隔壁貓叫

一天出兩篇文實在不是我的習慣，但意想不到，我也有寫《隔壁貓叫日記》的資格的一日，實在不吐不快，因此破例一次，敬請原諒。

由上週日開始，不知那位親愛的鄰舍的家中，就傳來陣陣的叫春聲。

依聲浪推斷，應該是在播放A片。至於是哪一個國家的作品就不得而知了(這是當然，我又唔係專家)。如是者過了四日，今天，娘親一邊看電視一邊奇怪：明明電視播緊處境劇，點解無端端會有人叫﹖(我媽真是純情)這時，隔壁的一位先生終於按捺不住，出聲呼喝：「喂細聲啲呀！」，於是那位鄰舍(為方便起見，吾命其名曰貓太郎者，因為依常理推斷，應該是獨居的男人，如果是女人就太變態了)就掩旗息鼓，我們都得到了耳根的清靜。

個人覺得，一個男人愛睇av唔係問題，但，唔駛話哂俾全層樓知嘅。你唔顧男，都顧下其他女住客丫。你話係你自己做就話冇得隔音啫。睇電影，加個耳筒都得掛。

嗯，會密切留意事態的發展的，為大家隨時匯報。

愛國與賣國

MSN上越來越多人改名叫「我愛中國」了。不過，很明顯香港有很多人依然非常心繫前宗主國(共產黨正其名曰「港英餘孽」)，所以這句愛國口號，跟咱們的奧運主題曲的歌名一樣，都是用洋文來寫的，雖然話係MSN的符號功能，但用一個「L」字母來表示love，不清楚來龍去脈者，絕對會以為是另一個諧音字。這簡直是侮辱了我們的祖國，閣下寫情信說情話，不會用「I L U」，搞這種爛gag的，是不是﹖

但何謂愛國，正所謂花開兩朵各表一支，定義各有不同，例如香港人就經常被批評為「不愛國」，也有人很喜歡給香港支持民主的人士扣帽子，叫他們「賣國賊」。我不知道為甚麼他們會有這種結論。支持西藏自治是否等於「賣國」，姑且不論，因為「中國最廣大的人民」現在是連基本的邏輯都有問題，實在不太適合談論這種艱深的題目。他們搞不清楚，賣國，像捐錢給東華三院一樣，可以很有意義。

賊者，不問自取也。將不是自己的物品未經對方同意而據為己有的意思。但根據「偉大的領袖」毛主席的教導，中國人民己經「當家作主」。既然作主，那麼全中國，包括香港的市民，理論上都係國家的「股東」之一。所以就算真係「賣國」，也是我把我的那份國家的股份賣出去，沒有偷也沒有搶，其實跟閣下將手頭上的中移動中石油股票賣出去一樣，你，不會認為自己是一個賊吧﹖

那跟愛國有甚麼關係﹖讓我仔細解釋一下。

正如閣下開寵物店賣寵物一樣，不代表你不懂得愛惜那些貓貓狗狗的。一個負責任的店主，應該做的，不是馬上把寵物店關門然後將動物拿回家撫養(你也養不了這麼多，養唔掂反而係虐蓄)，而是應該慎重地選擇買家，你認為手上的寵物由鄺美雲小姐撫養，比起跟你一起捱世界要幸福，你把他賣了，同時也是愛的表現。你眼見大陸的雜攤竟然有一隻貨真價實的清乾隆九紋龍御用青花碗被當普通古董破碗竟然賣十元一只，你低價買了回來，高價賣給一個識貨的富豪，你自己賺了，古碗有了與其身份相稱而又識貨的主人，富豪也有了心頭好，結果是三贏。那個白痴小販不帶眼識碗是他自取其辱，蝕了錢是活該。這種交易，每個人都可以做，心安理得，也實在不見得我跟那隻碗有深仇大恨，係咪﹖

既然閣下可以接受「黑社會都有愛國的」，點解唔可以接受賣國者可以愛國﹖至少，有很多「賣國賊」，不嫖不賭不毒，品行端正，相比起很多「不賣國賊」，絕對是一個值得信任的中間人。我國搞「有社會主義特式的市場經濟」都這麼多年了，這麼點買賣的常識都還沒有，還要扣上「不愛國」的反革命罪名，請問，你怎麼樣「和平堀起」呀﹖定係你想話我知，你一向賣慣假野呢﹖

美人外交

政客總是妄想得到最大的權力來控制社會，卻忘記了古訓：「一個成功男人的背後，都有一個女人」。一個聰明的政客背後，也會有一個女人，一個美女的笑容，單舉手投足就可以幫他左右逢源，逢凶化吉。

所以現在法國向金晶道歉這招，根本不會有用。你要明白，假如你要應付的係金晶一個，憑法國總統連名模都娶了過來的手段當然是心到手到毫無難度。但他得罪了的，其實不是這位英勇的火矩手，而係中國最廣大的網民。新義和團中以男性為主，若用同樣的挑情手段對付，中國基佬雖然不少，但應該不是網絡的主流群眾，這招不但不行，恐怕還會越演越烈。

這就是要依靠賢內助的時候了。請Carla Bruni做親善大使，親自到中國一躺，蝕底一下，跟胡主席溫總理握握手示個好，照個相，送個禮。在大陸萬大事要靠朋友，所以去前還要練習一下打麻雀，方便會後跟胡總夫人溫總夫人進行麻雀外交，去打番三十六圈，其間適時「鬆章」，但不能太水免得夫人們失了興致，後宮外交一旦成功，那就世仇都變朋友了。

為表尊重，去中國就唔好仲著Dior，放心，別看現在中國人個個著西裝戴LV，我國傳統服飾有很多都很有style的，例如最經典的旗袍，配合Bruni的高挑身材簡直一流。馬上請法國的名設計師們設計番十七八件，日日不同去見人好似行cat walk咁。別擔心，Bruni乃名模，論衣著品味絕對會好過閣下手下三十年經驗的外交官。而且系出名門素有教養，斯文淡定談吐有禮，絕不會有辱國體的。

不用擔心「俾人望蝕哂」。中國受兩千年儒家思想荼毒，一般男人早就養成了一個壞習慣：在女人背後可以望得雙眼發直，但當站在美女的前面，我擔保，義和團裏冇人會可以同佢對望超過三秒鐘，然後就會眼神閃爍，甚至垂下了頭望地板。

由女人對付男人，自古有之。《六韜．文伐》云：「養其亂臣以迷之，進美女淫聲以惑之。」。別擔心，淫聲，不是指床上的叫聲，指謅言也。對，就是這樣，用美貌將眼前這幫暴民迷得暈頭轉向的時候，就算告訴他月亮是方的，太陽是三角形的，他們也會點頭稱是的。

對佢地唻講，比起Sarkozy親自到訪，Bruni大駕光臨，會令中國人民覺得自己更有面子。對付中國人，只要解決了面子，和命根子的問題，還有解決不了的事情嗎﹖

跟小弟弟的感情

傳個奧運火矩，紅了一個金晶。她父母還真沒有改壞了名，這不，一雙眼睛水汪汪的，瓜子口面，活脫脫是一個美人胚子。坐著輪椅，不要緊的，依舊溫婉柔麗，隔個海岸東瀛那邊，一個坐著輪椅的女孩，木村拓哉也為之傾心。當然，重點係你要足夠靚。

可惜天高海深，世事難料。這位運動員說錯了話，套句老話，叫「傷害了中國人民的感情」，於是一夜間，她由「女神」，就變成了「賤人」。不知由何時開始，中國人民的感情，就特別容易受到傷害，而那些粗言穢語，幾可斷定乃由網絡上的男人說出，那就更令人奇怪。

對女性我比較包容，女人被男人飛了，感情受到傷害，約深閨密友傾訴心事，或借在下的肩膀靠靠抹抹眼淚(當然前題係你要夠靚)，我完全可以接受。但中國大男人(即所有男性)自古以堅強是美德，持久為表率，有萬大的苦難加諸身上而不動聲色，除了那至親的小弟弟受到傷害之外，根本不會大呼小叫，有辱國體。金庸小說中，這種一巴掌也捱不住，踢兩腳就求饒的人，多數是貪生怕死的小人奸角。但原來今天我們偉大的祖國母親中，「小人坦蕩蕩，君子長戚戚」，小人於網路坦蕩蕩地漫罵，君子長戚戚以避開無日無之的口水飛沫。

還是其實那句「家樂福中都是中國員工」真的是命中了要害，金小姐火矩一掃，就中了萬萬千千憤青們的小弟弟，搞得憤青們每晚跟女友上床時只要想起這句說話就無力舉起，從此絕了子孫﹖但嚴格來說，配合國家的一孩政策，這倒是好事。所以在網絡上抗議金晶，就是質疑國家制定的一孩政策，成為全中國人民的公同敵人，學那個姓胡名佳的做一個反動反革命，是不是﹖

而且，就算真係痛，男人們都唔應該係叫「傷害了中國人民的感情」，應該改為金晶這賤人「傷害了中國人民的小弟弟」，或者如果硬要加上感情元素，可以稱為「傷害了中國人民和他小弟弟之間的感情」：「佢以前一叫就應丫嘛，而家，叫極佢都唔理我呀！嗚~~~」

中國網民的躁動，像深宮中的公公躲在牆角的痛哭聲，越洋萬里，聽得世界都毛骨悚然。

法國大革命

當年紅衞兵沖擊中國傳統文化，史稱「文化大革命」，今日，中國的新一代革命小將們將矛頭改為指向法國佬，可以稱為「法國大革命」。証明四十年o來，中國人一d都冇進步過。

這個命名，跟第一次世界大戰時期德軍將用來轟炸法國的大炮稱為「巴黎大炮」一樣，充滿了活地亞倫式的黑色幽默。九十個年頭過去，古今如一，擁有著坎坷的命運，法國，是一個悲情的民族。

對於這種民族主義抬頭的現象，希特拉這樣解釋：「鼓吹民族主義的功效，其實是分散人民的注意力，使之對準一個共同敵人。」(The effectiveness of the truly national leader consists in preventing his people from dividing their attention, and keeping it fixed on a common enemy)

西藏的情形我不了解，但起碼知道一件事：中國人，連外省人都排斥，更不論對西藏人，新疆人，蒙古人和台灣人。我當你共產黨真係好優惠藏族，等於一個大家族裏面，個老豆係好錫你，但佢d仔，你d阿哥，不停排斥你，我叫你當呢個係你既「家」，你就每日明明係少爺但被迫過著妹仔的生活，俾人暗中mid到手臂又瘀又黑聲都冇得聲，幾十年。你條氣順唔順﹖

自己的問題自己唔解決，走去搵法國佬，喂，好彩家樂福老闆係法國佬o者，萬一係中國人開的法資企業，條友俾人捉左去跪玻璃啦。所以法國總統Nicolas Sarkozy唔出席開幕禮，明智呀，喂，你出席，你老婆都應該會一齊丫。拿，你法國支持自由和平的示威丫嘛，憤青們就示威遊行，到時唔搞法國國旗或者你張相，就淨係拎你老婆o個張陳年裸照出o來，都唔燒呀，就咁繞場一百個圈然後對張相再做d猥褻的行為直至開幕禮完結為止。

真係仲慘情過阿嬌呀。無辜o個下唔抵丫嘛。

P.S. 朋友找來圖片一張：

大雨隨筆

大雨滂沱，久違了的黑雨又再出現，可惜時機不對，不是昨天八點之前。

在家百無了賴，無所事事，書唔想溫之下，又繼續諗下份startup。寫d畫d，把一張a4紙寫了個滿，然後越寫越動搖，越動搖越寫，越諗越多，先至發覺，連生意都未開始就唔識專心，証明Bill生做左首富廿幾年都仲可以專心賣windows係幾咁有毅力的一件事。

公司岩岩續多我半年contract，但條件苛刻，十個老友九個話離哂譜，我發覺自己而家的處境，有d似rich dad poor dad個作者九歲時既處境，分別係佢老板因為教佢而刻薄佢，我個agent因為刻薄我而刻薄我。

今日msn越o來越多人將china加落自己個名度，對我o來講冇可能，因為made in china仍然係全球次貨的代名詞，在下係正貨一件，冇理由自貶身價。所以你問奧運同政治有冇關係，其實希特拉早就話左你知個答案。不過希特拉好聰明，識得搞形象，手腕一流，畢竟希特拉同史太林雖然都係屠夫，但唔能夠簡單咁劃上等號。

繼續寫proposal中。

自殺權

大概有人認為我上篇講得太刻薄，有網友問，如果我有朋友自殺，我會點做。

與其問「我會點做」，不如問「我可以點做」﹖拉，我拉你唔住。勸，我又唔係心理專家。你唔好以為咁易靠把口就可以勸掂一個想死既人。勸唔住都算，最怕係原本你老友只係唔開心，俾你勸勸下就變左想死，咁你就涉嫌教唆他人自殺。我絕對懷疑今次係咁既case，你要勸企左係騎樓的朋友落番o來，警方有專門的心理專家負責，如果你以為真係講下家事時事天下事就可以令佢浪子回頭，我可以肯定，你，睇得太多香港的婆媽劇集喇。

我，涼薄，近乎冷血，俾女飛可以眼淚都唔流一滴直情好似失戀o個個唔係我自己咁，你問我有朋友想自殺我會點﹖

第一，係o個個situation，你朋友係唔會俾你明白點解佢想死架，個對話會係咁樣：
我：「你點解會咁諗架﹖」
佢：「你都唔明」
我：「咁你有乜野唔開心講o來聽下丫」
佢：「講左都係咁架啦」
我：「咁你唔講我點幫你呢」
佢：「我都冇叫你幫我」

對付佢，你唯有一去到就知佢心裡面諗緊乜想要乜，同埋你點樣俾到佢想要既野。所以為錢自殺都仲有計，為情自殺的人，你點勸得住呢﹖即係我有Socrates的口材我會勸囉，咁我冇，這種對我來說，是「挾泰山以超北海」的行為，冇計啦。

第二，如果我朋友想死，作為一個朋友，我會好尊重佢的決定。呢個關乎價值觀的問題。對我o來講，有權利先至有義務，咁冇選擇生存的權利，就冇繼續生存的義務，主耶穌基督管我唔著。唔好話我知生命係好寶貴。即係等如你煮隻三頭網鮑俾我食，但我食完一啖我唔想食喇，呢個時候你話我知隻鮑魚好貴架，唔好浪費呀。喂，我話知你隻鮑魚值幾十萬丫，個問題係我而家食緊呢一隻，好似屎咁難食，係咪因為一個貴字就要我食哂佢丫﹖唔係我落order架嘛。所以，我覺得大家都應該尊重別人想自殺的權利(此所以我係十分支持斌仔的)。

第三，係，死唔可以解決問題，但係，喂，冇人話過要解決問題呀，我只係唔想再面對個問題，對我o來講，我唔駛面對的問題，就唔係問題啦，係咪﹖你個朋友，生前痛苦，死後解脫，生不逢時，死得其所，又唔係要你呢個老友郁手，咪成全佢囉。

所以邊個想自殺又唔想自殺的人(即係自己想自殺然後唱通街搵朋友安慰o個種)，記得唔好搵我，因為，搵完我，你死梗。

是有點涼薄

報紙頭條，有人跳樓，朋友勸服不果，想拉住，結果一齊去了見耶穌基督。

如果大家不明白一個企圖自殺者的心情，不妨多讀斌仔的著作，下次遇著這種事，就不會再做冤大頭，上頭條。我唔知有幾多人覺得佢大好人材，咁樣死好可惜，at least我唔會咁覺得。

當然，閣下想勸服朋友唔好自殺，我贊成。但佢都一隻腳跨左出欄杆，踏左入鬼門關，你仲想拉住佢，就係同閻羅王作對，憑一人之力同一眾牛鬼蛇神扯大纜，我只可以話你好有勇氣，但無謀，死左，難聽d講句，唔抵可憐。

若果閣下遇到呢種情況，但又想勸朋友，切忌以下幾句，基於人類自有意識以來，就有搵藉口既本能，所以其實講乜都冇用，以下是例子：

1. 「要愛惜生命」

呢個世界冇人唔愛惜生命，但我愛惜生命，生命唔愛惜我。喂，我話我好愛陳法拉，但陳法拉唔愛我，冇結果架。你唔好再同佢慢慢elaborate「其實生命都好愛惜你」呢個命題，聽唔入耳架。

2. 「生命誠可貴」

生命唔止誠可貴，係好L貴，今時今日水貴油貴柴貴米貴，對唔住，我買唔起喇。阿媽係女人的道理唔駛你講，三歲細路識得up的slogan唔駛你唱。通脹壓力之下，乜都貴哂，我就係冇聽過人命有貴到。我淨係聽過女人一過三十歲就只會不停咁depreciate，而男人的value就不分年齡，隨住自己身家的波動而波動，即係耶穌基督又唔整隻輪出o來等我玩下引伸波幅，咁成世人咪俾人夾囉。

3. 「你身邊仲有好多人好愛你呀」

呢句野，通常d人自以為對為情企圖自殺者好o岩用。你諗下，係呀，全世界人都愛我呀，但就係我最愛o個個唔愛我丫嘛，我唔想佢理我o個班就係咁話愛我丫嘛。我去生果店買蘋果，你話冇哂喇，不如買十個橙丫。喂，唔同架。(唔好話鑽牛角尖，唔鑽牛角尖的人都唔會為情自殺丫)

4. 「希望在明天呀」

唉，我當你廿歲人，大大話話都叫見過三次股災啦，仲唔學識乜野叫止蝕﹖你話你係投資唔係投機﹖「一命二運三風水，四積陰德五讀書」，你話喇，人生係投資定投機先﹖

仲有千千萬萬不能盡錄，所以呢，你老友想自殺，一係，就你好professional in呢樣野(professional，唔係religiously professional，明啦)，百發百中一定勸得住，如果唔係，都係慳番啖氣啦，真係有心既，白事幫佢做好d，帛金同佢做多d，顧下義氣就係喇。咁樣一命賠一命，學百佳咁買六包紙盒裝維他奶送多六包，喂，生命誠可貴，自己條命就特別矜貴丫嘛，你自己又唔係想自殺，明架﹖

把聖火吹熄

在巴黎的傳遞奧運聖火活動，遇到百般阻撓，中國派出專人夾道護送，示威的人士卻喊打喊殺，矢志要把聖火弄滅。許多人不明白，奧運啊，是全世界的盛事嘛，把奧運辦好，大家臉上都沾光，搞甚麼偏偏要中國蒙羞呢﹖

對於這個問題，那個根正苗紅的北京奧組委新聞宣傳部部長是這樣回答：「奧林匹克聖火屬于全世界人民，極少數人公然挑釁奧林匹克精神的行徑是不得人心的，必將激起愛好和平、擁護奧林匹克宗旨的人們的強烈憤慨，是注定要失敗的。」

所謂「奧林匹克宗旨」，到底是甚麼呢﹖By definition，有四點：團結、和平、友誼和進步。可是現在我們偉大的祖國受四大獨瘤(台獨，藏獨，疆獨，蒙獨)困擾，非常的不團結。暴力事件不斷，也非常不和平。跟世界的友好關係也不過源於中國國力的上升，這種有事鍾無艷的朋友，有常識的人都不會認為那是一段真誠的友誼(事實上在政治上談友誼只是閣下自己笨七)。至於進步，那就見人見智啦，跟小平同志所說的一樣：「讓小部分人先富起來」，小部分人的錢包是進步了不少，可「中國最廣大人民的利益」卻沒有進步，文盲程度沒有進步，言論自由沒有進步，民主發展也沒有進步。

讓這種完全沒有奧林匹克精神的國家舉辦奧運，根據王同志所講，就是完完全全「公然挑釁奧林匹克精神的行徑」，是「不得人心的，必將激起愛好和平、擁護奧林匹克宗旨的人們的強烈憤慨，是注定要失敗的。」。既然閣下注定失敗，那麼那些愛好和平，反對閣下辦奧運的憤慨之士當然是注定成功的了。如漢高祖斬白蛇起義受蒼天庇佑，現在則獲奧林匹克山上的雅典娜女神祝福，他們哪還有不發狂的道理﹖

魔鬼撒旦忽然手執聖經站在十字架下跟大家講解基督耶穌的真理，閣下不會認為他是忽然改過自新的，作為一個虔誠的基督教徒，當然應該二話不說，拔出手槍，呯的一聲，將他手上的聖經和十架打飛，免得他褻瀆了上帝的話語。正所謂「寧可失去百體中的一體，也不能够叫全身下地獄。」寧可玩少一屆奧運會，也不可以令整個奧運精神受侮辱。不要忘記，咱們偉大的毛主席當年說要「打倒一切牛鬼蛇神」的時候，好像也沒有漏掉那個雅典娜，那麼，你憑甚麼要我相信你現在已經改過自新呢﹖

所以，任何一個真正支持奥運精神的人，都應該站出來，「捨得一身剮，敢把奧運火炬手拉下馬」。把聖火吹熄，還全人類，還有那力量與智慧最完美的結合，一點點的尊嚴。

勇者鬥惡龍

全天下的女士，由青春少女到深閨怨婦，都一定曾幾何時做過以下的白日夢：

自己是一個美貌與智慧並重的公主，可惜被囚在一座古老的城堡之中，孤芳自賞，在城堡最高的那座城塔中無所事事(當然，這夢若由男士來做的話，公主絕不可能完好無缺還有這種閒情日致的)，日日泡茶種花，set頭梳髮，穿一襲薄衣依在窗前，輕托香腮，眺望著遠方，一副心事重重的模樣。然後天可憐見，有一日終於出現一個金髮銀瞳，胯下騎一隻純白色獨角俊馬的俊朗王子神劍一揮，把守在堡前的惡龍大卸八块，把自己救出了古堡，從此兩個開始了幸福美滿的婚姻生活。

所以嘛，那時候徐子淇的甚麼童話式婚姻根本就不入流。今時今日，若我是女孩子，要羨慕也不會選她，而會選擇Isabella。

當全世界的大古堡幾乎全部被改成了博物館，恐龍又絕種了幾千萬年的今日，李家二公子硬是有本事像好萊塢的電影製作商一樣，把一片只會在童話中出現的場景從現於各位觀眾的眼前。先天缺憾，俊是不俊啦，但學學亞瑟王倒還可以，拖一把石中劍，帶著八位圓桌武士(由座下專業律師們友情客串)一起宰掉那條姓楊的淫龍，真人版「見龍卸甲」，倒還是威風凜凜，羨煞旁人。

香港人看白雪公主是看得多做得多(即永遠跟外母乸作對，還有在女孩睡得剷也剷不醒的時候才敢偷偷吻著，女孩醒來卻只會雞手鴨腳者)，但勇者鬥惡龍的戲碼，香港地有痴心的男人旺角一個招牌跌下來可以壓死一大片，會妄想的港女更如恆河之沙多不勝數，就是那一條入型入格的惡龍難求。當然還有那一身屠龍的絕技，萬一本事不濟，由屠龍者變成被龍屠者，格林童話變成哈姆雷特，豈不令塔上那望穿了秋水的小羊羔淚濕頸下一片雪白的胸襟。

學賭馬 睇AV 長見識

小時候，我看的是小鹿斑比和神犬拉西，時移世易，今時今日的小朋友，原來喜歡看精英大師和爪黃凌雨。

香港的道德團體倡議禁止馬主帶子女入馬場觀戰，又是老掉牙的理由，認為會「助長賭風」。

他們到底是不知道，還是扮不知道，總之，從沒有人提過，香港，是日間時段毫無禁制地免費直播賽馬的。簡單來說，就是這些道德團體(嗱，我今次真係無意針對基督徒，但有咁o岩得咁嘺，經濟日報寫出o來反對的團體，分別係「監察賭風聯盟」，「工業福音團契」同大名鼎鼎的「明光社」)，係認為直播賽馬不會助長賭風，相反入場睇馬就會。

無論點睇，我都只會覺得，經由電視直播賽馬，影響力點都大過去馬場睇馬丫。等如你准個小朋友個個weekend睇AV，但當個小朋友話想去夜總會現場睇脫衣舞的時候，你個大人就對個小朋友講：「OH NO！小明你仲細個呀，入場睇，會助長歪風呀，夠十八歲爸爸再帶你去啦」。即係咁我係咪有足夠理由相信，你，係弱智既呢﹖

正如曹仁超所講，買樓唔係講location, location, location，而係neighborhood, neighborhood, neighborhood。睇馬亦然。那些馬主子女入去的，都是馬會的專用俱樂部，身邊都是些大有錢佬，個個口叼一支古巴雪茄一副氣定神閒樣，剛剛擲了三百球買重的那隻獨贏跑了個第二，還可以笑咪咪的如坐雲端，正是「泰山崩於前而色不變」也，這種心境，就算幾萬元一個月學費的名牌國際學校，要教也無能為力。一層玻璃，隔了天涯，那些子女就算在上面看多十年馬，也一定不會跟場下的那幫愛國大叔一樣，一邊賭馬一邊叉高一雙二郎腿，左手高舉馬經，右手尾指挖著鼻屎，輸o個廿蚊馬就會換成中指，然後大喝一聲「x你老母呀」。

「居移氣，養移體」。小朋友長大後擁有這種「賭馬輸鑊甘亦貌如常」的心理質素，以後買股賣樓就有保証，股市一日上落千點，不會像那些日日淨係識得打電話問彭偉新郭思治藺常念又或者四叔五叔六叔的炒股師奶們一樣，俾人夾完好倉夾淡倉，體無完膚，然後一把鼻涕一把眼淚係電台度喊：「阿郭生呀，我十九蚊買左隻中石油幾時番家鄉呀，嗚~~~~~~」

The two possibilities

報載，全球回教徒人數首次超越了天主教徒，達十三億。

理所當然，主耶穌基督的忠實徒弟們又是一陣恐慌，驚怕魔鬼的勢力是日益強大，撒旦出世，拉登降臨。咱們身為天主的堅定不移的門徒嘛，要馬上加十二分努力去好好傳教，以免更多世人落入魔鬼的蠱惑之中。果然，梵蒂岡馬上就按捺不住，Monsignor Vittorio Formenti馬上出來解畫：It is true that while Muslim families, as is well known, continue to make a lot of children, Christian ones on the contrary tend to have fewer and fewer.

這位梵帝崗的年報編輯如果不是突然腦中風引致間歇口部發up風而自把自為大放厥詞，At the very least，就等於他們肯定了Richard Dawkins的近作The God Delusion的preface的一句。Dr Dawkins說："If you are religious at all it is overwhelmingly probable that your religion is that of your parents."(p.25, line 11-12)，詳細請看該書charter 9，恕不詳述。

所以只有兩個可能，一是Richard Dawkins的說話絕對正確，各位基督徒以後不用再浪費心血去傳揚福音普渡眾生。以後各位基督徒最最緊要跟從的，不是耶穌基督，而是鼓吹共產主義無神論的毛澤東毛主席，反正閣下「放開肚皮生」就是了。那些甚麼計劃生育人口政策，簡直是魔鬼的陰謀，撒旦的利爪，不斷壓榨剝削著基督徒階級全身充滿了信仰因子的寶貴血液，瓦解細胞內的對主耶穌充滿景仰之情的純種基因。凡我基督徒們必須堅定不移抗爭到底，直至撒旦的毒計倒下為止。

二是那些世界天主教中心的核心成員，凡事信靠主耶穌基督，學識淵博飽讀詩書，被視為對聖經教義有最深刻理解的忠實信徒們，原來只是一窩遇事推三推四，只會推行駝鳥政策的人物。當整個宗教的核心成員的核心價值原來只有這種程度。我想請問一句，這是怎麼的一個宗教呢﹖你，叫人點信你呢﹖

這兩個可能性，請問，Which is it?

西藏的暴力活動搞到今時今日我是有點意外，原本以為很快沒事的。


一邊共產黨指達賴喇嘛煽動，一邊達賴喇嘛又說自己一直主張和平。你問我信邊個，我當然是信達賴喇嘛，因為我好像從沒聽過他說謊，但共產黨嘛，老實講，係誠信這個層面上，我一直將他和李登輝看齊。


身為一個香港人，當看到中國四大毒瘤：台獨，藏獨，疆獨，蒙獨，齊齊發作，應該抱甚麼態度﹖當然是希望越亂越好，越演越烈越好。所謂鷸蚌相爭，漁人得利，中國一方面要對付四大勢力，自然沒有時間跟一塊小小的香港彈丸之地斤斤計較，到時我們偉大的民主派們再下猛一點的藥，用少少的暴力，輕輕的用文火烤烘一下特首辦，熱得要曾蔭權從太師椅上跳彈起來但又不至於將他燒焦，要他焦頭爛額走上北京求救，到時要普選就有普選，要cepa有cepa，要直通車有直通車啦。


即係我唔明，連喜瑪拉雅山邊的那個叫做不丹的小國都可以搞普選，咁點解香港仲會係因為「條件未成熟」所以冇呢﹖計落不丹好過香港既，就係人地國王係英國牛津大學畢業，咁你胡錦濤唔係囉。同埋，即係咁講，你共產黨建國的時候毛澤東個大腦夠未發育成熟啦，我唔見你話「哎呀，咁唔好立國住喇，等我腦筍關埋先啦」。


冇藉口啦大佬，仲要等到2017，我怕連古巴都有普選喇。

生意二談

尋日一行五人去食天下壽司，有感而發。

很多人話做生意最緊要口碑好，自然有人會幫襯。呢間天下壽司，openrice的評語都幾好，去食，我個人覺得係中上，即係起碼好過死人板前。但，重點係，間舖係冇人幫襯的(假期lunch得三枱客...)。証明做生意呢樣野呢，除左質素好，仲要識得搞下噱頭，尤其間舖門口咁僻，擺明唔係行過肚餓會行入去的位置，就更加要係宣傳上下功夫。

再加上見我阿叔係黃大仙開間食肆生意鬼死咁難做，我就覺得，做生意，舖租係唔可以慳既。

話時話，間野算唔錯，除左手卷的紫菜成日整濕之外。

席間有朋友表示想搞網上時裝店。idea唔錯，但有以下問題：

1. 個客揀衫的時候點知著出o來的效果。

2. 貨源。

我既諗法：

1. 最理想你可以寫個system出o來俾人網上試衫，不過咁高技術唔太適合startup。不妨搵個有身材的朋友或者直情請model幫你著衫影相做sample俾人揀，係比較可行的方法(呃到人架都)，列明用料cutting尺寸即可。長遠寫番個試衫sys都有好處，起碼有噱頭，同埋都算實用，再加上你科3d grahpics唔駛白讀。

2. 呢個就唔係問題啦，鴨寮街十蚊三件衫都有人買，你買番o來d辦唔爛得過呢d，就點都有人買既，差在你想做幾好既o者。不過與其自己搵衫賣，不如同d小品牌傾掂數自己淨做中間人收佣仲好啦。

做到既話，都有一定的barrier，我幾buy啵老實講。

難兄難弟

台灣終於選完了總統。

一路我很少提及這個選舉，也不敢預測到底誰會勝選的問題。因為我實在是拿握不準台灣人選總統的準則。

現在塵埃落定，令我最感興趣的人物，不是勝選的馬英九，也不是落選的謝長廷，而是陳水扁和連戰這對難兄難弟。這兩位仁兄，心情現在肯定比謝長廷還複雜。

先說陳水扁。馬英九可以以二百多萬票勝出，這位全台灣最有影響力的國民黨助選員(你冇睇錯我冇打錯，係國民黨)實在是功不可沒。做八年總統，聲名信譽江河日下，絕對比得上阿美利加的殊仔總統。連到最後關頭還要說「不交權力給綠卡持有人」這種有失大體的說話，閣下到底是不是已倒戈到國民黨了﹖

也不是沒有可能，大家心知肚明，國民黨再怎樣說不一黨獨大，追究陳水扁貪污案肯定是不遺餘力的。一來國民黨大可以說關乎大眾利益，二來陳水扁權力已盡失，此時不做牆頭草，依靠權力，更待何時﹖當然，馬英九是否接受是另一回事了。

再說連戰，此君選了兩屆，輸了兩屆。第一屆，三個候選人之中以他最沒有聲勢，輸了是無可厚非。第二屆跟宋楚瑜拍擋食輸二萬票，他今時今日肯定心想，如果當日不是伙拍宋楚瑜，而是拍馬英九，大概今日就是自己去競選連任了。第一次輸是信錯了李登輝，第二次是信錯宋楚瑜，自己的政治生涯，就因為信錯了兩個人所以就此完結，豈不令人唏噓﹖我係佢，今晚會悔恨到嵌頭埋牆。

還有，我很期待李登輝這條老狐狸接下來會說甚麼話。整個台灣最有政治智慧的人，就是他了。

笑貧不笑娼

我是一個尖酸刻薄的人：我會很公式化地鄙視有工作能力而又領綜緩的人；總是用一大堆言之無物的專有名詞寫文章，擺明特登唬你，正式來說是欺世盜名的所謂作家；一邊話自己爭取緊民主一邊係背後搵著數的低能政客；還有那些自己影埋幾百張鹹相，俾人偷影到換衫就喊到眼都腫埋的白痴藝人；打著任何神佛的名號四處招搖撞騙的人就更加不在話下。

但我從來不會歧視娼妓。因為嚴格來說，娼妓這個行業只是需求與供給的結果，資本主義社會下的一種產物，只是這種產物如果不小心處理，會比較容易傳染疾病。至於甚麼道德倫理，其實是不用太放在心上的。倪匡說得好，比起「淫」，「謊」是更加可恥的行為。這個世界說謊的人肯定比當娼的人多，所以那位殺了四個妓女的人，我覺得，閣下要發洩心中怨氣，其實有一大堆人合付資格，給你慢慢折磨，實在沒有必要將火燒到妓女的頭上。

我從小就很明白女人做妓女的人的心態，都只是為了一個錢字。一個錢字，有人覺得市儈庸俗，我覺得因為一個錢字而做事，只要唔會同時直接及蓄意地(即係deliberately, 英文比較簡單......)傷害他人的利益，其實是最高尚不過：因為你己經懂得，甚麼叫忠於自己。懂得承認自己愛錢的人，起碼不會自欺欺人。簡單來說，我會認為你係比較信得過。做妓女有人為富裕的生活，有人為追逐名牌，慘一點的為養家等等，其實亦只是人生的一種追求，一種需要，就個人而言，跟你靠老豆，家住比華利山日日行街要帶幾十萬LV哂行頭其實係冇乜分別，兩者只係客觀環境的不同。

至起碼，閣下去嫖娼，正所謂「真金白肉」，一手交錢一手交歡，肉帛相見童叟無欺，她是不會將你蒙住雙眼之後改用一個吹氣公仔來應付你的。有付出有收穫，非常公道。

歡場盡是義氣雞丫嘛，係咪咁講。

獨立思考

今天中學班聚，才發現原來很多朋友認為我是一個反基督教的人，大家是誤會了，其實我一向很尊重宗教自由。但尊重宗教自由，不代表要對這些宗教事事容忍。我覺得你話我蠢，不是問題，但若果閣下經常因為我的說話係oppose to一個比我蠢的人的說話而因此認為我係一個比佢更蠢的人的話，就關乎尊嚴的問題。就等於當年樓市低潮，任志剛果斷購入國金頂部數層作辦公室的時候被劉慧卿等垃圾議員指佢「亂駛錢」的情形一樣(即係人地國金而家升到一百蚊尺)，正所謂士可殺不可辱，作為一個男人，是絕對沒有容忍的道理。


美國民主黨總統候選人之一Barack Obama番左二十年的那間教會的牧師Jeremiah Wright經常語出驚人，詳情可看這裡：


http://appledaily.atnext.com/template/apple/art_main.cfm?iss_id=20080315&sec_id=15335&subsec_id=15339&art_id=10867896http://www.youtube.com/watch?v=ZHATK4OjnyIhttp://abcnews.go.com/Blotter/story?id=4443788&page=1


看完之後，各位經常認為「牧師的說話都是對的」的人，不妨嘗試回答一個問題：如果"Hillary ain't never been called a Nigger!"係用以質疑Hillary對黑人社會的理解不足的有力理由，咁，如果閣下從來未食過屎，你點知屎難食﹖既然閣下唔知屎好唔好食，咁當有人好誠懇咁宴請閣下食屎的時候，你其實係冇乜理由拒絕這位朋友的好意的，反正自古成功在嘗試，說不定閣下由此開闢出另一片美食的天空，造福人群功德無量。


還有，如果因為Hillary是白人而對黑人社會理解不足，那麼大家也很有理由相信Obama對白人和女人的理解並不足夠，而McCain對黑人和女人的理解也不足夠。那麼選美國總統其實是很兒戲的事嘛，簡簡單單，男性白人都選McCain，男性黑人可以選Obama，女性白人選Hillary，比比人頭誰最多誰就贏啦，閣下的愛徒Obama也不用四出演說，告訴大家I have a dream，世界是多麼美好。至於黑人女性﹖啊，對不起，恐怕大家要自己推舉一個候選人出來了。


當然，這也不等於說牧師的說話都是錯的，所以重點係，請閣下下一次，唔好再用某某傳道人「唔係咁講」這種有理由等於冇理由的理由o來質疑我的說話的準確性。閣下是受過高等教育的人，應該有所謂「獨立思考」，既然有，就請多多運用，我係會給予適當的尊重的(當然何謂適當又係一個好controversial的topic)。


Obama不是蠢材，他是美國史上其中一個口材最了得的政治家，當然跟很多基督徒不能相提並論，他稱Wright"is like an old uncle who says things I don't always agree with"。這是一句很精警的說話，因為don't always，可以係usually，often，sometimes，seldom，rarely甚至never，進可攻退可守，而不會一句實話說死為" I don't agree with"，繼續維持與宗教勢力的關係。你得明白，美國人對宗教這回事非常著緊，你臨到選舉先話同間你番左廿年的教會劃清界線，隨時會令你翻艇。這就是為什麼他年紀輕輕可以選總統，而閣下唔得的理由。


即係各位基督徒朋友，我唔係唔尊重你地呀，但我覺得，被一個聰明人誤導，並不可恥；而被一隻豬誤導，萬一不幸被人傳揚開去，有損家聲呀。

留下買命財

人類從歷史中汲取到唯一的教訓，就是人類永遠不能從歷史中得到任何教訓。

董朝禍政，當年政府搞強積金，七年過去，平均回報仍然慘不忍睹，比買匯豐更不如，幾個月前更被傳媒大數強積金的弊端，是好是壞早有公論。可惜我們偉大的特區政府飽暖又思淫慾，要搞醫療融資。

好聽叫醫療融資，難聽一點，正名應該「強醫金」。強醫金和強積金的共通點，在於一個「強」字，強迫之意。強積金，顧名思義，是強迫閣下存錢的意思。那麼「強醫金」，就是強迫閣下存醫病的錢的意思。但由於香港人的用錢哲學，係俾左出去的錢，最緊要收番同等或更多的著數。所以，強醫金，對香港人來說，就是強迫你醫病的意思。

咁你就會明白這個收費無聊的地方。這種政策傾斜像強積金一樣，只會養肥那些強積金公司，這次就是養肥做醫療保險的公司同埋醫生。以前你睇醫生係因為你有病，以後你睇醫生，就係因為政府搵支槍指住你個頭要你去睇。「你唔想睇﹖唔緊要呀，留低銀包你咪走得囉！」我想講，呢個世界，係真係有好多人身體好健康，好似家母咁十年都唔病一次，日日精神奕奕，根本不需要醫療保險。問題係就算自己買醫療保險，都會因應各個人唔同病歷收費有所不同，而政府就劃一收費，即係我身體好健康，我一個月交二百幾蚊其實應該可以保好多野，但而家你交的兩舊水同一個長期病患的保障範圍係一樣的。就算條款唔一樣都有問題，一個長期病患交二百蚊可以保基本醫療需求，咁一個健健康康的人呢，就要包埋d奇難雜症，伊波拉病毒，愛滋病等等，又或者同一項病賠償會高些，但其實佢幾年都唔會發一次燒，簡單來說，就係倒錢落鹹水海。還有，原本冇能力負擔醫療開支的人同樣冇能力供強醫金，有能力負擔的人早就有公司買齊醫療保險唔會幫襯公家。咁樣供一個基金可以減輕「長遠政府醫療開支」，係可以，但你其實只係將財富由有錢的人轉移落去窮人身上，同抽稅冇分別。

咁多此一舉的政策，到底係邊條牟利提出的﹖

還有，那種減輕開支的理由，亦是很低能的狡辯。因為同一個理由，香港市民除了醫療開支，還可以收管理交通開支，收「強交金」；警隊維持治安開支，收「強警金」；消防開支，要收「強消金」；急症室救護車開支，開「強護金」；人生漫漫長路總有被人打劫的可能，為保險起見，要收「強盜金」；世風日下，女孩子生得花容月貌還有可能被非禮強姦，最好也買個保險，收「強姦金」；以後住屋開支，要收「強住金」；衣著開支，要收「強衣金」；平時上下班坐車塔船，要收「強載金」；生仔開支，要收「強生金」；生完仔要供書教學，收「強學金」；小朋友長大成人，買花氹女，要收「強花金」；買法拉利載女，要收「強車金」；要買股票對抗美滙下跌，收「強股金」；或者買外匯，要收「強匯金」；外遊開支，要收「強遊金」；買東江水費用昂貴，因此食水開支，要收「強水金」；豬肉長升長有，越食越貴，所以要收「強豬金」；還有粟米一年升三成，要收「強粟金」；大豆小麥更勁升八城，要收「強豆金」和「強麥金」；期油就快升破一百一十美元大關，收「強油金」；黃金也到一千關口，收「強黃金」；堆填區越來越唔夠用，建焚化爐，要收「強燒金」；空氣污染，政府要搞環保，多多種樹，收「強樹金」；香港就快冇冬天，為了冬天重臨，要收「強冬金」；一大堆基建項目等著拍板上馬，要收「強建金」；人終有一死，要收「強葬金」；閣下還有可能破產失業，他日要領綜緩度日，所以最緊要收「強緩金」。

開此先例，以後乜你都可以另外收，請問，我交的稅去哂邊﹖

古代的綠林好漢有五言絕句一首曰：「此路是我開，此樹是我栽，想要由此過，留下買路財！」。政府每次出報告都要寫幾隻字做封面，今次不妨用這句：

「醫院是我開，有病係好哀，唔交強醫金﹖準備買棺材！」

包保大家一目了然。

Closet

繼陳冠希之後，咱們歷史悠久的香港大學也有樣學樣，有學生將藏有自家活春宮的thumb drive留在校園圖書館供人賞玩，結局，當然是可以預見的。

此事証明，全香港有興趣並付諸行動，自編自導自演變變變生命力的，除了那個開山始祖陳公冠希之外，還有這許多星斗市民。可以認為，這種其實不是個別事件，而係香港其中一種畸型性文化。香港七百萬人，原來除了有不少closet gay(櫥櫃同性戀者)之外，還有更多closet AV director(櫥櫃AV導演)。

因此，我是越想越不明白，港大為甚麼要開除那位公開片段的學生。陳冠希影鹹相，你可以話「關你x事」。同一件事由香港大學生做，就不可以草草了事。試想港大百年清譽，自創校以來人材輩出，社會上幾多律師醫生教授名人師從此校。今天，這位冒住要坐監的危險都要挺身而出的學生告訴校方，原來該校一時不察，竟然收了這樣一個百年不出的蠢材做學生，差點將校譽毀於一旦。犧牲一個學生，救了整間大學，請問何罪之有﹖

陳冠希單新聞風風火火搞足一個月，閣下還不知警惕，是為其一；同一隻thumb drive內，除左裝有閣下自己的性生態片段，還要放上cv，慌死人唔知道你係個男主角，水洗都唔清，是為其二。這種人，他日踏出社會如果係做個掃街的還可以，萬一真係做律師，醫生，教師，甚至普普通通一個文員，以這種做事態度，搞出人命是等閒事。原本你要弱智，安安份份住係青山冇人會打搞你，偏偏你要拎住港大個金漆招牌招搖撞騙，呃飲呃食，全世界就信哂你，到時仲唔死得人多﹖

這種人，實在是應該讓他嘗嘗「切舟之痛」，以免他以後繼續四處播種，散播他的白痴基因，遺禍後代，增加日後香港綜緩負擔。又可以殺一儆百，因為很明顯像陳冠希那種公開道歉完全無效，此誠「治亂世當用重典」也。罰放片的那個學生，只治標而不治本，更加會繼續縱容這種愛好大自然的另類行為，未見其利，先見其害。

是禍躲不過。大家現在是知道亞視的用心良苦了。遠道去日本將一眾AV女優男優監督編劇燈光化妝場地逐個訪問，務求將最專業的AV拍攝技巧及過程介紹俾大家。各位closet要學，當然要學最專業的，日後閣下的珍貴片段若果有幸被公開，俾人評頭品足樣貌身材，至少唔好俾人捉住話柄，被批評是amateur，就有辱祖宗了。

選總統(之二)

美國人以種族性別取人，台灣人簡單一點，以貌取人。

馬英九為廣大台灣女性所愛戴，本來相貌不錯，作為選舉籌碼的其中之一亦無不可。可惜自取其辱，佢同劉德華一樣，幾十歲人，一個俾人叫「小馬哥」，一個叫「華仔」，甘之如飴。尤其當閣下聽到叫呢幾隻字既人係一個幾十歲既師奶的時候，你就會好自然聯想到一幅類似電影「食神」李兆基係沙灘慢跑的那一幕，係會令人將三日前食既早餐煎雙蛋都嘔埋出o來。由此可見，所謂藝人同政客，其實同AV女優冇乜分別，即係一個av宅男走埋去吉澤明步身邊叫聲「小步步」，佢依然可以笑容滿面繼續同你握手簽名拍照留念。請問阿馬生同劉生，你兩位同佢有乜分別﹖

有，分別係人地二十出頭花樣年華樣貌娟好，這個「小」字，還是擔當得起，但你兩位不妨先照照鏡。敬業﹖NONONONONO，呢個絕對係尊嚴的問題。

所以可以肯定，選馬英九這種小白臉，遇強即屈，一點說「不」的氣魄都欠奉，最後必然是向共產黨投誠的結局。偏你看台灣的女人們，見了馬英九，像蜜蜂見到了蜜糖一樣(尤其係台北的雌蜂們)，要佢唔好選馬英九，等於叫十年前的香港女人見到碧咸唔好尖叫一樣，機會應該好微。

但選謝長廷更糟。

謝長廷一面奸相，未選己經輸左半個馬鼻(台灣應該有不少女人一直認為是這個姓謝的夾埋王金平在「迫害」她們心愛的小馬哥)。雖然說選總統不是選忠臣名將的時候，但有得揀，你都會想揀個劉備多過想揀個曹操。這還不止，謝長廷是一個鐵志的台獨份子，馬英九上台，溫和派主政，共產黨還有點信心可以「和平統一」，畢竟白臉書生，比這種大花臉易應付得多。若果謝長廷上台，中國肯定再沒有之前的耐性，忍完一個陳水扁，又忍一個謝長廷。奧運一過，不馬上先把一百支核彈描準台灣再慢慢跟這個姓謝的「談判」才怪。

戰國強秦築完鄭國渠那一年，馬上揮軍攻韓，開始統一戰爭。現在中國攻台明顯比當年秦國統一來得容易，苦心經營奧運亦有八年之期，假若台灣今後由謝長廷主政，中國會唔會攻台，你話呢﹖

政治，是現實的。以這個結局為假設，為著自己的性命財產著想，雖然娘娘腔了一點，各位台灣同胞們還是選馬英九的好。

選總統(之一)

這邊廂美國民主黨鬧得如火如荼，月尾台灣就要正式選總統。

雖然兩地的選民同樣弱智，但這個世界是很大的，正所謂一種米可以養百種弱智的人，弱智，也分很多種。

先說美國式的弱智。民主黨兩位剩餘的候選人，一個是黑人，一個是女人(排名不分先後)，美國的選民一廂情願的認為，這個代表著弱勢社群的第一個黑人/女人總統，一定會替他們這些弱勢社群(so far我唔係好覺佢地係弱勢，似係長年累月被害妄想症多d)謀福利的。有的甚至期望這位前無古人的總統可以為美國帶來一點變革(transformation)，打救美國。

如果這個邏輯正確，各位美國的選民其實是不用煩惱到底想要女人還是黑人的，去推舉共和黨，現任美國國務卿賴斯(Condoleezza Condi Rice)就是了，又是黑人又是女人，這個一石二鳥的人物，為甚麼不用﹖可見這其實不是黑人還是女人的問題，說到底，都係能力的問題。一個選民如果有正常程度的智商，就當知道最應該著眼的，應該係候舉人及幕僚的能力，撇除所有假大空的口號標語，尤其是那種滿口偉大理想的候選人，最信唔過。係人都知道美國總統係全世界最現實的職位，你有理想﹖不妨去寫小說演話劇。總統重責還是退位讓賢比較好。現實係美國而家係面臨大衰退，正如信報曹仁超其中一句明言叫「熊市弱勢先行」，俾你做總統，搵人開刀，搵邊個先丫﹖仲唔明﹖即係董建華夠好多理想啦。

明未呀﹖

台灣聽日講。

p.s. 話時話，真係有得諗，McCain不如認真考慮一下搵rice拍擋食，反正呢位小姐都叫薄有名氣，應該可以抵銷一下民主黨的所謂「優勢」。

雖然，係就係樣衰左d。

我真係好hurt。

即係當我發現某人原來我同佢以前認真講既野講一百次都係唔入耳唔鍾意聽死唔信邪，但係d唔等駛既我講一次，佢就話我成日講仲可以記到而家，好老實講我都己經唔記得點解會提起呢樣野。

呢d，咪就叫偏見囉。不過係intentionally，unintentionally，occasionally抑或係ecumenically，我就唔深究啦......

雖然我覺得，做為一個香港女性，認識一下這個橫掃日港台的第一婦科聖手都實在唔係乜野過份的事，起碼第日見到成班麻甩佬係度笑淫淫咁，你都叫做知道發生緊乜野事丫嘛。

咁，都唔算係乜野壞事丫。

諗到呢度，我就心中釋然。

木宰羊

美國總統共和民主兩黨提名戰進入尾聲。小弟首先要多謝共和黨的Mccain，因為此君擊敗了對手Huckabee----------兩黨所有提名人當中，我最討厭的一個。

雖然如果我做選民會毫不猶疑投票俾Mccain，但客觀地睇，佢不足以贏Obama或Hillary(Hillary仲未輸，真係令人安慰)。敗因如下：

1. 受殊仔拖累。我會將喬治布殊呢個總統同毛澤東相提並論。毛澤東作為人類歷史上最無能而又最受人民擁戴的首領的典範(當然亦與民智有關，但政治手腕，玩弄陰謀權術的本領亦是一絕)，喬治布殊由第一日選總統都成個低能仔咁，可以做足八年，兩者實有異曲同工之妙。而且，邊個做得佢接班人，或者被人標籤為他的接班人，睇怕都冇乜運行(而民主黨的人實會咁做，寫包單)。

2. 老。唔係歧視老人家(如果唔係我就唔會話投票俾佢啦)，但佢今年七十一歲，美國人選得總統雖然每四年一次，但一做，就會預自己做八年，選民選係預左選八年(如無必要，邊個想成日換總統)，八年後佢係七十九歲，民主黨人亦一定會拎佢既年齡做文章，質疑其拖政能力。

3. 最大問題，佢實在係冇民主黨兩位咁有魅力。這個問題非常嚴重，可能係年紀問題，但佢講野，好明顯不及Hillary的潑婦式高音，也不及Obama的抑揚頓挫(不得不佩服他的演說形態真係一流)。音調太過平隱，一旦兩者上電視對壘，兩者一比之下，非常輸蝕。你難以想像這位老人家惡起上o來個樣會係點，但Obama同Hillary，都唔駛諗啦，佢地都惡過幾十次。

所以，唉，希望天有眼。我揀佢原因得一個，咁多個候選人之中，我相信佢係最了解軍事的一個，亦相信佢係最了解伊拉克的困局的一個。今時今日伊拉克的爛局，其實己經唔容許美國撤軍，美軍一撤，中東必亂。雖然Mccain都話要撤軍，但就死都唔講係幾時，証明其實佢係明白伊拉克局勢的嚴重性。

順便提提，上一期economist談到Mccain將來應如何對付兩位民主黨候選人，認為如果民主黨的nominee的Hillary的話對Mccain會比較著數，原文節錄如下：

"He could crush her simply by asking voters whose character they admire more."
"He is a war hero; she is not. He freely admits mistakes; she is bizarrely incapable of doing so."
"He often takes brave and unpopular stands; she is cautious and poll-driven."(呢點我係好buy架，因為咁先叫有領袖風範)
"He has a reputation for telling the truth; she, to put it mildly, does not."
"He would not need to make any of these charges himself, because a legion of freelance Hillary-haters would do it for him."(呢點好正)

而對Obama則："Devising a strategy to shoot down Mr Obama is much harder."。結論是："Mr McCain will find it dauntingly hard to beat his younger, sexier, honey-tongued rival. But not impossible."。

事實係咪咁﹖我希望係，但美國人short開有條路，真係好難講。

話時話，民主黨提名戰，我個多月前的預測依然有效，估Hillary。

大將之風

不知有多少人有看肥姐的追思會，錯過了不緊要，但欣宜跟鄭少秋一起上台回應鄧光榮的那段，卻值得一睇再睇：

鄧光榮的指控：http://www.youtube.com/watch?v=lsxVRtKGbn4
兩父女的回應：http://hk.youtube.com/watch?v=0iSvF-l9tNU

鄭少秋我唔多講，俾人當住幾千人指住鬧，上到台都仲要咁客氣，你俾少少火得唔得﹖冇火都唔係事事問個女丫，你上去之前就同個女夾定計乜野好講乜野唔好講啦大佬﹖

鄭少秋的說話熟真熟假大家無從得知，但重點不在他身上，在欣宜。因為假設鄭少秋講真話，係老父有越講越激動的趨勢的時候，識得打個完場。第一句「誤會」，免卻雙方尷尬，再加一句「有心人做出o來既野」，以後仲有邊個夠膽係呢件事上面講多半句，就係「有心人」，以後出師無名，只會被人認為乃搞是搞非之徒，由此斷絕以後一切閒言閒話，公關手腕很了不起。

假設鄭少秒講大話，整段講話她面部也沒有絲毫沒有不悅的神色，還幫忙反駁，城府之深更是令人咋舌。

而且成場站姿得體，眼神淡定，你留意佢用字，鄭少秋問佢「呢個係咪我既藉口呀﹖」，欣宜答得好聽，其實既冇話係，又冇話唔係。因為話係，自己老豆難落台，話唔係，鄧光榮難落台。最後再加句「我地自己屋企人知咪得囉」，咁即係點﹖依然係未答。咁識修辭，你話香港有幾多個廿歲出頭的女仔及得上佢﹖

再加上整件事她出奇地高的曝光率(一個人家有喪事好少會咁頻密見傳媒，阿媽幾出名都係咁話)，很明顯想藉此一改形象，洗脫以前「白雪公主」的負面形象。如此懂得善用良機，就不知是出自佢自己的主意，還是一眾世叔伯的提議了。此女已隱有大將之風，將來就算唔靠母蔭，唔玩娛樂圈，有本事自己搞生意，單這份沈著，已足夠令我相信佢唔會失敗。

此所以點解我咁不滿鍾欣桐呢，人地廿歲，你姓鍾的廿七歲，遇大事你睇下人地臨場發揮可以講d乜，你有英皇成班高層度稿度足兩星期，結果又講d乜﹖

民主預算

曾司長的那份新預算案，除了告訴大家庫房水浸之外，還令大家知道為甚麼香港永遠沒有民主。

原因在於，預算案一出，曾司長的支持度由25%升至58%。而今次預算案的重心，係「派錢」，太公分豬肉，人人有份。如果這算是一份「好」的預算案，而且係一份好到令阿司長支持度可以上升幾乎一倍的預算案。我不能想像，壞的，到底是怎樣﹖

所以由此可以得出一個同鄧小平同志「唔理黑貓白貓，捉到老鼠就係好貓」一樣的邏輯：無論係曾司長做的預算案，抑或係唐司長做的預算案，總之有錢派的，大家就覺得呢份係好的預算案。同理，無論係全香港八百萬人選出的特首，定係八百人小圈子選出的特首，總之搞得好經濟的，就係大家都會叫好的特首。

你擺這種姿態俾阿爺睇，你做胡錦濤，會唔會俾香港民主丫﹖唔明﹖即係你用一蚊買到既野，你會唔會俾兩蚊買丫﹖你打經濟牌就可以令香港人滿足，仲會唔會俾埋民主你丫﹖

共產黨都早就睇通睇透，香港人根本唔係要民主，要錢先係真。全中國75%財富掌握於共產黨手中，你香港幾百萬人幾時先食得窮我﹖於是咪到時到候搞下類似QDII的活動，送下錢俾閣下，你點會仲想要民主﹖阿美利加的殊仔總統都搞派錢，你覺得原本諗住投票俾Obama的美國人會唔會因為這個原因轉為投票俾Mccain呢﹖咁你明點解美國有民主香港冇啦。

所以呢，拿，你睇下香港的民主派，有邊幾個話呢份預算案係好的，又或者仲嫌份預算案派得唔夠多(即係話點解人人都有係佢冇，又或者點解人地咁多我咁少咁解)：間接者會同你講份預算案未能令全部港人受惠，又或者令「富者越富，貧者越貧」加劇，直接者就會同你講點解唔加多d綜緩同生果金」，即擺到明貪得無厭者，呢d呢，就係所謂的民主內奸。

邊個係人，邊個係鬼，識分未呀﹖

讀得書少

我一向認為那些隨口妄談道德的人講的都係廢話，因為對這些人來說，所謂「道德」只是他們自己的價值標準，而真正的道德，好明顯定義廣泛得多。因此那句「共通點是讀書少」，真真正正點出了問題所在。

舉個例子。陳冠希公開道歉的那天，教評會副主席何漢權說了這句：仍未承認全部錯誤，最重要係承認性濫交呢個錯誤！

問題係邊﹖第一，你既然認為他未承認全部錯誤，「全部」指哪些﹖你做為accuser，好明顯係有責任列出究竟「全部」的定義是那些，否則就算陳冠希連殺人放火都認埋，你依然可以話佢「仍未承認全部錯誤」，即係俾你屈到死o個日都未屈完。

第二，就是後面那句：「承認性濫交呢個錯誤」。我只聽過濫交會容易染上性病，但重沒有聽過「濫交=錯誤」這個邏輯。濫交=錯誤恐怕只有閣下這樣認為。佔全世界宗教人口三分一的伊斯蘭教容許男人娶四個老婆，依基督教定義算係「濫交」，言則咁樣算唔算係「錯誤」﹖閣下當然可以堅持己見，我個人建議閣下可以去塔利班的根據地用阿拉伯語大聲朗讀這種邏輯，順便開導一下他們，傳揚一下基督教的道德思想，對世界也有好處。

再講，容易染病，也不等於就是錯誤。天氣得十二度你走去遊冬泳都好容易會傷風感冒。生老病死從來都唔係自己可以控制的。

第三，就算係「濫交」呢個字，都好有問題。濫者，過度之意。但何謂「過度」，其實也是因人而異。閣下跟自家老婆盤腸大戰之後就有心無力，所以兩個對閣下來說是「濫」。閣下係無能之士，鍾小姐親自出馬你仍然無能為力，就半個都算做係「濫」。陳冠希正值壯年血氣方剛，一晚連御九女還可以精神抖擻，就沒有閣下的「過度」問題。再講，陳君是否同時有幾個女人，還是其實分階段持有你又唔係佢，你點知得咁清楚﹖疑點利益歸於被告，呢句野唔駛讀過法律，只要讀多幾本書，就會好清楚喇。

所以為免被呢d所謂「學者」欺騙，讀多d書，真係好緊要呀。

周融

周融高調申請廣播署長，有人認為是政府的手段，用以空降AO擔任時市民會比較接受。

這種「退而求其次」的手腕其實只係談判基本功，但我認為可能性不大，原因如下：

一、我不認為政府會懂得如此取巧來獲得市民支持，原因是特首不是民選的，所以佢根本唔駛買你怕。你唔歡迎我，我依然可以舒舒服服做特首，要擔心支持度問題的，應該係唐英年曾俊華這些有志來屆參選特首的人士。

二、就算原本係咁諗，而家都唔可以係喇。魔術師俾人當場拆穿，自然要退番入後台，點可以繼續表演呢﹖

三、周融係老江湖，點會咁容易任政府擺布﹖只有係政府答應俾廣播署長更大的利益令佢肯演呢場戲，如果唔係，單靠佢咁多年經驗，再加上佢開記招之前報紙己經將呢招唱哂出o來，真係有問題，我唔相信佢一d都感覺唔到。所以一係佢地己經傾掂數互相扯貓尾，一係就根本冇「退而求其次」呢回事。

照我睇，都係政府直接搵周生做廣播署長居多，只要睇最後的申請名單上面，有幾多個冇大學學歷就知道了。

P.S. 今日陶傑專欄有呢一句：「中國的道德家，他們有時是文人，有時是「學者」，有時是師奶，共通點是讀書少，尤其缺乏邏輯訓練」，深得我心，聽日再講。

開始有人呼籲阿嬌去演AV。即係我覺得咁，做人呢，積下口德，唔好出口傷人先得架。

第一件事，天底下係冇人因為自己好「飢渴」而去演AV的。全世界人做呢行都睇個錢字份上既o者。大佬，唔係為錢，唔通係為世界和平咩。你咪以為演得AV既都一定係淫娃蕩婦o來先得架，咪咁天真咁傻啦。

第二件事，人地演完就演完，退休之後係唔會同大家講當年選擇咁拋頭露面係因為「好天真好傻」然後推卸責任，將乜野狗屎垃圾全部推哂落個男人度，演左咪演左囉，唔駛死既。某著名女優曾經咁樣回答：「演AV也是需要專業，我希望大家尊重我，因為我很努力地看待自己的工作」。你理佢真定假，起碼係大大方方似模似樣。

香港既記者又真係奇怪，兩個AV女優開記者會，都仲係要問人地有冇睇過d相。你咪以為自己好威水先得架，人地自己影都影過唔知幾百張啦，仲要係成棚人睇住咁o來影添啦，你想人地俾乜野反應你呀﹖

講開又講，全世界都知日本既AV公司係香港係冇代理既，咁點解兩位姐仔仲會咁紅呢﹖喂係人都知你班友仔個個都係睇翻版架啦，你睇翻版唔緊要丫，仲要請埋主角o來同你開光剪綵，會唔會厚顏無恥左d呢﹖難得佢地對住個鏡頭仲可以笑得咁燦爛，完全唔當一回事咁，你就知道乜野叫演技啦。

所以呢，做人厚道d，真係演AV都要專業，唔係你發姣就可以走去演。唔好當人地好似避難所咁丫。同埋呢，阿鍾小姐你廿七歲喇，真係去到日本，搵鬼要你咩，你係香港紅o者，日本冇人識你架。

風雲際會

這幾天來香港的，除了以賣臘腸名揚四海的那位陳冠希(老友話加拿大都有人想睇佢d相喎)；香港男士的恩物，日本現今至紅的AV女優吉沢明步和みひろ外，還有世界歌唱大師杜明高(Plácido Domingo)。

巴伐洛堤(Luciano Pavarotti)死後，世界男高音以杜明高為首，享負盛名已久。但我懷疑，在香港，應以這位歌唱家人氣最低。陳先生是今期人氣人物自不用說，兩位AV天后級美女亦早已深入香港人民心(尤其是電車男御宅族)，但杜明高，大家除了知道他「很出名」，這幾天知道他是「跟巴洛伐堤齊名」，到底還知道多少呢﹖

歌劇我聽不少，但從不會介意到底是誰人主唱。正如睇電影，我亦唔會好介意到底誰人掛當主角，因為最重要的，還是導演。好導演拍出來的戲，衰極有個譜，但好就可以好得好離譜，等於閣下看色戒一樣，湯唯是首次演戲，但大家還是毫不猶豫買票入場，當然是對李安有信心的表現。其次是劇情，任你演技再好，爛片就是爛片，你將一個爛角色演得再出神入化，山雞，是變不了鳳凰的。

聽歌劇，以曲目為首，歌本身的melody不好，你發揮也有限，你買古典音樂cd，第一樣考慮的，是到底是莫札特還是貝多芬，西貝流士還是孟德爾遜；然後再看到底是那一首作品，大師也會有交行貨的時候。其次是指揮，這是靈魂人物，此所以小弟買碟，會特意挑Herbert von Karajan或小澤征爾指揮的(你係真係就算唔識聽都會聽得出分別架)，但誰人主唱其實我是不太上心。

傳聞杜明高除了歌喉好，演技亦一流，巴伐洛堤主力唱功，於演技方面並不特出，所以兩者是各擅其長。傳聞，因為佢既碟我聽過(咁我都唔會特登見到係名人唱就唔買既)，但cd係冇影像既，他演技如何我就無從得知，所以，如果要係佢兩個之中揀一個，我就會揀聽Pavarotti喇。大師快要轉唱男中音，世界頂級男高音三去其二，餘下的卡里拉斯(José Carreras)比起其餘兩人實在有點遜色，令人唏噓。

大師轉行前來香港，大概以為香港有很多知音人。傻啦，香港人只係覺得出席這種場合，好有面夾有品味，睇怕阿杜生係唱緊高音定中音，佢都未必分得清，總之係「好夠氣」囉。同理，就算紳士們床下底抽屜裏裝滿了兩位小姐的AV全集，也不會去她倆的記招的，冇面嘛，咪即係俾人知我好鍾意睇﹖

「寧被人知，莫被人見」，陳冠希而家就最明白呢句說話的意思喇。

貼幾張圖先啦，唔係女士們都唔知邊個打邊個。

Plácido Domingo(跟pavarotti風格絕然不同):



吉沢明步(你話佢靚定阿嬌靚﹖我就話佢喇，人地靚得好有層次架)



みひろ(呢個就差左少少)



陳生﹖睇怕香港地而家冇人唔識佢啦。

一笑風雲過

肥姐病逝，一生功過論定，無事堪記，反而那身後戲，跟當年新馬仔的爭產案一樣，足以譜成一齣收視冠軍的百集連續劇。

演的是肥姐，欣宜，官晶華及鄭少秋四人的關係，這場大戲，官晶華的角色可以由鄧萃雯飾演(她實在厲害，可以目露兇光，面帶殺氣之際還可以一邊露齒笑)，大婆一角則由肥姐好友汪明荃擔任(反正她也很樂於做這種角色)，但至關緊要，自己的角色要由自己演，還要帶一點點悲情的成份，眼泛淚光，爭取一下輿論的認同，要演活這個在兩個成年女人的權力鬥爭的縫隙中苟活的角色，非閣下自己莫屬，以後就不要再做白雪公主這種任二奶魚肉的角色了。這個世界「白馬王子不多，認命扮矮人的有太多個」，還是靠自己的好。至於鄭少秋﹖這種大家一看就知是鏡頭前識扮大俠，裙腳下甘做鵪鶉的小男人，在這種勾心鬥角的宮諱趣劇中當然不會有太多的戲份，隨便就是了，反正只是閒角，意思意思。

沒錯！正正是「金枝慾孽」的現實寫照版，但今日肥姐已故，鄭少秋難成氣候。剩下的，理所當然是兩女的世界。

因此若果我是欣宜，往後二十年專心事業就是了，家事絕不過問。春秋晉公子重耳流亡十九年而成晉文公問鼎中原，由此可見在這種情況下，生存之道盡在「韜光養晦」四字。官晶華固然手段厲害，可惜膝下無子，當鄭少秋年華老去，一個男人無人無物，還有不聽女兒和女婿的﹖到時再慢慢爭家產要名份，分屋割地就悉隨專便了。閣下就算甚麼都輸給她，年紀是贏定的，跟她鬥長命閣下肯定有勝無敗。既然有恃無恐，自然不用心急啦！不知肥姐臨行之際，有沒有對欣宜耳提面命，傳授此沉潛內歛的保命秘笈﹖

所以呢，一個男人，尤其是有錢而又多女人的男人，最最緊要，係識得鎮住閣下家中的河東獅。相信我，「怕老婆會發達」這句說話只是電車男的心理自慰用句。生子當如孫仲謀，做人要學韋小寶。鄭先生當年甚麼角色不好演，偏要演張無忌﹖

這種男人百無一用，各位謹記，謹記。

香港人仍然為今期壹週刊而亢奮，由此忽略了很多非常有價值的新聞。價值者，關乎真金白銀，我想說的，又是畢菲特。

「薑越老越辣」形容此君最適合不過，當全世界賓架為次按問題憂心忡忡之際，他卻藉此大發橫財，而且，根本唔怕對方唔上釣。不過趁火打劫，就似乎有失君子風度。係你都咪咁揚丫嘛。

拿，我又唔明，美國d乜乜反壟斷法永遠搞微軟搞google，偏偏唔會搞呢個全球第二首富，佢做債券保險，係美國都算獨市丫。有冇人可以話下俾我知點解﹖

錢係搵左番o來，但搞到全球財金界人士文批武鬥，何必呢﹖你又唔係志在o個一百幾十億既人。

這個世界從來沒有教壞只有學壞，也沒有教好，只有學好。學好學壞，關乎閣下自己的態度問題，與客觀的事實，可以說，其實毫無關係。

一堆藝人裸照放了上網，閣下可以選擇跟從朋友們逐一鑑賞，品評到底是阿嬌比較大膽還是張栢芝更為豪放，但單這件事，報刊雜誌評論者眾，閣下只要細心留意連日報紙專欄，就會驚訝於我國三千年文化，描述這種只是不斷重複的繁殖活動，詞彙竟然可以如斯豐富，乘機學好中文，補足一下香港各方人士一直批評的「香港中學生語文水平」，就是從中學好的一個途徑。做人不可以揀飲擇食，讀書當然也不可以，「食色性也」，將性愛跟飲食相提並論也實在合乎我國古訓。好的要學，壞的也學，正所謂「道在糞溺之中」，閣下若能去蕪存菁，將來自會修成正道。

例如可以學「說謊的學問」，「危機管理的手法」，「正確使用互聯網」，或評論一下「何謂道德」，又可以教育學生以後「逢人只說三分話，逢相只影三分面」的藝術，甚至攝影的技巧等等。當然還有一句「有志者鄧竟成」。

雖然我相信當年鄧媽媽替兒子改名時也是以一句「有志者事竟成」為藍本，但兒子的名字如此被人揶揄，恐怕並非其本願。做人要厚道一點，禍不及妻兒，名字又不是鄧署長自己改的，笑人姓名，等於X人老母，是很缺德的行為。就算要講，也得有點修養，含蓄隱悔一點，或作詩兩句文雅一點，而不是依書直抄，些少創意也欠奉，實在是太不尊重了。

總之一個有教養學識的人，看一張鹹相，簡簡單單，就可以看出很多層次。在香港當一個學生，真是幸福。

駛萬年船

妹問What would you expect，就容我簡單解說一下。

正確來說，那句「好天真好傻」不是鍾欣桐小姐的回應，而係整個英皇集團管理層對整件事件的回應。這是理所當然的，因為twins的智商是甚麼程度大家都心知肚明，讓她自己爆肚開腔會說出甚麼低能的說話是誰都說不準，萬一佢夠膽死句「車，裸照之嘛，有乜咁出奇o者」，到時楊生激到嘔血都似。

所以問題不是出在嬌小姐身上，而係英皇集團身上。嬌小姐乃英皇娛樂重要資產，廣告、音樂、電影及出席各公開宣傳場合的合約，加上twins品牌效應等的價值，數以千萬計。這個大資產現在出現誠信危機(當初佢俾人偷拍後聲淚俱下梨花帶雨的情景歷歷在目，香港人冇記性，都未致於要豬到咁既地步，再加上其經理人第一時間就話張相移花接木，而家仲要搵人信呢兩位大姐，會唔會係比較難呢﹖)，很可能令英皇娛樂多年來對她的投資付之流水，理應謹慎應對，令各廣告商及音樂、電影投資者重拾對她的信心，及保住原本的合約(出咁既大事，投資者極可能要求取消合約)。如果其管理層還看不到這個後果，表示完全缺乏危機意識。搞足兩星期，管理層開無數次會之後，結論係以為求其一句「好天真好傻」就可以擺平，你真係以係人地真金白銀投資你的有錢佬們真係同你一樣咁天真咁傻﹖

英皇的阿嬌出問題，等於HSBC的SIV出問題一樣，你試諗下，如果Stephen Green都係咁樣，開個記招，然後用唔夠一分鐘的時間道歉，告訴閣下「當時我們管理層誤信各評級機構對subprime mortgage的信貸評級，而家睇番，真係好天真好傻，但我地而家己經長大了，我地真係好後悔，好對唔住」，用這種說話來「回應」，咁，請問，閣下仲夠唔夠膽渣住匯控的股票呢﹖一百一十蚊﹖我睇怕佢跌到得番十一蚊都似啦。

所謂「諸葛一生惟謹慎」，辛苦搵來的血汗錢，當然的小心管理，誤投陷阱，陸叔教落，最緊要識得止蝕，係咪咁講﹖

久旱逢甘露

股神畢菲德買股票，非常看重該公司管理層的質素，因為好的管理層，就是盈利的保証。跟據這個邏輯，我奉勸各位如果手上持有任何英皇集團的股票，請盡快拋售。

我都旅行完番o來喇，件事竟然仍未擺平，越演越烈，到今日嬌小姐出o來道歉，竟然還是交行貨，一句「好天真好傻」就解釋哂全部來龍去脈，閣下如果以為事件會咁完結，就真係「好天真好傻」。搞十幾日就得呢五隻字，再加上「我己經長大了」這種廢話，中學生都識寫出o來啦，幕後寫稿o個條友唔該炒左佢好唔好﹖

-----------------------------------------------------------

埃及之行，四字概括是「冇啖好食」，伊斯蘭國家冇豬肉，但d雞煮到乾到好似豬肉咁，再加上well done的羊肉同牛肉，結果就係全部正餐我都係食沙律同煎蛋，偶然有煎魚(係逼於無奈之下食既，非常難食)，於是就食極唔飽。

久旱逢甘露，久餓食麥當勞。day 4見到終於有間麥記係左近，我同同房即刻撲到埋去，買番個漢堡包餐，折實42元港幣，就o個度而言，實在係太好食喇。

食到餐麥記都要流哂眼淚咁，真係折墮到呢......

埃及遊十日期間，我心中徘徊著某教會長輩幾個月前說過的一句話：「我寧願佢地(指非基督教的宗教人士)窮一點，辛苦一點，不要事事順境」(還有更難聽的說話，恕不轉述)。他以為這樣，這些非基督教的宗教人士就會回歸上主的懷抱。當時點頭附和者眾(當然不包括在下)。

言則這位長輩如果有幸拜訪埃及這個國家，一定歡喜若狂。因為當地九成心信奉伊斯蘭教，而且都很窮，很多人穿不暖吃不飽。於現在香港新聞日日頭條都是一些「魔鬼的誘惑」的時候，這位長輩若能帶整個教會到埃及一遊，我想，未嘗不是賞心樂事。若根據該長輩的邏輯，埃及應該快要成為基督教的國度了，葛福臨又可以到那裏大撈一筆。

在下雖然成日話香港的基督教徒呢樣o個樣，但也未致於要詛咒他們。這個世界，唔係閣下一句「傳教」彈埋o來，就可以有o個句up o個句腦都唔用下。我真係懷疑，如果呢種人有番多少見識，知道呢個世界窮既人有幾窮，餓既人有幾餓，瘦既人有幾瘦，病既人有幾病，仲會唔會講出一d咁樣既說話。

我相信人之初性本善，這種惡毒言語當然不會出自我口。我當時心中一面想著，一面祝願小朋友們都豐衣足食，快快樂樂，健康活潑，無論你信的是耶穌，阿拉，還是The flying spaghetti monster。

類廿三條

一大幫網民說政府偏袒藝人，真是冤枉了。咱們偉大的特區政府，從來最會為自己打算，哪會無端白事做低手招人口舌。

事先聲明，我承認我陰謀論，但這種事，寧枉莫縱，不得不防。覺得在下妖言惑眾者(我都話得人多喇)請勿再往下看。

幾年前特區政府推廿三條不果，一直密謀復辟，由上年尾葉劉出選，大家可以看出其實政府的親中派人士對這條法例仍然諗諗不忘。政府一直打的如意算盤是先隱住經濟，然後學希特勒一樣慢慢陰乾香港的法治，溫水煮蛙，從來是最有效的政治推銷手段。

可惜事與願違，美國佬洗腳唔抹腳死性不改，終於搞出次按大頭佛，香港經濟受拖累，政府「挾經濟以令政改」的策略受阻滯，曾特首「於任內解決廿三條立法問題」言猶在耳，此惡法硬銷是一定不行(他也是推銷員出身嘛，怎會不明白這種道理)，窮則變變則通，那就來軟的好了。

香港的淫褻及不雅物品管制條例規定，任何人管有或發放淫褻及不雅物品，均屬違法，最高判監三年及罰款一百萬元。大家都看輕了這條法例的嚴重性，正如當年政府立例禁止商業機構使用翻版軟件一樣，立法原意是好的，可執行的那個機構，信用值自回歸後是不斷下降，一厥不振。仔細想想，只要閣下不是一個百分百的正人君子，曾幾何時上過一次色情網站，而閣下的IE Browser的Temporary internet file足夠大的話(放入去的file過十年先會自動delete者)，就己經「觸犯」法例。你試諗下，這樣的香港人，有多少個﹖我敢肯定，十個男人，九個半己經犯了案。

政府平日不動聲色，但他日發現閣下處處跟政府針鋒相對，特區幾萬警察馬上日夜加班，「合法進入」閣下電腦搜尋「犯罪證據」，一經定罪，承惠一百萬元正，監禁三年，反正資料是否淫褻不雅，也是政府說了算。三年之後閣下回家不到三日，以前舊債還來不及delete，馬上又第二班警察上來，此次更是重犯，乃罪無可恕者。如是則「三年之後又三年，三年之後又三年」，要你坐十年監，真係話都冇咁易。

所謂經一事長一智，特區政府上次學了個乖，自由民主是香港人的死線，廿三條是立不得的了。但有這種「佔領道德高地」的法例可以走後門，哈哈，在香港這個conservative程度跟伊朗有的拼的社會，那有不成功的﹖反正只係要眼中釘坐監，因何入罪，對政府來說，不會是重點，中共監禁政治犯也是用一條「洩露國家機密」間謀罪。本港回歸祖國十年，這種國粹智慧，那有不融會貫通的道理﹖

種種事件表明，政府是越來越倚重這條好駛好用的法例。萬大事先告你一條管有淫褻物品的罪狀，反正此法律覆員廣闊，無遠弗屆，香港男性動物們就算抵得住阿嬌色情裸照的誘惑，擋不了東瀛av大軍的號召。道行再高的和尚，一個裸女係面前大跳辣身舞可以色即是空，一百個車輪跳恐怕菩提老祖亦要重入紅塵。你夠膽話政府偏袒藝人﹖即是閣下好同意這種照片的存在和普及了。那好呀，就由我們特區忠字當頭，勇字填胸的警察部隊們好好「處理」一下閣下的電腦吧。

西方國家立法管制淫褻物品，第一是嚴防兒童有機會接觸這種資訊，第二是嚴防有人利用兒童演出色情資訊。以保護兒童為考慮，成年人有足夠能力分辨這種資訊，就不需要法例保護了(留意，法例，係用以保護市民的權利，而不是侵犯，咱們的立法行政機構好像越來越不明白這點)。但點解咁多個立法會議員冇人會出聲反對此條類廿三條惡法﹖因為怕被人笑係淫蟲嘛，所以你話香港的政客，有乜Q用丫﹖

p.s 小弟外遊，為期十日，荒山野嶺之地，本無華貴之物，請勿伸手問敝人攞手信耳。

誰助長歪風

藝人裸照被盜，這種事情，告對方盜竊，又或者非法入侵他人電腦等罪名就是了，偏演藝人協會要杜撰一個看似堂而皇之，大道大德的理由，叫「助長歪風」，以為這樣就可以「佔領道德高地」(又一個報紙常見的大陸term)。

我就當這件事助長了歪風好了(雖則我其實還不大清楚是助長了甚麼歪風，應該是指「發放色情照片」這種行為吧，發放阿嬌跟陳冠希手拖手逛街市買菜的親密照，他們應該不會認為是歪風的)。請大家先思考一個問題：一個女人，佢老公上大陸包二奶，你不妨問一下這個女人：如果閣下手握一罐漒水，你會將漒水淋向這對狗男女身上呢，還是淋向介紹這個二奶給你老公認識的中介人﹖「梗係淋個狐狸精啦！」，我相信女士們都會這樣作答的。

同理，如果這是「歪風」，到底係將相片distribute的人的責任，還是拍這種照片的人的責任﹖你只會，亦只可以怪後者，前者你極其量只可以話佢選材上有問題，品味低俗(當然你亦可以告佢非法入侵他人電腦等罪名)，但「助長歪風」這四個大字，還有一連串道德審判，就實在是莫須有。你可以話該藝人拍照片沒有打算「唱通街」的，但言下之意，即是不論你做甚麼事情，總之密密實實，天知地知我知就可以胡天胡地，背後三妻四妾，5p6p，外表繼續扮得斯斯文文，就不會「助長歪風」了，是嗎﹖原來閣下的道德標準就只到這種程度。

所以，如果閣下還認為照片被盜的藝人係受害者，就沒有助長歪風這回事；如果依然堅持係助長歪風，就請先向貴會屬下的親愛會員們問責。

請勿再妖言惑眾。

p.s又有廢柴教授講「數碼欺凌」：http://appledaily.atnext.com/template/apple/art_main.cfm?iss_id=20080201&sec_id=4104&subsec_id=11866&art_id=10709223

可唔可以shut up﹖

少見多怪的Crisis management

一個人要建立誠信，重點不是要老實，而是說謊從不被揭破。同樣要隱瞞一件事，要把謊話說得滴水不漏，八面玲瓏，講究經驗及技巧。跟博奕的道理一樣，要花一點想像力，模擬對手的下一部行動，作好部署，善守者藏於九地之下。不懂說謊，可以學，不用讀很高深的心戰術，只需多讀幾篇《鹿鼎記》學學韋小寶就是。

萬大事先行否認，其實是一個極差的公關習慣。今天實牙實齒說照片移花接木，隔天對手就刊幾張連環圖，證據確鑿，童叟無欺。照片不是你英皇登，可謊話也沒有人逼著你說，你自己踐踏自己的誠信，與人無尤。堂堂上市集團，財力雄厚，一張照片要找專人鑑別真偽又有何難﹖閣下後發制於人，遇危機第一件事就應先隱住陣腳，如此怱怱發一封公開聲明以為可以掩住互聯網上悠悠之口，乃一大疏忽。忽略考慮對手可能還有更多照片有待公開，壓軸登場，此第二大疏忽也。

自拍裸照，可以有一百個理由推搪過去。打開門口做生意最講誠信，如今英皇的管理層們，請問，點收科﹖

當然，我很明白，否認乃源於大家其實不太接受一個外表斯文內裏open的藝人。由此徹底暴露出香港人的心理病態，就是對性事的忌諱。不然，大家不會對這種照片如此興高彩烈的談論。英皇的管理層們也不會急於否認事件。我是完全不明白，自拍裸照，又不是在沙灘公園大戰三百回合，開心見誠認了就是，男女朋友互相恩愛纏綿拍個照片留個紀念有何不可﹖藝人也可以有私生活，跟自家男友行房作樂難道還要緊閉雙腿裝黃花閨女﹖很明顯，香港男人是以為全世界女人都是一見要上床就一定會抗拒到底要男人廢盡九牛二虎之力才會就範，又或是一副含情脈脈欲拒還迎，以為拖手就要結婚，接吻就會懷孕的鄰家女孩。Come on，還女性一點性愛的自由，別以為天下女性都跟閣下家中典蔵數百(甚或數千)的av光碟中的女優們一模一樣好不好﹖

這是甚麼問題﹖問題只係香港人一張裸照都大驚小怪，一點見識都沒有。中共政府與其有空取締法輪功，不如把香港諸如明光社之流的道德塔利班也一窩端了，免得青少年再受原教旨主義涂毒，如此功德無量，善哉善哉。

風暴年年有

當全球賓架在擔心金融風暴之際，香港人繼溏心風暴後，卻鬧淫照風暴。

先此聲明，我未睇過阿嬌呢張相，我唔係偽君子，而係我平時唔睇電視，第二朝見到報紙時張相己經俾人delete哂，真係蘇州過後冇艇塔。

但一個人只要有基本常識，都不會將阿嬌的裸照(陳冠希和陳文緩的其實大家都沒有太大興趣)在網上流傳。閣下hack左某人的電腦後得到如此珍貴的照片，自己看個夠就是了，現在放了上網，受警察通輯不在話下，又得罪天下人，所苦為之﹖

看倌們也許很奇怪，此君得罪了天下間所有女人大家都心裏明白，但香港很多男人們正值大飽眼福之際，為甚麼也得罪了﹖

閣下如果作如是想，就太短視了。

這得分開來說。假設照片是假的(雖然據講連連環圖都出了，假的可能性微乎其微)，就像用一張過期六合彩獎券對到了頭獎一樣，看見羊頭卻買了狗肉，全世界人陪你空歡喜一場，做了大羊牯。想我中華大好男兒個個智慧非凡(邊有人認自己蠢架﹖)，如此俾此人明擺了一道，士可忍熟不可忍也。

照片是真的，就更令人氣憤難平。閣下遊畢華山，見四周景色優美，自然會拍個照片作留念。同理，閣下幾經波折攀上了心中愛人的玉女雙峰，深山幽谷輪廓尤美，情到濃時，拍張照以為紀念，亦屬人之常情。現在好了，閣下逞一時快感hack入別人的電腦偷艷照後原來會公諸同好，搞得全港女生人人自危，擔心這個變態色狼不知那一天心血來潮也來hack一下自己男友那部不設防的電腦，偷了自己的裸照。所謂同遮唔同柄，阿嬌流一滴眼淚全香港男士個個自告奮勇搶住去親親抱抱安慰一番，自己家住牛頭角下邨一個鄉下妹到時真係搵鬼可憐。女生心中兩相權衡，自當取其輕者，這張艷照還是不拍為妙。如此一個增加情趣的活動被強行中止(情趣對這回事是非常重要的，就是一個懂得搔首弄姿的性感尤物跟城門河一條死魚的分別)。全港生育率因而大降，黃色事業大振，此人當為禍首。

由此可見，放這張照片的人，應該從沒有戀愛經驗。再加上智商不高(掘到金礦會公佈天下的人的智商，叫他跟猩猩下棋會鬥個旗鼓相當的就是了)，考試成績唔慌好。智商低成績差又沒有女朋友的弱智低能兒全香港應該沒有幾個。

各位特區的英勇警察們，為免英皇復辟，閣下的頂戴花羚十年一覺又要再換徽章，還請快快破案。

英皇香港警察

阿嬌的裸照前天出爐，兵貴神速的英皇娛樂昨天發表聲明，指該裸照乃邀月憐星之作。由此可見，楊先生除了可以開英皇鐘錶，英皇珠寶，英皇證券和英皇娛樂外，還可以開一家「英皇偵探社」。

月前網絡流傳一張東北虎照片，大家疑幻疑真，中共政府出手干預，找來鑑証專家分辨真偽，個多月後，結果找到一張跟照片九成相似的月曆海報，由此証明相片是偽造的。今次阿嬌的相片前日開始於網絡流傳，昨日英皇就出聲明，只一天的時間，英皇集團旗下的精英們就查清來龍去脈，比全港幾萬香港警察的行動更加迅速，怎不令人咋舌。依我看，如果不怕共產黨懷疑閣下陰謀巔覆國家，復辟英帝國主義的話，不如由英皇集團正式取締香港警察，從新改名為「英皇香港警察」。

但跟林建岳的座驚為甚麼會慢了三十公里一樣，那張被竄改的原照到底是從那裏找來，關乎公眾利益，所以還請英皇奉告。

英皇既然不會因一張照片而認定旗下藝人會亂搞男女關係，那麼當然不會因同一個人的片面之詞而相信其道德操守。發公開聲明，而且聲言會追究法律責任，那麼，當然是有真憑實據的。如果有被刪改的原照，就敬請公開。但如果沒有，楊老闆何以一眼認定照片是假的﹖

啊！真是一個謎。

日久見股神

股市反覆，對於在下這種「手空空無一物」，一張股票都冇係手的人，理所當然悠然自得，瀟灑到極。心情暢快無倫，為應良辰美景，自當吐槽一番，大講風涼說話去也。

股票走勢其實是一幅懸崖圖，長升短跌，閣下開快車要去到最高，最緊要唔係要勇氣，而係識掌握時機，幾時dum break。早左，你固然上唔到最高仲要眼光光睇住人地越上越高你越來越唔順氣，遲左，你更加死無葬身之地。辛辛苦苦搵的血汗錢叫棺材本，閣下應該視之如命根。牛市唔好摸頂，因為摸頂就係等如做呢一種咁高難度的特技行為，但好明顯全港明白這個道理的散戶唔多(明既話呢幾日你唔會見到通街人都愁眉苦臉啦)。

幾個月前畢菲特沽中石油，全世界fund佬一致批評他「冇眼光」，一派「股神老矣」的口吻，非常潤喉潤肺。今時今日，大家又好似七年前的長平之戰-----科網股爆破後一樣，開始懷念起這位大智大慧的老人家。大家忽然醒悟，如果當日跟住阿畢哥沽中石油的時候順手沽出自己手上的中人壽，中交建同埋中移動，實行同姓「中」的有仇，今日就唔駛為兩個星期之後點過「年關」的問題而惆悵。

劉華話「當匪，就要當最大的」；信神，自然要信最靈的。畢菲特之所以被稱為股神，除左因為眼光獨到，更因為言行一致。唔會似某些大行講一套做一套，開口叫你沽自己就係咁「造」低吸納，開口叫你買自己就博命沽貨。中石油十三蚊佢自己覺得貴開始沽貨，你要跟可以隨便。你要信埋d係個市二萬點話年尾會升到二萬三，到二萬三就話年尾會升到二萬七，二萬七又話年尾會到三萬，點知轉眼又到三萬佢話你知年尾一於三萬三啦，結果而家就陪閣下一同坐艇；又或者一味係你耳邊「熊市近了」，然後閣下的股市快車駛過八千里路雲和月卻依然一帆風順，一味睇淡靠嚇威逼利誘叫閣下沽貨的「股棍」，當然亦係閣下自由。

路遙知股力，日久見股神。牛市中有風駛盡人人都識，但事實証明，所謂獨立思考，正正就係要識得唔好人信乜你又跟住信乜。你急流勇退大唱反調，仲要有忍受千夫所指的氣魄。

頂得住，一步之遙，就是人神之別。

希夫烈達

斷背山男主角之一，希夫烈達英年早逝，卻告訴全世界的電影觀眾一件事：同樣二八年華，「如何演好角色」只是香港的年輕演員要應付的問題，對於一個被譽為才華洋溢的國際新星，要應付的，卻是如何抽離角色的問題。

因為對一個演員來說，演好角色只是本份，正如曾特首的那句「我要做好呢份工」一樣，你要應徵呢份工，就自然要做好，做唔到就係你失職，偏要搖旗吶喊到處宣揚這種「阿媽係女人」的事，印証閣下只係一個三腳貓演員。

如何抽離角色，才是一個出色的演員要思考的問題。因為劇本裏的世界太過多姿多采，浪漫奇情，人生那得幾回有如此奇峰特出﹖像以前走進荔園的好奇小朋友，大千世界，要考慮的從不會是到底去看大象還是玩旋轉木馬的問題。

這種因演員抽離不了角色而自殺的新聞其實屢見不鮮，香港人最熟識的應該是張國榮。好的演員都很文藝腔(總不會是研究量子力學的權威吧)，多愁善感，所以這種級數的人物，因為有涵養，是從不會廢話的。萬一遇著失戀，又剛剛演過一齣盪氣迴腸的感情劇，兩者交叉感染，小則傷風感冒，重則休克昏迷，傷重死亡並不奇怪。

歲月怱怱，人生苦短，希夫烈達，就有如茫茫宇宙間爆發的一粒超新星，瞬間閃耀，留給了世人一念經典的回憶。

願安息。

All Quiet on the Western Front

宗教令人討厭的其中一個原因，係實在太多人用佢o來招搖撞騙。

都唔係問題。你用劉德華個名，話俾人聽你係劉華個契弟出去呃飲呃食，劉華會出o來澄清。週街都係假銀紙，匯豐銀行會搵鄭海泉出o來澄清，同教你點分銀紙真假。但成千上萬人話自己係基督徒，耶穌唔會出o來澄清，教你點分乜野係基督徒乜野唔係，總之你多d祈禱，「依靠耶和華是智慧的開端」，然後就大條道理橋埋雙手買包花生等睇戲。

美國總統大選，其中一個共和黨候選人Mike Huckabee公然用自己既宗教信仰為政治資本。他也是個老實人，開宗明義以基督徒為佢既結構選民，聽落好似好好，睇真d其實係正宗極端原教旨主義，假上帝之名，行撒旦之實：
www.perrspectives.com/blog/archives/000863.htm
再睇埋呢個：Mike Huckabee on Crime:
http://www.ontheissues.org/2008/Mike_Huckabee_Crime.htm

你係咪會好奇怪點解佢會支持死刑，而且講野前言不對後語，一睇就知係正宗大話精一名。

但好明顯美國既基督教徒好唔得香港既幾多。觀乎此君係Iowa先拔頭籌，又矢言會將下一個重點放係Carolina，原因係Iowa係出名conservative大本營，而Carolina最多基督徒。我覺得政治人物有宗教信仰唔係唔得，但你用宗教之名o來做你競選既籌碼就不可接受。更加大鑊既就係將閣下既宗教信仰係政策中執行。阿富汗，伊朗，連理智如英國，都有過Bloody Mary既血淋淋宗教歷史(仲有好多不能盡錄)。唔好忘記殊仔都係基督徒，結果為左要「解放伊拉克」(而家大家都知係為石油啦)，就搞出個大頭佛。共和民主兩黨候選人今時今日冇一個夠膽話場仗要繼續打落去，殊仔而家除左多多祈禱等下屆收拾殘局之外，己經乜都做唔到。

中世紀十字軍東征叫既口號，到今時今日都仲有人用，証明「橋」唔怕舊最緊要受。

丫，你一定又會話「呢d唔係真正既基督徒」又或者「人總有缺失既地方所以要依靠神」，係咪﹖閣下不妨參閱《莊子．外篇．田子方第二十一》莊子與魯哀公的對話。

唔鍾意﹖咁不妨睇睇聖經，《使徒行傳》第十一章26節：「門徒(被)稱為基督徒，是從安提阿起首。」(The disciples were first called "Christians" at Antioch)。

如此西線無戰事，天下太平，可喜可賀也。

大國崛起

古有六月飛霜，今歲初立春之時卻熱得令人冒汗。最清楚原因的，唔係遠在阿美利加既Al Gore，而係香港既田北辰。

全世界的翻版事業只會翻software，咱們偉大的祖國，software翻得爐火純青，就轉戰hardware。外國一間google享譽國際，無所不能的同胞們馬上複製十個，外國一間youtube，祖國馬上有一百個，而且性能卓越，青出於藍，造福人群，實在可喜可賀。而家更流行所謂「惡意註冊」，將國際大企業的名字搶先於中國註冊，然後對這些企業敲詐巨額款項。以番鬼佬不義之財壯大我國經濟。

G2000係國際品牌，大陸十年前資訊落後冇人聽過係唔出奇。但因為係中國既註冊時間先後而判敗訴，咁同樣道理都可以用去告Microsoft既Window 2000。又或者將之後一百年既年份全部註哂冊，一出D乜野Norton2006，Window2007，Apple2008，逐一輪流勒索，好過你自己開公司做生意啦。

再睇埋賠償金額你真係會突眼。一個「冇人聽過」既品牌俾人盜用，獲賠二千萬元人民幣。大佬，一間公司如果佢既unidentifiable intangible asset值成千萬，會寂寂無名，都真係算閣下韜光養晦本領高強啦。

見微知著，由此可見，自由黨同中共既關係，應該好麻麻。拿，你諗下丫，俾著係唐英年個細佬俾人咁告，我睇怕最後會係個姓趙既要賠番二千萬出o來囉。牌面上睇，計同共產黨既關係，姓田既唔及呢個姓趙既，好明顯啦。大陸佬睇怕仲係將廿三條田少忽然人民英雄耿耿於懷。

咁搞法，你話中國有乜辦法唔發呢。

Steve Jobs的演繹法

新出的macbook air號稱全球最薄，即係有幾薄﹖0.8吋厚，13吋螢幕。

oh no！這個世界很多人對數字沒有概念，連一加一都要諗過先答你係等於幾多既人大有人在。0.8吋，你要我用尺出o來度﹖o來o來o來，我show俾你睇。所以steve jobs出場，第一樣做既就係個普通公文袋入面拎部macbook出o來，而唔係哂口水話你知佢部野有幾勁。

這是一個很出色的演繹手法。一般人對螢幕大小有概念(一日到黑都望住個mon點會唔知﹖)，但對手提電腦厚度既概念就一般。一吋厚同0.8吋有乜分別﹖steve jobs話你知答案就係一部放得入公文袋，一部放唔入，一眼就好practically睇得出部macbook既優點。放入公文袋仲有另一個好處就係大家都會估一個ceo無端端拎個公文袋上台做乜﹖冇人會傻仔到以為裏面係放今日既講稿掛。

當然你話佢唔搞呢一招，依然會世界都會focus係呢個新產品度。係，但都話呢d叫ambition咯，有得做好d點解唔做埋佢，仲要呢d野唔駛成本既。同埋，咁樣淡淡定抽部機出o來，好似張無忌係武林大會度滋滋遊遊咁抽把倚天劍屠龍刀出o來，震懾群雄，仲要擺番副串樣，真係好鬼死型。

咁收收埋埋，就勝過硬橋硬馬就拎部機出o來。即係你溝女，都鍾意溝番個識得適當時候遮遮掩掩，若隱若現，欲拒還迎架啦係咪﹖

特稿：Macbook Air

Apple新公布既product係手提電腦Macbook air。人情紙咁薄，電腦都係，0.8吋厚既手提電腦，淨重三磅，13吋mon，計我話以後最好全部教科書用哂電子書，又或者老師自己出notes，d學生一部電腦帶番學就搞掂，三磅，好過你見d細路你成日拎個十幾磅重既書包番學揹到好似隻狗咁。又可以環保，再將香港各大無良教科書出版商趕盡殺絕。

不過今日唔係講呢樣，而係Steve jobs既目標。

Apple出既野，一向外型美觀，而且越出越輕便。由ipod classic到最近既ipod nano，就以放棄classic既強大功能換來輕便，而家一部ipod 16 gb，細過一張八達通，聽歌睇戲樣樣得(你話octopus係咪pk丫)。如果佢唔咁搞，一路到而家都係賣ipod classic佢掂唔掂﹖我敢話佢實掂，因為其實冇人expect一部mp3機係可以細到咁既地步。但呢d就叫ambition，永遠唔甘於現狀，新既客戶你搶都要搶番o來。Apple股價長升長有，呢個就係原因，股東都相信佢而家有好既product出到o來，將來，一定會有更加好既，一間咁既公司盈利有乜辦法唔升，呢d股票真係唔買就笨。

再加上Apple呢個brand name而家係歐美己經變成左「型」既代名詞，名牌效應下只會有更加多人慕名購買，所以我敢斷言Macbook air就算要萬四蚊(US$1799)一部，依然會好賣得。

「賣貴Dell四成啵」，當然，d人唔會無端端走去有一萬蚊部唔買走去買萬四蚊既。我覺得，Steve Jobs係越o來越想將Apple既product當係一種奢侈品(luxury)o來賣。等於你買勞力士番o來唔係為左睇時間，係等你「唔覺意」撞到人既時候可以講番句：「哎呀唔好意思呀，我隻勞冇撞親你丫嘛」，咁。你試諗下，你出去同人傾生意，左邊o個個sales帶部Dell，你帶部Apple，一眼望落去，你做客，你buy邊個多d丫﹖

因此，如果閣下想佢好似iphone咁出幾個月就減價，機會好微。原因係佢呢部Macbook air好明顯唔係好似ipod咁走大眾化路線，亦都唔駛好似iphone咁要去搶市佔率。

呢部野要買就趁早。

七種靜默

報章訪問林奕華，此君數了無線電視七宗罪。

但「如果人有七宗罪，上帝就有七種靜默」。如果電視台有七宗罪，觀眾，都有七種靜默。如果真如林先生所說無線電視自三十年前己經開始腐化，咁香港既觀眾起碼啞忍左二十年，文革都過左兩個，所以責無旁貸。

唔止電視，電影都係。所謂八十年代香港電影最光輝既年代，最多人睇都係王晶「追女仔」，又或者係賭神賭俠同埋周星馳既笑片之類(唔好話我知佢幾有深度，o個陣d人鬼識呢d，買飛入場都係得啖笑之嘛)。到今時今日連張藝謀都要拍「英雄」同「黃金甲」，然後大鑼大鼓話你知佢套戲大收幾千萬。你問心o個句，張藝謀係以前d戲好d定而家收幾千萬既好﹖所以，以「觀眾係低能」既宗旨o來整作節目，絕對無可厚非。

「上帝之罪，在靜默無言」

再加上最近電視台力推高清電視既時候師奶阿婆前呼後擁但對節目內容逆來順受，大家就知道到底係乜野一回事。會追求節目內容深度既觀眾就唔會被畫面上既華麗奪目迷到，而係電視台搞高清o個陣就第一時間要求改善節目質素。即係我由第一日聽到高清呢個term我己經唔明，睇個電視o者，你清楚到睇到個藝人眉毛底下收埋o個粒1mm直徑既癦有乜用﹖

咁唔係冇用，例如睇波o個陣就可以連我阿媽呢d唔睇開波既人都可以分得出場上面邊個係碧咸同c朗拿度，又或者搞番d藝術節目大家去研究下故宮文物既精雕細硺同埋羅浮宮Mona Lisa既細膩筆觸都得。但你無線又唔係搞呢d節目，要高清把鬼﹖同埋，你覺得，香港既「主流觀眾」，對呢d節目有冇興趣﹖中國人嘛，都係鍾意糖心風暴呢d鬥來鬥去既鬧劇。

大勢所趨非人力所能抵擋，所以如果你真係覺得電視好無聊，與其浪費時間投訴，不如讀多幾本書好過。

天地不仁

二萬二人遊行到底算多還是算少這個問題，等於一眾財經消息，好壞只在乎閣下到底係睇好定係睇淡，即係到底係得番半杯水丫，定仲有半杯水既分別。

所以睇呢d政治消息，同睇財經一樣，最緊要係耳清目明，第一要斷定消息既影響力，第二係宏觀趨勢同消息既方向係相反定一致。如果只係一d無關痛癢既小消息就無謂浪費精神去研究。

人大才剛剛否決2012普選，咁遊行人數何以為大，就要睇呢個遊行可唔可以推翻呢個決定而定。好明顯唔可以係咪﹖咁就唔駛哂時間睇究竟二萬二係多定少啦。即係好老實講，俾夠你五十萬人都係哂氣，廿三條中共可以讓步，普選問題係中共眼中極為嚴重，影響深遠，俾夠你一百萬人去遊行，我敢寫包單，佢地都係唔會俾你2012普選，而只會係香港放多幾萬解放軍預防暴動(又或者整番個「坦克碌豬」軍事演習都唔錯)。

孫中山搞革命，話要學就學洪秀全。民主派要搞公民抗命，則可以學學廿一世紀最偉大既革命家。冇錯，就係拉登喇。即係......即係你明我意思啦，廢事寫到咁明俾人話我鼓吹恐怖活動。拿，放心，香港信阿拉真主既雖然唔多，但跟其他神佛搵食既都唔算少，要搵番個肯捱義氣既義氣仔女而又支持普選既應該都唔會好難。就咁話啦，唔係成日俾人話你一日到黑都淨係識得遊行，你都好冇面架係咪﹖

天地不仁，以萬物為芻狗。

哀哉。

聰明的女人

Hillary Clinton跟Obama的爭鋒看得令人熱血沸騰。但無論誰勝誰負，Democrat成功吸引大眾的focus，先贏一場。那邊廂Republician的McCain贏得毫無難度，大家還是喜歡看民主黨的熱鬧。

由Hillary的一輸一贏，就可以睇出，美國人選舉，最重要的，還是選公關形象。Hillary也是個明白人，第一場輸了，馬上打個溫情牌，係電視機面前露一雙淚水汪汪的大眼睛，眼淚不必流出來，凝而不發(邊會學似台灣佬堂堂大男人喊到殺豬咁q大聲)，o來番個欲語還休既shot，動之以情，再曉以大義，就咁贏番一場(我成日覺得，呢d咪叫唔見棺材唔流眼淚囉)。

其實這張牌早就該出，全世界人都知道Hillary最大弱點，唔係曾經投票支持出兵伊拉克，亦唔係搵過私家偵探查過自己老公。問題係佢呢個女人，太過男人feel。呢一點好重要，正如心理學家統計得出大家照鏡照側面時，將面部較大的那邊靠鏡，會比將面部較小的那邊靠鏡靚d(人既面左右係有大小之分既)，原因係你望野，靠近你d既野望落去會大d。而咁樣擺pose就合乎你大腦潛意識裏面既呢個assumption，咁你望落，咪覺得舒服d囉。

男人睇女人亦都係一樣。正所謂一個識得係男人面前扮蠢既女人就係最聰明既女人，你一個女人擺到個樣咁硬淨，同男人既assumption唔一樣，d男人梗係唔buy你啦。俾你贏哂d女性選票又如何﹖八年前Al Gore己經示範左一味拉攏女性選票既下場。所以，要show堅強既形象唔係問題，但閣下講野溫柔番d，語氣客氣d，唔好俾人覺得你好「潑辣」，俾d位人地覺得其實你都係似番個女人既，就己經好夠。

拿，呢樣你信我，佢絕對係特登既。因為以佢份人，佢要唔流眼淚，絕對忍得住。外國政客既哭功同中國官場源遠流長既太極功一樣，乃入門第一基本功，國粹o來架。

btw，我依然睇好(同埋支持)Hillary多過obama，原因係美國人而家最驚係衰退，Obama既經濟手腕如何大家都唔知，但Hillary就有個好大既asset，就係佢老公。大家都知"vote Hillary and get Bill"，呢個會係佢o來緊選舉既最大本錢。但隱憂係

1.obama既助選團實在太過厲害，由半年前Hillary仍然一片大好形勢，到而家佢竟然可以先拔頭籌，令我諗起葉劉，我諗極都唔明點解d民意可以轉得咁快，有冇人可以話俾我知obama呢半年做左d乜咁鬼勁(定係好似佢老公咁講，係因為Hillary俾人 "unfairly scrutinised" 所以佢先漁人得利)﹖

2.唉，靠老公呢樣野，唔可以宣之於口架嘛，可以，佢份人都唔會咁做丫，係咪﹖

3.江山易改本性難移，佢份人今次贏番一場，想佢再似番個女人﹖難咯。(即係今時今日全世界都好明白點解當年Bill Clinton要偷食啦係咪﹖)

單這份雍容，一副君臨天下的氣勢，就不是香港下九流的政客學得來。

殺頭的生意

兩電加價，同美國減息一樣，咁都「估」唔到既人，直情係弱智既。奇在電視台依然要問「街坊」，d師奶依然俾一個白痴答案：「咁係唔好啦，咁佢地之前幾年都賺架嘛」

我想問，除左兩電及其相關利益者，請問邊個會贊成﹖呢d唔駛問架啦！所以呢，問呢d問題，反映出既唔係「香港人唔贊成兩電加價」呢d阿媽係女人既野，而係香港人幾十年o來一d都冇進化，「香港人」成為基督徒反駁Darwin既進化論(Evolutionism)最有力證據。

俾電視台訪問既o個位師奶，言下之意，係咪即係話：「佢地之前幾年都賺架啦，都係時候要蝕番俾我地喇掛！」咁﹖到底閣下係咪要人地真係蝕俾你o來做生意你先會滿意﹖拿，咪話我話，真係到兩電做到蝕水既時候，李卓人班pk肯定仲要死句：「兩電長年壟斷經營，管理不善，應該諗辦法減省成本，電費仲可以下調既。」，結果都係唔可以加電費。

正所謂：「殺頭的生意有人做，蝕本的生意冇人做」，你有乜理由要人蝕俾你呀﹖閣下如果嫌電費貴，可以用少d電丫。即係咁，假如你一年用少十分一電，俾少十分一電費，電廠燒少十分一煤，放少十分一二氧化碳同懸浮粒子，香港既廢氣少百分之八，一舉四得，又合乎政府既環保政策大方向，好過收膠袋稅丫係咪﹖

所以問題呢，唔係電費貴既問題。對香港人o來講，一樣野貴唔係問題，貴貴都唔係問題，只要呢樣野，我買番o來，轉個手可以用多20%既價錢賣番出去，就唔係問題。即係樓價夠升左唔少啦，我唔見你嘈﹖你試下電視台又走去做個訪問，問下d師奶睇樓價飄升有乜野睇法，佢梗話好啦，係咪﹖全香港冇人嫌樓貴既，有得炒丫嘛。阿里爸爸三十幾蚊股我唔見你話貴﹖仲要你班蛋散仆到走去買﹖

所以呢，問題唔係兩電「食水深」，只不過係佢地兩個食水深既時候，你冇得分o者。

喂，咁好簡單丫，你咪走去買兩電既股票做個對沖囉，上市公司o來架嘛，你覺得間公司盈利好到不得了，買佢股票等升值，電費越加佢越升，夠你賺番轉頭有突啦。佢地d股票踢都唔郁﹖咁咪係囉，咁你憑乜野話人地賺到你盡呢﹖你老闆買隻股票轉個頭一個double賣番出去唔見你可憐下接你貨o個個替死鬼，同情下佢打番個八折﹖

我諗呢班人，真係要人地倒貼俾你先會滿意，咁你先有賺丫嘛，係咪咁講呀﹖

作家倪匡還在三藩市的時候，蔡瀾有次去探望，住了一晚，第二天趕走 。一大早的士來到門口，只有倪太起身，她說倪匡那傢伙也真的太沒意思了，明知是專程從墨西哥飛下來探他們的，現在要走，他還呼呼大睡，真不夠朋友，是不是﹖

蔡瀾說：「是朋友的話，不在乎這些，在乎的，不是朋友」

我當然還沒有這兩位老人家如此爐火純青，所以好朋友回加拿大，我還是去送了一程。

而且今次，我忽然有d明白點解我地永遠可以咁鬼多野講，我發覺你總會講到一d我諗唔到既野，而又冇乜排斥，有你係度，我等於多一個腦用。而且用起上o來不廢精神(用你架嘛)，當然用個不亦樂乎。

你走左，我又得番半邊腦。

衰退

美國經濟會被次級按揭(subprime mortgage)拖累，是事實。大家然後很關心的課題，是美國會否因此陷入衰退(recession)。

啊，我不是要跟大家探討美國到底會否衰退，而係呢期成日聽到財經節目，主持人好喜歡說的一句：「美國會陷入衰退的機會率己經增加到百分之xx喇」。最近xx = 50，所以就係：「美國會陷入衰退的機會率己經增加到百分之五十喇」。

即係等如有個大肚婆去照超聲波，照完之後個醫生同個大肚婆講：「你有百分之五十既機會生仔啵」。

你咁同唔講有乜分別﹖我自己係屋企搵粒骰仔擲仲易啦。我地淨係想知美國「會衰退」，定係「唔會衰退」，而唔係有幾大機會衰退。

你都唔知﹖咪係囉。

電梯的覺悟

平時用扶手電梯，人人都企右邊，我鍾意企左邊(但係又唔行阻鬼住哂然後俾幾十人咒罵o個種呢)，我一路以為係因為我鍾意將身靠向左邊。

去到日本，發覺個個都鍾意企左邊，然後......我企番去右邊。

跟住我發現，原來唔係左同右既問題，我只係，唔想俾人阻住。

呢個世界好多野，都係咁既道理既o者。

目標

像當年考AL的目標一樣，我今年頭半年的目標，就只能是考好個死人CFA。下半年﹖搞掂呢個先啦，做人呢，要一步一步慢慢o來。腳踏實地丫嘛，係咪咁講先﹖

妹講得好岩，我地真係命苦=.=

吊詭

曾經有傳道人跟我打過這樣一個比喻，很有趣：

傳道人：「如果我話而家有份工想請你o來做，任你開價，你做唔做﹖」

我：「唔做啦，分別係用o來呃阿婆既種金騙案。」(話時話，點解永遠都冇阿伯俾人呃既﹖)

傳道人：「你當唔係先啦。」

我：「做乜野先﹖」

傳道人：「只係一d好簡單既野，不過呢，要做一世唔可以轉工既。」

我唔貪心丫：「十億﹖」

傳道人：「得，不過呢，如果我而家話你份人工要你死左之後先可以拎既，咁你仲做唔做﹖」

..............

阿傳道人，言下之意，你係咪即係叫我唔好去信耶穌呢請問﹖

賠償的問題

利東街重建，政府高額賠償後租戶仍然好唔滿意，有人覺得他們很「貪得無厭」。

與其說是貪，不如說是策略，談判的策略。用以爭取更多賠償。這個手法絕對合理，因為可以令政府俾一個佢願意出既最高價錢。所以不斷有人替商戶們催谷宣傳，或增加對政府輿論壓力，最近玩埋絕食抗議，無非都係一個錢字。絕食既意思就係：「想我唔絕食呀﹖得！俾多d錢我啦」

至於賠幾多錢先至夠呢﹖嗯，呢個問題就等於問李嘉誠，到底佢要搵幾多，先至為之「夠」呢﹖It seems the sort of questions does not call for answer. 所以，都係錢作怪o者。世人在錢面前，同係耶穌面前一樣，都是好平等的。

大家咁得閒話人貪得無厭，不如話政府無端端俾個把柄人地squeeze佢啦，條街又殘又舊d人住到唔滿意就自自然全部自動搬架啦，咁，而家人地話住得好地地你賠幾十萬俾佢佢話要番間舖，咁咪由得佢啦。即係d老鼠係條渠度住得好地地你話坑渠好污糟呀不如你o來住我個老鼠籠丫乾淨企理一日三餐仲有埋個健身用滑輪添。

引狼入室，引賊入屋，引隻大老鼠入自己米缸，抵死啦你。

反思的反思

近幾年，基督教徒的聖誕口號是：

「要反思聖誕節的真正意義」

說是近幾年才開始，係因為係近幾年先有「反思」呢個詞語出現。我想請問大家，反思，即係乜野﹖

o拿，係咪要諗一輪呢，係咪諗諗下有拎本詞典o來查下既衝動呢﹖即係你用d咁既有歧意(ambiguity)既用字o來傳教，會唔會覺得好冇效率(inefficient)呢﹖

唔該，反省就反省，思考就思考，反省本身就己經有思考既意思架啦。各位牧師傳道，可唔可以得閒都「反思」下自己既用字呢﹖

基督教徒所說的「聖誕的真正意義」，自然是基督耶穌降生為要拯救世人之類。我又想請問，有乜野咁值得你反省呢﹖反省既意思，是反身省察，檢查自己的思想行為(self-examining)。咁而家你地係咪覺得呢個一路以來既「聖誕真正意義」好有問題，又或者終於發覺自己係聖誕唱普世歡騰係褻瀆神明，而開始識得反省一下呢﹖我估唔係丫，咁你反省乜野呢﹖

你只不過係要人「記住」，「記得」或者甚至係「紀念」呢個「聖誕既真正意義」，唔係反省。就算要用反省，係咪應該係「反省聖誕對你既意義」會適合d呢﹖

上次葛福臨佈道會其中一個主題係紀念「馬禮遜來華二百周年」，大家有參加既基督徒不妨都真係紀念一下呢位偉大既牧師，人地有好好學好中文先到中國傳教架。

同埋呢，即係呢，「反思」聖誕真正意義呢d野係我呢d人先會做架，各位虔誠既基督教徒係唔駛做架，所以，唔好再「反思聖誕節的真正意義」喇，俾人笑架。

衣架武力

十一歲小童被母親用衣架打之後報警。聽後當然大笑不止。搞得香港的警察大部分時間就是用來處理這種雞毛蒜皮的民事糾紛，越來越像一個保姆。這當然不是警方的問題，而是報警的人的智商問題。

難得的是每次有這種事情，報章電視台都會非常踴躍找一些專家出來鼓勵這種弱智兒童，提醒大家「暴力不能解決問題」。

當年納粹德國在歐洲恣意擴張，英國首相張伯倫(Neville Chamberlain)也認為暴力不能解決問題，但歷史告訴我們，事實上希特拉只是當張伯倫一個白痴來玩弄，繼續侵佔波蘭，英國如夢初醒，匆匆對德宣戰。

一個人只要多讀幾本書多識幾隻字，就不會厚顏無恥在電視機面前說出諸如「暴力不能解決問題」之類的廢話。如果邱吉爾也是這種白痴的話，我怕二戰到今天還沒有打完。

電視機前那位專家女士如果有子女，應該教導他們如果有朝一日不幸被性侵犯，千祈唔好叫救命同報警，因為警察是一定會使用暴力的。相反，可以叫他們跟那個強姦犯多些溝通和合作(點合作我就唔知啦)，又或者嘗試介紹一些社工機構看看能否解決那位暴力中年男的性需要問題。

所以那種滿口偉大理想仁義道德說得天花龍鳳的人，最信唔過。因為永遠講一套，做就另一套。暴力當然唔係一個解決問題既好方法，但有時卻是最好的方法。永遠只懂迴避暴力，以為咁樣就係尋求和平，我會說：you gotta be "A good lord mayor of Birmingham in a lean year"，但旨意你做大事就死得。

仲有兩樣野：

一：用衣架就叫暴力﹖我當年捱o個招摺凳係乜野呀咁﹖
二：即係唔好話係我話丫，「暴力不能解決問題」呢d野，永遠只係打輸左o個個先咁講既o者，你幾時聽到打贏左人o個個咁講丫﹖

呢隻係馬

跟從前趙高指鹿為馬一樣，指石為金，大家今天是親見親聞。

如何將居屋「改裝」為豪宅出售，就等於問如何用煉金術將石頭煉成黃金一樣，是一個很科學的問題。但為甚麼到二十一世紀還會有人相信十八世紀煉金術士的把戲，認為o舊鍍左黃銅既石頭「有得升值」，用買金既價錢去買，就是一個近乎哲學的問題。

這個近乎哲學的問題就是：點解有人可以蠢到咁﹖

這個看似很容易簡單的問題其實很複雜，就等於閣下永遠唔會明白點解d豬食餿水都食得咁滋味一樣。層次唔同。從呢個角度諗，大家大概對於點解今時今日無論警訊點樣呼籲市民要提防受騙，報紙依然日日有新聞話d阿婆俾乜乜寶藥黨祈福黨騙到既事，唔會咁介懷。事實上，點石成金成功與否係出指點人o個個既功力問題，而指石為金成功與否，就係俾人點o個個既智商問題。

大家明明知道只係一間居屋不過裝修左然後賣豪宅價，等於將粒香檳色的鑽石套落個金指環然後用純火藍鑽既價錢賣俾你，明碼實價童叟無欺，閣下願者上釣唔好幾年之後先投訴層樓只係居屋質素，呢個係你買之前就應該諗清諗楚既問題。

如果大家連咁都信，咁，即係我話你知余慕蓮著左婚紗之後會變陳法拉，你會唔會信﹖你話知件婚紗值成億丫﹖

所以香港各位自問貌不驚人但又三十而立雲英未嫁既女士們，識點樣吸引異性未﹖

取捨的問題

某人說我做事不考慮結果。

我想閣下搞錯了一件事。不考慮結果的人做事，之後會感到後悔。

打o個篇野時間雖然是浪費了，但起碼我還能忠於自己的價值觀。至少被問「點解唔去﹖」既時候，不用啞子吃黃蓮。

不後悔的原因：

1. 係有人問起我先會打o個篇野，並非主動寫出來惡意中傷那個佈道會。

2. 只是因為無論我如何交代，基督教徒朋友們都不會明白所以才作罷。對牛彈琴實在太過無謂。我對我的文字還沒慷慨到由人倒落鹹水海的地步。

3. 所以，這是一個選擇和取捨。

4. 而且我為我還能堅守靈台的一點清明而感到慶幸。

5. 仲有，打出o來自己解下度氣都好。

當然，怕得罪廣大的基督教徒是主因，但，還談不上後悔。

普選2017

普選方案又出爐，這次說要等到2017年。

政治是妥協的藝術，誠然。但如果以這個為理由而事事妥協的話就不成體統。所以，這次民主派堅持2012普選，我很贊同(少有地完全贊同民主派啦)。雖然堅持這種不切實際的方案，肯定不能帶來普選。

大家是要明白如果事事妥協，那麼做任何事都根本沒有難度。總之對方進一步自己就退一步，事事妥協。對不起，事事妥協並不是妥協，而是被要脅。妥協，也應該有進有退的。不然要當個民主黨也很容易嘛，一起拉大隊加入保皇行列就是了。到時有阿爺照住要風得風要雨有雨好不快活。你看那個民X建Y聯Z就是那麼一回事。

當然，如果對方是致誠君子，那麼大家講信用，的確萬大事都有得傾。共產黨的誠信修養一向都是為世人稱頌有加的，不是嗎﹖

政治講求運用權術。那麼無權的民主派，自然就無術，於是強硬一點的堅持成為他們唯一的手段。你管曾特首是否「有心推行普選」做乜﹖政治是講現實結果的，你同我講心有鬼用﹖你話我知阿特首「真係好有心推行普選架，不過阿爺話要等到3047喎...」，咁，你係咪都要我因為「特首真係有心推行普選」而接受呢個方案先﹖

咪咁低b啦

《我在伊朗長大》

今天食lunch時心血來潮，突然好想睇這部只在百老匯電影中心和 IFC PALACE 上映的電影。加上我實在係掛心佢會係星期四落畫(聖誕節嘛，加上這種戲，冇人會expect佢好賣座既)，於是即刻買飛放工睇。近水樓台，這是我在IFC上班的唯一好處......

這種非主流電影有公司肯買回來，基本上都有一定水準。結果沒有失望，這部電影，值得細細品味。有一些不太清晰的地方，不知是我看漏了還是她說漏了，我正在苦苦思索中......

美中不足係開頭太多歷史背景，有d亂，細節太多，也實在記不全，加上英語的配音有點生硬。詳評則留到我把漫畫也看完後才打吧。

但不要緊的，睇完出o來除左評語係「幾好丫」或者「幾有意思啵」然後就空無一物的只是荷里活式的消費型電影。冇人expect呢套會係一套咁既電影，係咪﹖

所以呢，原則上呢套電影我好推薦(放心，一d都唔悶)。不過呢，對於「我覺得睇呢d故事既時候要好小心囉」既基督徒們我就唔推薦喇。

由於生日的緣固，獲羅監製贈送我心怡己久的iPod一部(4gb)。於是急不及待將家中約七成的古典音樂cd轉入去，其餘三成我一向都唔多聽。點知過哂，都係2gb。我正在積極考慮要不要將那三成也放進去。

如此這般，由於幾年前因為遺失discman而同時被放棄的古典音樂又再成為生活的一部分。(家中那部大hifi實在太擾人清夢)

也因此，公主小姐的離開實在是令人倍加傷感。今時今日要搵個女仔識得乜野叫音樂，而又會陪你一齊癲去聽一場幾個鐘的concert同時同你一齊研究銅管樂同弦樂的音色問題，經過大會堂會研究入面究竟奏緊貝多芬還是莫扎特的問題，唔多喇。而家最多女仔只會同你討論LV或者Cartier新番皮裝手袋到底紅色定藍色比較好睇。對於這班無才無德的女子，我現在唯有每天默默忍受。

這種才女情意結我到底係邊個度學番o來架=.=

--------------------------------------------------------------------------------------------------

話說週六出旺角打算買個ipod套順便執番兩對converse，點知出到去勁多人，結果去旺電打左個白鴿轉見到個岩心水既套買左番o來就算，鞋就買唔成。假期旺角真係like a hell

交談後還留有讓我深思熟慮的餘地，是我喜歡的溝通模式。

而所謂思考其實就係坐係度發白日夢乜都唔駛做，這是我的強項。

丫，多謝你，你令我諗通左一個問題。

匯豐的管理藝術

HSBC五日撤回300元提款下限的計劃。各報章引述所謂專家指HSBC「未夠深思熟慮而且未顧及民意」。還認為管理層缺乏「政治智慧」。

証明所謂「市場學學者及人力資源專家 」，幾容易搵食。

淺一點的，先講常識：

香港的提款機提款下限設為一百元己經是咸豐年的事。銀行跟隨通脹，提高提款下限，其實再正常不過。

本來通貨膨脹，用戶覺得d錢唔見洗，自自然會提更多現金，不用設下限來控制。但偏偏其實好多香港人(我唔知外國係唔係咁)係會好死硬派咁，無論物價上升幾多，都只提取固定金額(小弟就係一例，每次拎四百，嫌拎五百要打散好麻煩)。於是乎係物價上升，而用戶每次提款額不變，假設香港人沒有因通脹減少實質消費，咁結果就係平均每個用戶，提款既frequency高左(同通脹成正比)。咁好自然地，大家等提款既時間會多左，銀行成本會高左。非常合理。

銀行不是開善堂的，管理層要向股東交代(這應該是管理層的唯一責任)，成本上升，管理層自然要諗辦法開源節流，今時今日銀行業競爭激烈，加價是不大可能的，唯有節流。而此乃方法之一。

香港銀行多如牛毛，閣下不滿HSBC的制度，就快d將d錢轉去第二間銀行啦，冇人會阻止你。

--------------------------------------------------------------------------------------

深一點，談談所謂「政治智慧」。

這件事，我是這樣推測：

HSBC的管理層舉世知名，而是次變動亦影響廣泛，可以想像他們並不是傖促實行。我是相信HSBC的管理層不會跟那些「專家」一樣用一個灌了水的豬腦來思考的，所以聰明如佢地，冇可能預計唔到民間的反應(傻既都知d社工會跳哂出o來啦)。咁點解仲要咁做﹖

假如推行成功，HSBC毫無疑問可以減省成本。

好似而家咁唔成功，都唔緊要。咁日後減分行減優惠減服務又或者用戶嫌三嫌四話提款時間過長時就有一個好好藉口喇：「即係我地管理層之前都考慮過一d可行既方案o來減省成本，可惜公眾唔接受，唯有用其他方法」。大家而家要做正義既朋友幫助弱勢社群唔緊要，第日提款下下要你等廿幾三十分鐘時唔好又係度怨呢樣o個樣同我講d乜野時間就係金錢之類既廢話。

所以此乃進可攻退可守，連環之計。

計我話，佢地一早就諗住實行唔通，唔係點會個plan推得咁急，又撤得咁快(五日)﹖咪傻啦，當年減分行唔見佢咁手軟。

所以你話佢冇智慧﹖我話佢直頭精過鬼。呢位專家你自己蠢，唔好以為人地都好似你咁蠢先得架。

丫

很抱歉，那篇葛福臨佈道會，我是決定不post了。原因係無論我措詞如何浮華，只要我係show disapproval，基督徒們應該都唔會好appreciate佢。咁，唔post篇野我又唔會死。

唉，浪費哂d時間......我又實在唔係好甘心，大拿拿打左五千字呀頂......

嗯......不如咁啦，如果邊個有興趣既就留言我email俾你啦

That's just a kind of concession

因為曾德成一句「忽然民生」，很多人要求佢道歉，收回言論及下台。

各位言重了。要佢道歉，可以。收回言論，亦合理。但因此要他下台，就有點太過。

誠因如果大家一向有留意香港立法會內所謂辯論，就會發現像曾局長這種人身攻擊，其實為數不少。曾局長這次出了名，只因為陳方安生的名頭太大所致。民主黨元老司徒華也曾在議事庭上指責對方是「呂布」，還加上「請閣下翻閱三國演義」；對方(不記得是哪一位了)即還擊指司徒華是「吳三桂」，並說「今次唔係小說，係歷史」。這種帶有人身攻擊的謾罵在議事庭根本無日無之，如果要曾德成因而下台，實在是有點冤。但如果一視同仁全部有「案底」的議員要引咎辭職，立法會肯定會癱瘓的。

當然，並不表示這種言論理應存在於議事庭。所以，我想說的是，以往各議員，及曾局長今次發表這種言論沒有人即時阻止，才是根本問題所在。在外國議會，這些都有嚴格規定。而維持議事庭內言語的秩序，在外國是議長的責任。在香港立法會，是立法會主席的責任，即係范徐麗泰。

所以，落台的應該係范太。曾局長這種言論，極其量係失言。但范徐麗泰，係失職。原因係立法會淪為街市阿婆式謾罵場地，佢「居功至偉」。

一般市民不知道尤自可，那幫議員也跟著起哄，則很明顯別有用心。不可以因為曾德成是左派局長，就特別嚴格的，「天子犯法與庶民同罪」，但局長犯錯，也不必罰得比議員重吧。

說曾局長侮辱十七萬選民就更加係無限上綱。他絕對沒有侮辱選民，因為香港的選民係真係會因為一個候選人「忽然xx」而「忽然」支持/不支持他的。例如葉太「忽然」認錯，就「忽然」有十幾萬選民支持佢。如果佢仲「忽然」變索，就肯定「忽然」贏埋呢次選舉。

而且平心而論，撇除人身攻擊這個因素，曾局長是說得沒錯，陳方安生的那篇言論，「忽然民主」是衊加的罪名，但的而且確令人覺得佢係「忽然民生」。所以陳太，經一事長一智，在議事庭發表政見就好，沒有必要再加上個人選舉感想，招人話柄的。

兩個新人還有很大的進步空間，祝好運。下次記得醒爬d啦。

這幾天忽然很多新聞，寫都寫唔切。

為免過時，先寫寫立法會補選。

雖然我個人也是反對葉劉的(不代表我支持陳方安生啦)，但看到她落選時那個隱隱想哭而又極力掩飾的表情，我個人還是有點同情她的。別誤會，我可不是因為她哭所以同情她啦。原因係佢呢幾個月內可以做到的，都己經做了。輸，非戰之罪。

可以看出她很落力之餘，也有謀略，短短幾個月支持度大幅攀升，那四成半選票不可能全部都是鐵票。她的幕後軍師實在功不可沒(到底是誰﹖)。所以我同意，她己經贏了。這不是「跌落地拿番咋沙」，的而且確係如果個選舉再過多一個月舉行，那幾萬票難保不會全部過戶到葉劉那裏。

不得不說陳方安生也實在有欠風度。作為勝利者是應該有點胸襟的，人家輸了講點悔氣說話也是人之常情，應該諒解一下嘛，你輸了，也不會希望對手這樣說話的。對不﹖反正閣下現在意氣風發，也不會真的在意一個手下敗將的挑釁。

至於葉劉失敗原因，如果全部歸咎於二十三條，我是有點保留。因為無論當時她推銷23條時是真心也好，「盡忠職守」也罷，現在她既然道歉，大家沒有真憑實據証明她說謊而認為她說謊，其實是極不理智。很多人說：「想起她推銷23條時那幅嘴臉就唔開胃啦。」。對，所以其實不關23條事，是樣子跟形象問題。

也實在比起陳方安生那幅四萬笑容，她天生嘴miu miu的尊容實在係公關上的一個致命傷。理據如下：

如果選民夠理智的話就會看出問題所在：這次補選只有八個月任期，如果葉劉在任期內表露出她不是真心支持民主而只是拉票手段的話，會令自己的誠信盡毀，八個月後就可以放棄佢，葉劉點睇都唔似咁蠢。但如果她在任期內言行跟拉票時一致，那為甚麼不選她而要選陳太呢﹖所以其實不投票給她，與政治立場沒有太大關係的。

最有力既理由。拿，即係咁，女仔我唔敢講，如果阿葉太生得唔係一幅串樣，而係陳法拉咁索，有幾多男人會對佢投下「神聖」既一票﹖

所以，千祈唔好將香港人睇到咁高層次先得架。

至於那篇葛福臨佈道會，我還在針酌用字，請耐心。你必須知道在這個世界，感情上最fragile既就係muslim同埋christian......

基於溫cfa開始越溫越唔識，又睇得出只會越o來越花時間既關係，我發覺自己好似又要好似考AL o個陣咁實行刻苦既溫書時間安排。真係自己搵自己笨。

所以呢，我話我忙，係真架......

----------------------------------------------------------------------------------------------

今日睇atv褚簡寧的節目，何俊仁做嘉賓。原本香港低能選舉法例要求每一次佢提到候選人士，一定要全部講哂，唔可以只提一或兩個(you know who la)。於是褚簡寧就要每次對住張表讀哂o個八個人既名。我諗：

1. 如果唔係八個候選人而係二十個，咁咪大鑊﹖真係讀名都讀完個節目咯
2. 何俊仁呢條友身為民主黨主席，上到個節目到有佢講冇人講。乜，民主唔係要有不同既聲音既咩﹖定係你做律師既職業病﹖雖然呢d英文節目香港唔係好多人睇，你都唔係咁樣句句搶住o來講架，好影響形象呀。
3. 節目中褚簡寧問到一個問題，如果anson chan輸左，民主派有乜打算﹖睇何俊仁個樣，就知佢冇乜點諗過呢個問題。係葉劉數個月之內由俾人睇死轉為陳太反而要「告急」(次次都要告急，你民主派真係咁厚面皮)，身為黨主席連呢d risk management都唔做，想民主黨好﹖難咯。
4. 何大狀d oral english......拿，聽落，我真係覺得佢同我係半斤八兩囉。

----------------------------------------------------------------------------------------------

此時此刻，應該就快有初步結果，i mean立會補選。

這次補選，最重要，唔係邊個選出，反而係教識左大家一個好現實既政治詞彙：妥協(concession)

香港人而家大部分人對民主派沒有好感，這是事實。但不支持民主派就完全冇人會爭取普選。這是一個比補選更現實的問題。等於幾年前英國選舉的一句「選貝理雅，得白高敦」一樣，你係好唔順貝理雅呢條友，但你又好想要阿白生做財相，就係咁。

而且既情形係其實好多人連陳太都唔係好想要(因為其實唔太想支持泛民主派)，不過你更加唔想要葉劉，但你又唔如果你呢d被定為中間遊離票唔去投，葉劉就可能會贏，於是你就去投。逼於無奈下你唯有去投票。

這就是妥協。

丫，還有另外六個候選人：何來、李永健、蔣志偉、柳玉成、蕭思江、凌尉雲

拿，選委會唔好拉我呀......

兩皇一后

眾所周知，小弟平日絕少看電視。但這幾天番新工回家實在提不起勁溫英文同cfa，就看看電視舒緩一下，一看，不得了。

話說其中一個廣告是鴻星酒家做大閘蟹宴，沒有問題，但下面四隻醒目大字寫：「兩皇一后」

......

士別三日，刮目相看。乜而家連d電視廣告既用字都要同d九流八卦雜誌睇齊。拿，唔係假道學，但咁樣一個廣告只會令人覺得你成個marketing team都係低能既。

即係如果你見到有間酒樓搞齋宴，然後叫個餐做「觀音坐蓮」套餐，你做顧客，你會點睇間酒樓﹖

不如下次賣雞咁賣：「叫雞七十，兩皇一后八折」

究竟你鴻星而家係做酒樓定做雞竇﹖

國金外望

番工第一日，己經嬲嬲地。

個agent超低能，幾日之前俾封email我話八點九番工，冇問題丫，我去到，冇門口入，公司冇reception，諗住打電話求救，但收唔到(堂堂國金竟然收唔到電話!!!!!!)，於是要番番大堂，但我係番69樓，結果遊lift河。然後不停咁打電話，終於個電話係9:20打得通，我先有得入。

番去一問之下，人地係official hour係「九點正」番工。仲要好明顯唔駛打card個個都遲一兩個字。你老廉咁早八點九叫我番去做乜﹖仲要個電話打極都打唔通，真係勞氣到死。

----------------------------------------------------------------------------------------

我個位都唔錯，行兩步(真係兩步)可以睇到半個海，但係無閒欣賞，唔係忙(btw，我而家都仲未好知我係會做d乜......)，而係d大粒佬坐哂係隔離我唔係好敢行o來行去睇海景。今日原本好遊閒，但又係由於周身唔自在既關係，全日都要將o個二十頁紙睇完又睇扮哂忙咁。

----------------------------------------------------------------------------------------

回家後媽問lunch既情況

媽：點呀你，今日去左邊度食呀﹖
我：蘭桂坊
媽：哇！幾錢呀﹖五十幾呀﹖
我：係七十幾呀媽媽......

席間同同事吹水，講起港燈既lunch係19.5，同事聽後眼都凸埋，我心諗，南丫島9.5一個lunch仲要係食九大鬼.......

虛渡

閒在家中無所事事的六日終於告一段落，聽日又要開始番工。

事實証明，放假係屋企又唔去下旅行其實係好浪費時間。浪費既意思唔係話你用哂d時間做埋哂d唔等駛既野，而係呢幾日，你跟本諗唔起，d時間係點過既，空白一片。

這實在不能算是人生最愉快的經驗。我係終於明白點解d人做到七老八十都唔退休。

我發誓，以後都唔要咁樣。

抱佛腳

區選在即，各黨宣傳舖天蓋地，氣勢磅礡。

雖然政客的大聲公擾民行動令人很討厭，但最討厭的，還是政府的宣傳短片，說盡公民責任要去投票。

然則不投票的人就沒有盡所謂公民責任。

Are you sure?

但幾個候選人我都唔鍾意，去到投票我都揀唔落手，點解仲一定要我去選﹖你張選票又冇不信任票俾我投，咁即係唔能夠清晰表達我意向啦，咁我仲乜仲要陪你玩﹖

個問題係呢d候選人平時鬼影都唔見野又唔見有做，但一到選舉前一個月就將自己個樣貼到通街都係(你估你自己係吳彥祖﹖)隔離寫幾個詞語諸如：實幹，為民，拼博等等。當然，他們是有點誠意的。於是你會見到七點幾鐘當你仲番緊工既時候係街口己經會企左個著住件中環style既shirt既肥師奶(但其實你住黃大仙)同你講早晨，然後下一句就係「請支持下我丫」。

但，誠意只限於選前一星期。

即係要我去投票唔係唔得，問題係咁樣就等於我去鼓勵呢d咁既行為。即係以後當個老豆同個仔講：「你咁樣考試之前o個日先溫書，臨急抱佛腳，有鬼用呀﹖」既時候，你個仔老實唔客氣回應你呢一句：「冇用﹖d人選區議員都係咁啦，做到議員添呀！」。你做老豆，你點教仔﹖

公民責任﹖唔好妖言惑眾

14K

昨天等巴士，諗起前幾日差佬因為有舖頭賣印左「14k」字樣既T恤封舖拉人。

丫，咪誤會，我見到o個架只係11k。但即使真係14K，我諗差佬都唔會咁好膽走去請陳祖澤去飲啖茶食個包，問下阿陳生係咪想用黑社會組織名稱嚇唬乘客，等佢地係俾o個幾蚊雞車費既同時，識得自動自覺每人交多幾舊水「巴士駕駛安全費」(即係保護費)，o來對抗政府年年唔批加價。

件T恤同黑社會撞名要個做T恤既改。即係咁萬一d報紙爆大鑊話唔知係邊度搵到料，原來某某社團個大佬個名叫做鄧竟成，我唔知阿一哥會唔會俾人內部審查然後被「勸龥」改名。

呢d野，自己內部搞都算容易，萬一唔好彩條友仔唔係叫鄧竟成，係叫曾蔭權，咁又冇理由封左個特首辦架。到時咪阿一哥要死死地氣咁同阿特首講：曾生，為左香港整體治安發展，閣下不如考慮屈就一下改過個名，拿，我地警方查過通勝架喇，不如就叫......

建華啦！建設香港，安定繁華，好意頭呀

真係霸道到呢~

這世上最令人討厭的其中一種女人，就係無端白事要一大班男人走去煮飯整野食既女人。

這種女人，直接點說是心理變態。文雅點的，可以認為係心理狀態傾斜的現代女性主義者。

我覺得d女人係都要男人煮飯既目的只有一個，就係因為佢地覺得d男人要女人煮飯煮左幾千年，而家女性主義抬頭，係報復既最佳時候，革命既天賜良機。

即係你好聲好氣要我做，ok，fine，我整唔到都買番o來。講野呼呼喝喝唔在講，我話我唔識整你仲要大聲夾惡同我講：「唔理呀，次次都係女仔負責，今次要你地男仔負責呀」

冇禮貌唔在講，你呢個係理由o來既﹖你第時同個男人結左婚會唔會同你老公講：「唔理呀，次次都係我o來M，今次你o來代我呀」，又或者：「唔理呀，次次都係我負責生仔，今次你o來負責呀」

我廢事俾人話我冇風度同個女人嘈我先唔出聲

一個銀河系得一個火星

對於在下找到新工作，友人紛紛道賀，大家都明白在下在敝公司的苦況。

但其實我並不看好。

畢業後第一份工搞成咁樣，始終有陰影，怕又係另一個trap。雖然話「一個銀河系得一個火星」(我聽到呢句野o個陣真係爆笑左出o來)，但難保仲有其他環境更惡劣既金星水星，命中地球的機會其實唔高。

真係勁擔心

-----------------------------------------------------------------------------------------------

區議會選舉臨近，通街都是競選slogan。但昨天在佐敦看到一個很搞笑的，頗有心思，值得一提。十二隻字，係：

經歷破產，屹立不倒，我有膽識

我O咀左五秒，即係我實在唔係好明破產同做區議員有乜野關係。破過產可以做好區議員，咁唔通冇破過產既就係冇膽匪類﹖你話唔係呀，破產係人生一個好大既危機o來架。咁我係咪可以用「經歷小產」，又或者「經歷難產」呢d關乎母子性命既經歷o來做slogan﹖又或者嫌一個人破產唔夠氣勢，寫「經歷x家產」，取其全家一齊共渡難關之意，同舟共濟互相扶持，思想正面，幾好呀。

趙子龍百萬軍中藏阿斗，據漢水背水一戰，劉備事後誇他「一身都是膽」。閣下只不過是選個議員，遊下街洗下樓，見到人就揮個手。咁簡單既工作，要膽識做乜﹖你不如寫「於百萬軍中取上將首級如探囊取物」﹖你有冇膽識我唔知，但搞句咁既野，好明顯你係冇常識。

不過選舉嘛，講乜都假，最緊要咯，要有人識o者。

小弟終於轉工，星期五遞辭職信

入房，挑通眼眉既manager第一句講既野係：「咦﹖你搵我呀﹖唔係好野o來喎！」

雖然眾多同事對他很不滿，但平心而論，除了開會時諸多廢話(天下老細誰不廢話)，他待我不薄。所以，我那句抱歉，是真心的。

至於我老細，唉，唔想多講，我只可以話跟住佢做野既日子一定會係我人生中其中一段最黑暗的時期。佢問我有乜想同佢講(我唔知佢o個陣知未，因為我o個陣未遞信，但佢咁問又真係好怪)。我話冇，我心諗，我有乜野意見我平時開會己經講哂毫無隱瞞，你o個陣唔聽我講而家先o來問，何必呢﹖

總之，都過去。

今期economist的special report講現代宗教同政治的關係越o來越密切。連來屆美國總統大熱的Hillary Clinton都要proclaim自己係一個prayer(祈禱者)的時候，表示無論你如何自我感覺良好，民調節節領先，又或是演說的時候一呼百應，宗教這張牌都不容放棄。

宗教無疑是關於死後世界的理解，而政治卻是現世的權力紛爭。水溝油。兩者要融合，則無可避免事但一樣野會被同化，或者兩樣野既性質都會改變。

會突然寫呢個topic既原因，係因為快將舉行的葛福臨佈道會，被納入回歸慶典之一。這是個耐人尋味的問題，到底是政治為宗教服務，宗教為政治服務，還是兩者兼備的產物﹖

今天跟團契的導師談論這個問題，然後俾佢帶我遊花園，我是白費唇舌。

別跟我說其實兩者是分開的，大家只要抱住去聽道的心去就可以了，或回歸也是一件值得慶祝的事云云。這是廢話。

(待續...)

今天從IFC走出來，人來人往，覺得流動的人群像螻蟻一樣，每天上班下班，不知在幹甚麼。
我忽然覺得，人生只是一場鬧劇。

----------------------------------------------------------------------------

李柱銘一篇文章，搞得香港政界又再熱鬧起來。

通常這種情況，我只會問一個問題：這件事發生後，誰是最大得益者﹖

十一月尾區議會選舉，十二月立法會補選。陳太乃李柱銘力薦下出選，對李柱銘來說，陳太敗陣，他無顏見江東父老。陳太恤髮後，情勢忽然急轉直下，李柱銘那篇文遲不寫早不寫，偏偏選中這個時候寫，當然有他的目的。

李柱銘這種人物，從來都不受親中勢力歡迎，老左對他的印象差到極點，再做甚麼都不會令他們對自己的印象好那麼一點點。相反，這樣哂哂英文，加偏激一點的言論，與他一貫行事方式一致(他也不是第一次搵美國佬幫拖)。因此，可以鞏固香港支持民主的人士對他，及民主黨的支持。
但香港人民主意識分明，這樣做不是多此一舉嗎﹖

原本是。但葉劉出選，拉了一大票明星名人助選叫陣，那邊廂陳太勢孤力弱，那一大幫所謂泛民根本幹不了大事。情形是越來越多中間游離票受明星效應所吸引，覺得葉劉「都唔係咁差o者」。對民主黨來說，立會及區議會選舉跟本都不容有失，這時不出口術，更待何時﹖

香港老左們政治智商等於零(泛民中如劉慧卿者亦如是)，但李柱銘作為資深大狀，當然有智慧得多。這種文章一見報，不用做過幾十年律師都能夠料到老左們是所等反應。所謂遣將不如激將，與其等老左們自己衰多口，不如拋磚引玉，一顆石頭擲下去，老左們果然按耐不住，左一句漢奸，右一句賣國賊。統計顯示，每次曾憲梓之流一吐唾沫，泛民民望就會飄升, exponentially。再一次証明，愚蠢的人等待機會，聰明的人製造機會。

現在回想，鄔醫生死的那天，李柱銘一個人在家，不知，是不是，哭得很淒涼。

今日買書一事，很能體會我自己既洗錢哲學。

話說今日請病假早番屋企，路經三聯書店，做緊減價，雖然抱病在身，但都入去打左個白鴿轉。入到去見到張永霖寫既「成功路」一書。呢本書其實我想買好耐，原價八十都唔可以話貴。但問題係本書印刷精美，彩色。我對內頁都係彩色既書一向冇乜好感，同一本書用黑白同彩色，價錢差百分之二十。而且香港各大書店耐唔耐會搞減價(即係好似今次咁)，本書我唔急用所以唔駛咁急買。結果今日去到，三聯全線八五折，而呢本，係七折。田園最多都係八折咋，七折邊度搵﹖即買啦。

此所以點解老豆多番勸龥我買股票我到而家都唔肯落塔既原因：隻港交所九個幾十蚊你唔買，升到二百幾蚊你話我知唔買你就笨。你駛乜驚o者，遲早咪跌番落o來。

今日去Intergraph的conference，逸東酒店，竟然冇訓(好難得架，坐係度朝九晚六乜都冇得做呀大佬)

有一個鐘係由個法國佬講，講英文，老實講，如果冇d slide o來guide住，真係好難聽得明，不過我覺得幾得意，法國人講英文，我除左呢次之外，就係睇Johnny english既時候聽過。所以係半場都訓既呢個環節我聽得尤其用心。總比聽我老細o個d唔鹹唔淡既英文好，起嗎用字豐富，而且，人地唔會錯grammar同亂用字。

再講，呢d野係香港唔係周圍有，物以罕為貴嘛。難得不用面目模糊

法國人講英文，個調，好似意大利文=.=

==========================================================

vmware既介紹都幾好，令我相信呢間公司大有前景，包括其股票(vmware係美國上左市)，各炒友不妨留意留意相關概念。

為左分散注意力，最近看黃碧雲的小說(與其說是小說，不如說是一種很長很長的舒情文)，並研讀莎士比亞(他媽的經常一字多意，而且個個意思都好似岩咁，有冇人可以介紹一兩本註釋俾我)。

同時依然每個星期一本economist同埋報左既cfa六大本書下年六月考

點解人要訓覺=.=，廿四小時你估好多﹖

那晚婚禮以後，回家以後，我想了很久，明白了一點。對這種事，我一向有點天份。母親遺傳下來的。

然而困惑，到底是，甚麼時候，甚麼事。毫無道理。因為，我一向，精於計算。

鶴頂紅最毒嗎﹖

誰知，誰曉

一本萬利雖然難能可貴，但無本生利，才是天下第一等的武學。

當大家見陳太振臂高呼，民間百般和應以為必勝，左派紛紛暗自擔心的時候，那邊廂緬甸的昂山女士展示了更勝一籌的政治修為。一言不發坐在家中自然有十幾萬僧侶前來參拜，名副其實是一尊女神，這邊陳太葉太甚至那個落選了的勞大夫肯定個個眼紅。「民主女神」﹖不是學佛祖那樣帶個四萬笑容就可以做。

一個懂得掌握最適當時候流眼淚的女人最能得到天下間男人的支持，而一個硬頸的女人又同時能獲得新一代「站起來了」的女強人所垂青。所以像昂山素姫這種會流眼淚的女強人，最是難纏。軍政府如果在既不妥協又不用效法小平同志的前提下可以解決問題，簡直天方夜譚。

不下凡的女神，才是女神，陳太怎麼不明白。

陳方安生出選立法會，跟港府增持港交所一樣，原因耐人尋味。

選舉講勢頭，像李卓人陳婉嫻等鼠輩每日跟扎鐵工人們大呼小叫，明眼人一睇就知係早一年就要為明年立會選舉做勢，是為低手典範。陳太，當屬高手。

攘外必先安內。眼看陣內泛民山頭林立，互相猜忌，就算自己肯出選，將來這幫人不服氣，唔幫手尤自可，倒抽後腳就不妙。因此先來學諸葛亮，先自拒絕。泛民心知非陳太出選，勝出機會渺茫，心慌起來，乜要求都應承，甘乃威，何秀蘭等退選，當出自陳太及其幕僚手筆。既然知道泛民其實一盤散沙，現在逼得這些曾經的競爭者，將來潛在既搞小動作者退選。而家退選，又話自己心甘情願(其實只係知道冇機會贏，順便賣個口乖，做個順水人情，有個好落台階)，到自己選舉拉票時，就不可以再數落自己，又話自己當時乜乜物物，影響聲譽尤為大事。這式封口術連消帶打，絕。

泛民自亂陣腳不要緊，反正陳太自己出選，也沒旨意靠這幫人出力。她自己賣的是聲望，既是曾經官拜布政司，當然要以高貴為賣點。一直以o來冇所謂「地區工作」，咁一向議員用開既「洗樓」戰術對自己就毫無意義。不用人海戰術，更不用與泛民這盤散沙同流。反正小人己除，以獨立身份參選，擺明你班友唔好認親認戚到時洗樓為名順便又為自己做勢。委身出選，地位乃保超然，又另一絕。

既然不用泛民，出謀劃策重任就落在其核心小組身上。其他人選舉要洗樓，佢唔駛。只要核心小組的大姐們三不五時指點江山一番，自有香港大小傳媒爭相報導，到時自己坐鎮居中，侃侃而談，適時展示一下招牌笑容，票，自然會來。

立法會議員的工作只有一個，就係撈政治本錢(你唔係真係以為佢為民請命先出選呀下，係做民主鬥士，都唔係搵個六十歲阿婆o來做)。以常理推之，只有特首之位才能令其心動。眼見同是「港英餘孽」，曾蔭權做得，做乜我唔做得﹖離下屆特首選舉尚有五年，要做野，絕對夠用。芳間聞說陳太想做泛民共主，實在無聊之極，泛民一盤散沙，做其共主吃力不討好，如袁本初領八路聯軍，得罪人多，兼耗錢糧。泛民議員們，實在太睇小方某人。

至於要做乜野﹖做特首最大障礙當在中央。與中央搞好關係是為特首的基本功。能說服中央支持自己，簡簡單單當然最好。退而求其次，不能獲得支持，爭取2012年普選，或擴大小圈子選舉，對陳太來說，越多人對佢越有利。假如能竟全功，功勞自然歸佢，泛民無與爭鋒，民望一時無兩，特首之位亦唾手可得。

中央一向打經濟牌企圖穩住香港政局，但美國次按問題嚴重，國內衰退跡象越加明顯，香港經濟未來五年似跌多過升，中央不斷北水南調亦不能力挽狂瀾，經濟牌是否有效成疑。假如不行，則為穩住政局，開放普選勢在必行。金融為香港之命脈，陳太亦當有計算在內。

以此刻看，到時天時地利人和俱備，只欠東風。

今日去in個agent，外藉女仕一名。

in完之後，佢同我講，話我英文好。我當堂心裏面打左個突，然後好有衝動想同佢講：

「小姐，你係小弟有生以o來第一個話我英文好既人」。雖然唔信，畢竟聽到都真係有d飄飄地。千穿萬穿，馬屁不穿嘛。

同埋又介紹左一d同佢冇關係既公司，但又覺得我適合既，recommend我去自己apply。係香港地做sales做到佢咁，我諗佢生意應該都麻麻地。

天底下所有事如果都可以靠示威遊行或是談判解決，就沒有所謂「社會問題」。而社會問題，就像幾年前政府說的「結構性財赤」一樣，係社會既結構問題。要解決，就得連根拔起，不是人工由六百加到九百五就可以了事。

議員要撈政治本錢支持遊行無可厚非，但唔知邊條水魚走去sponsor工人罷工一日收三百蚊就等同弱智。工人長期開工不足，話六百蚊一日，但一個月開得十日工，一個月人工計落得六千幾七千蚊，而家有人sponsor，一個月有九千蚊，就差唔多等於資方假若應承俾九百五一日，工人一個月既實收工資，分別，在於前者唔駛做日日示威遊行訓街碌地，後者日曬雨淋擔擔抬抬做到隻狗咁。俾我做工人，最好資方永遠唔好應承，大家永永遠遠罷工落去。

工人有這種諗法，但水魚不可能永遠水魚下去，得想想辦法。今日sponsor三百，過多個幾兩個月就慢慢加碼，四百，五百，工人見sponsor越o來越高自然更加唔想做，叫價更高，到達拖累地產股業績(財經演員的口吻)的地步，然後水魚實行沽空地產股，狂買put輪，一日sponsor出去九十萬，炒番番o來一日幾百萬，不出一月，連本帶利賺番番o來，工人冇開幾個月工，體能下降，更加好食懶飛，地產商要還價，越o來越難。

李卓人等無聊政客就更加高興，平時四出奔走造謠生事或在立法會示威抗議，而家每日朝九晚五上街遊行，一日地產商唔答應工人要求(要求嘛，當然要與香港經濟同步，即同股市同步)一日唔覆工，長做長有，生意興隆。

係香港，要反客為主賺番地產商既錢，同志們(普通話)，呢個就係機會。

某天在書店打書釘，聽到旁邊一對父子的對話。簡單地說，是兒子(幾歲大)想買書，但個老豆好似唔係好情願咁，或者係怕個仔亂買書，於是問：你上次o個d睇哂未呀﹖

香港既小朋友，連買本書都冇自由。難得小朋友想買書，點解要再三刁難﹖佢又唔係買龍虎豹。我就差d忍唔住想問o個位先生，你買股票，係咪每次都放哂上次o個d，先再買新既﹖

股票，冇錯，又係股票。個股市實在包含左太多人生哲理。

我想問，有冇人知xanga點樣plug in aNobii﹖

---------------------------------------------------------------

我這樣一個好辯的人，這幾日竟然提不起談興，原因是工作很累(對，我也有工作到很累的時候)。然而，自己不說話，旁人自會代勞。於是，我忽然成為了一個很好的聆聽者。

然後我想，如果像這樣的沉默可以解決天下間一切問題，該多好。

女友對本人之前的一篇關於宗教的blog感到unhappy，女友為人一向厚道，說話含蓄，但背後意思，小弟心裏明白。

友人說，明知女友會看，看後會不高興，身為男友，這些話就不該出口，還問我：「你有幾重視身邊果個﹖」。一言驚醒，這種話實在不應該寫在一個她會看的blog上面。所以，我還在反省。於是致電，打算致歉，但她很忙，忙著跟同事吃飯說笑談天，很不耐煩。我唯有打個哈哈然後收線，歉就道不出口。

昨天我有回團契。因為原本說是「討論週」，我是有點興趣的(女友好像不大喜歡我因為「興趣」而番教會)，但結果是「辯論週」(當然係out of my expectation)。有這個演變的原因，我想是由於如果這種題目由得大家自由討論，講不了兩三句就會有共識，這一個小時就會很悶局。辯論倒是省卻了不少這種麻煩。問我意見，我說沒有。原因是當他們討論得興高彩烈的時候，加入我這種out of their scope的意見，太過唐突。而且當自己女友也不能平心靜氣地聽這種意見的時候，其他人，按理也不會報以友善的回應。為免由原本四對四的辯論變成以一對七，在下不是諸葛亮，又不是要說服大家去打曹操，舌戰群儒這種事可免則免。

只是當你因為宗教分歧而覺得unhappy的時候，不要誤會，我不會覺得亢奮，好似打左場勝仗咁然後開香檳慶祝，we share the same feeling

對於多位友人詢問：

「點解你女友msn張相冇你既﹖」

由於資訊不通，糾纏不清，以至謠言四起，因此，呢個問題，我既公開回答係：

「我又唔係佢，我鬼知佢點解唔放我張相﹖」

不過公平d講，我部腦既desktop都係放左張Lady Godiva而唔係放佢張相，we are square，沒甚麼大不了。

再講，同咁多個佛像影相，耶穌咁大個醋酲都未出聲，在下也不妨大方一點。

開口中

馬力病逝，原來，o個陣真係俾我亂up，up中左

http://chhung3.blogspot.com/2007/05/blog-post_23.html#links

何必呢......

尋日睇一套叫「小麥子」的福音記錄片(有興趣自己睇，我唔想簡介內容)，當然，在那種場合(團契)，實在是不適合我發表意見。所以唯有記之於blog，公諸於世，大家下次幾時「有幸」睇到o個套片，不妨諗諗以下呢幾句話，然後先再感謝神：

片中各人和席間各團友的看法，我想先用Bertrand Russell的"The Argument From Design"其中一句來回應：

"it is argued that rabbits have white tails in order to be easy to shoot. I do not know how rabbits would view that application."

竟然今時今日仲會有人話呢個小朋友患癌係by god's will，感動別人，傳揚宗教云云。呢種意見，同上面既argument一樣荒謬，所以同樣地，I do not know how the boy would view that application.

如果 "rabbits have white tails"既目的係"be easy to shoot"，咁佢既white tails既存在，對兔仔而言只有係一齣悲劇，你會唔會叫佢因為咁而酬謝神恩﹖如果唔會，就唔該唔好將一個患病既小朋友同神拉上關係。正如希特拉屠殺六百萬猶太人之後，國際社會為左保護佢地，幫助佢地復國，咁我可唔可以話，希特拉大屠殺係神既旨意﹖你有種走去以色列咁講，你估下自己會係點死法﹖

閣下要傳教，不如就幫自己打支愛滋針然後傳到你自己滿意為止，唔好搵個細路o來較非。

Nike

http://docs.google.com/View?docid=dnnc4qd_7d22xvq

用三篇稿講一個放av既網民，應該係只會係香港出現既現象。

先不論甚麼數碼欺凌(又係一個不倫不類既term)，將一個網民既放av行為大肆渲染，本身己經有問題。Historically，一個新媒體面世，繼而慢慢普及，最先受惠既，一定係色情資訊，研究這個現象，應該係歷史，經濟又或是社會學既課題，一篇論文咁長，豈是一篇短短既新聞稿講得完﹖閣下將之簡化，未嘗不可，然而將這個問題歸於一人之功，就好明顯係對整個問題認識不足。

新聞稿尤自可，極其量只可以話佢讀得書少，但篇專欄就簡直不知所謂。誣衊當事人「培育AV 男優新血」，我想請問，小姐，香港邊度有AV男優﹖既有新血，當有舊人，舊人又係邊個﹖既有男優，理所當然會有女優，請問香港地七百萬人，又有邊個報稅既時候寫左自己職業係「AV女優」呢﹖冇，就唔好講到人地好似開班授徒咁，然後列舉一堆青少年風化案，入埋佢數，o個幾個靚仔係咪俾當事人直接或簡接教唆﹖唔係，然後你咁樣係個專欄度寫，就係完全不負責任。

當然，要你舉証據証明冇nike就唔會有閣下列舉的事情發生似乎有點困難，但comparatively，我會比較相信就算冇nike，都會有其他網民放av，d中小學生繼續可以download av同繼續睇av。將這種風氣歸咎於一人，就等如以為捉左個古惑天皇就冇人會bt一樣，這種立論跟本不成立。

閣下執筆行文，以後最好三思，免得網民一下子亢奮過頭，罵得閣下狗血淋頭不要緊，但將《明報》改成《膠報》，子孫不肖，卻辱及祖宗，查大俠面上可不好看。

談欺凌

欺凌就欺凌，乜Q野叫數碼欺凌﹖唔好乜野term求其關電腦事就加「數碼」兩隻字落去，然後又扮專家咁講一大堆廢話o來演繹呢個term。一般欺凌同數碼欺凌既成因有冇分別﹖冇。結果有冇分別﹖都冇。咁「數碼」呢兩個字咪就係廢話囉。只不過係用唔同既media之嘛，以前你係用手腳，用口舌，傳紙仔，而家變左係網上寫字，有乜咁值得大驚小怪﹖講到尾，咪都係好似小學生打交咁，你搶我支鉛筆，我偷你舊擦膠，兒戲到極。要你閣下用一大堆digital，cyber又幾多幾多百分比扮哂professional咁o來寫﹖

另，欺凌是甚麼﹖因為係呢個世界，有弱小同強大既共存。強肉強食，適者生存，想唔被欺負，好簡單，變得強大就可以，冇辦法變強大，咁你就認命。而唔係小題大做，一叫有人俾人「蝦」就撲埋去保護佢，你肯定佢一定就係o岩o個個﹖邊個話強大o個個一定係錯架﹖我買層幾百呎既樓要幾百萬，我都話我俾李嘉誠恰呀，你唔好又係報紙度寫下﹖

就正正因為呢種保護意識，小朋友係學校有乜東瓜豆腐番到屋企就撲埋個阿媽度係度喊：阿媽呀，miss今日「恰」我呀，嗚~~~」然後個阿媽唔理三七廿一第二日就番學校同個miss「理論」，呢種係值得鼓勵既態度﹖

論仇恨

又係同一個問題，「科技散播匿名仇恨」，同「散播仇恨」，有乜分別﹖「科技」兩字上文已提，不贅。至於匿名，我想請問，呢個世界有邊個話鬧人之先，要自報姓名既﹖定係閣下睇得太多武俠小說，找人麻煩之先都要說一通：「在下華山派令孤沖，汝是何人﹖」然後先打﹖低能！

再講，論散播仇恨，該編輯又何嘗唔係。字裏行間，渲染一個網民既行為對整個社會既影響，令一眾父母親感到「我個仔成日睇av就係因為你係度日日放幾套av」，令該名叫nike既網民一瞬間被天下父母親視之如過街老鼠，點解閣下唔寫下佢散播仇恨﹖閣下亦如是，甚麼「本地網上論壇一向都盛行口誅筆伐」，「篡改圖文」，「尋人起底」等等。這些行為，好像也不是網民的專利，咱們中央政府也非常喜歡口誅筆伐，篡改六四歷史，尋人起底更加不在話下。閣下立論不見得特別中肯，還說「心寒」云云，顯然也是散播大眾市民對這些網民的仇恨。尋人起底，辦報的難道會做得少﹖黐膠花！

今日行尖咀商務，諗住搵一本叫The god delusion既書
行哂成間都唔見，於是問個售貨員，佢答：
「呢本書賣哂咯喎，因為上左暢銷書榜呀」

佢都睇得幾通透，香港地既書，到底係因為上左榜所以暢銷，定係暢銷所以上榜架﹖

進修之路

係一路諗下年再報過科大mba之際
一個更吸引我既course出現左......

http://www.baf.cuhk.edu.hk/mba/program_jd_jm_obj.htm

不過，三年，點讀呀......
睇佢個curriculum起碼有五年既野

今日放工途中同同事吹水，講起呢樣野：

我：「其實係咪每個岩岩畢業既學生都會想自己搞生意既呢﹖」
友：「唔知呢，可能掛，尤其係男仔添啦」

上星期行過書店，睇到一本叫「富爸爸辭職創業」既書，佢裏面有一句寫得真係好好，佢話，而家既學校，係訓練labour，而唔係entreperneur

中哂point啦

岩岩睇完魔盜王，可能係因為睇之前都冇乜expectation，比想像中好，雖然好多劇情其實都係交代得唔清唔楚。不過睇呢套戲，其實都係因為睇左頭兩集，好頭好尾冇理由唔睇埋第三集丫，所以雖然好多人都話唔好睇，結果又係好多人照去睇。

除 左戲，最近都睇緊本書，叫"winning"，一本講management既書，我一路睇，就一路發覺，個作者所講既每一樣野，我老細，都好似犯哂(我淨 係睇左頭五個chapter，但命中率達100%)。而呢位作者，係前GE(美國通用電氣)既CEO，佢將GE由全球排名第十，提升到全球第二大企業。

大家都係電力公司o者......

所以我成日都認同一樣野，就係人，係要讀書既。冇野做o個陣，如其掛住打俾d 師奶閒話家常或者同d仔女安排課外活動，不如睇多兩頁書啦你。

話時話，我feel到，佢開始唔妥我

----------------------------------------------------------------------------------------------------

份test做完一個星期後，我仲未收到reply，睇o來凍過水

考試隨筆

今日去做recruitment test，75分鐘，做35條mc加兩篇essay

佢，recommend，30分鐘做mc，45分鐘做essay。As a result, 我，用左45分鐘做mc，然後用30分鐘嘔兩篇essay。當然，毫無文筆可言，而且，應該會錯幾多tense......

但呢個唔重要，重要既係過程。

話說我一打開份卷，一睇，份test既題目，八成係GMAT，當時我心諗：「P你個K，今舖仲唔L掂﹖天助我也啦今次」斷估，成場，除左我呢條無聊友之外，都應該冇人會考過GMAT喇掛。就算未見過題目，d技巧，點都用得著啦係咪先。

而結果係，當我做到第七條mc既時候，我望下隔離，再望下前面兩位仁兄，都己經去到下一版(10-12)。然後，一路head住我十分鐘o來做

.......

我唔明，35條mc，20條係verbal，15條係maths，數己經唔係淺(深過GMAT，我都要一分鐘一條仲要有一條唔識做=.=)，20條 verbal，我當你grammar真係好勁頭十條考tense同埋sentence correction你可以唔駛諗就識做，後面十條全部都係critical reasoning，每條起碼要花兩分鐘(我兩個月前做到爛熟後用既時間)，你班友係咪真係快手到咁呀..........我GMAT考得唔差架 啵......淨計個分，我科大mba都夠入架啵......

順帶一提，GMAT俾既時間，係大約兩分鐘一條

最吹脹係，佢封email度，話(The test will take 1 hour 45 minutes approximately)......o個三十分鐘，我唔知點解會俾人扣起左，唔知去左邊

香港地唔係真係咁臥虎藏龍呀下.......

星期六個writing assessment，我勁淆，因為好想pass

因為在乎，所以緊張

你明唔明呀fifi