「為甚麼唱歌的和從政的有得傳火矩而咁多運動員冇」這個問題,跟「點解我老細會係我老細而我唔係我老細個老細」一樣,全港幾百萬打工仔問左幾百萬年都冇答案的問題,你去問,勇氣可嘉,但我唔係一個多餘的人,當然唔會做多餘的事。
其實我覺得冇乜野唔妥,當有人一邊說「唔好將奧運同政治混為一談」一邊派一大堆政治人物去傳火矩,我覺得幾好,香港人一向最缺乏的就係幽默感,尤其係呢種黑色幽默,呢次就係一次學習的好機會。
而且,d運動員肯定唔夠我地的土產共產黨員同埋政府高官咁愛國,點可以擔當傳送聖火的重任呀﹖計我話應該唔准運動員跑,然後對呢d運動員從新進行思想建設,實施愛國愛黨的教育,要背默國歌,要朗誦黨訓。三大紀律八項注意佢地識唔識﹖八榮八恥佢地識唔識﹖三個代表論佢地又識唔識﹖全部唔識,你憑乜野拎住把火矩呀先生﹖
話說回頭,新聞報道有擦鞋校長打算明日帶隊去觀看聖火的傳遞,說要加強對學生的「愛國教育」。選去沙田,原因係「嗰度唔係熱門的示威地點」,冇咁危險。
我不知他到底想教他的學生愛哪一個國家。
我國辦奧運與眾不同的地方,正正就係有特別多的示威,你帶班學生去睇一個冇示威的聖火傳送活動,同睇其他的冇分別,咁你點樣令佢地愛國﹖你要帶,應該要帶佢地睇「有社會主義特色的聖火傳送」,正如教經濟,也要教「有社會主義特色的市場經濟」。傳火矩一樣,一定要睇有示威的,要有人擲水彈,燒汽車,然後看著穿藍衣的衛士們跟火矩手(這個火矩手當然不可以是運動員,佢地又唔係共產黨嘅,冇資格做愛國的革命分子)一起「冒著敵人的炮火,前進,前進,前進進」,唔係,而家高官成日話香港太平盛世,學生又點樣身同感受「中華民族到了最危險的時候」呢﹖
怕危險﹖你做為校長,應該教導你的學生,愛國,是要付出代價的,而唔係攤大手板問國家攞著數的,你咁樣,唔係教學生愛國,只係教學生做人大常委,中共委員同埋政府高官。你應該教導你嘅學生,愛國,就係當那個姓曾的共產黨員傳緊聖火的時候俾人擲手榴彈,要「把我們的血肉築成我們新的長城」,抵禦藏獨分子,擋住示威的反革命,要保護住「中國共產黨最親密的朋友」,跟從毛主席的教導,「要到大風大浪中去」,要自告奮勇去最危險的地方,而唔係去和平的沙田駐紮。
所以,呢間小學的學生們,你地都係毛主席的好兒女,革命先烈的接班人,發出你地最後的哮聲,唔好理你地嗰個受資本主義荼毒左幾十年,回歸之後先至轉軚的校長,唔好去沙田,應該去中環,起來,不願做奴隸的學生們。
嗱,咪話哥哥唔提點你呀,愛國唔等如阻住地球轉呀小朋友,唔好lunch time去呀,我約左人食飯呀聽日。
e+ 既校長, 有幾多係明白愛國係乜 ?大概, 佢地連中國是什麼也搞不清.佢地突既, 只係如何愛一個政權, 聽聽話話就算了。至於中國是一個地域既概念、文化既概念(漢文化?)、歷史既概念、民族既概念(中華民族的概念出於清未立憲期間)? 大概不必深究, 亦不想深究。
ReplyDelete早前和朋友入中學搞一個通識pilot project, 原本目的係想培養學氐既獨立思考能力。搞搞下, 大家忽然發現, e+既教育政策原來唔鼓勵呢樣野。即係無論搞得幾好, 呢個project都會被人閹左。
btw, 明天睇奧運既人, 真係唔好阻住曬。我, 又係約左人在tst lunch, 仲要係靚女tim~~~~
講得冇錯呀,寫得唔錯呀。=D
ReplyDelete篤篤篤撐:
ReplyDeletepilot project即係乜﹖我實在是孤陋寡聞......
不過校長也有他的政治考慮,對教育署要表明心跡嘛,做為一個中國人,最緊要是站對了隊伍。
snowysoso:
多謝~~~
DEREK
ReplyDeletePILOT PRoJECT 係乜我都唔知, 因為我打錯字, 多手打左pilot...kakakakka