美女廚房

身為一個自由經濟主義者，我認為，假如閣下不喜歡看美女廚房，大可以轉台，或者關掉電視機，以示抗議。只是一個普通電視節目，沒必要小提大做，又走去廣管局投訴的。

比如說我，自第一輯開始，就一集都沒有看過。但你唔鍾意睇，唔代表你就要去投訴然後唔俾其他人睇，很簡單的邏輯問題。

至於說女明星著低胸裝煮飯賣弄姿色：

第一，聽故不要駁故，不要一面看一面問「哎呀，著咁少怕唔怕滾油辣親呀﹖」，吳剛師父飲滾油幫東華三院籌款時不見閣下這麼緊張，你怎麼知道該位女藝人不是晚晚滴蠟訓練有素﹖人家的搵食本錢，她比你更加緊張，你像一大班八婆一樣在旁邊指手劃腳幹甚麼﹖

第二，煮飯很熱，錄影廠又咁多大光燈射住，煮起野上唻大大冷氣都唔夠，明星上鏡又要化粧，不穿少一點幫助散熱，陣間煮下煮下滿頭大汗要抹又會抹走個粧，唔抹又污糟兼周身痕，又唔係拍av要咁多汗唻做乜﹖這是很簡單的道理，這都不懂的人，肯定十年不入一次廚房。

又或者，未試過化粧再入廚房。人一世物一世，搵次試下啦，好好玩架，包你越著越少。

第三，係街d女人著到密密實實你話人地係港女扮矜貴，而家著少d益下街坊你又話教壞細路，不如你講埋佢啦。就係呢班咁嘅人，遲d可能香港d女人要好似塔利班咁要黑巾蒙頭架喇。

所以，係呀，我係贊成女仔唔好著咁多衫架，香港咁鬼熱，著咁多做乜﹖

第四，講過十萬次，教仔係做父母的責任，唔係教師/電視台/政府的共同責任，冇本事教唔好生，無謂生舊叉燒出唻獻世。

點解我唔睇，理由很簡單，一個女人走入廚房，單看表情，就可以知道她的入廚經驗。你試試問問你媽，入廚是一件快樂的事嗎﹖然後你看那些女明星一個個煮飯的時候笑語盈盈，你就可以大約猜到食物的質素。所以不用想都知道節目的宗旨就是給大家看明星們吃了屎的表情。人生苦短，值得花時間做的事情很多，例如溝女；這些無謂節目就無謂花時間看了。

美女廚房，除了廚房之外，就剩下美女，但很抱歉，小弟對tvb的女明星，除了一個陳法拉，就沒有第二個覺得特別好看。

所以睇乜鬼美女廚房丫，得閒努力d，洗脫港男的恥辱，溝番條女，然後同美女開房好過啦。