和記斷線寛頻(2)

睇左兩次我鬧和記有d悶﹖今日寫d對話俾大家：

事源由九月初開始敝家中寬頻不停斷線修理四次不果，結果他們說要拉多條線入屋，但要等到十月九號，我覺得忍無可忍，於是要求解約：

和：「睇番其他嘅網絡服務公司都會有斷線嘅情況架...」
我：「其他網絡公司會斷線斷個半月﹖你試下講多次﹖」

和：「先生，我地而家可以即刻安排番師傅聽日上門幫你再維修，睇下係咪可以係十月九號之前就可以為你解決問題」
我：「咁即係你到而家呢個時候，維修左四次都仲未知個問題所在啦﹖」
和：「咁我地都需要師傅上唻睇番個情況...」
我：「如果你係個醫生，同個病人開四次刀都未知佢係乜野病，你估下你有乜野後果丫拿﹖」


和：「先生，根據合約，如果你要解約係需要賠償餘下的月費。」
我：「你浪費我嘅時間，唻解決你嘅系統問題，你地話冇辦法兩星期內解決，我唔為難你，我要求解約，好簡單，你地又唔肯。喂，先生，你到底係客戶關係組丫，定係破壞客戶關係組呢﹖」

我：「好，咁你話我知如果十月九號都搞唔掂嘅，你地有乜野plan﹖」
和：「咁我地當然要睇番師傅嘅維修情況...」
我：「即係我要繼續做你地嘅白老鼠啦！你俾呢個理由，係可以拖我成年架你知唔知﹖次次整唔好就我搵個師傅同你了解番啦！一路拖落去，我要求解約唔再拖，你就話哎呀唔好意思如果解約你要貼月費」

和：「先生，上次同事都解釋過係因為我地要租線入屋所以要等到十月九號(網絡由九月一號開始不停斷線，維修四次不果後的結論)先可以為你上門維修...」
我：「我訂一百萬貨，你俾得八十五萬我，然後你話我知你架貨輪沉左呀，關我乜事呀﹖你咪叫保險賠俾你囉！你搵我唻較非﹖你好困難唔係問題呀，你做唔到丫嘛，我唔為難你架，我而家要求解約，咁你咪解脫囉」

和：「先生，我地可以計番，係有問題嘅呢段時間內，我地係唔會收取閣下嘅月費嘅。」
我：「阿生，我買一個橙，半個係爛嘅，你話唔好意思呀我計番唔你嗰半個橙錢丫，大佬，你而家爛左嗰半個食疴左我丫嘛！」