英皇香港警察

阿嬌的裸照前天出爐，兵貴神速的英皇娛樂昨天發表聲明，指該裸照乃邀月憐星之作。由此可見，楊先生除了可以開英皇鐘錶，英皇珠寶，英皇證券和英皇娛樂外，還可以開一家「英皇偵探社」。

月前網絡流傳一張東北虎照片，大家疑幻疑真，中共政府出手干預，找來鑑証專家分辨真偽，個多月後，結果找到一張跟照片九成相似的月曆海報，由此証明相片是偽造的。今次阿嬌的相片前日開始於網絡流傳，昨日英皇就出聲明，只一天的時間，英皇集團旗下的精英們就查清來龍去脈，比全港幾萬香港警察的行動更加迅速，怎不令人咋舌。依我看，如果不怕共產黨懷疑閣下陰謀巔覆國家，復辟英帝國主義的話，不如由英皇集團正式取締香港警察，從新改名為「英皇香港警察」。

但跟林建岳的座驚為甚麼會慢了三十公里一樣，那張被竄改的原照到底是從那裏找來，關乎公眾利益，所以還請英皇奉告。

英皇既然不會因一張照片而認定旗下藝人會亂搞男女關係，那麼當然不會因同一個人的片面之詞而相信其道德操守。發公開聲明，而且聲言會追究法律責任，那麼，當然是有真憑實據的。如果有被刪改的原照，就敬請公開。但如果沒有，楊老闆何以一眼認定照片是假的﹖

啊！真是一個謎。

日久見股神

股市反覆，對於在下這種「手空空無一物」，一張股票都冇係手的人，理所當然悠然自得，瀟灑到極。心情暢快無倫，為應良辰美景，自當吐槽一番，大講風涼說話去也。

股票走勢其實是一幅懸崖圖，長升短跌，閣下開快車要去到最高，最緊要唔係要勇氣，而係識掌握時機，幾時dum break。早左，你固然上唔到最高仲要眼光光睇住人地越上越高你越來越唔順氣，遲左，你更加死無葬身之地。辛辛苦苦搵的血汗錢叫棺材本，閣下應該視之如命根。牛市唔好摸頂，因為摸頂就係等如做呢一種咁高難度的特技行為，但好明顯全港明白這個道理的散戶唔多(明既話呢幾日你唔會見到通街人都愁眉苦臉啦)。

幾個月前畢菲特沽中石油，全世界fund佬一致批評他「冇眼光」，一派「股神老矣」的口吻，非常潤喉潤肺。今時今日，大家又好似七年前的長平之戰-----科網股爆破後一樣，開始懷念起這位大智大慧的老人家。大家忽然醒悟，如果當日跟住阿畢哥沽中石油的時候順手沽出自己手上的中人壽，中交建同埋中移動，實行同姓「中」的有仇，今日就唔駛為兩個星期之後點過「年關」的問題而惆悵。

劉華話「當匪，就要當最大的」；信神，自然要信最靈的。畢菲特之所以被稱為股神，除左因為眼光獨到，更因為言行一致。唔會似某些大行講一套做一套，開口叫你沽自己就係咁「造」低吸納，開口叫你買自己就博命沽貨。中石油十三蚊佢自己覺得貴開始沽貨，你要跟可以隨便。你要信埋d係個市二萬點話年尾會升到二萬三，到二萬三就話年尾會升到二萬七，二萬七又話年尾會到三萬，點知轉眼又到三萬佢話你知年尾一於三萬三啦，結果而家就陪閣下一同坐艇；又或者一味係你耳邊「熊市近了」，然後閣下的股市快車駛過八千里路雲和月卻依然一帆風順，一味睇淡靠嚇威逼利誘叫閣下沽貨的「股棍」，當然亦係閣下自由。

路遙知股力，日久見股神。牛市中有風駛盡人人都識，但事實証明，所謂獨立思考，正正就係要識得唔好人信乜你又跟住信乜。你急流勇退大唱反調，仲要有忍受千夫所指的氣魄。

頂得住，一步之遙，就是人神之別。

希夫烈達

斷背山男主角之一，希夫烈達英年早逝，卻告訴全世界的電影觀眾一件事：同樣二八年華，「如何演好角色」只是香港的年輕演員要應付的問題，對於一個被譽為才華洋溢的國際新星，要應付的，卻是如何抽離角色的問題。

因為對一個演員來說，演好角色只是本份，正如曾特首的那句「我要做好呢份工」一樣，你要應徵呢份工，就自然要做好，做唔到就係你失職，偏要搖旗吶喊到處宣揚這種「阿媽係女人」的事，印証閣下只係一個三腳貓演員。

如何抽離角色，才是一個出色的演員要思考的問題。因為劇本裏的世界太過多姿多采，浪漫奇情，人生那得幾回有如此奇峰特出﹖像以前走進荔園的好奇小朋友，大千世界，要考慮的從不會是到底去看大象還是玩旋轉木馬的問題。

這種因演員抽離不了角色而自殺的新聞其實屢見不鮮，香港人最熟識的應該是張國榮。好的演員都很文藝腔(總不會是研究量子力學的權威吧)，多愁善感，所以這種級數的人物，因為有涵養，是從不會廢話的。萬一遇著失戀，又剛剛演過一齣盪氣迴腸的感情劇，兩者交叉感染，小則傷風感冒，重則休克昏迷，傷重死亡並不奇怪。

歲月怱怱，人生苦短，希夫烈達，就有如茫茫宇宙間爆發的一粒超新星，瞬間閃耀，留給了世人一念經典的回憶。

願安息。

All Quiet on the Western Front

宗教令人討厭的其中一個原因，係實在太多人用佢o來招搖撞騙。

都唔係問題。你用劉德華個名，話俾人聽你係劉華個契弟出去呃飲呃食，劉華會出o來澄清。週街都係假銀紙，匯豐銀行會搵鄭海泉出o來澄清，同教你點分銀紙真假。但成千上萬人話自己係基督徒，耶穌唔會出o來澄清，教你點分乜野係基督徒乜野唔係，總之你多d祈禱，「依靠耶和華是智慧的開端」，然後就大條道理橋埋雙手買包花生等睇戲。

美國總統大選，其中一個共和黨候選人Mike Huckabee公然用自己既宗教信仰為政治資本。他也是個老實人，開宗明義以基督徒為佢既結構選民，聽落好似好好，睇真d其實係正宗極端原教旨主義，假上帝之名，行撒旦之實：
www.perrspectives.com/blog/archives/000863.htm
再睇埋呢個：Mike Huckabee on Crime:
http://www.ontheissues.org/2008/Mike_Huckabee_Crime.htm

你係咪會好奇怪點解佢會支持死刑，而且講野前言不對後語，一睇就知係正宗大話精一名。

但好明顯美國既基督教徒好唔得香港既幾多。觀乎此君係Iowa先拔頭籌，又矢言會將下一個重點放係Carolina，原因係Iowa係出名conservative大本營，而Carolina最多基督徒。我覺得政治人物有宗教信仰唔係唔得，但你用宗教之名o來做你競選既籌碼就不可接受。更加大鑊既就係將閣下既宗教信仰係政策中執行。阿富汗，伊朗，連理智如英國，都有過Bloody Mary既血淋淋宗教歷史(仲有好多不能盡錄)。唔好忘記殊仔都係基督徒，結果為左要「解放伊拉克」(而家大家都知係為石油啦)，就搞出個大頭佛。共和民主兩黨候選人今時今日冇一個夠膽話場仗要繼續打落去，殊仔而家除左多多祈禱等下屆收拾殘局之外，己經乜都做唔到。

中世紀十字軍東征叫既口號，到今時今日都仲有人用，証明「橋」唔怕舊最緊要受。

丫，你一定又會話「呢d唔係真正既基督徒」又或者「人總有缺失既地方所以要依靠神」，係咪﹖閣下不妨參閱《莊子．外篇．田子方第二十一》莊子與魯哀公的對話。

唔鍾意﹖咁不妨睇睇聖經，《使徒行傳》第十一章26節：「門徒(被)稱為基督徒，是從安提阿起首。」(The disciples were first called "Christians" at Antioch)。

如此西線無戰事，天下太平，可喜可賀也。

大國崛起

古有六月飛霜，今歲初立春之時卻熱得令人冒汗。最清楚原因的，唔係遠在阿美利加既Al Gore，而係香港既田北辰。

全世界的翻版事業只會翻software，咱們偉大的祖國，software翻得爐火純青，就轉戰hardware。外國一間google享譽國際，無所不能的同胞們馬上複製十個，外國一間youtube，祖國馬上有一百個，而且性能卓越，青出於藍，造福人群，實在可喜可賀。而家更流行所謂「惡意註冊」，將國際大企業的名字搶先於中國註冊，然後對這些企業敲詐巨額款項。以番鬼佬不義之財壯大我國經濟。

G2000係國際品牌，大陸十年前資訊落後冇人聽過係唔出奇。但因為係中國既註冊時間先後而判敗訴，咁同樣道理都可以用去告Microsoft既Window 2000。又或者將之後一百年既年份全部註哂冊，一出D乜野Norton2006，Window2007，Apple2008，逐一輪流勒索，好過你自己開公司做生意啦。

再睇埋賠償金額你真係會突眼。一個「冇人聽過」既品牌俾人盜用，獲賠二千萬元人民幣。大佬，一間公司如果佢既unidentifiable intangible asset值成千萬，會寂寂無名，都真係算閣下韜光養晦本領高強啦。

見微知著，由此可見，自由黨同中共既關係，應該好麻麻。拿，你諗下丫，俾著係唐英年個細佬俾人咁告，我睇怕最後會係個姓趙既要賠番二千萬出o來囉。牌面上睇，計同共產黨既關係，姓田既唔及呢個姓趙既，好明顯啦。大陸佬睇怕仲係將廿三條田少忽然人民英雄耿耿於懷。

咁搞法，你話中國有乜辦法唔發呢。

Steve Jobs的演繹法

新出的macbook air號稱全球最薄，即係有幾薄﹖0.8吋厚，13吋螢幕。

oh no！這個世界很多人對數字沒有概念，連一加一都要諗過先答你係等於幾多既人大有人在。0.8吋，你要我用尺出o來度﹖o來o來o來，我show俾你睇。所以steve jobs出場，第一樣做既就係個普通公文袋入面拎部macbook出o來，而唔係哂口水話你知佢部野有幾勁。

這是一個很出色的演繹手法。一般人對螢幕大小有概念(一日到黑都望住個mon點會唔知﹖)，但對手提電腦厚度既概念就一般。一吋厚同0.8吋有乜分別﹖steve jobs話你知答案就係一部放得入公文袋，一部放唔入，一眼就好practically睇得出部macbook既優點。放入公文袋仲有另一個好處就係大家都會估一個ceo無端端拎個公文袋上台做乜﹖冇人會傻仔到以為裏面係放今日既講稿掛。

當然你話佢唔搞呢一招，依然會世界都會focus係呢個新產品度。係，但都話呢d叫ambition咯，有得做好d點解唔做埋佢，仲要呢d野唔駛成本既。同埋，咁樣淡淡定抽部機出o來，好似張無忌係武林大會度滋滋遊遊咁抽把倚天劍屠龍刀出o來，震懾群雄，仲要擺番副串樣，真係好鬼死型。

咁收收埋埋，就勝過硬橋硬馬就拎部機出o來。即係你溝女，都鍾意溝番個識得適當時候遮遮掩掩，若隱若現，欲拒還迎架啦係咪﹖

特稿：Macbook Air

Apple新公布既product係手提電腦Macbook air。人情紙咁薄，電腦都係，0.8吋厚既手提電腦，淨重三磅，13吋mon，計我話以後最好全部教科書用哂電子書，又或者老師自己出notes，d學生一部電腦帶番學就搞掂，三磅，好過你見d細路你成日拎個十幾磅重既書包番學揹到好似隻狗咁。又可以環保，再將香港各大無良教科書出版商趕盡殺絕。

不過今日唔係講呢樣，而係Steve jobs既目標。

Apple出既野，一向外型美觀，而且越出越輕便。由ipod classic到最近既ipod nano，就以放棄classic既強大功能換來輕便，而家一部ipod 16 gb，細過一張八達通，聽歌睇戲樣樣得(你話octopus係咪pk丫)。如果佢唔咁搞，一路到而家都係賣ipod classic佢掂唔掂﹖我敢話佢實掂，因為其實冇人expect一部mp3機係可以細到咁既地步。但呢d就叫ambition，永遠唔甘於現狀，新既客戶你搶都要搶番o來。Apple股價長升長有，呢個就係原因，股東都相信佢而家有好既product出到o來，將來，一定會有更加好既，一間咁既公司盈利有乜辦法唔升，呢d股票真係唔買就笨。

再加上Apple呢個brand name而家係歐美己經變成左「型」既代名詞，名牌效應下只會有更加多人慕名購買，所以我敢斷言Macbook air就算要萬四蚊(US$1799)一部，依然會好賣得。

「賣貴Dell四成啵」，當然，d人唔會無端端走去有一萬蚊部唔買走去買萬四蚊既。我覺得，Steve Jobs係越o來越想將Apple既product當係一種奢侈品(luxury)o來賣。等於你買勞力士番o來唔係為左睇時間，係等你「唔覺意」撞到人既時候可以講番句：「哎呀唔好意思呀，我隻勞冇撞親你丫嘛」，咁。你試諗下，你出去同人傾生意，左邊o個個sales帶部Dell，你帶部Apple，一眼望落去，你做客，你buy邊個多d丫﹖

因此，如果閣下想佢好似iphone咁出幾個月就減價，機會好微。原因係佢呢部Macbook air好明顯唔係好似ipod咁走大眾化路線，亦都唔駛好似iphone咁要去搶市佔率。

呢部野要買就趁早。

七種靜默

報章訪問林奕華，此君數了無線電視七宗罪。

但「如果人有七宗罪，上帝就有七種靜默」。如果電視台有七宗罪，觀眾，都有七種靜默。如果真如林先生所說無線電視自三十年前己經開始腐化，咁香港既觀眾起碼啞忍左二十年，文革都過左兩個，所以責無旁貸。

唔止電視，電影都係。所謂八十年代香港電影最光輝既年代，最多人睇都係王晶「追女仔」，又或者係賭神賭俠同埋周星馳既笑片之類(唔好話我知佢幾有深度，o個陣d人鬼識呢d，買飛入場都係得啖笑之嘛)。到今時今日連張藝謀都要拍「英雄」同「黃金甲」，然後大鑼大鼓話你知佢套戲大收幾千萬。你問心o個句，張藝謀係以前d戲好d定而家收幾千萬既好﹖所以，以「觀眾係低能」既宗旨o來整作節目，絕對無可厚非。

「上帝之罪，在靜默無言」

再加上最近電視台力推高清電視既時候師奶阿婆前呼後擁但對節目內容逆來順受，大家就知道到底係乜野一回事。會追求節目內容深度既觀眾就唔會被畫面上既華麗奪目迷到，而係電視台搞高清o個陣就第一時間要求改善節目質素。即係我由第一日聽到高清呢個term我己經唔明，睇個電視o者，你清楚到睇到個藝人眉毛底下收埋o個粒1mm直徑既癦有乜用﹖

咁唔係冇用，例如睇波o個陣就可以連我阿媽呢d唔睇開波既人都可以分得出場上面邊個係碧咸同c朗拿度，又或者搞番d藝術節目大家去研究下故宮文物既精雕細硺同埋羅浮宮Mona Lisa既細膩筆觸都得。但你無線又唔係搞呢d節目，要高清把鬼﹖同埋，你覺得，香港既「主流觀眾」，對呢d節目有冇興趣﹖中國人嘛，都係鍾意糖心風暴呢d鬥來鬥去既鬧劇。

大勢所趨非人力所能抵擋，所以如果你真係覺得電視好無聊，與其浪費時間投訴，不如讀多幾本書好過。

天地不仁

二萬二人遊行到底算多還是算少這個問題，等於一眾財經消息，好壞只在乎閣下到底係睇好定係睇淡，即係到底係得番半杯水丫，定仲有半杯水既分別。

所以睇呢d政治消息，同睇財經一樣，最緊要係耳清目明，第一要斷定消息既影響力，第二係宏觀趨勢同消息既方向係相反定一致。如果只係一d無關痛癢既小消息就無謂浪費精神去研究。

人大才剛剛否決2012普選，咁遊行人數何以為大，就要睇呢個遊行可唔可以推翻呢個決定而定。好明顯唔可以係咪﹖咁就唔駛哂時間睇究竟二萬二係多定少啦。即係好老實講，俾夠你五十萬人都係哂氣，廿三條中共可以讓步，普選問題係中共眼中極為嚴重，影響深遠，俾夠你一百萬人去遊行，我敢寫包單，佢地都係唔會俾你2012普選，而只會係香港放多幾萬解放軍預防暴動(又或者整番個「坦克碌豬」軍事演習都唔錯)。

孫中山搞革命，話要學就學洪秀全。民主派要搞公民抗命，則可以學學廿一世紀最偉大既革命家。冇錯，就係拉登喇。即係......即係你明我意思啦，廢事寫到咁明俾人話我鼓吹恐怖活動。拿，放心，香港信阿拉真主既雖然唔多，但跟其他神佛搵食既都唔算少，要搵番個肯捱義氣既義氣仔女而又支持普選既應該都唔會好難。就咁話啦，唔係成日俾人話你一日到黑都淨係識得遊行，你都好冇面架係咪﹖

天地不仁，以萬物為芻狗。

哀哉。

聰明的女人

Hillary Clinton跟Obama的爭鋒看得令人熱血沸騰。但無論誰勝誰負，Democrat成功吸引大眾的focus，先贏一場。那邊廂Republician的McCain贏得毫無難度，大家還是喜歡看民主黨的熱鬧。

由Hillary的一輸一贏，就可以睇出，美國人選舉，最重要的，還是選公關形象。Hillary也是個明白人，第一場輸了，馬上打個溫情牌，係電視機面前露一雙淚水汪汪的大眼睛，眼淚不必流出來，凝而不發(邊會學似台灣佬堂堂大男人喊到殺豬咁q大聲)，o來番個欲語還休既shot，動之以情，再曉以大義，就咁贏番一場(我成日覺得，呢d咪叫唔見棺材唔流眼淚囉)。

其實這張牌早就該出，全世界人都知道Hillary最大弱點，唔係曾經投票支持出兵伊拉克，亦唔係搵過私家偵探查過自己老公。問題係佢呢個女人，太過男人feel。呢一點好重要，正如心理學家統計得出大家照鏡照側面時，將面部較大的那邊靠鏡，會比將面部較小的那邊靠鏡靚d(人既面左右係有大小之分既)，原因係你望野，靠近你d既野望落去會大d。而咁樣擺pose就合乎你大腦潛意識裏面既呢個assumption，咁你望落，咪覺得舒服d囉。

男人睇女人亦都係一樣。正所謂一個識得係男人面前扮蠢既女人就係最聰明既女人，你一個女人擺到個樣咁硬淨，同男人既assumption唔一樣，d男人梗係唔buy你啦。俾你贏哂d女性選票又如何﹖八年前Al Gore己經示範左一味拉攏女性選票既下場。所以，要show堅強既形象唔係問題，但閣下講野溫柔番d，語氣客氣d，唔好俾人覺得你好「潑辣」，俾d位人地覺得其實你都係似番個女人既，就己經好夠。

拿，呢樣你信我，佢絕對係特登既。因為以佢份人，佢要唔流眼淚，絕對忍得住。外國政客既哭功同中國官場源遠流長既太極功一樣，乃入門第一基本功，國粹o來架。

btw，我依然睇好(同埋支持)Hillary多過obama，原因係美國人而家最驚係衰退，Obama既經濟手腕如何大家都唔知，但Hillary就有個好大既asset，就係佢老公。大家都知"vote Hillary and get Bill"，呢個會係佢o來緊選舉既最大本錢。但隱憂係

1.obama既助選團實在太過厲害，由半年前Hillary仍然一片大好形勢，到而家佢竟然可以先拔頭籌，令我諗起葉劉，我諗極都唔明點解d民意可以轉得咁快，有冇人可以話俾我知obama呢半年做左d乜咁鬼勁(定係好似佢老公咁講，係因為Hillary俾人 "unfairly scrutinised" 所以佢先漁人得利)﹖

2.唉，靠老公呢樣野，唔可以宣之於口架嘛，可以，佢份人都唔會咁做丫，係咪﹖

3.江山易改本性難移，佢份人今次贏番一場，想佢再似番個女人﹖難咯。(即係今時今日全世界都好明白點解當年Bill Clinton要偷食啦係咪﹖)

單這份雍容，一副君臨天下的氣勢，就不是香港下九流的政客學得來。

殺頭的生意

兩電加價，同美國減息一樣，咁都「估」唔到既人，直情係弱智既。奇在電視台依然要問「街坊」，d師奶依然俾一個白痴答案：「咁係唔好啦，咁佢地之前幾年都賺架嘛」

我想問，除左兩電及其相關利益者，請問邊個會贊成﹖呢d唔駛問架啦！所以呢，問呢d問題，反映出既唔係「香港人唔贊成兩電加價」呢d阿媽係女人既野，而係香港人幾十年o來一d都冇進化，「香港人」成為基督徒反駁Darwin既進化論(Evolutionism)最有力證據。

俾電視台訪問既o個位師奶，言下之意，係咪即係話：「佢地之前幾年都賺架啦，都係時候要蝕番俾我地喇掛！」咁﹖到底閣下係咪要人地真係蝕俾你o來做生意你先會滿意﹖拿，咪話我話，真係到兩電做到蝕水既時候，李卓人班pk肯定仲要死句：「兩電長年壟斷經營，管理不善，應該諗辦法減省成本，電費仲可以下調既。」，結果都係唔可以加電費。

正所謂：「殺頭的生意有人做，蝕本的生意冇人做」，你有乜理由要人蝕俾你呀﹖閣下如果嫌電費貴，可以用少d電丫。即係咁，假如你一年用少十分一電，俾少十分一電費，電廠燒少十分一煤，放少十分一二氧化碳同懸浮粒子，香港既廢氣少百分之八，一舉四得，又合乎政府既環保政策大方向，好過收膠袋稅丫係咪﹖

所以問題呢，唔係電費貴既問題。對香港人o來講，一樣野貴唔係問題，貴貴都唔係問題，只要呢樣野，我買番o來，轉個手可以用多20%既價錢賣番出去，就唔係問題。即係樓價夠升左唔少啦，我唔見你嘈﹖你試下電視台又走去做個訪問，問下d師奶睇樓價飄升有乜野睇法，佢梗話好啦，係咪﹖全香港冇人嫌樓貴既，有得炒丫嘛。阿里爸爸三十幾蚊股我唔見你話貴﹖仲要你班蛋散仆到走去買﹖

所以呢，問題唔係兩電「食水深」，只不過係佢地兩個食水深既時候，你冇得分o者。

喂，咁好簡單丫，你咪走去買兩電既股票做個對沖囉，上市公司o來架嘛，你覺得間公司盈利好到不得了，買佢股票等升值，電費越加佢越升，夠你賺番轉頭有突啦。佢地d股票踢都唔郁﹖咁咪係囉，咁你憑乜野話人地賺到你盡呢﹖你老闆買隻股票轉個頭一個double賣番出去唔見你可憐下接你貨o個個替死鬼，同情下佢打番個八折﹖

我諗呢班人，真係要人地倒貼俾你先會滿意，咁你先有賺丫嘛，係咪咁講呀﹖

作家倪匡還在三藩市的時候，蔡瀾有次去探望，住了一晚，第二天趕走 。一大早的士來到門口，只有倪太起身，她說倪匡那傢伙也真的太沒意思了，明知是專程從墨西哥飛下來探他們的，現在要走，他還呼呼大睡，真不夠朋友，是不是﹖

蔡瀾說：「是朋友的話，不在乎這些，在乎的，不是朋友」

我當然還沒有這兩位老人家如此爐火純青，所以好朋友回加拿大，我還是去送了一程。

而且今次，我忽然有d明白點解我地永遠可以咁鬼多野講，我發覺你總會講到一d我諗唔到既野，而又冇乜排斥，有你係度，我等於多一個腦用。而且用起上o來不廢精神(用你架嘛)，當然用個不亦樂乎。

你走左，我又得番半邊腦。

衰退

美國經濟會被次級按揭(subprime mortgage)拖累，是事實。大家然後很關心的課題，是美國會否因此陷入衰退(recession)。

啊，我不是要跟大家探討美國到底會否衰退，而係呢期成日聽到財經節目，主持人好喜歡說的一句：「美國會陷入衰退的機會率己經增加到百分之xx喇」。最近xx = 50，所以就係：「美國會陷入衰退的機會率己經增加到百分之五十喇」。

即係等如有個大肚婆去照超聲波，照完之後個醫生同個大肚婆講：「你有百分之五十既機會生仔啵」。

你咁同唔講有乜分別﹖我自己係屋企搵粒骰仔擲仲易啦。我地淨係想知美國「會衰退」，定係「唔會衰退」，而唔係有幾大機會衰退。

你都唔知﹖咪係囉。

電梯的覺悟

平時用扶手電梯，人人都企右邊，我鍾意企左邊(但係又唔行阻鬼住哂然後俾幾十人咒罵o個種呢)，我一路以為係因為我鍾意將身靠向左邊。

去到日本，發覺個個都鍾意企左邊，然後......我企番去右邊。

跟住我發現，原來唔係左同右既問題，我只係，唔想俾人阻住。

呢個世界好多野，都係咁既道理既o者。

目標

像當年考AL的目標一樣，我今年頭半年的目標，就只能是考好個死人CFA。下半年﹖搞掂呢個先啦，做人呢，要一步一步慢慢o來。腳踏實地丫嘛，係咪咁講先﹖

妹講得好岩，我地真係命苦=.=

吊詭

曾經有傳道人跟我打過這樣一個比喻，很有趣：

傳道人：「如果我話而家有份工想請你o來做，任你開價，你做唔做﹖」

我：「唔做啦，分別係用o來呃阿婆既種金騙案。」(話時話，點解永遠都冇阿伯俾人呃既﹖)

傳道人：「你當唔係先啦。」

我：「做乜野先﹖」

傳道人：「只係一d好簡單既野，不過呢，要做一世唔可以轉工既。」

我唔貪心丫：「十億﹖」

傳道人：「得，不過呢，如果我而家話你份人工要你死左之後先可以拎既，咁你仲做唔做﹖」

..............

阿傳道人，言下之意，你係咪即係叫我唔好去信耶穌呢請問﹖

賠償的問題

利東街重建，政府高額賠償後租戶仍然好唔滿意，有人覺得他們很「貪得無厭」。

與其說是貪，不如說是策略，談判的策略。用以爭取更多賠償。這個手法絕對合理，因為可以令政府俾一個佢願意出既最高價錢。所以不斷有人替商戶們催谷宣傳，或增加對政府輿論壓力，最近玩埋絕食抗議，無非都係一個錢字。絕食既意思就係：「想我唔絕食呀﹖得！俾多d錢我啦」

至於賠幾多錢先至夠呢﹖嗯，呢個問題就等於問李嘉誠，到底佢要搵幾多，先至為之「夠」呢﹖It seems the sort of questions does not call for answer. 所以，都係錢作怪o者。世人在錢面前，同係耶穌面前一樣，都是好平等的。

大家咁得閒話人貪得無厭，不如話政府無端端俾個把柄人地squeeze佢啦，條街又殘又舊d人住到唔滿意就自自然全部自動搬架啦，咁，而家人地話住得好地地你賠幾十萬俾佢佢話要番間舖，咁咪由得佢啦。即係d老鼠係條渠度住得好地地你話坑渠好污糟呀不如你o來住我個老鼠籠丫乾淨企理一日三餐仲有埋個健身用滑輪添。

引狼入室，引賊入屋，引隻大老鼠入自己米缸，抵死啦你。

反思的反思

近幾年，基督教徒的聖誕口號是：

「要反思聖誕節的真正意義」

說是近幾年才開始，係因為係近幾年先有「反思」呢個詞語出現。我想請問大家，反思，即係乜野﹖

o拿，係咪要諗一輪呢，係咪諗諗下有拎本詞典o來查下既衝動呢﹖即係你用d咁既有歧意(ambiguity)既用字o來傳教，會唔會覺得好冇效率(inefficient)呢﹖

唔該，反省就反省，思考就思考，反省本身就己經有思考既意思架啦。各位牧師傳道，可唔可以得閒都「反思」下自己既用字呢﹖

基督教徒所說的「聖誕的真正意義」，自然是基督耶穌降生為要拯救世人之類。我又想請問，有乜野咁值得你反省呢﹖反省既意思，是反身省察，檢查自己的思想行為(self-examining)。咁而家你地係咪覺得呢個一路以來既「聖誕真正意義」好有問題，又或者終於發覺自己係聖誕唱普世歡騰係褻瀆神明，而開始識得反省一下呢﹖我估唔係丫，咁你反省乜野呢﹖

你只不過係要人「記住」，「記得」或者甚至係「紀念」呢個「聖誕既真正意義」，唔係反省。就算要用反省，係咪應該係「反省聖誕對你既意義」會適合d呢﹖

上次葛福臨佈道會其中一個主題係紀念「馬禮遜來華二百周年」，大家有參加既基督徒不妨都真係紀念一下呢位偉大既牧師，人地有好好學好中文先到中國傳教架。

同埋呢，即係呢，「反思」聖誕真正意義呢d野係我呢d人先會做架，各位虔誠既基督教徒係唔駛做架，所以，唔好再「反思聖誕節的真正意義」喇，俾人笑架。

衣架武力

十一歲小童被母親用衣架打之後報警。聽後當然大笑不止。搞得香港的警察大部分時間就是用來處理這種雞毛蒜皮的民事糾紛，越來越像一個保姆。這當然不是警方的問題，而是報警的人的智商問題。

難得的是每次有這種事情，報章電視台都會非常踴躍找一些專家出來鼓勵這種弱智兒童，提醒大家「暴力不能解決問題」。

當年納粹德國在歐洲恣意擴張，英國首相張伯倫(Neville Chamberlain)也認為暴力不能解決問題，但歷史告訴我們，事實上希特拉只是當張伯倫一個白痴來玩弄，繼續侵佔波蘭，英國如夢初醒，匆匆對德宣戰。

一個人只要多讀幾本書多識幾隻字，就不會厚顏無恥在電視機面前說出諸如「暴力不能解決問題」之類的廢話。如果邱吉爾也是這種白痴的話，我怕二戰到今天還沒有打完。

電視機前那位專家女士如果有子女，應該教導他們如果有朝一日不幸被性侵犯，千祈唔好叫救命同報警，因為警察是一定會使用暴力的。相反，可以叫他們跟那個強姦犯多些溝通和合作(點合作我就唔知啦)，又或者嘗試介紹一些社工機構看看能否解決那位暴力中年男的性需要問題。

所以那種滿口偉大理想仁義道德說得天花龍鳳的人，最信唔過。因為永遠講一套，做就另一套。暴力當然唔係一個解決問題既好方法，但有時卻是最好的方法。永遠只懂迴避暴力，以為咁樣就係尋求和平，我會說：you gotta be "A good lord mayor of Birmingham in a lean year"，但旨意你做大事就死得。

仲有兩樣野：

一：用衣架就叫暴力﹖我當年捱o個招摺凳係乜野呀咁﹖
二：即係唔好話係我話丫，「暴力不能解決問題」呢d野，永遠只係打輸左o個個先咁講既o者，你幾時聽到打贏左人o個個咁講丫﹖

呢隻係馬

跟從前趙高指鹿為馬一樣，指石為金，大家今天是親見親聞。

如何將居屋「改裝」為豪宅出售，就等於問如何用煉金術將石頭煉成黃金一樣，是一個很科學的問題。但為甚麼到二十一世紀還會有人相信十八世紀煉金術士的把戲，認為o舊鍍左黃銅既石頭「有得升值」，用買金既價錢去買，就是一個近乎哲學的問題。

這個近乎哲學的問題就是：點解有人可以蠢到咁﹖

這個看似很容易簡單的問題其實很複雜，就等於閣下永遠唔會明白點解d豬食餿水都食得咁滋味一樣。層次唔同。從呢個角度諗，大家大概對於點解今時今日無論警訊點樣呼籲市民要提防受騙，報紙依然日日有新聞話d阿婆俾乜乜寶藥黨祈福黨騙到既事，唔會咁介懷。事實上，點石成金成功與否係出指點人o個個既功力問題，而指石為金成功與否，就係俾人點o個個既智商問題。

大家明明知道只係一間居屋不過裝修左然後賣豪宅價，等於將粒香檳色的鑽石套落個金指環然後用純火藍鑽既價錢賣俾你，明碼實價童叟無欺，閣下願者上釣唔好幾年之後先投訴層樓只係居屋質素，呢個係你買之前就應該諗清諗楚既問題。

如果大家連咁都信，咁，即係我話你知余慕蓮著左婚紗之後會變陳法拉，你會唔會信﹖你話知件婚紗值成億丫﹖

所以香港各位自問貌不驚人但又三十而立雲英未嫁既女士們，識點樣吸引異性未﹖

取捨的問題

某人說我做事不考慮結果。

我想閣下搞錯了一件事。不考慮結果的人做事，之後會感到後悔。

打o個篇野時間雖然是浪費了，但起碼我還能忠於自己的價值觀。至少被問「點解唔去﹖」既時候，不用啞子吃黃蓮。

不後悔的原因：

1. 係有人問起我先會打o個篇野，並非主動寫出來惡意中傷那個佈道會。

2. 只是因為無論我如何交代，基督教徒朋友們都不會明白所以才作罷。對牛彈琴實在太過無謂。我對我的文字還沒慷慨到由人倒落鹹水海的地步。

3. 所以，這是一個選擇和取捨。

4. 而且我為我還能堅守靈台的一點清明而感到慶幸。

5. 仲有，打出o來自己解下度氣都好。

當然，怕得罪廣大的基督教徒是主因，但，還談不上後悔。

普選2017

普選方案又出爐，這次說要等到2017年。

政治是妥協的藝術，誠然。但如果以這個為理由而事事妥協的話就不成體統。所以，這次民主派堅持2012普選，我很贊同(少有地完全贊同民主派啦)。雖然堅持這種不切實際的方案，肯定不能帶來普選。

大家是要明白如果事事妥協，那麼做任何事都根本沒有難度。總之對方進一步自己就退一步，事事妥協。對不起，事事妥協並不是妥協，而是被要脅。妥協，也應該有進有退的。不然要當個民主黨也很容易嘛，一起拉大隊加入保皇行列就是了。到時有阿爺照住要風得風要雨有雨好不快活。你看那個民X建Y聯Z就是那麼一回事。

當然，如果對方是致誠君子，那麼大家講信用，的確萬大事都有得傾。共產黨的誠信修養一向都是為世人稱頌有加的，不是嗎﹖

政治講求運用權術。那麼無權的民主派，自然就無術，於是強硬一點的堅持成為他們唯一的手段。你管曾特首是否「有心推行普選」做乜﹖政治是講現實結果的，你同我講心有鬼用﹖你話我知阿特首「真係好有心推行普選架，不過阿爺話要等到3047喎...」，咁，你係咪都要我因為「特首真係有心推行普選」而接受呢個方案先﹖

咪咁低b啦

《我在伊朗長大》

今天食lunch時心血來潮，突然好想睇這部只在百老匯電影中心和 IFC PALACE 上映的電影。加上我實在係掛心佢會係星期四落畫(聖誕節嘛，加上這種戲，冇人會expect佢好賣座既)，於是即刻買飛放工睇。近水樓台，這是我在IFC上班的唯一好處......

這種非主流電影有公司肯買回來，基本上都有一定水準。結果沒有失望，這部電影，值得細細品味。有一些不太清晰的地方，不知是我看漏了還是她說漏了，我正在苦苦思索中......

美中不足係開頭太多歷史背景，有d亂，細節太多，也實在記不全，加上英語的配音有點生硬。詳評則留到我把漫畫也看完後才打吧。

但不要緊的，睇完出o來除左評語係「幾好丫」或者「幾有意思啵」然後就空無一物的只是荷里活式的消費型電影。冇人expect呢套會係一套咁既電影，係咪﹖

所以呢，原則上呢套電影我好推薦(放心，一d都唔悶)。不過呢，對於「我覺得睇呢d故事既時候要好小心囉」既基督徒們我就唔推薦喇。

由於生日的緣固，獲羅監製贈送我心怡己久的iPod一部(4gb)。於是急不及待將家中約七成的古典音樂cd轉入去，其餘三成我一向都唔多聽。點知過哂，都係2gb。我正在積極考慮要不要將那三成也放進去。

如此這般，由於幾年前因為遺失discman而同時被放棄的古典音樂又再成為生活的一部分。(家中那部大hifi實在太擾人清夢)

也因此，公主小姐的離開實在是令人倍加傷感。今時今日要搵個女仔識得乜野叫音樂，而又會陪你一齊癲去聽一場幾個鐘的concert同時同你一齊研究銅管樂同弦樂的音色問題，經過大會堂會研究入面究竟奏緊貝多芬還是莫扎特的問題，唔多喇。而家最多女仔只會同你討論LV或者Cartier新番皮裝手袋到底紅色定藍色比較好睇。對於這班無才無德的女子，我現在唯有每天默默忍受。

這種才女情意結我到底係邊個度學番o來架=.=

--------------------------------------------------------------------------------------------------

話說週六出旺角打算買個ipod套順便執番兩對converse，點知出到去勁多人，結果去旺電打左個白鴿轉見到個岩心水既套買左番o來就算，鞋就買唔成。假期旺角真係like a hell

交談後還留有讓我深思熟慮的餘地，是我喜歡的溝通模式。

而所謂思考其實就係坐係度發白日夢乜都唔駛做，這是我的強項。

丫，多謝你，你令我諗通左一個問題。

匯豐的管理藝術

HSBC五日撤回300元提款下限的計劃。各報章引述所謂專家指HSBC「未夠深思熟慮而且未顧及民意」。還認為管理層缺乏「政治智慧」。

証明所謂「市場學學者及人力資源專家 」，幾容易搵食。

淺一點的，先講常識：

香港的提款機提款下限設為一百元己經是咸豐年的事。銀行跟隨通脹，提高提款下限，其實再正常不過。

本來通貨膨脹，用戶覺得d錢唔見洗，自自然會提更多現金，不用設下限來控制。但偏偏其實好多香港人(我唔知外國係唔係咁)係會好死硬派咁，無論物價上升幾多，都只提取固定金額(小弟就係一例，每次拎四百，嫌拎五百要打散好麻煩)。於是乎係物價上升，而用戶每次提款額不變，假設香港人沒有因通脹減少實質消費，咁結果就係平均每個用戶，提款既frequency高左(同通脹成正比)。咁好自然地，大家等提款既時間會多左，銀行成本會高左。非常合理。

銀行不是開善堂的，管理層要向股東交代(這應該是管理層的唯一責任)，成本上升，管理層自然要諗辦法開源節流，今時今日銀行業競爭激烈，加價是不大可能的，唯有節流。而此乃方法之一。

香港銀行多如牛毛，閣下不滿HSBC的制度，就快d將d錢轉去第二間銀行啦，冇人會阻止你。

--------------------------------------------------------------------------------------

深一點，談談所謂「政治智慧」。

這件事，我是這樣推測：

HSBC的管理層舉世知名，而是次變動亦影響廣泛，可以想像他們並不是傖促實行。我是相信HSBC的管理層不會跟那些「專家」一樣用一個灌了水的豬腦來思考的，所以聰明如佢地，冇可能預計唔到民間的反應(傻既都知d社工會跳哂出o來啦)。咁點解仲要咁做﹖

假如推行成功，HSBC毫無疑問可以減省成本。

好似而家咁唔成功，都唔緊要。咁日後減分行減優惠減服務又或者用戶嫌三嫌四話提款時間過長時就有一個好好藉口喇：「即係我地管理層之前都考慮過一d可行既方案o來減省成本，可惜公眾唔接受，唯有用其他方法」。大家而家要做正義既朋友幫助弱勢社群唔緊要，第日提款下下要你等廿幾三十分鐘時唔好又係度怨呢樣o個樣同我講d乜野時間就係金錢之類既廢話。

所以此乃進可攻退可守，連環之計。

計我話，佢地一早就諗住實行唔通，唔係點會個plan推得咁急，又撤得咁快(五日)﹖咪傻啦，當年減分行唔見佢咁手軟。

所以你話佢冇智慧﹖我話佢直頭精過鬼。呢位專家你自己蠢，唔好以為人地都好似你咁蠢先得架。

丫

很抱歉，那篇葛福臨佈道會，我是決定不post了。原因係無論我措詞如何浮華，只要我係show disapproval，基督徒們應該都唔會好appreciate佢。咁，唔post篇野我又唔會死。

唉，浪費哂d時間......我又實在唔係好甘心，大拿拿打左五千字呀頂......

嗯......不如咁啦，如果邊個有興趣既就留言我email俾你啦

That's just a kind of concession

因為曾德成一句「忽然民生」，很多人要求佢道歉，收回言論及下台。

各位言重了。要佢道歉，可以。收回言論，亦合理。但因此要他下台，就有點太過。

誠因如果大家一向有留意香港立法會內所謂辯論，就會發現像曾局長這種人身攻擊，其實為數不少。曾局長這次出了名，只因為陳方安生的名頭太大所致。民主黨元老司徒華也曾在議事庭上指責對方是「呂布」，還加上「請閣下翻閱三國演義」；對方(不記得是哪一位了)即還擊指司徒華是「吳三桂」，並說「今次唔係小說，係歷史」。這種帶有人身攻擊的謾罵在議事庭根本無日無之，如果要曾德成因而下台，實在是有點冤。但如果一視同仁全部有「案底」的議員要引咎辭職，立法會肯定會癱瘓的。

當然，並不表示這種言論理應存在於議事庭。所以，我想說的是，以往各議員，及曾局長今次發表這種言論沒有人即時阻止，才是根本問題所在。在外國議會，這些都有嚴格規定。而維持議事庭內言語的秩序，在外國是議長的責任。在香港立法會，是立法會主席的責任，即係范徐麗泰。

所以，落台的應該係范太。曾局長這種言論，極其量係失言。但范徐麗泰，係失職。原因係立法會淪為街市阿婆式謾罵場地，佢「居功至偉」。

一般市民不知道尤自可，那幫議員也跟著起哄，則很明顯別有用心。不可以因為曾德成是左派局長，就特別嚴格的，「天子犯法與庶民同罪」，但局長犯錯，也不必罰得比議員重吧。

說曾局長侮辱十七萬選民就更加係無限上綱。他絕對沒有侮辱選民，因為香港的選民係真係會因為一個候選人「忽然xx」而「忽然」支持/不支持他的。例如葉太「忽然」認錯，就「忽然」有十幾萬選民支持佢。如果佢仲「忽然」變索，就肯定「忽然」贏埋呢次選舉。

而且平心而論，撇除人身攻擊這個因素，曾局長是說得沒錯，陳方安生的那篇言論，「忽然民主」是衊加的罪名，但的而且確令人覺得佢係「忽然民生」。所以陳太，經一事長一智，在議事庭發表政見就好，沒有必要再加上個人選舉感想，招人話柄的。

兩個新人還有很大的進步空間，祝好運。下次記得醒爬d啦。

這幾天忽然很多新聞，寫都寫唔切。

為免過時，先寫寫立法會補選。

雖然我個人也是反對葉劉的(不代表我支持陳方安生啦)，但看到她落選時那個隱隱想哭而又極力掩飾的表情，我個人還是有點同情她的。別誤會，我可不是因為她哭所以同情她啦。原因係佢呢幾個月內可以做到的，都己經做了。輸，非戰之罪。

可以看出她很落力之餘，也有謀略，短短幾個月支持度大幅攀升，那四成半選票不可能全部都是鐵票。她的幕後軍師實在功不可沒(到底是誰﹖)。所以我同意，她己經贏了。這不是「跌落地拿番咋沙」，的而且確係如果個選舉再過多一個月舉行，那幾萬票難保不會全部過戶到葉劉那裏。

不得不說陳方安生也實在有欠風度。作為勝利者是應該有點胸襟的，人家輸了講點悔氣說話也是人之常情，應該諒解一下嘛，你輸了，也不會希望對手這樣說話的。對不﹖反正閣下現在意氣風發，也不會真的在意一個手下敗將的挑釁。

至於葉劉失敗原因，如果全部歸咎於二十三條，我是有點保留。因為無論當時她推銷23條時是真心也好，「盡忠職守」也罷，現在她既然道歉，大家沒有真憑實據証明她說謊而認為她說謊，其實是極不理智。很多人說：「想起她推銷23條時那幅嘴臉就唔開胃啦。」。對，所以其實不關23條事，是樣子跟形象問題。

也實在比起陳方安生那幅四萬笑容，她天生嘴miu miu的尊容實在係公關上的一個致命傷。理據如下：

如果選民夠理智的話就會看出問題所在：這次補選只有八個月任期，如果葉劉在任期內表露出她不是真心支持民主而只是拉票手段的話，會令自己的誠信盡毀，八個月後就可以放棄佢，葉劉點睇都唔似咁蠢。但如果她在任期內言行跟拉票時一致，那為甚麼不選她而要選陳太呢﹖所以其實不投票給她，與政治立場沒有太大關係的。

最有力既理由。拿，即係咁，女仔我唔敢講，如果阿葉太生得唔係一幅串樣，而係陳法拉咁索，有幾多男人會對佢投下「神聖」既一票﹖

所以，千祈唔好將香港人睇到咁高層次先得架。

至於那篇葛福臨佈道會，我還在針酌用字，請耐心。你必須知道在這個世界，感情上最fragile既就係muslim同埋christian......

基於溫cfa開始越溫越唔識，又睇得出只會越o來越花時間既關係，我發覺自己好似又要好似考AL o個陣咁實行刻苦既溫書時間安排。真係自己搵自己笨。

所以呢，我話我忙，係真架......

----------------------------------------------------------------------------------------------

今日睇atv褚簡寧的節目，何俊仁做嘉賓。原本香港低能選舉法例要求每一次佢提到候選人士，一定要全部講哂，唔可以只提一或兩個(you know who la)。於是褚簡寧就要每次對住張表讀哂o個八個人既名。我諗：

1. 如果唔係八個候選人而係二十個，咁咪大鑊﹖真係讀名都讀完個節目咯
2. 何俊仁呢條友身為民主黨主席，上到個節目到有佢講冇人講。乜，民主唔係要有不同既聲音既咩﹖定係你做律師既職業病﹖雖然呢d英文節目香港唔係好多人睇，你都唔係咁樣句句搶住o來講架，好影響形象呀。
3. 節目中褚簡寧問到一個問題，如果anson chan輸左，民主派有乜打算﹖睇何俊仁個樣，就知佢冇乜點諗過呢個問題。係葉劉數個月之內由俾人睇死轉為陳太反而要「告急」(次次都要告急，你民主派真係咁厚面皮)，身為黨主席連呢d risk management都唔做，想民主黨好﹖難咯。
4. 何大狀d oral english......拿，聽落，我真係覺得佢同我係半斤八兩囉。

----------------------------------------------------------------------------------------------

此時此刻，應該就快有初步結果，i mean立會補選。

這次補選，最重要，唔係邊個選出，反而係教識左大家一個好現實既政治詞彙：妥協(concession)

香港人而家大部分人對民主派沒有好感，這是事實。但不支持民主派就完全冇人會爭取普選。這是一個比補選更現實的問題。等於幾年前英國選舉的一句「選貝理雅，得白高敦」一樣，你係好唔順貝理雅呢條友，但你又好想要阿白生做財相，就係咁。

而且既情形係其實好多人連陳太都唔係好想要(因為其實唔太想支持泛民主派)，不過你更加唔想要葉劉，但你又唔如果你呢d被定為中間遊離票唔去投，葉劉就可能會贏，於是你就去投。逼於無奈下你唯有去投票。

這就是妥協。

丫，還有另外六個候選人：何來、李永健、蔣志偉、柳玉成、蕭思江、凌尉雲

拿，選委會唔好拉我呀......

兩皇一后

眾所周知，小弟平日絕少看電視。但這幾天番新工回家實在提不起勁溫英文同cfa，就看看電視舒緩一下，一看，不得了。

話說其中一個廣告是鴻星酒家做大閘蟹宴，沒有問題，但下面四隻醒目大字寫：「兩皇一后」

......

士別三日，刮目相看。乜而家連d電視廣告既用字都要同d九流八卦雜誌睇齊。拿，唔係假道學，但咁樣一個廣告只會令人覺得你成個marketing team都係低能既。

即係如果你見到有間酒樓搞齋宴，然後叫個餐做「觀音坐蓮」套餐，你做顧客，你會點睇間酒樓﹖

不如下次賣雞咁賣：「叫雞七十，兩皇一后八折」

究竟你鴻星而家係做酒樓定做雞竇﹖

國金外望

番工第一日，己經嬲嬲地。

個agent超低能，幾日之前俾封email我話八點九番工，冇問題丫，我去到，冇門口入，公司冇reception，諗住打電話求救，但收唔到(堂堂國金竟然收唔到電話!!!!!!)，於是要番番大堂，但我係番69樓，結果遊lift河。然後不停咁打電話，終於個電話係9:20打得通，我先有得入。

番去一問之下，人地係official hour係「九點正」番工。仲要好明顯唔駛打card個個都遲一兩個字。你老廉咁早八點九叫我番去做乜﹖仲要個電話打極都打唔通，真係勞氣到死。

----------------------------------------------------------------------------------------

我個位都唔錯，行兩步(真係兩步)可以睇到半個海，但係無閒欣賞，唔係忙(btw，我而家都仲未好知我係會做d乜......)，而係d大粒佬坐哂係隔離我唔係好敢行o來行去睇海景。今日原本好遊閒，但又係由於周身唔自在既關係，全日都要將o個二十頁紙睇完又睇扮哂忙咁。

----------------------------------------------------------------------------------------

回家後媽問lunch既情況

媽：點呀你，今日去左邊度食呀﹖
我：蘭桂坊
媽：哇！幾錢呀﹖五十幾呀﹖
我：係七十幾呀媽媽......

席間同同事吹水，講起港燈既lunch係19.5，同事聽後眼都凸埋，我心諗，南丫島9.5一個lunch仲要係食九大鬼.......

虛渡

閒在家中無所事事的六日終於告一段落，聽日又要開始番工。

事實証明，放假係屋企又唔去下旅行其實係好浪費時間。浪費既意思唔係話你用哂d時間做埋哂d唔等駛既野，而係呢幾日，你跟本諗唔起，d時間係點過既，空白一片。

這實在不能算是人生最愉快的經驗。我係終於明白點解d人做到七老八十都唔退休。

我發誓，以後都唔要咁樣。

抱佛腳

區選在即，各黨宣傳舖天蓋地，氣勢磅礡。

雖然政客的大聲公擾民行動令人很討厭，但最討厭的，還是政府的宣傳短片，說盡公民責任要去投票。

然則不投票的人就沒有盡所謂公民責任。

Are you sure?

但幾個候選人我都唔鍾意，去到投票我都揀唔落手，點解仲一定要我去選﹖你張選票又冇不信任票俾我投，咁即係唔能夠清晰表達我意向啦，咁我仲乜仲要陪你玩﹖

個問題係呢d候選人平時鬼影都唔見野又唔見有做，但一到選舉前一個月就將自己個樣貼到通街都係(你估你自己係吳彥祖﹖)隔離寫幾個詞語諸如：實幹，為民，拼博等等。當然，他們是有點誠意的。於是你會見到七點幾鐘當你仲番緊工既時候係街口己經會企左個著住件中環style既shirt既肥師奶(但其實你住黃大仙)同你講早晨，然後下一句就係「請支持下我丫」。

但，誠意只限於選前一星期。

即係要我去投票唔係唔得，問題係咁樣就等於我去鼓勵呢d咁既行為。即係以後當個老豆同個仔講：「你咁樣考試之前o個日先溫書，臨急抱佛腳，有鬼用呀﹖」既時候，你個仔老實唔客氣回應你呢一句：「冇用﹖d人選區議員都係咁啦，做到議員添呀！」。你做老豆，你點教仔﹖

公民責任﹖唔好妖言惑眾

14K

昨天等巴士，諗起前幾日差佬因為有舖頭賣印左「14k」字樣既T恤封舖拉人。

丫，咪誤會，我見到o個架只係11k。但即使真係14K，我諗差佬都唔會咁好膽走去請陳祖澤去飲啖茶食個包，問下阿陳生係咪想用黑社會組織名稱嚇唬乘客，等佢地係俾o個幾蚊雞車費既同時，識得自動自覺每人交多幾舊水「巴士駕駛安全費」(即係保護費)，o來對抗政府年年唔批加價。

件T恤同黑社會撞名要個做T恤既改。即係咁萬一d報紙爆大鑊話唔知係邊度搵到料，原來某某社團個大佬個名叫做鄧竟成，我唔知阿一哥會唔會俾人內部審查然後被「勸龥」改名。

呢d野，自己內部搞都算容易，萬一唔好彩條友仔唔係叫鄧竟成，係叫曾蔭權，咁又冇理由封左個特首辦架。到時咪阿一哥要死死地氣咁同阿特首講：曾生，為左香港整體治安發展，閣下不如考慮屈就一下改過個名，拿，我地警方查過通勝架喇，不如就叫......

建華啦！建設香港，安定繁華，好意頭呀

真係霸道到呢~

這世上最令人討厭的其中一種女人，就係無端白事要一大班男人走去煮飯整野食既女人。

這種女人，直接點說是心理變態。文雅點的，可以認為係心理狀態傾斜的現代女性主義者。

我覺得d女人係都要男人煮飯既目的只有一個，就係因為佢地覺得d男人要女人煮飯煮左幾千年，而家女性主義抬頭，係報復既最佳時候，革命既天賜良機。

即係你好聲好氣要我做，ok，fine，我整唔到都買番o來。講野呼呼喝喝唔在講，我話我唔識整你仲要大聲夾惡同我講：「唔理呀，次次都係女仔負責，今次要你地男仔負責呀」

冇禮貌唔在講，你呢個係理由o來既﹖你第時同個男人結左婚會唔會同你老公講：「唔理呀，次次都係我o來M，今次你o來代我呀」，又或者：「唔理呀，次次都係我負責生仔，今次你o來負責呀」

我廢事俾人話我冇風度同個女人嘈我先唔出聲

一個銀河系得一個火星

對於在下找到新工作，友人紛紛道賀，大家都明白在下在敝公司的苦況。

但其實我並不看好。

畢業後第一份工搞成咁樣，始終有陰影，怕又係另一個trap。雖然話「一個銀河系得一個火星」(我聽到呢句野o個陣真係爆笑左出o來)，但難保仲有其他環境更惡劣既金星水星，命中地球的機會其實唔高。

真係勁擔心

-----------------------------------------------------------------------------------------------

區議會選舉臨近，通街都是競選slogan。但昨天在佐敦看到一個很搞笑的，頗有心思，值得一提。十二隻字，係：

經歷破產，屹立不倒，我有膽識

我O咀左五秒，即係我實在唔係好明破產同做區議員有乜野關係。破過產可以做好區議員，咁唔通冇破過產既就係冇膽匪類﹖你話唔係呀，破產係人生一個好大既危機o來架。咁我係咪可以用「經歷小產」，又或者「經歷難產」呢d關乎母子性命既經歷o來做slogan﹖又或者嫌一個人破產唔夠氣勢，寫「經歷x家產」，取其全家一齊共渡難關之意，同舟共濟互相扶持，思想正面，幾好呀。

趙子龍百萬軍中藏阿斗，據漢水背水一戰，劉備事後誇他「一身都是膽」。閣下只不過是選個議員，遊下街洗下樓，見到人就揮個手。咁簡單既工作，要膽識做乜﹖你不如寫「於百萬軍中取上將首級如探囊取物」﹖你有冇膽識我唔知，但搞句咁既野，好明顯你係冇常識。

不過選舉嘛，講乜都假，最緊要咯，要有人識o者。

小弟終於轉工，星期五遞辭職信

入房，挑通眼眉既manager第一句講既野係：「咦﹖你搵我呀﹖唔係好野o來喎！」

雖然眾多同事對他很不滿，但平心而論，除了開會時諸多廢話(天下老細誰不廢話)，他待我不薄。所以，我那句抱歉，是真心的。

至於我老細，唉，唔想多講，我只可以話跟住佢做野既日子一定會係我人生中其中一段最黑暗的時期。佢問我有乜想同佢講(我唔知佢o個陣知未，因為我o個陣未遞信，但佢咁問又真係好怪)。我話冇，我心諗，我有乜野意見我平時開會己經講哂毫無隱瞞，你o個陣唔聽我講而家先o來問，何必呢﹖

總之，都過去。

今期economist的special report講現代宗教同政治的關係越o來越密切。連來屆美國總統大熱的Hillary Clinton都要proclaim自己係一個prayer(祈禱者)的時候，表示無論你如何自我感覺良好，民調節節領先，又或是演說的時候一呼百應，宗教這張牌都不容放棄。

宗教無疑是關於死後世界的理解，而政治卻是現世的權力紛爭。水溝油。兩者要融合，則無可避免事但一樣野會被同化，或者兩樣野既性質都會改變。

會突然寫呢個topic既原因，係因為快將舉行的葛福臨佈道會，被納入回歸慶典之一。這是個耐人尋味的問題，到底是政治為宗教服務，宗教為政治服務，還是兩者兼備的產物﹖

今天跟團契的導師談論這個問題，然後俾佢帶我遊花園，我是白費唇舌。

別跟我說其實兩者是分開的，大家只要抱住去聽道的心去就可以了，或回歸也是一件值得慶祝的事云云。這是廢話。

(待續...)

今天從IFC走出來，人來人往，覺得流動的人群像螻蟻一樣，每天上班下班，不知在幹甚麼。
我忽然覺得，人生只是一場鬧劇。

----------------------------------------------------------------------------

李柱銘一篇文章，搞得香港政界又再熱鬧起來。

通常這種情況，我只會問一個問題：這件事發生後，誰是最大得益者﹖

十一月尾區議會選舉，十二月立法會補選。陳太乃李柱銘力薦下出選，對李柱銘來說，陳太敗陣，他無顏見江東父老。陳太恤髮後，情勢忽然急轉直下，李柱銘那篇文遲不寫早不寫，偏偏選中這個時候寫，當然有他的目的。

李柱銘這種人物，從來都不受親中勢力歡迎，老左對他的印象差到極點，再做甚麼都不會令他們對自己的印象好那麼一點點。相反，這樣哂哂英文，加偏激一點的言論，與他一貫行事方式一致(他也不是第一次搵美國佬幫拖)。因此，可以鞏固香港支持民主的人士對他，及民主黨的支持。
但香港人民主意識分明，這樣做不是多此一舉嗎﹖

原本是。但葉劉出選，拉了一大票明星名人助選叫陣，那邊廂陳太勢孤力弱，那一大幫所謂泛民根本幹不了大事。情形是越來越多中間游離票受明星效應所吸引，覺得葉劉「都唔係咁差o者」。對民主黨來說，立會及區議會選舉跟本都不容有失，這時不出口術，更待何時﹖

香港老左們政治智商等於零(泛民中如劉慧卿者亦如是)，但李柱銘作為資深大狀，當然有智慧得多。這種文章一見報，不用做過幾十年律師都能夠料到老左們是所等反應。所謂遣將不如激將，與其等老左們自己衰多口，不如拋磚引玉，一顆石頭擲下去，老左們果然按耐不住，左一句漢奸，右一句賣國賊。統計顯示，每次曾憲梓之流一吐唾沫，泛民民望就會飄升, exponentially。再一次証明，愚蠢的人等待機會，聰明的人製造機會。

現在回想，鄔醫生死的那天，李柱銘一個人在家，不知，是不是，哭得很淒涼。

今日買書一事，很能體會我自己既洗錢哲學。

話說今日請病假早番屋企，路經三聯書店，做緊減價，雖然抱病在身，但都入去打左個白鴿轉。入到去見到張永霖寫既「成功路」一書。呢本書其實我想買好耐，原價八十都唔可以話貴。但問題係本書印刷精美，彩色。我對內頁都係彩色既書一向冇乜好感，同一本書用黑白同彩色，價錢差百分之二十。而且香港各大書店耐唔耐會搞減價(即係好似今次咁)，本書我唔急用所以唔駛咁急買。結果今日去到，三聯全線八五折，而呢本，係七折。田園最多都係八折咋，七折邊度搵﹖即買啦。

此所以點解老豆多番勸龥我買股票我到而家都唔肯落塔既原因：隻港交所九個幾十蚊你唔買，升到二百幾蚊你話我知唔買你就笨。你駛乜驚o者，遲早咪跌番落o來。

今日去Intergraph的conference，逸東酒店，竟然冇訓(好難得架，坐係度朝九晚六乜都冇得做呀大佬)

有一個鐘係由個法國佬講，講英文，老實講，如果冇d slide o來guide住，真係好難聽得明，不過我覺得幾得意，法國人講英文，我除左呢次之外，就係睇Johnny english既時候聽過。所以係半場都訓既呢個環節我聽得尤其用心。總比聽我老細o個d唔鹹唔淡既英文好，起嗎用字豐富，而且，人地唔會錯grammar同亂用字。

再講，呢d野係香港唔係周圍有，物以罕為貴嘛。難得不用面目模糊

法國人講英文，個調，好似意大利文=.=

==========================================================

vmware既介紹都幾好，令我相信呢間公司大有前景，包括其股票(vmware係美國上左市)，各炒友不妨留意留意相關概念。

為左分散注意力，最近看黃碧雲的小說(與其說是小說，不如說是一種很長很長的舒情文)，並研讀莎士比亞(他媽的經常一字多意，而且個個意思都好似岩咁，有冇人可以介紹一兩本註釋俾我)。

同時依然每個星期一本economist同埋報左既cfa六大本書下年六月考

點解人要訓覺=.=，廿四小時你估好多﹖

那晚婚禮以後，回家以後，我想了很久，明白了一點。對這種事，我一向有點天份。母親遺傳下來的。

然而困惑，到底是，甚麼時候，甚麼事。毫無道理。因為，我一向，精於計算。

鶴頂紅最毒嗎﹖

誰知，誰曉

一本萬利雖然難能可貴，但無本生利，才是天下第一等的武學。

當大家見陳太振臂高呼，民間百般和應以為必勝，左派紛紛暗自擔心的時候，那邊廂緬甸的昂山女士展示了更勝一籌的政治修為。一言不發坐在家中自然有十幾萬僧侶前來參拜，名副其實是一尊女神，這邊陳太葉太甚至那個落選了的勞大夫肯定個個眼紅。「民主女神」﹖不是學佛祖那樣帶個四萬笑容就可以做。

一個懂得掌握最適當時候流眼淚的女人最能得到天下間男人的支持，而一個硬頸的女人又同時能獲得新一代「站起來了」的女強人所垂青。所以像昂山素姫這種會流眼淚的女強人，最是難纏。軍政府如果在既不妥協又不用效法小平同志的前提下可以解決問題，簡直天方夜譚。

不下凡的女神，才是女神，陳太怎麼不明白。

陳方安生出選立法會，跟港府增持港交所一樣，原因耐人尋味。

選舉講勢頭，像李卓人陳婉嫻等鼠輩每日跟扎鐵工人們大呼小叫，明眼人一睇就知係早一年就要為明年立會選舉做勢，是為低手典範。陳太，當屬高手。

攘外必先安內。眼看陣內泛民山頭林立，互相猜忌，就算自己肯出選，將來這幫人不服氣，唔幫手尤自可，倒抽後腳就不妙。因此先來學諸葛亮，先自拒絕。泛民心知非陳太出選，勝出機會渺茫，心慌起來，乜要求都應承，甘乃威，何秀蘭等退選，當出自陳太及其幕僚手筆。既然知道泛民其實一盤散沙，現在逼得這些曾經的競爭者，將來潛在既搞小動作者退選。而家退選，又話自己心甘情願(其實只係知道冇機會贏，順便賣個口乖，做個順水人情，有個好落台階)，到自己選舉拉票時，就不可以再數落自己，又話自己當時乜乜物物，影響聲譽尤為大事。這式封口術連消帶打，絕。

泛民自亂陣腳不要緊，反正陳太自己出選，也沒旨意靠這幫人出力。她自己賣的是聲望，既是曾經官拜布政司，當然要以高貴為賣點。一直以o來冇所謂「地區工作」，咁一向議員用開既「洗樓」戰術對自己就毫無意義。不用人海戰術，更不用與泛民這盤散沙同流。反正小人己除，以獨立身份參選，擺明你班友唔好認親認戚到時洗樓為名順便又為自己做勢。委身出選，地位乃保超然，又另一絕。

既然不用泛民，出謀劃策重任就落在其核心小組身上。其他人選舉要洗樓，佢唔駛。只要核心小組的大姐們三不五時指點江山一番，自有香港大小傳媒爭相報導，到時自己坐鎮居中，侃侃而談，適時展示一下招牌笑容，票，自然會來。

立法會議員的工作只有一個，就係撈政治本錢(你唔係真係以為佢為民請命先出選呀下，係做民主鬥士，都唔係搵個六十歲阿婆o來做)。以常理推之，只有特首之位才能令其心動。眼見同是「港英餘孽」，曾蔭權做得，做乜我唔做得﹖離下屆特首選舉尚有五年，要做野，絕對夠用。芳間聞說陳太想做泛民共主，實在無聊之極，泛民一盤散沙，做其共主吃力不討好，如袁本初領八路聯軍，得罪人多，兼耗錢糧。泛民議員們，實在太睇小方某人。

至於要做乜野﹖做特首最大障礙當在中央。與中央搞好關係是為特首的基本功。能說服中央支持自己，簡簡單單當然最好。退而求其次，不能獲得支持，爭取2012年普選，或擴大小圈子選舉，對陳太來說，越多人對佢越有利。假如能竟全功，功勞自然歸佢，泛民無與爭鋒，民望一時無兩，特首之位亦唾手可得。

中央一向打經濟牌企圖穩住香港政局，但美國次按問題嚴重，國內衰退跡象越加明顯，香港經濟未來五年似跌多過升，中央不斷北水南調亦不能力挽狂瀾，經濟牌是否有效成疑。假如不行，則為穩住政局，開放普選勢在必行。金融為香港之命脈，陳太亦當有計算在內。

以此刻看，到時天時地利人和俱備，只欠東風。

今日去in個agent，外藉女仕一名。

in完之後，佢同我講，話我英文好。我當堂心裏面打左個突，然後好有衝動想同佢講：

「小姐，你係小弟有生以o來第一個話我英文好既人」。雖然唔信，畢竟聽到都真係有d飄飄地。千穿萬穿，馬屁不穿嘛。

同埋又介紹左一d同佢冇關係既公司，但又覺得我適合既，recommend我去自己apply。係香港地做sales做到佢咁，我諗佢生意應該都麻麻地。

天底下所有事如果都可以靠示威遊行或是談判解決，就沒有所謂「社會問題」。而社會問題，就像幾年前政府說的「結構性財赤」一樣，係社會既結構問題。要解決，就得連根拔起，不是人工由六百加到九百五就可以了事。

議員要撈政治本錢支持遊行無可厚非，但唔知邊條水魚走去sponsor工人罷工一日收三百蚊就等同弱智。工人長期開工不足，話六百蚊一日，但一個月開得十日工，一個月人工計落得六千幾七千蚊，而家有人sponsor，一個月有九千蚊，就差唔多等於資方假若應承俾九百五一日，工人一個月既實收工資，分別，在於前者唔駛做日日示威遊行訓街碌地，後者日曬雨淋擔擔抬抬做到隻狗咁。俾我做工人，最好資方永遠唔好應承，大家永永遠遠罷工落去。

工人有這種諗法，但水魚不可能永遠水魚下去，得想想辦法。今日sponsor三百，過多個幾兩個月就慢慢加碼，四百，五百，工人見sponsor越o來越高自然更加唔想做，叫價更高，到達拖累地產股業績(財經演員的口吻)的地步，然後水魚實行沽空地產股，狂買put輪，一日sponsor出去九十萬，炒番番o來一日幾百萬，不出一月，連本帶利賺番番o來，工人冇開幾個月工，體能下降，更加好食懶飛，地產商要還價，越o來越難。

李卓人等無聊政客就更加高興，平時四出奔走造謠生事或在立法會示威抗議，而家每日朝九晚五上街遊行，一日地產商唔答應工人要求(要求嘛，當然要與香港經濟同步，即同股市同步)一日唔覆工，長做長有，生意興隆。

係香港，要反客為主賺番地產商既錢，同志們(普通話)，呢個就係機會。

某天在書店打書釘，聽到旁邊一對父子的對話。簡單地說，是兒子(幾歲大)想買書，但個老豆好似唔係好情願咁，或者係怕個仔亂買書，於是問：你上次o個d睇哂未呀﹖

香港既小朋友，連買本書都冇自由。難得小朋友想買書，點解要再三刁難﹖佢又唔係買龍虎豹。我就差d忍唔住想問o個位先生，你買股票，係咪每次都放哂上次o個d，先再買新既﹖

股票，冇錯，又係股票。個股市實在包含左太多人生哲理。

我想問，有冇人知xanga點樣plug in aNobii﹖

---------------------------------------------------------------

我這樣一個好辯的人，這幾日竟然提不起談興，原因是工作很累(對，我也有工作到很累的時候)。然而，自己不說話，旁人自會代勞。於是，我忽然成為了一個很好的聆聽者。

然後我想，如果像這樣的沉默可以解決天下間一切問題，該多好。

女友對本人之前的一篇關於宗教的blog感到unhappy，女友為人一向厚道，說話含蓄，但背後意思，小弟心裏明白。

友人說，明知女友會看，看後會不高興，身為男友，這些話就不該出口，還問我：「你有幾重視身邊果個﹖」。一言驚醒，這種話實在不應該寫在一個她會看的blog上面。所以，我還在反省。於是致電，打算致歉，但她很忙，忙著跟同事吃飯說笑談天，很不耐煩。我唯有打個哈哈然後收線，歉就道不出口。

昨天我有回團契。因為原本說是「討論週」，我是有點興趣的(女友好像不大喜歡我因為「興趣」而番教會)，但結果是「辯論週」(當然係out of my expectation)。有這個演變的原因，我想是由於如果這種題目由得大家自由討論，講不了兩三句就會有共識，這一個小時就會很悶局。辯論倒是省卻了不少這種麻煩。問我意見，我說沒有。原因是當他們討論得興高彩烈的時候，加入我這種out of their scope的意見，太過唐突。而且當自己女友也不能平心靜氣地聽這種意見的時候，其他人，按理也不會報以友善的回應。為免由原本四對四的辯論變成以一對七，在下不是諸葛亮，又不是要說服大家去打曹操，舌戰群儒這種事可免則免。

只是當你因為宗教分歧而覺得unhappy的時候，不要誤會，我不會覺得亢奮，好似打左場勝仗咁然後開香檳慶祝，we share the same feeling

對於多位友人詢問：

「點解你女友msn張相冇你既﹖」

由於資訊不通，糾纏不清，以至謠言四起，因此，呢個問題，我既公開回答係：

「我又唔係佢，我鬼知佢點解唔放我張相﹖」

不過公平d講，我部腦既desktop都係放左張Lady Godiva而唔係放佢張相，we are square，沒甚麼大不了。

再講，同咁多個佛像影相，耶穌咁大個醋酲都未出聲，在下也不妨大方一點。

開口中

馬力病逝，原來，o個陣真係俾我亂up，up中左

http://chhung3.blogspot.com/2007/05/blog-post_23.html#links

何必呢......

尋日睇一套叫「小麥子」的福音記錄片(有興趣自己睇，我唔想簡介內容)，當然，在那種場合(團契)，實在是不適合我發表意見。所以唯有記之於blog，公諸於世，大家下次幾時「有幸」睇到o個套片，不妨諗諗以下呢幾句話，然後先再感謝神：

片中各人和席間各團友的看法，我想先用Bertrand Russell的"The Argument From Design"其中一句來回應：

"it is argued that rabbits have white tails in order to be easy to shoot. I do not know how rabbits would view that application."

竟然今時今日仲會有人話呢個小朋友患癌係by god's will，感動別人，傳揚宗教云云。呢種意見，同上面既argument一樣荒謬，所以同樣地，I do not know how the boy would view that application.

如果 "rabbits have white tails"既目的係"be easy to shoot"，咁佢既white tails既存在，對兔仔而言只有係一齣悲劇，你會唔會叫佢因為咁而酬謝神恩﹖如果唔會，就唔該唔好將一個患病既小朋友同神拉上關係。正如希特拉屠殺六百萬猶太人之後，國際社會為左保護佢地，幫助佢地復國，咁我可唔可以話，希特拉大屠殺係神既旨意﹖你有種走去以色列咁講，你估下自己會係點死法﹖

閣下要傳教，不如就幫自己打支愛滋針然後傳到你自己滿意為止，唔好搵個細路o來較非。

Nike

http://docs.google.com/View?docid=dnnc4qd_7d22xvq

用三篇稿講一個放av既網民，應該係只會係香港出現既現象。

先不論甚麼數碼欺凌(又係一個不倫不類既term)，將一個網民既放av行為大肆渲染，本身己經有問題。Historically，一個新媒體面世，繼而慢慢普及，最先受惠既，一定係色情資訊，研究這個現象，應該係歷史，經濟又或是社會學既課題，一篇論文咁長，豈是一篇短短既新聞稿講得完﹖閣下將之簡化，未嘗不可，然而將這個問題歸於一人之功，就好明顯係對整個問題認識不足。

新聞稿尤自可，極其量只可以話佢讀得書少，但篇專欄就簡直不知所謂。誣衊當事人「培育AV 男優新血」，我想請問，小姐，香港邊度有AV男優﹖既有新血，當有舊人，舊人又係邊個﹖既有男優，理所當然會有女優，請問香港地七百萬人，又有邊個報稅既時候寫左自己職業係「AV女優」呢﹖冇，就唔好講到人地好似開班授徒咁，然後列舉一堆青少年風化案，入埋佢數，o個幾個靚仔係咪俾當事人直接或簡接教唆﹖唔係，然後你咁樣係個專欄度寫，就係完全不負責任。

當然，要你舉証據証明冇nike就唔會有閣下列舉的事情發生似乎有點困難，但comparatively，我會比較相信就算冇nike，都會有其他網民放av，d中小學生繼續可以download av同繼續睇av。將這種風氣歸咎於一人，就等如以為捉左個古惑天皇就冇人會bt一樣，這種立論跟本不成立。

閣下執筆行文，以後最好三思，免得網民一下子亢奮過頭，罵得閣下狗血淋頭不要緊，但將《明報》改成《膠報》，子孫不肖，卻辱及祖宗，查大俠面上可不好看。

談欺凌

欺凌就欺凌，乜Q野叫數碼欺凌﹖唔好乜野term求其關電腦事就加「數碼」兩隻字落去，然後又扮專家咁講一大堆廢話o來演繹呢個term。一般欺凌同數碼欺凌既成因有冇分別﹖冇。結果有冇分別﹖都冇。咁「數碼」呢兩個字咪就係廢話囉。只不過係用唔同既media之嘛，以前你係用手腳，用口舌，傳紙仔，而家變左係網上寫字，有乜咁值得大驚小怪﹖講到尾，咪都係好似小學生打交咁，你搶我支鉛筆，我偷你舊擦膠，兒戲到極。要你閣下用一大堆digital，cyber又幾多幾多百分比扮哂professional咁o來寫﹖

另，欺凌是甚麼﹖因為係呢個世界，有弱小同強大既共存。強肉強食，適者生存，想唔被欺負，好簡單，變得強大就可以，冇辦法變強大，咁你就認命。而唔係小題大做，一叫有人俾人「蝦」就撲埋去保護佢，你肯定佢一定就係o岩o個個﹖邊個話強大o個個一定係錯架﹖我買層幾百呎既樓要幾百萬，我都話我俾李嘉誠恰呀，你唔好又係報紙度寫下﹖

就正正因為呢種保護意識，小朋友係學校有乜東瓜豆腐番到屋企就撲埋個阿媽度係度喊：阿媽呀，miss今日「恰」我呀，嗚~~~」然後個阿媽唔理三七廿一第二日就番學校同個miss「理論」，呢種係值得鼓勵既態度﹖

論仇恨

又係同一個問題，「科技散播匿名仇恨」，同「散播仇恨」，有乜分別﹖「科技」兩字上文已提，不贅。至於匿名，我想請問，呢個世界有邊個話鬧人之先，要自報姓名既﹖定係閣下睇得太多武俠小說，找人麻煩之先都要說一通：「在下華山派令孤沖，汝是何人﹖」然後先打﹖低能！

再講，論散播仇恨，該編輯又何嘗唔係。字裏行間，渲染一個網民既行為對整個社會既影響，令一眾父母親感到「我個仔成日睇av就係因為你係度日日放幾套av」，令該名叫nike既網民一瞬間被天下父母親視之如過街老鼠，點解閣下唔寫下佢散播仇恨﹖閣下亦如是，甚麼「本地網上論壇一向都盛行口誅筆伐」，「篡改圖文」，「尋人起底」等等。這些行為，好像也不是網民的專利，咱們中央政府也非常喜歡口誅筆伐，篡改六四歷史，尋人起底更加不在話下。閣下立論不見得特別中肯，還說「心寒」云云，顯然也是散播大眾市民對這些網民的仇恨。尋人起底，辦報的難道會做得少﹖黐膠花！

今日行尖咀商務，諗住搵一本叫The god delusion既書
行哂成間都唔見，於是問個售貨員，佢答：
「呢本書賣哂咯喎，因為上左暢銷書榜呀」

佢都睇得幾通透，香港地既書，到底係因為上左榜所以暢銷，定係暢銷所以上榜架﹖

進修之路

係一路諗下年再報過科大mba之際
一個更吸引我既course出現左......

http://www.baf.cuhk.edu.hk/mba/program_jd_jm_obj.htm

不過，三年，點讀呀......
睇佢個curriculum起碼有五年既野

今日放工途中同同事吹水，講起呢樣野：

我：「其實係咪每個岩岩畢業既學生都會想自己搞生意既呢﹖」
友：「唔知呢，可能掛，尤其係男仔添啦」

上星期行過書店，睇到一本叫「富爸爸辭職創業」既書，佢裏面有一句寫得真係好好，佢話，而家既學校，係訓練labour，而唔係entreperneur

中哂point啦

岩岩睇完魔盜王，可能係因為睇之前都冇乜expectation，比想像中好，雖然好多劇情其實都係交代得唔清唔楚。不過睇呢套戲，其實都係因為睇左頭兩集，好頭好尾冇理由唔睇埋第三集丫，所以雖然好多人都話唔好睇，結果又係好多人照去睇。

除 左戲，最近都睇緊本書，叫"winning"，一本講management既書，我一路睇，就一路發覺，個作者所講既每一樣野，我老細，都好似犯哂(我淨 係睇左頭五個chapter，但命中率達100%)。而呢位作者，係前GE(美國通用電氣)既CEO，佢將GE由全球排名第十，提升到全球第二大企業。

大家都係電力公司o者......

所以我成日都認同一樣野，就係人，係要讀書既。冇野做o個陣，如其掛住打俾d 師奶閒話家常或者同d仔女安排課外活動，不如睇多兩頁書啦你。

話時話，我feel到，佢開始唔妥我

----------------------------------------------------------------------------------------------------

份test做完一個星期後，我仲未收到reply，睇o來凍過水

考試隨筆

今日去做recruitment test，75分鐘，做35條mc加兩篇essay

佢，recommend，30分鐘做mc，45分鐘做essay。As a result, 我，用左45分鐘做mc，然後用30分鐘嘔兩篇essay。當然，毫無文筆可言，而且，應該會錯幾多tense......

但呢個唔重要，重要既係過程。

話說我一打開份卷，一睇，份test既題目，八成係GMAT，當時我心諗：「P你個K，今舖仲唔L掂﹖天助我也啦今次」斷估，成場，除左我呢條無聊友之外，都應該冇人會考過GMAT喇掛。就算未見過題目，d技巧，點都用得著啦係咪先。

而結果係，當我做到第七條mc既時候，我望下隔離，再望下前面兩位仁兄，都己經去到下一版(10-12)。然後，一路head住我十分鐘o來做

.......

我唔明，35條mc，20條係verbal，15條係maths，數己經唔係淺(深過GMAT，我都要一分鐘一條仲要有一條唔識做=.=)，20條 verbal，我當你grammar真係好勁頭十條考tense同埋sentence correction你可以唔駛諗就識做，後面十條全部都係critical reasoning，每條起碼要花兩分鐘(我兩個月前做到爛熟後用既時間)，你班友係咪真係快手到咁呀..........我GMAT考得唔差架 啵......淨計個分，我科大mba都夠入架啵......

順帶一提，GMAT俾既時間，係大約兩分鐘一條

最吹脹係，佢封email度，話(The test will take 1 hour 45 minutes approximately)......o個三十分鐘，我唔知點解會俾人扣起左，唔知去左邊

香港地唔係真係咁臥虎藏龍呀下.......

星期六個writing assessment，我勁淆，因為好想pass

因為在乎，所以緊張

你明唔明呀fifi

智商

作為一個政客，要有起碼既政治智商，低級的錯誤，絕不能犯。

此時此刻，六四將近，作為一個親中政黨既主席，發表任何有關六四既言論，不論是支持或是反對，對佢自己o來講都毫無好處。說中共沒有屠城，香港的左派不會多謝你，讚揚馬先生「明察秋毫」或「眾人皆醉你獨醒」。民主派就不用說了，原本關係只是不和，現在變為惡劣。

如果他說這些話是為了謀取政治利益，就結果(即係馬後炮囉=.=)而言，一敗塗地。但，馬力個樣雖然唔係好醒，但都不致於係蠢，如果佢認為咁樣講可以為佢帶o來一丁點既好處既話，我就唔信啦。再講，真係俾佢好處o個個人，恐怕，亦會成為眾矢之的。

既然唔係為利益，咁，他呢番話係肺腑之言既機會，甚高。

每人都有所謂心底話，但是否要公諸於世，是另一回事。作為一個政客，諗清諗楚先講野，應該係第一堂必修課，馬力作為一黨主席，理應精於此道。再講，司徒華都講得岩，失言，邊有失咁多架。

咁，佢深思熟慮自掘政治墳墓，為乜﹖唔通佢上大陸醫病，cancer復發，自知不久於人世於是將呢個鬱左係自己個心度十八年既心聲，公諸同好﹖

唔會掛。

-----------------------------------------------------

兵貴神速，將馬力之言無限上綱借題發揮既最佳時間，應該係佢講完野之後既兩日。但原來而家支聯會先籌緊錢用o來宣傳

太令人失望喇

當然，支聯會資源緊絀，我明，但其他政黨呢﹖總不致於連一個電視廣告都賣唔起掛﹖呢個千載難逢既時刻，自己既政敵居然會自掘墳墓，咁仲唔拿拿臨加多腳，幫自己加番d政治本錢﹖駛唔駛咁厚道呀﹖

香港人懶，呢d反六四廣告登係報紙度作用有限，登個電視廣告，有聲有影，放番d六四片段，再將馬力講o個d野同段片做個cross over，最後搵阿華叔出o來講兩句，最後鳴謝邊個有份donate既政黨，咁，呢個黨，第一時間就變成左「堅決維護六四歷史真相」的急先鋒，而馬力，睇怕除左維園阿伯，好難再有人撐佢。

喂，咁就搞掂人地個黨主席喇。邊可以話「唔想同呢d人講野」架，你唔理唔講，咪正中佢下懷﹖機會得一次架咋......記唔記得上屆台灣大選，連戰同宋楚瑜係點輸架﹖輸心慈手軟囉。民主黨唔係有心戰室既咩﹖請班友番o來食飯架﹖

唉，香港d民主派，真係收得皮

對人講野，最緊要小心。小心自己講過d乜，因為你自己或者唔記得，同你講緊野o個個，未必唔記得你一年前，同佢講過d乜。當然，如果你次次都係講真話，咁就冇乜所謂，但係，如果你唔係一個習慣講真話既人，咁，你就最好記得，你自己幾時同邊個，講過大話。

當一個人個樣蠢，其實個人未必係蠢。就算係蠢都好，蠢，同記性，係兩回事。

阿老細，或者你覺得今日坐係你對面同你講野既o個個人，個樣有d蠢，又或者你覺得佢真係好蠢，但係好不幸，佢係一個記性好好既人。而你一年前同佢講過既野，佢到而家，逐隻字都仲記得。你今日講既野同一年前講既完全相反，表示d乜野，我估，都應該冇人唔知。

人工，其實我唔係咁介意，你加唔到，或者你唔想加，肯用幾千蚊一日搵個所謂helper番o來乜都幫唔到手，你同我講一個月加o個條友一日既錢既一半俾我你俾唔到，ok，我都唔mind。但點解你要呃我﹖我最憎人呃我。

仲有，我份人，好記仇。

頭彩

香港政府的思維模式，漸漸與正常人有偏差

BT案的判案書只粗略看了一下，只粗略睇既原因，係我先入為主既觀點，認為五個法官欲加你罪，何患無辭，因此不看也罷。仔細睇只係浪費時間。

法律條文，我不懂，但天下間有些事，不必要有法律知識，只需要常識，就可以判斷。

BT，全世界通用。
用BT侵權，亦非香港獨有之社會現象。
論法制，香港法制傳承自英國，未見得青出於藍。
而各國政府，其實亦致力打擊各種侵權行為。
論追踪科技，香港IT水平又唔係世界頂尖。

好，問題係，點解「全球首宗成功檢控」呢個頭彩，會係偉大既香港政府攞到﹖

如果BT真係咁易告，咁好告，第一個告人告到發顛既，應該係Bill Gates。因Microsoft應該係全球侵權軟件的最大受害者。咁，點解咁多年o來，Bill Gates都冇所行動﹖咪唔記得，Bill Gates，係一個法律天才。另全球最大侵權公司，Google，則理應正忙於應付各版權公司所提出之訴訟，如果Microsoft同Google之間的 聲勢，可以單靠法律訴訟完全解決，Bill Gates呢位營商天才，點解唔付諸行動﹖

正如要一班中一生走去做pure maths卷，個個做到喊苦喊忽，係得你一條友輕輕鬆鬆仲要拎埋一百分。係囉，究竟發生乜野事呢﹖

事實係，香港政府拎完呢個頭彩後，世界各國無人塔理，偏只有海關警察硬要耀武揚威一番。

即係咁，出貓呢，個個讀書o個陣都會，不過，都唔該有番d技巧啦。出到咁揚，咪即係擺明話俾人知：「係呀，我係出貓呀，你吹咩﹖」，DLLM，弱智既咩﹖

幕後黑手

中大學生報一事，我開始感到有點點陰謀的味道，當有幕後黑手在其中。

只要細心回想一下就知道了：一開始學生只係一味defend，一味就話「我冇錯」，絲毫沒有退讓。再加上忽然淫審處介入，校方劃清界線，學生一度被孤立。 而被孤立的一方沒有甚麼新的論點，一味只係話探討學術，回應保守，令人覺得學生呢d只係用學術o來做藉口，更認為現今大學生水準又再下降。咁樣自然爭取唔 到大眾支持。

然後，事情就峰迴路轉。

首先係學生將口號一轉，由話自己探討學術，變成係淫審處干預出版。其實仔細諗下，你就發覺，出版物被審核是否淫褻，用「出版自由」四字，跟本毫無關係。下 次如果張學生報post張兒童色情照，話係探討青少年早熟問題，不過，我地眼高手低o者，你乜乜淫審處咪又干預學術自由丫，咁得唔得﹖

不過唔緊要，最重要係「出版自由」，「言論自由」等字眼，香港人尤其敏感，一聽到「自由」呢兩個字，俾人「干預」，唔理三七廿一喇，幾大話唔好先。民眾係 容易被煽動既，於是民心背向，民意重新向學生報靠攏。咁都未夠，仲要搵番大學十幾個學者撐撐場，話支持下d學生。民意嘛，總係比較信服一d讀得書多既人， 人地乜乜教授都話張學生報冇問題啵，應該都冇問題啦。於是，連一d遊離票都贏埋。

解決民意，學生報得番兩個「敵人」，第一個自然係淫審處，第二個，就係中大喇。於是唔知幾時開始，就有人開始發話，祭出蔡元培先生的神主牌，然後將茅頭直 指中大校長劉遵義，話呢條友都唔幫自己d學生擋下箭云云。劉校長雖然成日笑嘻嘻，不過人要面樹要皮，佢都要番三番薄面既。然後又唔知點解突然間d中大校友 又走埋出o來，話支持d學生。仲要有埋d法律學者警告中大，如果學生報被評為「不雅」，大學都有責任。於是大家就見到好奇怪既一幕，就係中大行政部由原本 開壇作法要討論點處分d學生，變成「會對學生提供適當協助」，期間立場交接既過程迅雷不及掩耳，兵貴神速，高。

上兵伐謀，其次伐交，學生報得一大盟友，自然更加理直氣壯，接起橫額示威去也。

然後就得番淫審處。理所當然，學生報最理想既攻擊手段，亦係其實應該最早做既，就係質疑其審美眼光，或評級準則。亦係學生報時來運到，d評審委員又要無端端走出o來，未審完就話好有可能份學生報會被評「不雅」，於是學生報順水推舟，就話你淫審處唔公平囉。

睇到呢到，我就奇怪，呢班學生之前onon居居咁，一味話我冇錯，一d外交措辭都唔識，講野一d餘地都唔留俾自己，乜忽然咁醒爬識得呢招連消帶打﹖

呢野己經令今次既評審結果毫無公信力。不過落水狗邊個唔識打，一於再下一城。今日睇報紙，又唔知邊個人發起投訴聖經行動，千幾個投訴信send去俾淫審處話聖經不雅，內容涉及亂倫，暴力等......

呢招，真係絕。如果話民眾容易被煽動，教徒，更加容易。想像一下，一個虔誠既基督教徒，會有乜反應﹖梗係幾大都話聖經其實寫呢d野係有目的既，呢d人咁樣 諗本聖經，實在係唔明白神既道理云云。好喇，咁點解會有個咁既debate呀﹖咪就係個乜乜淫審處係度亂點鴛鴦，話人地份學生報不雅，然後火燒連環船燒埋 我地耶穌o個疊囉！因為係心理上，一個人聽到一個咁既信息，反應會係：「淫審處既審美眼光，會認為聖經係不雅既。」最大鑊，就係個淫審處仲要冷公正咁，真 係走去研究，考慮。有冇腦架﹖仲諗﹖呢班友梗係嫌命長，想快d蒙主感召。

最怕就係件事越搞越大，上埋國際新聞。到時傳到梵蒂岡度，你估教宗會有乜反應﹖全世界十幾億天主基督教徒同你過唔去，你行出街，真係唔好亂咁話俾人聽你係「淫審處」度打工呀。

不過呢，阿高人都算有良心。如果唔係唔搞聖經，走去搞本可蘭經。你諗下，丹麥畫幾幅漫畫諷刺穆罕默德既，可以搞到暴動。你窒佢本經，你估會點﹖燒幾架車放幾 個炸彈點都會掛。唔好忘記，尖沙咀個清真寺，好多巴藉人士去架，佢地會同你客氣，好似七一咁同你慢慢遊行﹖你太天真喇。天主教就話得罪教宗，回教，哈哈， 你唔怕拉登搵你飲咖啡呀﹖

至此，中大學生大獲全勝。

至於個官會點判。我估係維持二級評級(持有?)，但唔追究責任囉。兩邊都唔得罪嘛。

嗯......今時今日最想見下呢位幕後高人既，應該係馬力。

中大單野，唔知幾時開始，輿論既攻擊對象由班學生，漸漸地shift左去劉遵義o個度。

單野一開始，大家覺得班大學生有冇搞錯呀讀咁多書駛政府咁多錢寫埋d咁既野。再加上電視報紙插左幾個街坊同「公眾人士」既意見，大家覺得班大學生好仆街。

然後淫審處，這個一般被市民與影評處，電檢處劃上等號既令人厭惡既機構一介入，中大行情就急轉直下，然後又唔知點樣講下講下，燒埋劉遵義o個疊，跟住仲要推埋個成百年前既蔡元培出o來，一比之下，大家又覺得劉遵義好仆街。

所以話呢，民眾既容易被煽動既。俾意見既人，十個裏面九個半未睇過篇野。睇過既，亦都未必識得，乜野叫做不雅物品，乜野叫有違社會道德，甚至，乜野叫道德。唔係呀閣下一望落去覺得唔順眼既，覺得好L不安焦慮煩燥既，就叫做冇道德囉。

至於劉遵義呢，佢係條仆街我就成年之前己經講過架喇，不過又公道d講句，你又冇理由下下搵佢同蔡元培比既，咪同d父母下下將自己個仔女同個全校考第一o個個比一樣﹖

至於個淫審處，同電檢處，影評處一樣，冇哂公信力架喇，曾特首不如考慮考慮，摺左佢啦。

我係越o來越覺得，所謂母親節，其實只係一堆商人搞既function，即係好似d plaza搞function咁，旨在煲下d人流同消費咁。

係咪真係咁L多孝子賢孫咁有心要特登一年搵一日o來多謝下個阿媽呢樣野我無意評論，但係你見d新聞報導，都只係問下d舖頭今年母親節比上年賺多左幾多錢， d花今年靚定上年靚，酒樓食肆有冇多左客，你就知道，呢個都只不過係一個商業活動o者，跟本講o來講去，都只係經濟好與唔好既問題，唔通你以為母親節多左 人出街食飯係代表香港人多左人識得孝順父母﹖

不過又咁講，我又真係唔信有個記者夠薑去問：「阿老闆呀，你咁孝順，點解今日唔休息一天，走去孝順下o個個生你養你餵到你肥肥白白既阿媽呀﹖」

咪玩啦，你去北韓同古巴，睇下有冇人慶祝母親節﹖

女友去日本旅行，為期一週。

以佢而家既工作忙錄程度，平時我地兩個都係一個星期見得一次(每次數小時啦)，佢去一個星期旅行，其實都冇乜大分別(係冇得msn囉)。進入神交境界己經 兩個月。其實我就覺得唔係幾好啦，有女朋友好似冇女朋友咁。不過佢份人工作至上，佢做緊野你最緊要最緊要就係唔好嘈住佢，如果唔係佢就會同你講：

「(語氣兇狠)你打o來做乜野呀！唔同你講住呀，係咁啦，拜拜！」............隔離o個個唔知頭唔知路既，肯定會以為係ex打o來問佢拎分手費既=.=

佢好忙，我知。佢公司身邊好多餓狼，我都知。咪玩啦，正所謂n男寡女共處一室日日十幾個鐘仲要d雄性生物全部正值生理壯年，你話冇人對你有野﹖呃鬼咩！雖然我份人係有d蠢o者，不過，我唔係傻架。

真係令人憂心呀......

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

話說尋日係公司發生左件趣事，發生係小弟身上。

前因：
1. 小弟任職某大上市公司
2. 四月中公司appraisal，我既performance evaluation不過不失，算係中等。
3. appraisal過後傾續約問題，我開高價。當時老細面有難色。
4. 數日後我o個team有位做左好耐既同事請辭，而個project年尾uat，好明顯時間不足。
5. 四月尾個project放左個testing version出街。

然後呢，件事就係尋日個project manager叫左我去佢個位，然後同我講，話個testing version我負責o個part佢好滿意，決定加我pe......但其實我出既野，都只不過係佢一路要求我做既野。我絕對冇任何既enhancement。

咁，各位，你估唔估到係發生乜野事﹖

都係o個句啦，雖然我個樣係有d蠢o者，我唔係傻架......咪搵d咁低能既藉口俾我先得架......我最唔鍾意，就係d人咁唔老實。

睇左本economist幾個月
叫做識多左幾隻字
但係唔知點解對writing都係冇乜幫助咁=.=
尤其係organization同埋sentence structure

有冇人可以幫到我﹖

檸檬茶

今朝同同事食早餐，忽然醒覺，香港人飲檸茶既方法，真係別樹一格。

一杯茶，大約放三分一個檸檬入去。飲的人永遠手拎一支鐵匙，然後對住o個幾塊檸檬起勢咁篤。聲音跟地盤打摏的聲音一樣，令人心煩，好disturb。

外國人發明的檸檬茶，係係tea time既時候，一邊品嘗檸茶的清香和甘甜，一邊享受工作中一段簡短的休息，而唔係閣下對工作既拼搏精神既延續。正確的品茶方法，應該係係檸茶上面放兩塊薄薄既檸檬，茶必須熱，將陣陣既檸檬香味慢慢咁蒸出o來，加上檸檬浮面，也有一定的保溫作用。切忌猛篤，茶本身帶酸，再篤檸檬就酸上加酸。然後閣下為左飲落口冇咁酸就加糖，結果甜酸夾雜，都唔知係乜味。

你話唔係丫，篤爛左檸檬咪仲香d﹖而且好飲d丫。

問題係檸檬既份量杯杯唔同，落糖有人手輕有人手重，根本上飲o個個人，要識得自己沖杯檸茶至得。但香港地有幾多人有心機慢慢試究竟一杯檸茶應該放幾多檸檬篤幾大力然後再落幾多糖先至好飲﹖得閒去睇下隻洛鉬今日升左幾多仲好啦。香港人從來不會對一杯檸茶慢慢品嘗，細心研究，一拎杯茶o來就係篤，飲，然後同茶友吹一輪水之後伙計唔該埋單走人。於是女士們開始明白，點解香港既男人係張床上面永遠唔識情趣，其飲檸茶的習慣同床上運動既習慣基本上一致。於是諸位小姐們知道，點解香港男人大多數撐不過三分鐘。冇得救。

有人同你溝埋既凍檸茶就仲大鑊。除左味道怪之外，最重要就係個樣，熱檸茶用瓷杯裝冇咁覺，凍檸茶一般用玻璃杯裝，就好容易見到杯茶篤完檸檬之後，成杯茶連色都變埋。由清變濁，白白地咁，你聯想到d乜﹖仲有篤完檸檬，d核又四圍飄，用支飲管一啜，哎呀，卡住左。好喇，然後各位又係起勢咁吹支飲管，要噴番粒核出o來。你有冇諗過，呢個動作，同街邊阿伯四圍吐痰個樣，其實係一樣。

因此當你同個男朋友一齊去食tea，而呢位人兄又係咁篤杯檸茶既時候，你應該禮貌地說聲抱歉，然後拎起你既手袋，轉身走人。男朋友很疑惑，自己做錯了甚麼﹖兩杯茶岩岩先到，連檸檬都未篤完丫﹖小姐你又發乜脾氣﹖

女孩子心中暗嘆，男人，總是在細節上粗心，連一dd既品味都冇。對不起，you are not my cup of tea.

母：咦﹖你唔駛搵女朋友咩
我：佢唔得閒呀呢排，搵乜鬼丫
母：咁打電話呢，又或者msn
我：你估人地捱到點幾兩點係office就係同我做呢d野既咩
母：o下﹖咁你地散得未呀

......

媽媽，你講野，真係好encouraging

我隻牙崩左=.=

係呢d就快考試既「危急存亡之秋」搞d咁既野，我邊有時間整牙......

三軍未發，就吹斷左支帥旗，大鑊......

邊個求邊個

女友又訴苦，呢次係因為佢老細今日鬧完人，賺工作跟唔上進度，聽日開壇作法。

該project又開始趕到完，之前己有提及，不贅。

其實係好簡單既問題o者，就係點解跟唔上進度嘛，唔駛鬧人丫，我幫你答。

一 個project會behind schedule(即係跟唔上進度)，原因之一就係做得慢。一team人既整體速度，最optimal就一定係所有人係同一時間完成工作，而唔係阿a做完 阿b都未做完，要搵到呢個optimal speed，係manager既責任，而唔係走去鬧阿b點解做得咁慢。當然，optimal speed好難搵，咁可以阿a做完幫阿b手，總之唔好有人遊手好閒就得。

咁好喇，如果成team人都好忙，咁你都仲嫌慢﹖咁就唔係快慢既問題，而係就算快，都跟唔上進度，而你又好唔滿意。物理學基本常識：

時間x速度=距離

我substitute距離=成個project既進度，咁個問題就好明顯喇，係一定時間內達唔到指定既距離，就唯有增加速度，如果唔係就增加時間，或者兩樣一齊增加。時間同個客簽左contract唔加得，咁得番一條計，就係增加速度。

不 過如果你覺得你班o靚俾你鬧完一大輪之後工作速度就可以如你所願，咁你就太天真喇。我怕鬧完會弄巧反拙，打擊士氣，班伙計做得仲慢左，都時你喊都無謂。再 講，今時今日咁既市道，對一個programmer o來講，搵過份工話都冇咁易。咁既形勢你都仲可以隨便發火，只有兩個理由，一係你就買定你班o靚對你忠心耿耿，做到死都唔會走，一係你就唔愁請到人，呢班 走左你可以請過第二班人同你做。如果唔係，我諗你梗係做野做到黐左線。而家你做老闆要自負盈虧，打工仔可以今日交封辭職信，然後一個月滋滋遊遊跟埋d「手 尾」走人。而家邊個求邊個﹖

再講，時間x速度少於距離，除左時間唔夠，同埋做野做得慢，仲有第三個理由，就係距離太遠。你有冇計清楚，係一定既時間同大約速度(你成間公司既工作速度你應該可以大約預計到，預計唔到﹖你做乜野management)，你set俾人既距離係幾多﹖ 俾五秒你跑一百米，你跑唔到﹖你都冇鬼用既！ 哦，你咪鬧囉，你鬧齊我祖宗十八代，我都係跑唔到架啦，咁點o者﹖ 講o來講去，就係閣下係度發火鬧人根本無補於事。而閣下依然選擇咁做既原因，似乎係你除左鬧人，己經冇第二樣野可以做到。

所以傻仔，你聽賠錢啦今鑊。

科大MBA既application 就快dead
我仲未諗好報唔報

報，好貴，而家咁早讀都唔知有冇用
唔報，但係我對個course又真係ok有興趣

好煩。
------------------------------------------------------------------------------------------

話說五日朝九點半晚五點二既完美退休生活終於結束左(奠)

oracle既course的而且確係比m$既好
但係我地既manager們又貪心
逼左人地可以教成個月既野入五日度
搞到呢五日，條友教書好似飛咁快
咁你飛，我地咪又「飛」囉......
飛去好遠好遠既地方~~~

我唔明，點解d人會覺得將一個月既野壓縮到係五日內進行
係sth should be proud of
成班middle management真係冇一個人知道咁樣其實只係浪費資源﹖
真係經典......

Manager

女友今晚加班通頂，作痛苦狀

我覺得公司失驚無神有乜大件事要人ot甚至通頂先搞得掂，冇問題。但係開個project由第一日趕到去最後o個日仲要日日ot番幾粒鐘偶然仲要通下頂咁，就好離譜。

成 個project流流長幾個月，既然由第一日你就知道唔夠人手，呢個問題係predictable既，唔該你請人。要人日日例牌ot幾個鐘又唔補水，咁即 係話簽contract既時候o個句：「工作時間由xx到yy」呢句statement基本上可以作廢。而因此我有理由相信，佢亦都有可能以後大條道理單 方面修改僱傭合約而不作任何通知。

人唔肯請，然後要班伙計同你做生做死話完左project之後有bonus，同共產黨十年前話香港07年就會有普選一樣，呢d空頭支票，你唔開好過開。

project唔夠人用但老細又唔請人既理由講o來講去都只有一個，就係個做老細既諗縮數，諗住慳番幾萬蚊自己袋袋平安。

聞 說該公司更獲美國某名牌大學商學院深入研究並由該院教授發表有關研究報告。我諗緊，如果所謂成功企業家就係咁樣剝削員工，淨係識得玩弄財技，同埋拍下膊頭 同你講句well done扮哂關心員工，然後你做生做死幾個月佢就晚晚番屋企大覺訓。但願我呢世都唔會係一個成功既企業家。

阿們。

近日溫GMAT，心情煩燥。

睇英文，ok，反正睇本economist都冇中文版。

寫英文，ok，平時返工唔多唔少寫doc都要。

但係考英文，就真係pk，尤其係d題目條條既準則都唔同，之前o個條話句野太長，下一條自己又寫番句咁長既o來做題目，咁你即係想點﹖我點知你所謂idiomatic即係點樣既英文﹖又點先算awkward﹖無所適從。sentence correction......

睇怕今次都係兇多吉少。

又開始左搵工既生涯......目標係MT，management trainee是也。

不過唔知點解，間間公司都好鍾意問career aspiration。

我唔明，我話你知我既aspiration有乜用﹖aspiration呢樣野可以好空泛，又可以好實際。空泛既寫o來都冇用，但係實際既呢，香港地十個人九個既aspiration都係一樣。

你問我，我既aspiration咪就係越爬越高，有幾高得幾高爬到爬唔到為止，就係咁多。我話我target係邊度，一o來唔關你呢個recruitment manager事，二o來我而家先岩岩出o來做野，target會係講緊三十年後既事......而家講o來有春用﹖連自己想做乜都未模清楚啦老老實實。

我只係覺得，如果呢條友志向好遠大，我肯定香港既老細十個有八個唔敢請呢d人。冇乜大志既人咩﹖你又肯定覺得呢條友八成係條廢柴。咁你究竟想請乜野人先﹖你講俾我聽丫大佬。你話你想請個冇乜大志既人，你早同我講，無謂浪費大家時間。

你入間海味舖想買魚翅咪魚翅，粉絲咪粉絲囉，係要人地全部野攤哂出o來然之後你先話我知其實你係想買個漢堡包......

咪玩啦。

短篇數則

貨如輪轉

話說今日係一個同事既last day，同時亦有兩個新人加入。份工番左八個月，己經先後有四個同事走，同埋四個人加入。

正所謂「有人辭官歸故里，有人連夜趕科場。」做生意客似雲來故然係好，但係人事上週而復始，就實在唔係乜野好事。

新年就到，寫番張「貨如輪轉」既揮春係office，都幾應景。

-------------------------------------------------------------------------

巴別塔

電影巴別塔帶出既信息係，語言不通，會做成溝通障礙。

但現實世界話俾我知，其實就算兩個人係share同一種語言，依然會有溝通障礙。事緣係尋日我同老細講解個system同implementation既方法。你聽唔明唔係問題，但你又唔識，我講你又講，講講下仲要發老脾，同我講「呢d minor野我唔講喇」，然後又繼續講落去。

即係呢，要人起唔成座巴別塔，唔駛搞到人人講唔同語言既，你搞到其中一部分既人既耳仔係聾既，就己經搞掂啦。殺雞焉用牛刀嘛。

-------------------------------------------------------------------------

metal ink

從我老細係email有呢句: It is very importance之後，我就終於明白，佢英文咁威水既原因之一，係佢nouns, verb adjective同adverb混淆不清，溝埋一齊o來用。唔講唔知，原來之前佢試過出封email俾oracle，將meta link 打錯做metal ink。我聽到，當場噴左出o來=.=

金城武同顏聯武，唔知佢識唔識分。

油魚事件越鬧越大，滿城風雨。然後之前食左兩年日日食到痾油都粒聲唔出既「受害者」們紛紛跳出來，指責百佳以油魚充鱈魚「無良」。大老闆李嘉誠前日終於按捺不住，開記者會，up左句：又唔係得百佳賣油魚。

由此可証，香港既衰落，同回唔回歸，大陸大肚婆落唔落o來香港生仔毫無關係。

此話何解﹖

查油魚入口香港作食用用途己經有兩年時間。條魚食到痾，一個平常市民就算話唔識分油魚鱈魚，都應該會懷疑條魚唔衞生，然後寫信去食環署投訴。而唔係一面係茅厠度放煙花，一面詛咒班百佳，鬧完就當乜事都冇發生過。但係兩年過去，今時今日單野先爆出o來，你可以話淨係百佳既責任﹖講唔通既。歸根究底，個個怕事懶得去理，以後唔買咪算囉，或者自己之前食錯野o者。古有愚忠，今有愚信，盲目信任大機構大公司信譽良好，反而唔信任自己既感覺。

李老闆既回應都好有趣。大家覺唔覺得似曾相識﹖好似小學o個陣你傾偈上堂俾miss鬧，你都係咁樣回一句：「咩啵，又唔係得我一個傾偈，做乜淨係話我一個﹖」。咁你到底係想幫全班同學平反丫，定係想拉多幾個人落水等自己冇咁難睇，甚至掩人耳目﹖我相信係後者居多。丫，定係佢想轉做污點證人。睇o來李生都開始反老還童，當然，我係指智商。

於是你就睇到一個情況，就係香港由下至上，由最窮o個班到最有錢o個班，行為都越o來越反智。是非曲直不分，下次出街話俾人聽我係吳彥祖個表弟，唔知有冇人信﹖

尋日攜同女友去睇perfume。套戲想講既野略嫌有d深奥，不過我諗入得場睇既人，都唔會expect呢套係一套易明既戲。所以老實講，呢套唔係一套適合香港人既電影。都係「生日快樂」呢d淺白d既戲係香港較有市場。

最後的情慾鏡頭，女友覺得太過刺激。我反而覺得冇乜野，反正場戲想表達既野好明顯。而同時好明顯地，我冇明顯既生理反應。咪就係咁簡單囉，駛乜咁大驚小怪丫。大不了咪當睇齣三級片囉，你又唔係未成年。

至於套戲既內容......唔講啦，反正都真係太難，有興趣自己去睇啦。

-------------------------------------------------------------------------------------

熟我既人都知道，小弟平生最痛恨既一種動物，叫做親戚。

當然不能一概而論，不過我覺得好既親戚，我一般都唔會當佢係親戚，一般我歸類為長輩，平輩等等(晚輩﹖羅監製都未肯俾人叫uncle，我點會有晚輩)。

話說尋日晨早八點幾，某位自遠方來既親戚打o來搵我阿媽，叫佢陪佢地去澳門。咁鬼早，尋晚又唔係早訓，梗係話未起身唔去架啦。

親戚：「喂，你o來o個陣我都帶你週圍玩啦！」
母親大人唯有死死地氣同佢地澳門一日遊。

即係我覺得咁，你話唔識路想搵個人帶路，我可以接受，你講到好似我阿媽欠左你咁，算點﹖番o來幾日，日日都出去食飯，日日自己都唔識俾錢請下人，邊有d咁pk既人架。

於是你就明白，點解紅樓夢會有劉姥姥呢個角色，而作者冠以「母蝗蟲」既稱號。不過可惜我唔係住榮國府既，冇咁有錢俾你日日係度食呢樣拎o個樣，日日飲飽食醉滿載而歸咁。仲要大番我轉頭。好，咁你以後唔駛旨意我會搵你。

富在深山有遠親﹖你未窮到底褲都冇得著，d遠親都仲係成個山頭咁多呀我話你知。

星期五既meeting有exhibition session。

通常呢d exhibition，我都會扮哂有興趣咁四圍睇，然後搵一兩個真係有興趣既問下。一o來睇下岩自己心水既野，二o來，我鍾意睇下d sales 係點樣sell野既。咁我行完一round之後，就走左埋去一個sales度，問下d printer對我print d cable圖有冇幫助(係serve purpose 1 既)。

然後呢位女sales(抱歉，實在難以用一個「靚」字o來形容佢)首先略帶婉轉咁表示做唔到，然後介紹我用photoshop執好張圖(我不如都試下咁樣recommend我老細)，跟住開始介紹佢身後面既兩部hp出品既printer既性能，兩部有乜分別，仲要講埋最難print既人樣呢兩部printer都同樣出色。最後叫我打開佢地入場派o個份category，原來呢位小姐既芳名就係第一頁。

我話我print cable喎......

都怪我年少無知，以為個樣唔得但係企到咁前做sales既，應該有番咁上下料子，唉......其實佢知唔知，如果解決唔到我要解決既問題，就算你身後面o個兩部printer有翼識飛，我都係唔會買架......

其實你不如第一句直接話我知做唔到，咁咪算囉。你花咁多時間係我呢個聽左幾句己經對你舊product完全冇興趣既人身上，係浪費大家時間。你係咁同我講，亦都錯失左sell其他potential clients既機會。sales呢樣野其實好簡單既o者，你幫到我，我咪幫襯你囉，你幫唔到我，就無謂浪費時間啦......

我懷疑finally會有幾多個人真係會contact番佢

小弟今日中午去左尖咀attend一個seminar

話說去到有一個鐘既buffet(free)時間，咁講明係buffet，梗係任食架啦。不過唔知點解，有d人就搞到好似pizza hut既一碗過沙律咁，疊到層樓咁高，然後心滿意足咁走埋一面慢慢開餐......。阿生......又冇人搶你既，d野食出極都有，o個度咁鬼多人，你咁做係想話俾人知你係pizza hut訓練有素丫，定係想話俾人知你老細好刻薄你，你係公司冇啖好食﹖

都算喇，到三點放個break，酒店又有一d cheese cake同點心拎出o來。喂，照計你頭先咁樣食法都食飽啦。偏偏又繼續冇蝕底，一隻直徑15cm既碟，你走去先放十件chesee cake(每件2cm *5cm)，然後上面再放點心，又係度塔塔塔塔塔......唔怪得娘親成日話我身在福中不知福啦，乜香港饑荒咩而家=.=

聽talk既時候又係好搞笑。話說坐係我後排右側既兩條友(佢兩個係坐埋一齊，唔知係識得既，定係真係物以類聚)，右手邊o個個後生仔全程係咁hold住一個笑樣，我唔知佢係咪係度練緊點笑，定係做乜，仲要係露齒笑，而且近乎定格。想像唔到﹖你睇番阿sa係d報紙面前擺pose既時候點笑就知，但呢個笑容套係一個聽緊talk既男仔面上......

佢隔離一個中坑則一面驚訝狀，兩眼發直，口部微張，雙手放大脾，雞咁眼望住個講員。

俾著係你，見到d咁既gag友，仲要無獨有偶，打孖咁o來，最最難得，係呢兩條友個表情hold足全程五十分鐘(之後我轉左去第二個track，冇見到佢地)，你會點﹖我當堂就忍唔住笑......

d人係咪有病架......

女友是個很有趣的人，她在日記打以下一句

「TUM 我一d 都唔難, 但係要知道用咩/點樣黎tum 我, 呢樣又真係幾難~ 呵呵~~~~」

正如我話：

「中六合彩一d都唔難，但係要知道買邊幾個number先中，呢樣又真係幾難~呵呵~~~~」

真係好鬼cute

唔講唔知，原來仲有兩個月就選特首。

但見市面風平浪靜，絲毫沒有選特首的氣氛，與彼岸台灣選總統的情景差天共地。曾特首得中央祝福，氣定神閒不在話下。奇在對手梁家傑除了偶然叫陣外，無甚作為，只是默默耕耘，籌募經費，彷彿選特首只係比錢多。或是偶然抨擊特首施政，其實亦只是身為一個立法會議員的份內事。

然則選特首，最重要，最應該宣傳的一點，係閣下的政綱。然而仲有兩個月，全港市民連一點皮毛都摸不到。對普選的日期固然沒有提及，其實民生項目，諸如最近鬧烘烘的內地孕婦問題，禁煙問題，空氣污染問題，食物衞生問題，或遠大一點的香港前途問題，經濟定位問題等等。全部可以討論。但梁律師宣佈參選特首以o來，從未公開討論，或在公開場合講解自己的施政方針，然則閣下憑甚麼要該八百名選委投你一票﹖

要討論，為甚麼一定要等曾蔭權出席先可以﹖閣下定下日期擺下龍門陣，佢唔o來，威信就先被挫了一層。可以做既野有好多，而唔係係立法會度講一兩句就算，然後被傳媒渲染為「短兵相接」，此時此刻，距離決戰之日日漸逼近，你仲慢慢短兵相接，知唔知乜野叫兵貴神速﹖「其用戰也勝，久則鈍兵挫銳」，偏偏你反其道而行，夠選委支持你之後就冇哂下文。一味係度掛住籌款，難道你係想彰顯閣下既撲水能力﹖

雖然香港係個金錢至上既社會，但若論籌款能力，露底既yumiko，銅鑼灣既丐幫，同埋香港各大學既校長既撲水能力亦不俗，唔通你係想鋪定後路，選唔成特首都有番份秘撈，幫補下公民黨既支出。

不務正業，掛住做埋d唔等駛既野，你同我老細有乜分別﹖

天下間最令人覺得奇恥大辱既事，莫過於俾一個弱智既人話你弱智，而事實......你呢次又真係弱智左。

事緣小弟今日開會既時候交份report，我一路同department manager交代份野有d乜，我pm一路睇一路睇......然後用支原子筆係上面改......

我打左can做cannot......梗係打o個陣恰緊眼訓。真係俾佢吹脹。我o個陣真係想同佢講，你咁得閒check我份野，不如你平時打email o個陣用個word check下自己d grammar先啦。你見我份野有錯mark低唔緊要，但最激氣係佢竟然真係係上面打個交叉，頂！

跟住仲要卒我，話我份野冇寫乜冇寫物。但其實份野係有，我成段野講d code點用點解用同埋alternatives係乜，佢就睇都唔睇，一眼望落去，就係咁話我冇寫，然後要我出個table form既。

大姐，我o個段野都係o個五六行o者，你睇埋先卒我都未遲丫。我出o個份叫internal document，係suppose寫得detail d，第日有番個reference，咁呢d野有得elaborate下既，我梗係寫一個paragraph架啦。

喂，你話要俾張list 人地o者，你冇話要我直接出張list俾你就咁俾人丫嘛，仲要係你話要我consolidate埋人地o個份，人地o個份都唔係table form丫，由頭到尾都冇叫過我出table。我早就講成份document係總結成個plotting，而你o個陣冇異議。

跟住仲要教埋我點寫個table：「拿，你一邊就寫objective，一邊就寫用過邊個object或者method啦」。唉，我想講，o個d unofficial code東用一d西用一d，點執到咁有系統俾你﹖你講就梗係易啦，有d code，我用左都唔知點解係咁用既(因為冇document，我淨係知有咁既method，而個method試出o來係做到)，平時又唔跟，開會就係你老細面前卒我，即係點﹖

我不知幾想學吳彥祖咁講一句：「想我出table之嘛，我識出丫Diu」，我駛你教番我轉頭﹖不過我又唔debate啦，「哦」

都唔知係咪睇過我日記而家走o來玩報復。一時唔偷雞就做保長。

靖康恥猶未雪，你睇住o來。

話說尋日受老豆之命，交表申請居屋，係屋企隔離既嘉峰台，母親代交。

點知當在下係公司做做下野既時候，母親大人打o來：

「白行一趟呀！」
「點解﹖我填溜左野﹖」
「唔係呀，你入息過左上限呀」
跟住話俾我知原來個人入息上限係萬一蚊。

唔係呀話......我未加人工架喎。唔怪得而家d老細咁手緊死都話我地d畢業生人工高啦。我唔明，萬一蚊一個月，點供樓呀﹖你唔食唔用，銀行唔收你息，今期居屋最貴o個層係一百九十八萬，咁樣供法，岩岩好十五年供完。十五年供層樓唔出奇，但銀行唔係開善堂，閣下亦都唔可能成份人工一毫子都唔用。咁樣計法，閒閒地供三十年以上。咁樣計法，得幾千蚊人工既人咪即係供你層樓供成世﹖

定個咁既入息上限，孫明揚你有冇腦架﹖萬一蚊做入息下限就差唔多啦。你咁即係分明鼓勵炒樓o者，分明就唔預d人會供哂用o來自住。咁叫乜鬼居屋﹖不如叫炒屋啦。雖然其實我係唔想抽既(自己搵錢就廢事用老豆架啦)，但見到香港政府咁弱智，就真係忍唔住。正如我見到我老細既英文一樣會怒不可遏。我第一憎人煩，第二就係憎人咁L弱智=.=

-------------------------------------------------------------------------

講起又講，老細呢期係咁開會，唔得閒出email(雖然forward既唔少，但佢都係加FYI三隻字咁大把，無傷大雅)。令在下既email box乾淨左好多(少減好多垃圾英文嘛)

為左令工作環境更加整潔，於是在下上星期執左我office o個張半年o來都冇執過既枱面(由於之前怒試printing既關係，勁亂)，乾淨左好多，但係丟滿左成個垃圾筒(可想而知幾亂)。

然後同事走埋o來：
「咦﹖你執野走喇﹖」
「o下﹖張枱亂得滯，執下佢o者」

=.=

繼「邊青」後，最近流行「隱青」，隱蔽青年。

報載香港隱青人數約萬八，太保守了。報紙定義隱青係日日打機，唔多出聲，冇朋友，唔番工番學既雙失青年，就有萬八。如果包括o個d放假唔會搵下朋友，番學恰眼訓，放學拿拿臨趕住番屋企打機既人(其實咪同隱青一樣)，在下估計，至少有十萬。

很多﹖這是一個正常的數字，不代表這一代學生質素下降。正如二氧化碳係工業革命既必然產物，那麼在今天ps3, wii賣個滿堂紅既社會，隱青數目增加，亦係必然既結果。也不關甚麼教育不教育的事，正如政府年年勸人吸煙危害健康，但吸煙的人依然照吸，不吸煙的人永遠不會吸。這種會上癮的行為，養成習慣，要改就很難。其實辦法不是沒有，當年新加坡政府不想國民食香口膠，索性就不准香口膠入口。

但香港政府不會這樣做的，遊戲機市場龐大，一但禁入，深水涉幾百間遊戲機舖要執笠，然後幾百個古惑仔樣的深水涉遊戲機售貨員一齊上街遊行，喊打喊殺，一路殺到禮賓府，舞刀弄槍，可以預料，政府又會以「再作詳細資詢」或「會對條例作出檢討」一類廢話塘塞過去。

說來說去，香港人習慣跟大隊行動，學生們見左右隔離日日講打機，於是又走去打機，見人講波又走去睇波，隔離o個個話想去厠所，於是又拉大隊去厠所。連禁個煙也搞到不倫不類，特首如果夠薑，乾脆就全面禁止香煙入口，但偏偏閣下又唔捨得d煙草稅，結果搞成咁。李光耀可不會立一條無聊法例，禁止新加坡人在室外地方吃香口膠，這一點點魄力，雖然困難，卻是成為一個出色的領袖，最緊要的元素。

於是港府看見鄰近的台灣大陸日本等地亦到處都是隱青，但遊戲機繼續賣，政府稅繼續收，不亦樂乎，反正都係未來多十幾萬個有potential拎綜緩既人o者，唐唐理財有方，冇所謂啦。

今日在下既pm所做既事，嗯......我真係死心架喇，唉......

碧咸走去美國踢波，簽約五年，正式退出歐洲球壇。

同時亦提早証實報紙o個d07年預測係一味9up，佢地唔夠一個月前話，麥卡倫會搵番碧咸入國家隊。冇可能啦，邊個會搵一個係美國踢波既人入英格蘭國家隊﹖其實明眼人早就知道，由碧咸離開曼聯開始就注定冇運行。你係曼聯踢左咁多年波，所有技術同組織都係o個度學番o來，西甲踢法同英超完全唔同，你一個三十歲既人，點適應﹖

一心以為自己有天份，去邊度都撈到世界，咁遲先走，遲喇。呢個世界有好多野，唔係你個人夠勁就可以做到。想另謀高就，覺得同老細唔夾，要走趁早啦。

所以各位女士們，想睇碧咸好趁呢半年睇埋佢喇，以後冇得睇架喇。除非你移民去美國啦。

老實講，呢條友斬波，又真係幾有水準既......

---------------------------------------------------------------------------------

今日番工火都o來，事緣今日係公司打緊份report，conclude番呢半年做過既野。在下o個位偉大既project manager走埋o來，問：「咦﹖做緊乜呀」，咁我話我做緊份plotting既technical document啦。跟住：

佢：「o下﹖你唔好咁樣一份report俾我喎！我唔會咁樣出份report架喎。」

我唔明，既然plotting係你口中經常be described as a major part of the project，點解唔可以出番份individual document呢﹖份野係for你俾user做reference，discussion，internal 既gap analysis同埋future maintenance架喎。不過我冇同佢debate啦。於是答左一聲：「哦」

佢：「係呀，拿，你同阿xxxxxxx(經加密處理)consolidate下個report先一次過send俾我啦。」
DLS啦，我同我同事做既野九成以上毫無關係，con乜鬼solidate o者，你咪聽到上次開會講起我地都有用unofficial api就以為做既野一樣先得架，佢做placement，我做plotting。兩樣野大纜都扯唔埋，亦都唔會拿埋一齊o來同user傾既，又唔係要出project report，合埋做一份report做乜﹖

再講啦，就算你真係想consolidate(佢永遠只識得用呢個字)，喂，呢d野，好似應該係你做架喎。我知你諗乜架，我地同你combine好哂，你睇下份doc冇乜野漏就睇都唔睇放俾user，然後自己就乜q都唔駛做，人地feedback番o來有乜問題咩，你又搵番我地o來問。你做野有幾認真，我睇你平時d email錯漏百出，大家都心知肚明啦。

你話你平時好忙，日理萬機，咁我同你做埋其實都冇乜所謂，但你又唔係。拿，唔係我唔了解佢既工作呀，係我其中一個同事(番左三個月工唔夠既，唔係UNDER佢既同事，坐係佢附近)話成日就聽到佢係個電話度傾私事。連平時一d個project既management decision佢都要我地o來justify，我地send俾佢要等佢comment既issue，佢真係夠膽死就咁forward番出去俾條team等成team人o來comment，要同同事夾既野，我地早就傾好哂先搵你啦，唔通我仲旨意你會幫到我咩。

尋日開會一開始，佢老頂問佢上個星期開會話做既野做左未，「哎呀，未喎」，diu啦。不過呢句野我冇講出口啦

「哦」

Price and Value

市道暢旺，轉工活動自然頻密。皆因容易叫價，而老細係公司搵到錢既時候，亦都比較願意出高人工請人。正如個股市一樣，隻股越升越貴就越多人買。但同樣道理，當市道差o個陣，第一批俾人炒既，都一定係呢班人工高既人，皆因做老細既由此至終，心裏面一直覺得呢堆友「物非所值」。

所以我唔會係呢個時候搵工，正如我唔會係呢個時候買入隻2628，無論人地幾咁睇好。

今日同好耐冇見既朋友(及朋友的父母親)食飯，回程時跟某位長輩講起前途問題，佢話以前做野比而家我地做野辛苦好多，我冇反駁(亦冇得反駁，在下而家份工，實在得閒得過份)。我只係覺得同讀書一樣，以前讀書辛苦，因為學位太少，而家讀書辛苦，因為學位太多。你覺得而家既學生踏出社會做野，邊個辛苦d﹖觀點與角度既問題o者。

席間講起，原來好多人都覺得在下而家有份咁既工好幸福。老實講，岩岩畢業，入間大公司，人工高福利好，我又實在唔識點樣向佢地解釋我既處境(未見識過在下老細既英文嘛，我明白)。或者我細個o個陣真係應該放棄數學學好英文，個個都話我把口最岩做律師，唉......

我開始發覺自己有d神經錯亂。

我唔係講笑。

東諗d西諗d一向係小弟既壞習慣之一，而一多野諗(多topic I mean)，你就好容易可以想像得到，我個腦入面幾亂，好似cpu行multi-process咁......

我諗我終於明白，點解d人話人地神經病，會叫做short short地。

當全香港女士鍾情於瘦身之際，歐美等國卻己經開始發覺瘦身潮的禍害，考慮立法打擊。一向被認為最能展現身段美態的模特兒行業首當其衝，體重不達標的，不准行cat walk。

實在係天下間所有男士既喜訊。皆因下次閣下如果不幸遇上女友係隔離依依哦哦話自己幾肥幾難睇然後老屈閣下俾幾千蚊贊助佢成立既，美其名為「女友纖瘦窈窕身段美培育基金」一類既呃街邊阿婆種金騙局既時候，你可以大條道理回敬：「今時今日仲講瘦身，out啦」。然後再同佢思想教育一番，講述達文西筆下既仙女女神，個個身材豐滿，有前有後，從來冇一個骨慘慘既女神既，嗯......除非畫餓荒啦......

其實自古到今，人類對女性體態美既標準都一致既，簡單講，就係「中庸」。應大則大，應細則細，就為之靚。肥到成舊車tie咁就唔好問喇，瘦到冇肉既又實在冇乜睇頭。買舊叉燒都識揀半肥瘦架啦，更何況人﹖

丫，偏偏香港人好鍾意以篇蓋全，人地一話「唔係瘦就代表靚」，成班肥婆就發哂癲咁。話說有次我係pantry同人吹水傾開呢個問題，有個阿嬸行過聽到，即刻就問我：「咦﹖咁我咪即係好靚﹖」。我呆左一秒鐘，然後向呢位女士展示一個禮貌性既微笑，放低水杯，轉身入厠所。咪玩啦，先不論體態，閣下個樣十足十一個肥版既台灣副總統呂秀蓮女士，靚﹖喂，我話瘦唔代表靚o者，都冇話過肥就代表靚架啵。

都係o個句啦，靚唔靚，搵盤水照下自己咪知囉，駛乜問人丫。真正既靚女，唔會四周圍問人自己靚唔靚既。李嘉誠會唔會四圍問人自己係咪好有錢丫﹖所以嘛，女士們，俾d信心自己啦。

今日行街同友人傾開MBA既問題。據講讀呢d course，同working experience有好大關係，理論上做得越耐野，讀呢d course就越beneficial。於是我又開始有d猶疑，應唔應該讀。

其實programming我真係有興趣。但係香港做資訊科技既困局，就係除非你係老細，或者你入到一d國際性既大公司諸如google, microsoft等，否則，就肯定冇「錢」途。而係香港，冇「錢」途，人地話知你係做ceo，定係個打雜架啦。相反係美國，做engineer係最有前途既工作，你就明白，點解人地入大學，個個成績最好既都走去讀engineering，偏偏香港既高材生，就全部走去讀finance，accounting同埋insurance。正所謂良禽擇木而棲，d考到咁高分既人，點都唔會係個白痴o來既。

做老細嘛......有錢先講啦，no money no talk. 唔會係我五年內會做既事，細細地一兩個web可能會搞下既。而且我覺得，唔知做老細辛苦既地方，根本就做唔到老細，都係學多d野先諗啦。
呢幾日花左好多時間，就係諗呢d野。嗯......我唔可以再俾自己咁冇目標落去。

07年大計

進修：
1.首要學好英文，呢樣唔駛講。
2.其次搵多個語言學(如果英文進度良好)，maybe德文，or西班牙文。

工作：
1.如果MBA適合，我會讀，otherwise應該會轉工，甚至轉行。老實講，呢個問題我諗左好耐都未諗好。但有一樣可以肯定既，就係我唔會做sales。
2.如果轉行嘛，其實我諗過應徵編輯(我渣筆搵食都應該ok丫)，或者做記者(唔好娛樂版就得喇)。

愛情：Well, 尋日番教會有人咁樣問，我心諗，小弟愛情一帆風順，女友不知幾咁貼貼服服千依百順小鳥依人三從四德兼之溫柔賢淑體貼(偶有暴力行為)高貴大方典雅。同隻滙豐一樣，係可見既將來都唔會出問題。冇乜plan可言。

大約就係咁。

-------------------------------------------------------

連日o來既老細英語專輯得到各界人士熱烈回應，友人質疑，其人之英語水平，係咪真係差到咁既地步。對此小弟有必要澄清：喂，老老實實丫，咁既grammar，你點作，都作唔出啦，係咪﹖我自問英文都仲未到呢d咁反樸歸真既境界喎。

我好煩，有冇人可以俾意見我：

讀MBA有乜用

對小弟連日o來張貼老細英語範句，老豆話有違厚道，叫我唔好貼。反正睇左咁多，大家都大約知道我team leader既能力水平去到邊度，而非小弟番工俾人鬧完(btw佢從來唔會鬧我，平心而論，佢對我唔錯)條氣唔順而故意中傷，目的己達，況且再寫落去，好快就可以存夠數目，出番本「港人英語罕見文法錯誤大全」就唔係幾好啦。所以以後一於減產啦。

寫左幾日佢既英文，令每日小弟番工既其中一件「工作」，就係幫佢做proof read，睇下有乜野mistake咁。反正考GMAT都好似要考proof read，當溫下書囉，又真係幾好既反面教材o來架。雖然人地d題目，照計又冇理由錯得咁離譜既......唉，搞到我而家睇佢d email，一封mail幾句英文冇grammatical mistake，就好似少減d野咁，心情有少少失落......咁樣諗會唔會好心理變態﹖

同埋亦告誡下各位朋友，平時得閒冇乜野做既，就溫下英文啦，唔係第日閣下有幸上位，做人manager，但係就寫一手咁既英文(我諗真係無出其右)，係會俾人係背後笑話架。所以話而家d小朋友學唔好英文，d做老師既扭盡六壬都motivate唔到d學生去學。計我話好易o者，拿，你又dup番幾句呢d咁既經典示範英文句子俾d學生睇，等佢地笑番餐懵既。然後話俾佢地知：「o拿，學唔好英文，大個仔就係會咁樣俾人恥笑架喇。」，細路仔嘛，最怕就係冇面架啦。

事實擺在眼前，妹一睇完呢d英文，二話不說，就即刻叫我搵過第二份工，你就知一個人既英文程度，係一個幾咁重要既image。其他乜野management skill中文計數電腦等等技能(雖然我都唔覺得佢呢幾方面係好)都己經唔駛睇。証明你去見工，或者sell野，幾時都係一口流利既英語，就己經夠哂impressive，其他方面不過不失，基本上係香港呢個地方，己經夠你名成利就。

正所謂為人為己，學好英語。

P.S to妹：改乜鬼丫，見到呢d咁既英文，一個大交叉打落去啦。

------------------------------------------------------------------------

枱面而家放左兩盒chocolate，一盒係Godiva，一係合Feodora，真係幸福。Thanks pie and fiona.

------------------------------------------------------------------------

老細棟篤爆笑奇趣英語劇場，嗯......本著小弟係一個孝子賢孫既關係，老豆講野，我冇理由唔聽既......改為少d同大家見面啦，不過反正今日都揀左出o來，唔差在post埋。

1.Is it okay for tomorrow of Friday?

2.Please find attached the notes of meeting of the caption for our reference and follow-up. (你知唔知佢attach既係乜=.=)

有學生組織要求全港中學生選06年十大新聞，組織發言人說，有國際新聞入選，表示香港的中學生開始有了一點點「國際視野」。

原來所謂既國際視野，就係填選十大新聞既時候，看到幾項國際新聞，懂得在上面打一個tick。

咁樣假如有個三歲細路係商場內大吵大鬧要去食麥記，而嫌酒樓老土，唔肯去同阿公阿婆飲啖茶食個包，算唔算又係有國際視野﹖所以睇o來唔單止係一班中學生，連一大班既在職人士，教育專業，其實都冇乜常識。不過當然啦，他們不會又同自己搞一個咁既調查，話自己冇常識既。

懂得國際新聞，是一般中學生應有既sense，而談不上國際視野。反過來說，國際新聞唔入選十大，亦唔代表中學生冇國際視野。既然係選舉，學生有選擇既權利，人地選完出o來，你唔滿意佢地既choice，然後話人地低能，咁你唔好問點解香港冇普選喇。

所謂國際視野，唔係識幾單新聞，去過幾度旅行，知道幾處名勝古蹟就可以有既。只有當人開始感到在身處之地太過狹小，感到不足，有必要走出去見更多，識更廣，然後一點點認識外國歷史，文化，語言，民生經濟等。有呢種自覺，對呢個世界有一個概括既認識，呢個人至算係開始有國際視野。所謂視野，只係講緊用眼睇，係一個開始同動機。閣下望過喇，睇夠喇，覺得有興趣，再深入研究，或用手摸，或用耳聽，逐步認識，越o來越有知識，然後有見識，繼而日積月累，沈澱成智慧。會睇國際新聞叫有國際視野，咁係咪見過自由神像就知乜野係「自由」，去過費城獨立紀念館就知乜野係「獨立」﹖

至於話之前幾屆冇國際新聞入選，我想講，只係前幾屆d人唔正常，唔代表今屆既人特別好。正如你放堆屎同一個蘋果係個細路前面，o個細路識得避開舊屎，揀個蘋果o來食，你會唔會因為咁而讚個細路聰明，有前途呀﹖你話唔係呀，佢之前會揀食屎架！喂，咁係佢之前精神有問題o者，唔代表佢而家就係個叻仔架，係咪﹖

再講啦，十大新聞，排第一係鍾小姐俾人偷窺，排第二係「巴士阿叔」短片。講o來講去，最吸引中學生既，都係偶像，同埋網上既無聊hot topic。有咁on9既教育機構，做d咁白痴既調查，然後得出咁低b既結論。要求香港中學生有國際視野，談何容易。

原來而家香港，選唔應該選既叫正常，選應該選既叫天才。

哀哉。

-------------------------------------------------

又到每日英語示範時間，今日例句如下：

1.I would consolidate your some of your drafted documents.

2.Attached here the draft for Introduction. You may need to supplement to the content after I consolidate what I ready have.

3.The new client would target to residence at standard PCs.

4.It may be benefit if you put forward any known/possible problems to the working parties.

老細神機妙語，非你我所能預料......

大陸旅客橫掃全球，基於「文化差異」，外國人眼見中國藉遊客，紛紛避之則吉。於是也連累黃皮膚的我們，在外地，其實也被歧視。

其實對香港人來說，也不算是甚麼新聞了。中國開放自由行己有數年，來港中國旅客只有每年增加。大陸人的劣行己經見識了幾年，無論如何也不能算是新聞。只是敲碎法國羅浮宮的玻璃金字塔，也實在太駭人聽聞，唔知係咪睇左達文西密碼，一時手痕想睇下入面係咪有寶物。又或者呢位仁兄係大陸係玩雜技心口碎大石既。但閣下力大，都冇需要係外國表演丫。你咁勁，下次遊埃及，不妨都試試敲碎那個胡夫金字塔，將我國中華武術發揚光大，技驚四座，彰顯中國與外地之間的「武術文化差異」，我話你好野。咁多樣投訴，「用大面額鈔票」係唯一我同情既，因為去外國旅行，又真係冇人會去銀行度換散紙，旅行要方便架嘛。

不過差異歸差異，香港人從來唔會同錢作對既。閣下冇禮貌，做生意既good一聲咪吞左佢囉。隨地吐痰﹖咪罰錢囉。總之閣下次次o來親都駛成幾十萬，我又冇理由斷自己米路丫。錢可以解決既問題，就唔係問題，做為香港人，大家都係黃皮膚，食物用水又依靠祖國，呢d問題，唯有用「文化差異」，食粒止痾丸，忍一忍先啦。

幾年前經濟不景，大陸一話開放大陸旅客來港，大家歡呼聲四起，係咪多謝阿爺關照。但而家香港經濟復甦，惡果漸現，大家不妨訪問下四周圍既香港人，仲有幾多人係想繼續自由行既﹖無謂講答案喇，大家知啦，我中華民族既感情一向都係比較易受傷害，陣間諗住番大陸玩下散下心既時候好似程翔咁無端端俾人屈你坐番三五十年監，你都咪話唔過癮。

下次收人著數之前，就要諗清楚先喇，咪係唔係都多謝先得架，呢個世界，no free lunch既。
零七年新年願望，我想......大陸可唔可以取消自由行。

------------------------------------------------------------------------------------

今日又要同大家分享幾句英文。此part得以日日同大家見面，實非我所願，罪過罪過。

1.Please note we need to provide the information be tomorrow afternoon.

2.The new system may be delivered as late as 2010.

老細英文千秋萬載，一統江湖，善哉，善哉......

小女孩除夕夜被男友甩掉，一時睇唔開，跳樓自殺。

雖然小弟從古到今都不反對自殺，但自殺應該係自私既行為。自私既行為，就唔該為下自己啦。為咁樣既男仔自殺，唔值。

作為一個男人，最起碼既風度，就係將講「分手」呢兩個字既權利，留番俾o個個實際上被你拋棄左既女士。男人要拋棄女人手段有好多，可以故意疏遠，可以係節日唔買禮物，但最後呢兩個字，是女人最後的一點點尊嚴，作為男人，應該將佢留番俾一個你曾經愛過既女人。

選男朋友可以隨便找個好玩的，但如果閣下諗住同佢有將來，而唔係「玩玩下」既話，風度、內涵、品味、氣質，此四項缺一不可。就像女人天生鍾意一身Gucci LV等名牌一樣，一個風度翩翩既男人，絕對係全世界女士一致最擁戴既一個brand name。就算此時此刻沒有，都要有potential，而唔係注定白痴一個，俗語所講「人蠢冇藥醫」o個種。

DLS，大除夕夜玩分手﹖係一個講到明係玩浪漫既節日度講「分手」兩個字，己充分顯示出其人之「冇大腦」。正如電視新聞度有個大波鬼妹大除夕係全香港人面前講句「恭喜發財」一樣，得啖笑咪算囉！同佢認真﹖傻左咩﹖

再講啦，一個男仔話同你分手，你就唔好理佢口up o個千千萬萬個理由喇，男人變心既理由可以有好多，心淡既理由都唔少，但要佢想「分手」，得兩個理由：

1. 你由朝到晚三十幾個電話係咁煩住佢，令佢連同人講句野既時間都冇。
2. 佢有另一個。

要記住，除左你煩，同埋佢己經有另一個女朋友(注意，唔係鍾意左另一個，男人既天性就係騎牛搵馬，未搞掂第二個之前，就冇足夠誘因令佢即刻等都等唔切要係除夕夜飛起你)。好喇，你話你真係好L煩，一日電話打個天昏地暗，咁你跳樓都尚算係為呢個世界帶o來一絲既平靜。但如果唔係，你為左一個毫無風度內涵品味氣質既男人跳樓，就真係唔抵喇。仲要係變左心既男人，邊有得追番架﹖

食chocolate係種享受，食粒chocolate發覺變左味，就拿拿臨吐番出o來啦，再食落去都冇意思。硬係要吞埋佢落肚，然後搞到肚痛要入廠，你話為乜呢﹖

各位女士，閣下鮮花一朵，天下間夠格陪襯既香草綠葉一地都係。為左一篤牛屎而跳樓﹖唉，小妹妹，安息啦，下世帶眼識人喇。

----------------------------------------------------------------------------------------------

Well，今日有加長版，蓋因小弟老細今日又mail出驚人，又有警世豪言英語面世，實在值得大家揣摩學習：

1. You may check my availability via making appointment via Calendar. I would not be available on the following time slots:
2. If you can't get an agreeable time slot. I may give up the Oracle Web conference on 9/1 Tue.
3. I am not sure what "Enhancement Charge" included.

Well......

此game肯定係07年度NDS第一大作：

http://www.gaforum.org/showthread.php?t=151982


NDS萬歲

新年流流，我病完就到女友病，真係無奈。

well，話說頭先落樓下同老豆食完晚飯之後，去超市買野飲，老豆買左一pack8罐裝可樂。番到屋企，小弟盡下孝子既責任，倒俾佢飲。

佢：咦﹖你落左檸檬呀﹖
我：你覺得我會咩(我呢d咁懶既人，倒埋俾你己經仁至義盡)
佢：點解會有檸檬味架﹖
我：有咩﹖(飲一啖)唔覺喎，可樂唔係咁既味既咩
佢：梗係唔係啦！

跟住一睇，原來成pack都係檸檬味可樂=.=，兩條友都懵既。

Happy New Year la各位。