番左七個月工，我總算明白，點解而家做老細既會覺得香港人英文水準低落。

話說小弟收到一封formal既email入面(今次唔係我老細，係vendor既作品)，竟然有咁樣既一句：Please advice.

震撼程度比台灣大地震更甚(反正o個日我乜都feel唔到)。而呢位仁兄係負責同敝公司提供GIS system上既technical solution同埋一般consultation既。呢d算唔算係蜀中無大將﹖我亦終於明白點解明明你份工係唔關英文事，但個個老細都鍾意睇你既英文水平。當你連咁白痴既grammatical mistake都可以犯既時候，我點信你有料到呀哥哥﹖

又講下個地震。

比起兩年前地震引發既南亞海嘯，今次死兩個，算係不幸中之大幸喇。嗯......咁樣講好似有d冷血，唯有希望小朋友大個生生性性啦。

至於中港台三地既人嘛，當然擔心既就唔會係小朋友快高長大呢d咁長遠既事。呢幾日冇網上，d人仲慘過牙痛咁。有大陸白痴網民竟然問冇網上，日子點過。

呢條問題問得好。閣下可以先問下係國內偏僻山區一日行幾個鐘番學放學然後要點蠟燭做照明o來做功課既小朋友，佢地既日子係點過既。

年前紐約公共交通大罷工，包括市長彭博在內，全市市民要步行番工。日子點過﹖冇車塔，咪行路番工囉。冇網上，咪唔好成q日對住部電腦囉。你話你係d大公司主管一日幾百萬上落我同情你，不過睇你咁得閒上得forum留言表示你都係閒人一個o者，邊有資格問d咁既問題﹖同「何不食肉糜」的問題一樣，只表示出問問題既人愚昧無知。

冇網上做乜好﹖拿拿臨打個電話約女朋友出o來先再諗做乜啦！