30 November 2006

蘇丹紅,孔雀綠。現今大陸出品一律添加改造,整色整水,應盡了劉基「金玉其外,敗絮其中」的寓言。

然後漁業商會理所當然的反撃,左一句「抽驗方法唔科學」,右一句「環境污染」,中間一句「食水都有禁藥」,再塔多句「走私魚問題嚴重」。諸多理由,其實重點都係下一句:「唔關我事」。中國為官之道,盡在「推諉卸責」四字,想不到現今連養魚既都深得此道。更說淡水魚可銷至日本澳洲等地,利潤亦相當可觀。然則現今d魚不面向國際,只銷香港,實在係虧本經營,「蝕到入肉」既行為。廣東漁商如此愛國,精神實在可嘉。

香港政府抽験魚類,由魚塘抽到街市,抽足成個workflow,一律驗出有孔雀石綠。如此方法本人覺得好科學,你反而話人咁様做唔科學,話係工序污染。好,你咁實牙實齒話係工序出問題,咁請話俾我知,邊個工序會幫d魚加孔雀石綠。

何玉賢今日出o來解畫,話d魚可能真係環境污染先有孔雀石綠,呢句話順水推丹,連消帶打,真係可圈可點。冇錯,就算真係環境污染,咁又點﹖都係關你地養魚既事。你個漁塘俾人落左十斤山埃,砒霜,釙毒(個前俄羅斯特工中左o個隻),都算係環境污染。你明知有環境污染,但係乜都唔做,魚就照賣,錢就照收,仲可以大大聲聲話「唔關我事」,呢d係乜野邏輯。咁既話你不如係核電廠隔離起個漁場丫,d魚中哂輻射,畸哂型,你都可以照話環境污染,唔關我事,有乜野事閣下唔該搵核電廠傾啦。

走私魚問題嚴重﹖你又知人地驗o個d係走私魚﹖再講,走私魚係邊度o來﹖咪又係漁場出既。既然係環境污染,走私魚場有,點解你就會冇﹖你做左乜野措施改善環境污染﹖冇。咁點解走私魚有毒,你o個d就冇。

韓國爆發禽流感,殺鳥百萬,官員為左鼓勵市民食雞,成班官員拉大隊叫記者睇住佢地食雞餐。恢復香港人食魚既信心﹖唔駛等香港政府做野既。既然你話自來水都有毒,你魚塘水都有毒,咁就簡單啦。嗱,以後所有養魚既人一律唔用自來水,改用自家魚塘水。沖涼、煮飯、洗衫、飲用等,一律改用魚塘水,同d魚「同生死,共存亡」,身體力行,實行鄧小平:「實踐是檢驗真理的唯一標準」的宗旨,事實勝於雄辯,如此則謠言止於智者矣。香港市民眼見閣下日日用孔雀石綠水,流孔雀石綠血,身子益發壯健,精神焕發,百歲之壽可期,肯定人人踴躍購買,而且非註明「含孔雀石綠」不買。更不用將魚銷往外地,淪為漢奸,繼續擁抱祖國,愛港愛國。

只希望他日閣下豬「龍」入水之時,記得小弟今日的一番提點,小弟己經感激萬分。

27 November 2006

My Xanga:
www.xanga.com/chhung3