。
6. 就算要震學校,都唔會揀番學時間去震。
7. 就算揀番學時間,都等d小朋友放lunch或者體育堂去哂操場先震。
8. 就算d學生全部係哂班房,都會搵d枱枱凳凳頂住d石屎等唔會壓親d小朋友。
9. 就算壓親小朋友,都唔會要佢地又要据手又要据腳先至出得番唻。
10.就算要個小朋友据斷隻腳先可以執番條命,都唔會等佢出番唻之後要有人同佢講:「小朋友,你爸爸媽媽己經過身喇」。
11. 就算我真係咁做,都唔會要我嘅信徒周圍同人講,「從好的方面想」,「凝聚人心」,「諦造和諧社會」,「增強愛國教育」,「鞏固民族意識」,最後還很有家教,數典不忘祖,說「這是上天的考驗」。

從好的方面想﹖等如d講股佬壞消息當好消息唱,如果你真金白銀買落去你唱好嗰隻股票度,我至少會敬你係一個言行一致嘅好漢。但如果今日,係香港地震,塌左嘅係你住緊幢樓,死嘅係你嘅父母子女,你可唔可以「從好的方面想」﹖

做人唔好得把口講,你即刻入四川,對住個得五歲,冇左隻腳,冇左老豆嘅小朋友,講「從好嘅方面諗」,「凝聚人心」,「增強民族意識」同埋「係上天俾我地嘅考驗」。你做得出,得,你好本事,就當我呢篇野係廢話。否則,就唔該,唔好再自我安慰,傷身呀。

19 May 2008

葛福臨

此文完於昨日,因區家閨秀壽辰,為免敗人清興,遂順延一日刊登。

數月前曾寫有關葛福臨佈道大會,瀝血數千字,後覺該文一旦刊出,徒增基督徒朋友心中憤慨之情,敵愾同仇之志,亦想在下人微言輕,所寫殊不足信,乃棄之深谷。

週六閱蘋果日報古德明先生《征服英語》專欄,見其談及葛之為人。想古先生博古通今,中外兼修,所言雖未必要奉為金科玉律,但亦甚有參考價值。原文節錄如下:

最近,美國葛培里佈道會會長葛福林牧師往訪新中國,稱明反對西藏百姓揭竿起義:「《聖經》明確指出,我們應遵守法律。我絕不會支持任何非法行為。」他似乎不知道rule of law和rule by law的分別,更似乎忘了《聖經.馬太福音》第十二章的故事:有一個安息日,耶穌走進堂,見到有人一手殘廢了。法利賽人認為安息日工作是違法的,就問耶穌:Is it lawful to heal on the Sabbath?(安息日治病,符合律法嗎?)耶穌回答:It is lawful to do good on the Sabbath(安息日行善,何違法之有)。說罷,就用大法力令那人的手復元。也許,葛福林不是沒讀過《聖經》,也不是不懂得of和by的分別,只是心有大欲,所以和許多牧師神父和尚尼姑一樣,只講中共法律,不分人間善惡。」

古先生言論是否正確,當由看倌自行判斷。吾轉載之謹作參考,未敢妄評。

18 May 2008

短歌行

青青子衿,悠悠我心。但為君故。沉吟至今。

我還記得,今天是區大小姐的生日。

凌晨時分,想發賀電,手中的電話按完號碼又delete,delete完又打,始終沒有發出dial的command。如此這般來來回回十分鐘,最後放棄。想不到我大好男兒,都有婆婆媽媽的時候。

繞樹三匝,何枝可依﹖

疊高了枕頭,驟覺憂從中來,不可斷絕。

何以解憂,唯有杜康。可惜家中半滴酒水都沒有。

月明星稀,夜就這麼過去。

16 May 2008

學琴

朋友提起八級鋼琴,有感而發。

現今的父母,喜歡讓子女學鋼琴。但如果教女,我建議,應該俾佢學小提琴,當然,其實仲可以有其他好多的選擇,但香港父母太過功利,冇得獨奏表演又或者太過偏門冇人識的樂器,父母們根本冇興趣。

鋼琴音色相對圓潤,幾激烈的樂曲,都難脫「柔」的感覺(我個人的感覺,所以我小時候唔鍾意聽鋼琴),表現的,是一種閒靜(首推Vladimir Horowitz的演奏,實在已經到波瀾不驚的境界)。小提琴音色較尖,每一個音符都有棱有角,表現的,係一種拉丁族群的躍動。這點,各有所好,也難說那一種較好,跟自己個女的性格配合就好。

個人喜好,都幾buy一d威風凜凜的女子(當然前提你個樣要襯),斯文恬靜唔係唔好,但問心,香港地有幾多個小龍女丫﹖

對女孩子來說,演小提琴得天獨厚有兩大優點:

1. 小提琴比鋼琴要求更大的體力,所以你只會見到有七八十歲老到冇牙的去奏鋼琴,但你從冇見過同一個阿伯仲要去演奏四季,我怕佢連骨頭都散。

女孩子,青春無敵,有機會當然想係演奏台上表現一下自己的年輕活力,肯下苦功的話,十幾廿歲可以登堂入室,但鋼琴就要日積月累,越老越辣,你幾有才華,廿歲出頭,都華唔過一個做得你阿爺的鋼琴家。但,到得你有咁上下功力,你都老喇,花樣年華,已隨流水去......

2. 女小提琴家去演奏,清一色一襲連身長裙,羅衣輕動,演奏時妸娜多姿,躍然於高台,男人照做,扭來扭去,只會俾人話佢發花癲。所以論可觀性,女性奏小提琴永遠高一籌,如果能夠再加上氣質樣貌,真係唔紅就奇。

拉小提琴,唯一要求係要夠高。唔高,著連身長裙唔好睇,你扭左腰彎左腳我都唔覺,咁你都係坐番係度彈鋼琴算數喇。

15 May 2008

才女

我後知後覺,到今日先知今年中大出左個超班的miss ccba。



評價:身材,欠奉。樣貌,一般,有點稚氣,可以加分。但普通的美女我唔會寫,我會寫佢的原因,係因為如果網上流傳佢的覆歷屬實:

1.會考十優
2.拔尖
3.DGS
4.讀global business
5.GPA 4.0
6.PE拎A
7.田徑隊
8.danso
9.有錢
10.基督徒

我唔覺得拔尖係一個selling point, 讀邊科可以係自己選,有錢唔係大哂,基督徒嚴格唻講我會認為係缺點多過係優點。雖然,I subjectively prone to believe佢唔會同一般嘅基督徒一般見識。

但除去呢四點不論,佢,己經完全打破左鄭小姐十幾年來係我心目中的形象。唔知佢會唔會好似鄭小姐咁對古典音樂有所鑽研,係,就真係perfect。

同埋我想同佢講:「你快點回去火星吧,地球是很危險的。」

震撼實在太大,謹贊文以記之。

14 May 2008

傘兵

當出動到傘兵來救災,大家就知四川災情有多嚴重。

做傘兵,是一件極危險的事,所以你很少聽到有人會用傘兵來救災的。那些還在埋怨「點解咁遲先派解放軍」的人,應該先補習軍事知識。

1. 地震區暴雨連綿,而且大風,閣下武藝超群,不如表演一下點樣係狂風暴雨下跳傘。再加上有行雷的危險,據我所知,傘兵應該沒有裝備避雷針。

2. 跳傘唔同碧咸射波,落點係邊唔係由你話事,所以唔可能直接係災區降落,因為民居密集,而跳傘降落時要用助跑減速,你一個唔覺意跌左係兩橦building中間,一撞埋牆,就一命嗚呼。又或者落左係d倒塌左的樓宇,d鋼筋石屎一支支插出唻,個傘兵一跳落去,衝力極大,即刻開膛而死。

所以落點一定要選平原,但四川乃谷地,平地少,就算有平地,因地形關係,容易積水,這才是最大問題。你平時落大雨見到水窪可以澗水過去,傘兵唔得,唔好睇小一個水窪,過膝的水窪足夠殺死一個傘兵。個傘兵降落係個水窪度,水阻力大,佢助跑唔到,一仆,就成個人訓落個水窪,上面成個降落傘蓋落,個傘一食住d水,任你幾大力都再頂唔番起個傘,於是你就浸死。

同埋唔該仲成日講「天遣論」的人小心,前事不亡後事之師,美國有個叫Jeremiah Wright的牧師講左句God damn America,結果令Obama一身蟻,而且你唔係牧師,有起事來唔可以賴係神的旨意,自己講野自己揹鍋,自是小心為上。況且紅軍根據地係陝西,首都係北京,辦公室係中南海,經濟特區係深圳同上海,行政特區係澳門同香港,我睇唔出有乜野原因個天遣要發生係四川。

唔妥共產黨一回事,乜野都賴個天就同香港的基督徒冇乜分別。再講,溫總七個鐘去到四川救災,你仲想佢點﹖

13 May 2008

地震見人心

四川地震,報紙說動物的預感能力驚人,早幾日就趨吉避凶,齊齊大遷徙去也。

跟咱們的奧運火矩手一樣。

地震過了廿四小時,好像還沒有一個火矩手跳出來公開表示自己要捐款,籌款,或者身體力行去振災,跟火矩手名單公佈後那廿四小時各方人士的敏捷反應相映成趣。

當日有份拎住支火矩的人,有邊個而家會挺身而出,說自己有份傳過聖火,而家要身體力行實踐愛國的精神,要去四川親自救助災民,而且會好似呼籲人地去支持聖火傳遞咁,呼籲其他火矩手同埋當時的觀眾一齊參與振災呢﹖還有那時夾道歡迎火矩手的觀眾們,現在當然不會再到處宣揚自己當日的愛國行為了。萬一被紅十字會或宣明會等慈善機構看上了,日日遊說自己捐款振災,就算力保荷包不失,煩都煩死。

証明人之為萬物之靈,不是毫無道理的。至少香港的青蛙老鼠,到今時今日,好像還是沒有反應,靜悄悄的繼續過著平靜的生活。

當然,佢地可以有好多藉口,例如要番工,例如唔應該將奧運同政治混為一談,例如話自己只係火矩手唔適宜干預我國內政,例如話自己老到要坐輪椅實在有心無力,例如話自己只係運動員/藝員/地方官員,自己遠水難救近火云云。

今時今日,國家正值危難之際,仲有人夠膽話自己有份傳過聖火,等如係日本中完兩粒原子彈之後話自己同東條英機私底下好老友一樣,撩交打咩﹖

11 May 2008

孝順的男人

唔知由幾時開始,女士們選男人,喜歡選孝順的。趁母親節,男人自然空群而出,一展孝道,誓要令天下女子因自己一時之孝而傾心。


女士們冷靜d,一個孝順的男人,看似好處多多,其實只係掩人耳目的煙霧,令你看不出背後的真相。更甚者,係你眼前呢個男人根本唔係孝順,只係從順,阿媽講乜佢就應乜之徒,嫁俾咁嘅人,真係三生有幸。


男怕入錯行,女怕嫁錯郎,身為女性的你,當然應該慎選男伴,以防中伏,殆誤終身幸福。
1. 男友母子關係良好,日後奶奶對自己都會好d。


個仔越孝順,個阿媽越覺得呢個係好仔,就算佢除左孝順之外一無是處。呢種阿媽一般有戀子情結,成日覺得個仔娶個咁嘅老婆係一朵鮮花插在牛糞上,蝕底哂,你做新抱嘅最好就同個仔一樣對奶奶孝順孝順,三從四德,如果唔係,你呢世人就係咁先喇。


唔好俾電視劇呃到你,d奶奶對新抱冇咁好死架,除非,你大肚啦。


2. 男友對奶奶好,自自然都會對外母好。


你要明白,一個男人同佢外母的關係,就等如大自然裏面老鼠同貓的關係。如果你真係佢地兩個係真心和好的,你應該先搵d老鼠同貓做下實驗,咁快做人體臨床實驗實在係好危險的事,亦都好唔人道。


你男友係孝順仔,理應會對外母遷就,但關係係雙方的,你男友肯讓步,唔等於令壽堂唔會得寸進尺。老鼠同貓的矛盾,關鍵都係係隻貓度,隻老鼠的角色,其實好被動架咋。


3. 男友孝順,佢第日教仔都會教個孝順仔丫。


你老闆對住老闆嘅時候笑到成個烚熟狗頭咁,唔等如佢d手下(即係你)都會對住佢笑到成個烚熟狗頭咁。更大可能係物極必反,你個仔睇你成日對住阿嫲冇哂尊嚴,心生蔑視,同你的關係仲差左。


4. 男友孝順,都會錫小朋友多d丫嘛。


同一個道理,你老闆對住老闆笑到烚熟狗頭咁,唔等於對住你都會笑到成個烚熟狗頭,層次唔同架。更大的可能係佢都會要求個仔好似佢咁孝順,如果撞正你個仔係反叛性格,咁,就有好戲睇咯。


當然,唔係要你特登揀個忤逆的,但孝順都要睇分寸,一個淨係識得聽阿媽話嘅男人會唔會識得幫個老婆爭取下權益呢個問題其實女士們應該心裏有數,如果唔係就唔會有「如果我同你阿媽一齊跌落水你會救邊個先」呢個咁睿智的問題。你應該揀嘅,係一個有d政治手腕的男人,識得平衡權力,左右逢源,唔俾任何一方勢力座大的,像卑斯麥一樣。


乜話﹖你想搵個偏幫老婆刻薄奶奶的男人﹖一個怕老婆的男人同一個怕阿媽的男人有乜分別呢﹖都係怕女人,一個怕女人的男人點樣養妻活兒我好懷疑,你想搵個咁嘅男人,証明你同佢結婚唔係因為你愛佢,你地追求的唔係一段平等的關係,而只係你想過下做老佛爺的癮。


咁我冇野好講喇,祝所有識得你嘅男人好運。

10 May 2008

公平

要立法保証公平競爭,原因當然是因為有人認為有不公平的競爭存在。

競爭是甚麼大家都很明白,但何謂公平,就實在是各有各的演繹。香港有好多人人讀書讀上腦,數學成績好,認為所謂公平,同秤天平一樣,總之大家一齊企上個天平度,稱到一模一樣,大家咁高咁大,就叫做公平。所以甘泉的老闆才會在公司停止營業後向傳媒說「被競爭對手打壓」等的說話。

呢個邏輯的問題係邊﹖問題係泰臣練拳練多你二十年,拳頭大過你個頭,手臂粗過你大脾係好自然的事,你上到台同佢打拳先話唔得呀,佢大蝦細呀,佢一鎚打過唻隨時勁過我打廿鎚呀,唔公平呀,然後叫政府插手:「你叫佢用一隻手指同我打就差唔多喇」。

當你覺得競爭對手用既有優勢打贏你的時候,你有冇曾幾何時諗過,人地的優勢係點得來的﹖天跌落唻﹖舊泥入面生出唻﹖人地都係用雙手爭番架。你企到上個擂台度先係咁同個裁判投訴對手拳頭太大手臂太粗,第一,冇人叫你唔知頭唔知路諗住胸懷滿腔熱血就衝上台同人決一死戰,係你自己冇做好資料搜集市場評估收支預算等等。第二,喂,人地都殺到埋身啦,你仲咁多野講咁多野投訴,不如諗下點打落去,或者早d投降算啦,仲細咩。

養兵千日用在一朝,有優勢梗係要盡用唻打擊對手啦,唔通仲要扶你一把,鼓勵你同佢搞對抗﹖如果你真係咁諗,我絕對有理由懷疑你係一個Masochist。你係變態嘅,我唔希望繼續同你交談。
你睇人踢波都知啦,點先算係一場最唔公平的球賽﹖唔係車路士用幾倍錢買人然後係球場上將你蹂躪,而係個球證買左波纜結果偏幫曼聯任得佢插水起飛腳。從來所謂的不公平,原因一定唔會來自參與者,而在監管的那條茂利身上。你而家搞公平競爭法,即係叫個買左對面波纜的球證同你主持公道。

咁同叫西門慶幫手保護你老婆仔女,守住佢地的貞操,有乜分別呢﹖

09 May 2008

陰謀報告

唔知大家最近有冇留意新聞,呢幾個月內,香港嘅報紙己經講左幾次同一樣野。

係乜野﹖

就係出左幾次同一個調查報告,個報告話俾廣大的香港市民知道,打工仔,最鍾意嘅,唔係加人工,而係俾老細讚佢well done。

我絕對有理由懷疑呢個報告係個陰謀。

因為大部分公司今年生意都冇上年咁好,但消費指數就不停上升,伙計加薪要求肯定只會高過上年。咁嘅時候,我俾你做老闆,你又唔想加好多人工,又想留人,你會點做﹖梗係出口術啦,因為唔駛錢丫嘛。

但讚得多,人工一蚊都唔加始終都唔係辦法,咁當然要諗諗計,催眠下手下的員工,令佢地覺得俾老細讚一句好過人工加十萬,Paul Goebbels講過,一個大話講一百次,就會變成真話。如此這般,就有左呢d咁嘅所謂調查報告。

但你問我有冇效,我將心比己,會覺得冇。你只要諗下,你讚令壽堂一句靚女,母親節可唔可以唔送禮物丫﹖唔得丫嘛,最多佢收禮物嗰陣開心d嘅啫,咁你做老闆嘅,就更加唔應該存呢d僥倖心理,諗住慳嗰一個幾毫先得架。讚賞呢d野要日子有功,唔係你咁樣煲一煲d新聞就可以解決的問題。

拿,各位打工的不妨留意下,你老細最近有冇讚多左你喇,有,咁恭喜你,你老細今年應該係唔多願意加你人工。保重。

08 May 2008

第三個紅人

北京奧運,先紅了一個金晶,然後紅了個王千源,最近又多了個陳巧文。司徒華看在眼裏,不知會否有一丁點兒英雄遲暮的慨嘆。

對於這位陳女士,你問我,她學問見識雖不見得,但膽色過人,不讓蘇眉,加上身材豐滿樣貌娟好,這種女子在下非常願意結交結交。所以講起「起底」,我會覺得,女人,應該只係妒忌,男人去起佢底,我會話呢條友正一豬頭,雖然嚴格來說,你都算係一個對香港人幾有貢獻的豬頭。

唔妥佢起佢底嘅,應該都係一d愛國人士,我假設。咁我想請問呢d愛國人士一個問題:係今時今日咱們偉大的祖國一路高唱「政治同奧運唔好掛勾」的腔調的時候,你將一個人的政見同佢的私生活掛勾,我就真係好想問你一句,你咁樣永無止境咁同國家的政策方向唱反調,「你係咪中國人」唻架﹖雖然,國家的口號廢尤自可,有時自打咀巴又真係唔抵幫,例如那句「同一個天空,同一個夢想」。我成日諗,天空冇錯係同一個,但講到夢想嘛,你中共想「西藏自古係中國的一部分」,但班藏民話唔係,你地點樣同一個夢想﹖又何如我國成日口口聲聲話要和平崛起,但美國好明顯想延續帝國主義式霸權。即係你點樣同一個夢想呢﹖我真係幾有興趣想知道下。

陳小姐的私生活質素,同佢政見的正確性似乎冇乜真接關係,企圖針對佢的私生活而評擊佢政見的人,等如d利用藏獨問題質疑北京成功主辦奧運的能力的人一樣,講來講去,你地都係一家人嘛,駛乜大家鬧來鬧去咁鬼麻煩丫。

政治智慧,冇,可以學,但其實我覺得唔學都唔緊要,呢個世界,能力同紅的程度,其實又係冇乜直接關係的。事實証明,你係一個政治白痴,唔等於你唔會高票當選做議員;twins都係唱歌的白痴,但你不得不承認某程度上佢兩位算係成功的。其實,我覺得俾人知道你鍾意蒲其實冇乜問題,呢個世界去蒲係唔犯法的,你又唔係五十幾歲的高官,唔駛成日自我審查,著衫著到好似中環d OL咁樣黑色一舊舊仲要拿口拿面好似去送殯咁。Come on,後生細女,show下d活力出來,好正常丫,佢唔show quali,你邊有野睇呀。

做人老實d,你係男人唻,就咪咁假,你望住佢d辣身相,唔會突然間孔夫子上身即刻阿彌陀佛四大皆空的,係咪﹖

05 May 2008

紙上談兵之家變篇

週日於網路閒逛,偶見友人面對家庭糾紛手足無措有感。

假若令尊跟令壽堂吵大鑊,做為子女的你,正所謂手心又肉手背又肉,可以點做﹖這跟女人愛問的那條「我同你阿媽跌左落水你救邊個﹖」的問題一樣,有時還真是令人為難。可恨的是,你條女同你阿媽同時跌落水的機會實在不大,而你會游水的機會更加微乎其微。但兩老爭執糾紛,就實在多過你屋企的曱甴。想置之不理而不得,實在不勝其煩。

當然,如果你可以好似我咁聰明,第二條問題根本難唔到你嘅時候,第一條問題,當然亦唔例如。想天下至理殊途同歸,齊家,跟平天下,道理其實一樣。總體來說,策略如下:

1. 分則力弱,合則力強,你想兵分兩路將兩老一起解決,唔係唔得,如果你自問身具安邦定國之材。但如果有,我勸你與其浪費時間在這種soap opera的是非問題上(你老豆同老母鬧交,通常都唔會係d好有意義的議題,最多嘅係錢,錢同埋錢。唔係話錢唔重要,但佢地嘈親都只會為左嗰一百幾十),不如考慮參選英國首相,或者美國總統,又可以考慮下做國家主席同埋總理,無謂浪費閣下大好才華。

根據希特拉的經驗,開闢兩邊戰線的行為實在與自殺無異,閣下咁做之前,最好先買定份人壽,受益人寫我。

2. 當然,若要量力而為,應當幫一個打另一個,選擇的priority可以根據自己的個人喜好,但其實我唔建議閣下咁做,自古成大事者都有大義滅親(即係大利滅親的意思)的本領,棄個人喜惡於不顧,美其名為「大局為重」者。

所以重點係要幫勢弱的一方。幫強的一方你最後只會俾對方吞埋,但幫弱的一方,你在旁吶喊助威,必要時適量助戰(少少好喇,咪搏老命),來個漁人得利,讓兩人拼老命鬥下去,自己大撈油水,豈不快哉!

你覺得太冇道德﹖這就叫做婦人之仁,曹操唔打孫權就自然會去打劉備,唔通你期望佢會自己左手打右手﹖冇可能的,你老豆同老母一得閒唔互鬧,就會係你身上雞蛋裏面挑骨頭,話你間房唔執張枱咁亂,狗住間房都整齊過你等等,與其自己俾人煩,不如等佢地兩個自己打個飽,消耗元氣,冇氣冇力自然唔會再煩住你。

兩老叫你評理點算﹖你應該表示中立,自稱人微言輕,見識不足,實在不應該在父母的爭執中多提意見云云,總之太極推手渾圓一體,無跡無痕,四兩撥千斤,一d都唔帶上身就係。

真係到時要做和事老都易d丫嘛,想擺和頭酒都要睇實力丫,正如你有冇本事勸掂胡錦濤同達賴喇嘛唔好鬧交丫﹖唔得丫嘛,咪係囉。

3. 你嫌煩,唔想佢地繼續嘈落去,都唔係冇辦法,但秦滅六國,一係你滅人,一係人滅你,你唔係以為秦始皇打完楚國仲會同齊國做朋友吓話。

所以,你應該學學明太祖「高築牆,廣積糧,緩稱王」的策略,先慢慢積存實力,然後逐一擊破。但記著用兵之法,十則圍之,五則攻之,倍則分之,未明敵我形勢者,切忌輕舉妄動,記緊上兵伐謀,其次伐交,其次伐兵,其下攻城,如非必要,千祈唔好硬碰硬,亂咁宣戰加作戰團,兩敗俱傷都係其次,你傷佢唔傷的話,到時我只好幫你祈禱。

記住,對敵人仁慈就係對自己殘忍,心慈手軟,自古取亡之道。祝好運。

04 May 2008

奧林聖火令

星期五,香港聖火傳遞之日,早上下著小雨。


公司規矩逢星期五便服日,只要穿有領的衣服便可,於是隨手在衣櫥中拿了一件恤衫(izzue出品),披在身上出門。走到半路才醒起,今日特殊日子,再望望自己的衣服,心中叫了一聲「仆街喇」,紅色的,真是該死!我這不是變成言行不一的政客了嗎﹖真係水洗都唔清,幸好同事們都沒有看我的blog,不然一定會被恥笑。


然後在中環康樂廣場中走著走著,看著微小的雨,忽然想起,如果傳火的時候仍然下雨,那個名字中有三個雨字的仁兄不知會有何感想。一邊走,一邊想像他到時的表情,結果陰陰嘴的笑了一個上午,直到雨停了為止(上帝真係冇d幽默感)。這小子真有運,如果昨天是黑雨,我肯定會有一大堆人走出來話佢「陀衰家」,你信唔信﹖


真係到時就好戲咯。唉......


奧林聖火FAQ:


Q: 點解曾憲梓坐住輪椅都仲要霸住個位﹖

A: 第一,閣下唔應該歧視殘疾人士,邊個話坐輪椅的唔可以傳聖火﹖你都唔明阿曾生諗乜,人地想學金晶丫嘛,點知香港人咁唔合作,D警察又唔識做放下水,搞到一個搶火矩的人都冇,唉,都冇鬼用嘅。

唔係佢駛乜一路傳一路叫加油丫﹖你見過有人一路同人賽跑緊一路同D啦啦隊講「加油」未﹖


Q: 點解有成十萬人支持咁多﹖

A: 其實我覺得很平常,香港人一向好奇,貪新鮮,火矩今次在香港傳完不知要等到何年何月何日再有機會,當然是先睹為快。如果有日阿曾生係皇后大道度裸跑,就算你係個男人(雖然女人都應該唔多會有興趣),都會想睇下到底發生左乜野事。

至於話有很多人揮動國旗唱頌國歌,即係我成日覺得,你去得聽演唱會頹頹地都會買番支螢光捧掛,全場齋坐,唔叫,機會微d啦。有十萬人叫即係好多人好支持﹖咁又係呀,如果政府向每個旁觀人士收番幾舊水入場費的話。


Q: 點解運動員冇得跑,演員同政客有得跑﹖

A: 即係好簡單,你睇下李麗珊出場多人叫d,定劉華同陳奕迅出場多人叫d,就明點解運動員冇得跑演員有得跑啦。真係你估政府係傻仔﹖佢都要同阿公交數丫。meet唔到quota,小心曾生俾人炒魷魚呀。打阿爺份工你估易呀﹖

至於政客點解跑﹖你不如問下紅衛兵去抄家點解你跟埋去﹖你D港英餘孽出身已經唔好,你唔去,就會俾人話同反革命同一陣線,你係咪想俾人抄埋一份﹖中國人嘛,最緊要係站對了隊伍,表明愛戴毛主席的心跡。唔去﹖用乜易俾人話你懷有不可告人的目的呀﹖你知啦,香港咁多保皇黨。本身係紅衛兵的,就更加冇可能唔去抄埋一份啦,咁好的娛樂。


Q: 點解要搵十個差佬圍一個女人﹖

A: 咁因為一個差佬圍唔住佢丫嘛,當差嘅啫,學堂應該冇教過草上飛架啵。

咁點解要圍佢﹖喂!男人點解要圍女人你仲要問,你有冇多餘D呀﹖烏蠅點解要嬲蜜糖呀﹖因為佢係藏獨分子﹖朋友,你多慮喇,消防員都鍾意同架反左嘅車影相啦,圍條女你都諗咁多野,你不如去寫小說啦。


Q: 咁陳巧文女士的事件你又點解釋呢﹖

A: 唉,你著住件曼聯波衫走入去車路士個球場,我做「實Q」都叫你走啦,你支持藏獨都唔駛搵條命搏丫小姐。留得青春在,哪怕冇人要﹖傳緊聖火搞出人命,因住鄧竟成俾人改名做鄧東菇呀。


Q: 點解民主派o個日冇哂聲氣﹖

A: 呢樣就要讚政府聰明喇,揀個working day先傳。你諗下,如果揀個weekend,個個打工仔唔駛番工,民主派搞遊行你估會有幾多人參加﹖但而家唔同呀,揀個working day,即係我唔係唔支持民主呀,問題我都要支持住我個飯碗先丫。相反,你睇下去做啦啦隊o個班,有邊個個樣似係要番工架﹖連跑o個d一睇個樣都知係奉旨嗰日唔駛做架啦,唔係點會個個跑得咁輕盈一路跑一路揮手,仲要笑口常開咁﹖你番工放工有冇試過咁開心丫﹖


Q: 點解唔俾人掠衫﹖

A: 你知啦,而家D後生仔著D T恤真係乜鬼圖案都有架嘛,陣間唔知邊件衫上面印左「共產黨」,另外一件印住「大檸樂」,又或者一件印住座雪山,下面嗰件印住隻獅子。俾記者影到,仲得了嘅﹖


希望呢個FAQ解答到大家的疑惑,還有問題的話,請不吝賜教。請呀!

01 May 2008

如何愛國

「為甚麼唱歌的和從政的有得傳火矩而咁多運動員冇」這個問題,跟「點解我老細會係我老細而我唔係我老細個老細」一樣,全港幾百萬打工仔問左幾百萬年都冇答案的問題,你去問,勇氣可嘉,但我唔係一個多餘的人,當然唔會做多餘的事。

其實我覺得冇乜野唔妥,當有人一邊說「唔好將奧運同政治混為一談」一邊派一大堆政治人物去傳火矩,我覺得幾好,香港人一向最缺乏的就係幽默感,尤其係呢種黑色幽默,呢次就係一次學習的好機會。

而且,d運動員肯定唔夠我地的土產共產黨員同埋政府高官咁愛國,點可以擔當傳送聖火的重任呀﹖計我話應該唔准運動員跑,然後對呢d運動員從新進行思想建設,實施愛國愛黨的教育,要背默國歌,要朗誦黨訓。三大紀律八項注意佢地識唔識﹖八榮八恥佢地識唔識﹖三個代表論佢地又識唔識﹖全部唔識,你憑乜野拎住把火矩呀先生﹖

話說回頭,新聞報道有擦鞋校長打算明日帶隊去觀看聖火的傳遞,說要加強對學生的「愛國教育」。選去沙田,原因係「嗰度唔係熱門的示威地點」,冇咁危險。

我不知他到底想教他的學生愛哪一個國家。

我國辦奧運與眾不同的地方,正正就係有特別多的示威,你帶班學生去睇一個冇示威的聖火傳送活動,同睇其他的冇分別,咁你點樣令佢地愛國﹖你要帶,應該要帶佢地睇「有社會主義特色的聖火傳送」,正如教經濟,也要教「有社會主義特色的市場經濟」。傳火矩一樣,一定要睇有示威的,要有人擲水彈,燒汽車,然後看著穿藍衣的衛士們跟火矩手(這個火矩手當然不可以是運動員,佢地又唔係共產黨嘅,冇資格做愛國的革命分子)一起「冒著敵人的炮火,前進,前進,前進進」,唔係,而家高官成日話香港太平盛世,學生又點樣身同感受「中華民族到了最危險的時候」呢﹖

怕危險﹖你做為校長,應該教導你的學生,愛國,是要付出代價的,而唔係攤大手板問國家攞著數的,你咁樣,唔係教學生愛國,只係教學生做人大常委,中共委員同埋政府高官。你應該教導你嘅學生,愛國,就係當那個姓曾的共產黨員傳緊聖火的時候俾人擲手榴彈,要「把我們的血肉築成我們新的長城」,抵禦藏獨分子,擋住示威的反革命,要保護住「中國共產黨最親密的朋友」,跟從毛主席的教導,「要到大風大浪中去」,要自告奮勇去最危險的地方,而唔係去和平的沙田駐紮。

所以,呢間小學的學生們,你地都係毛主席的好兒女,革命先烈的接班人,發出你地最後的哮聲,唔好理你地嗰個受資本主義荼毒左幾十年,回歸之後先至轉軚的校長,唔好去沙田,應該去中環,起來,不願做奴隸的學生們。

嗱,咪話哥哥唔提點你呀,愛國唔等如阻住地球轉呀小朋友,唔好lunch time去呀,我約左人食飯呀聽日。