風度和八婆

身為一個男人，傾向相信，如果你唔想命犯天煞孤星，對女士，應該具備最起碼的風度。最起碼就夠喇，今時今日，紳士實在唔係隨街可以搵到的動物。

但「最起碼的風度」，即是甚麼﹖那就是，不要跟女士斤斤計較。

這不是甚麼大男人主義之下的產物，只係我，好明白女士面對每月一次的苦楚。其實都唔難想像，男士們只要諗下，如果閣下每個月會有一星期會唻月經，於是大熱天時閣下要帶上男性衞生巾，還有經痛，你就大約會知道那是一件多麼令人困擾的事。我認為，女性的一點點脾氣係必然的，而男人應該容忍。比著係個男人，咁樣搞法，早就反哂枱啦，邊會只係發下少少脾氣﹖

但當然，再有風度的男士，都會有對女士發long黎的時候，最常見的情況係以下兩個：

1. 那個對女士來說係好小的問題，對男人來說，不是。其中最常見的係面子問題。女士覺得面子事小，男士卻看得比天還大。如果你問「如果要你冇哂面先上到天堂，但可以好有面咁落地獄，你揀邊個」，對於這種問題，男人一般都唔會猶豫。

這其實只是大自然的定律，全世界的雄性動物，都像孔雀一樣，靠開屏來吸引異性，所以別讓你的男人係人地面前冇面，尤其「人地」中的一員，或數員，是美女。

2. 那個女人，你覺得，而且毫不猶豫，deserve一個叫「八婆」的稱號。咁，男人可以盡情咁鬧，不留餘地，比女人更狠。但當然，定義各有不同。

那麼美麗的八婆又如何﹖傻啦，俾得你叫做八婆嘅女人，你就唔會覺得佢靚。正如一隻著Dior的豬，你唔會話佢著得好睇，你只會覺得佢係侮辱緊同樣著住呢個品牌的女士們，一樣。

如果meet唔到呢兩個requirement，抹左去啦，男人之家唔可以咁小器。