EQ

"Never let anyone know what you're thinking." (from Godfather III).

俾人當面挑撥應該怎樣做﹖你應該廢盡心思掩飾你心中的情緒，和一切可能暴露你的心情的肢體動作，而不是思考如何反駁。習慣是需要花時間來養成的，要在辦公室多多練習。學校會教你知識，但老師從來不會教你如何控制你的EQ，這就是所謂的工作歷煉。

周六，兩位移民左加拿大十幾年的親戚回港，相約到美心飲茶款待。兩位同家父母有何恩恩怨怨其實我是不太想干涉的，但大家知唔知呢條友講乜﹖佢同我講：

「丫，你真係幾似你阿媽架喎，一樣咁矮。」

我自問就真係好少會話女人做八婆，在我手上有這個名銜的女人真是屈指可數，但呢條友，我真係想同佢講：

"Why don't we cut you up into little pieces and feed you to your pooches?"

我在心裏諗完這句Joker的對白，然後繼續食蝦餃飲龍井，美心的龍井茶葉偏苦，少了點甘甜的味道。番工兩年養成的習慣，是面對這種情況，嘴角都會上翹，然後再用雙眼死死地盯著對方。

"Now I see the funny side. Now I'm always smiling"我這麼喜歡Joker這個角色是有原因的。

「你梗係成日掛住打機唔做運動啦。」

這次我跟自己說：Why so serious, son?，然後繼續飲茶，都廢事啋佢。呢個世界真係有人幾十歲個腦囪都未關埋。

唉，我都係忍唔住要係度發洩下。

十萬個厭惡民建聯的人

facebook最近新開的group，我見到後的反應是，很想笑。很明顯香港人還是不懂得政治，等如有人常說「香港不適合有民主，因為他們選長毛。」一樣，只顯出其人之愚魯。

《教父》是我最喜愛的電影，裏面其中一句對白，是第三集裏，Vincent提議將Joey Zasa殺死的時候，Michael對Vincent說的：

"Never hate your enemies. It affects your judgement."

為甚麼要憎恨民建聯呢﹖選議員的目的，是為市民謀取利益，一個令香港社會好的議員，就是一個好的議員，你話知佢係民主黨定係民建聯﹖

擺明車馬討厭民建聯，會令民主派有機可乘，利用民粹增加自己的政治本錢。民主派選舉是為了利益，民建聯選舉也是為了利益，作為選民，你手上的選票，也可以為你帶來利益，never hate anyone，那不會為你帶來一毛錢的利益。

"Keep your friends close, and your enemies closer."

這句是第二集的。

世界末日

「當世界末日，你會做甚麼﹖」

這條問題，應該算是全世界最多人問過的問題，但好像從沒有像今日這麼切身。前題是，你有足夠時間去做這些事。尤其是，當霍金說少於百分之一會發生這種事......不足百分之一，其實也是一個不少的或然率，我有點懷疑這傢伙的小兒麻痺症是不是開始蔓延到腦部了。

我會做甚麼﹖

1. 馬上找一個住得最近的基督徒朋友，然後詢問他對這件事的看法。我單保，他的表情一定很有趣。

2. 然後去最近的立法會議員辦事處，詢問他們對這件事的看法。他們的表情一定更加有趣。

3. 然後打電話給美女們，告訴她們其實我很愛你。雖然不知道她們在那種時候接到這種電話會不會抓狂。哎...有的我還從來沒有打過給她，到時還要多補一句「喂，我係Derek呀...」(其實我很少打電話)

做到呢三樣野我心滿意足喇。不過如果真係有個黑洞，睇怕都未知發生乜事都死左咯，有乜所謂丫。

希特拉是民選出來的

選舉那天，投票完畢，我又想起演說，然後我忽然想起葉劉的那句名言：

「希特拉都是民選出來的。」

希特拉無疑是世上其中一個最懂得演說的政治家。先不說他如何邪惡，如果香港求其一個政黨有這種領袖人物，區區立法會選舉，他應該是不放在眼內了。

希特拉是否民選出來的﹖他當然是民選出來的。當年葉劉此話一出，很多人說其實希特拉是用了很多卑劣的手段贏了選舉，So what﹖總之投票箱內他以最高票當選，他就是「民選」出來的。

但很明顯葉劉並沒有看清楚其中的關鍵，民主派也沒有，結果兩邊牛頭不塔馬嘴，老實說，場面有點搞笑。

民主派就更加別說了，這種簡單的邏輯問題還要氹一大個圈來解釋，那些公公婆婆大概沒有興趣了解納粹黨的複雜歷史吧﹖一句話就可以說破了：

「你食飯有機會噎死，你係咪以後唔食飯丫﹖」

民主有機會選出希特拉，你就以這個理由來否定民主嗎﹖一個國家越發展，資訊越發達，民主是一個不可避免的結果，就像食飯一樣，你絕食幾十日仲可以吊住條命，但一年，兩年，你最終還是會營養不良而死。

finish！仲有乜野要講﹖你想同全香港幾百萬人上歷史堂，咪玩啦。

演說

香港的選舉，永遠只有辯論，但沒有演說。

辯論的精彩處在於互相攻擊，拳來腳往像看武俠小說一樣。但一個人如果只知道針對別人的缺點，而不懂得宣揚自己的優點，那就只能淪為一個打手。所以一個全面的候選人，除了參加辯論，還應該有一兩場出色的演說。參加辯論，是為了告訴選民不要把票投給對手的理由，而演說，就是告訴選民要投你票的理由，何者比較重要，是不用廢話的了。

你留意一下，香港的政客開始他們競選的campaign(中文叫甚麼﹖)，都會搞「誓師」，即是甚麼﹖對我來說，那只是一班候選人用來壯行色的，對選情有沒有幫助﹖沒有。那搞來幹甚麼﹖玩來玩去就是落區拉票，晨早七點開始站在閣下樓下跟閣下握手問一些例如令壽堂是否女人的問題，然後就「請俾個機會我」。

那些甚麼黨主席之類的，可不可以花點時間準備一兩場大型演說，至少我見你說話流利論點清晰，都會比較可以相信閣下在立法會議事廳裏的議事能力(大家別搞錯，立法會內的辯論不是選舉論壇中那種潑婦罵街式的，是有程序的)。而且可以歸納一下自己黨的重點。要記住，選民投票，很多時是投給黨的，要建立整個黨在大眾心目中的形象，不能單靠個別候選人突圍。而演說，無異是最直接有效的方法。

看看隔著大西洋的選舉，奧巴馬憑甚麼突圍而出﹖麥堅恩又怎麼絕地反擊﹖還是靠一場場的演說。辯論，只是用來錦上添花而已。

但當然，他們有沒有這種才能，又是另一回事了。

正名

名不正言不順，出師無名，失敗是遲早的事。

「將好戲量踢出旺角」這一號召，從一開始就是錯誤的。理由很簡單，你輕輕鬆鬆將好戲量踢出旺角，如果我是油麻地尖沙咀的居民或者上班人士，就很難支持你了。你想想，好戲量離開了旺角，總還要找地方落腳的，萬一走來我這裏，於是我每日放工就會見到他們。你叫我點支持你﹖

做人，不可以這麼自私的，自私的人哪裏會有朋友﹖如果以前廉署的口號不是「撲滅貪污」，而是「將貪污踢出香港」……

你知道整件事是多麼搞笑了。

簡簡單單「踢走好戲量」不是更好嗎﹖起碼不用得罪油麻地尖沙咀的居民，而且字數更少更簡潔。把他們踢出旺角，不在旺角阻街非禮非法擺賣難道閣下就不管﹖

雖則「好戲量」這三個字也不見得十分高明，但都係嗰句啦，人地衰你就要跟埋一齊衰架喇咩﹖

好戲量

我一向沒有看《蘋果批》的習慣，但今集實在很有趣。看後獲益良多，未看的朋友，在下強烈推薦。

香港人向來有一種很奇怪的想法，就是假如所做的事沒有任何金錢瓜葛，就是正確的。為藝術而犧牲﹖那簡直是偉大。而這個社會對待偉人是應該抱景仰的態度的。

於是那幾個facebook group代表和節目主持就被牽著走。「我地都好明白藝術嘅野人人睇法都唔同。」你留意這句說話在整個節目中出現了多少次﹖都數不清了。

做這種論壇，最重要是思維清晰，別被那種白痴的廢話混淆自己的思路，是基本功。

其實由始至終問題都只有兩個：第一是阻街，第二是非禮。

先談阻街。別跟我說甚麼誠邀大家去睇show的廢話，我話知你係哥普拉係嗰度拍緊教父第四集﹖你拍五日我唔理你丫，你拍五年喎而家﹖你將一個公共空間霸佔為一個閣下專用的空間五年的時間，然後再話我知一個行人專用區唔應該只係行人所以你唔好一日淨係係度complain，complain，complain。咁，我係咪係嗰度起間屋住下都得呢﹖

好多電訊公司都係度擺檔﹖一，人地冇用咁多位，二，唔好因為有其他人做同樣的行為而將你自己的這種行為合理化。這是常識。再講，我有話好歡迎佢地咩﹖

非禮就更加搞笑，「呢個係成套戲係當時的環境所出現的一種情況」。佢其實知唔知自己係度講緊乜﹖

重點並不是閣下當時在做甚麼，有甚麼環境甚麼氣氛，而是那個女孩子是否願意被人kiss。上到court法官是不會理會閣下當時是做戲還是做愛，他只會問那女孩子有沒有明示過你可以kiss佢，又或者過程中該女孩子有沒有明顯的反抗動作。香港法例是保障女性的。

我實在不明白為甚麼可以一句「戲情需要」，他就以為可以將問題輕輕帶過，很明顯所有的戲情需要都必須演員同意才可以進行的，記得年前張衞健和謝霆鋒演戲途中借機打人嗎﹖結果搞得幾大﹖如果「戲情需要」大哂，「藝術觀點個個不同」可以是藉口，那我下次殺人放火都可以﹖你認為沒殺人放火那麼嚴重﹖你不知道非禮在香港同樣是刑事罪嗎﹖

奇怪的是整個節目從沒有人提出過這幾樣最重要的問題，然後一直兜一直兜，沒完沒了。

當然，那位楊先生還有很多搞笑出位的鏡頭的，例如當被人批評為「冇戲量」的時候，他發脾氣，說「你話我冇器量本身就係一種侮辱。」。我成日都唔明，當我話一隻豬係豬的時候，何解你會認為我正在侮辱那隻豬呢﹖同樣當我批評一個冇器量的人冇器量，你憑甚麼認為我是在侮辱你呢﹖「你話我冇器量本身就係一種侮辱」﹖閣下這句說話本身就是侮辱「邏輯思維」這個詞語，侮辱「批評」這個詞語，還有侮辱了天下所有的母親。點解﹖因為以後你唔可以話你阿媽係女人囉，小心俾雷劈呀衰仔。

因為閣下的組織名稱是「好戲量」所以批評閣下「冇器量」是一種侮辱﹖那就是如果閣下不是叫「好戲量」那我的批評就不是侮辱了。那問題就出在你自己的名本身嘛，別把責任推在我身上。你名叫李聰明，考試全班包尾，於是被人叫你「唔聰明」，你話人侮辱你﹖不如問下令壽堂何解明知你蠢過隻豬又幫你改「聰明」這個名字，明知閣下冇器量但改戲團名叫「好戲量」，你自己俾位人入怨得邊個﹖

還有一點，閣下如果夠細心的話，會留意到他經常說現在這個模式是「跟警察溝通的結果」。

何謂「人蠢冇藥醫」﹖這是人辦。

全世界從來只有上級向下級卸責，你甚麼時候見過做細的可以將肩膊上的責任推給上司的﹖你想將責任推給警方，推說這是警方的安排﹖冷靜一點，無憑無據，沒有白紙黑字的事情大家都只靠個信字。戲都做唔少喇，你販毒被捕，然後跟那個盤問你的警察說「你知唔知d粉邊個架﹖尖沙咀黃警司元朗區李處長中環總署陳幫辦私低下夾份開個檔口嘅貨唻呀！你夠膽郁﹖買棺材唔撚知定呀﹖」你以為自己是否會明日就無罪釋放﹖我包你聽日日出之前就「畏罪自盡」了。搞藝術不是問題，先讀多一點中國歷史好不好﹖如果我是旺角區警署署長，下次一收到風「好戲量」又擺檔，即刻帶隊防暴警察驅趕啦。擺到明你而家犯眾憎，我做署長我幫邊個﹖

簡單而言，整個論壇對好戲量來說只是一場公關災難。他們有著楊先生這種出色的representative，大家應該很快有好日子過了。

溝通當然不是問題，但請閣下先準備好一點點的common sense才來吧。

還有，真心奉勸楊先生一句，有心搞藝術嘛，就不要在香港這個彈丸之地，閣下才華洋溢，在香港就等如龍游淺水，虎落平陽，荷里活才是你大展拳腳的所在嘛。最最緊要，做人要有骨氣，走了，就不要回來。正所謂「好馬不吃回頭草」嘛，對不﹖

Credit

我到今時今日依然不明白的一件事情，是為甚麼有這麼多人打開門口做生意，仲係鍾意呃呃騙騙。

事緣，現在名義上正聘用在下的agent公司昨日來電，內容大意是現任的銀行想問如果想我打風都要番工，要求的人工是多少。

我思前想後，覺得不對勁，於是今早問老細。

「冇咁嘅事啵」

咁大家都知乜野事喇。

我唔明，呢d事第二朝就可以查正的事情都可以呃﹖係咪真係當我lulu﹖講大話呢回事，我認為，最好的學習對象，是股神畢菲特：

"If you don't feel comfortable owning something for 10 years, then don't own it for 10 minutes."

And I'd say if you can't deceive someone for 10 years, don't do it for 10 minutes.

乜做生意唔係講信用架咩﹖

小丑

今早上班，途中，見一電單車橫臥在馬路中心，我心想，電單車被撞翻了嗎﹖

車再走前一點，我看見電單車旁，還躺著一個人。不知道有沒有頭破血流，他戴著頭盔，而我看到的是他的背面。他像泥一樣軟在地上，不知道還有沒有救。

那時我想，如果那個是我，就這樣被車撞在地上，死了，那我現在做的到底是為了甚麼﹖豈不是都白費心機﹖

這真是一個一流的懶惰藉口。

然後那時我有點想折返回家，不幹了，星期一死就死啦。反正還有人這種危急關頭走去北京看奧運。

然後我又發現，在這種關頭還有心思思考如何懶惰的問題，我的冷血症似乎又有加劇的跡象。

在國金工作了的九個月，我學到的是「抽離」。那並不是指要將自已抽離工作做一個卸膊的人，事實上我一直都很盡責。但上班這回事，實在沒有必要加添太多的感情元素。不要太過著緊，看著deadline做人就是了。那才能夠冷靜處事。

而冷靜和冷血的分別是，冷血是冷靜，再加點血。例如在對手發出淒厲的叫聲的同時仍然冷靜地用小刀在他面上畫上小丑的笑臉。這招在開會時用不知會有甚麼效果﹖即在別人氣急敗壞的時候依然不留情面的攻擊他的弱點。

小丑雖然聰明，但註定是一個不受歡迎的人物。

產假

某日飯局，跟老佛爺等談起產假的問題。

身為一個市場經濟原教旨主義者，進化論的忠實信徒，當然會覺得那些白痴福利無聊之極。而產假無異是當中最無聊的。因為最不公平。

男人永遠沒有產假，女士未婚的也不大有希望會有產假，結婚但不想產子的又沒有產假，結果這種福利只掌握在一小撮做愛不戴套的人手上，而老闆補貼的十個月人工換來零生產力，還未算前後一星期cool down同warm up，十二個星期，足三個月了。

結果監製是這樣評價：「你呢d人仲係停留係十七世紀嘅資本家思想。」當年他是諗社會學的。

而老佛爺則頒下御評：「你諗野可唔可以唔好咁偏激呀﹖」當你個個月要將薪金百分之三十捐給國家建設LV大觀園，而你最近又很不幸地聽到國家一個唔覺意在一眾中移動中石化之間將你半年的捐款化為烏有，偏激一點實在在所難免。

丫，我仲想講，十七世紀d資本家，係咪都好有錢架﹖

Continue

The previous one is just kidding. Everyone please don't take it serious.

And this one is serious.

Perhaps it is universally acknowledged that all things should be "real" in the entire Olympic games. And I can't even imagine how the two little girls would feel...you know, the implicit meaning of this fake is that the little girl's appearance is reckoned as an opposition to the interest of the country because hiding her face to public is due to the consideration of the country's interest.

Don't you think that it is too serious? And why don't they pay the same attention to the psychological effect on the two girls? One is blamed to have an ugly face and the other an unpleasant voice. You don't want your daughter in either position, right?

What I know as a worldwide standard is that children should be protected and they deserve the greatest respect.

That's what I believe, sincerely.

代唱與魔術

奧運那位小女孩是否應該找代唱的問題，其實並不複雜。

因為這根本不是一條是非題。事實上這個世界並沒有純粹的是非問題，有的只是情緒問題。

而且實在沒有必要將它延伸到甚麼大國崛起，係人都知係場show之類的問題。其實，兩個字就可以概括：

假狗

你話可唔可以接受﹖

女人，當然會話可以接受，不然市場上不會有一種叫「魔術胸圍」的產品。

「你估我帶d咁嘅野係俾自己睇架，俾你地d麻甩佬睇之嘛，成日望住d鬼妹眼都唔眨」

對女人來說，「費盡心思，呈現最美好的一面給大家」，是天經地義的事，而且非常值得鼓勵，及同情。女人總認為這樣做是表現女性動物大愛無私的行為。是糟蹋自己，取悅他人。

「我為自己架而家﹖你知唔知帶d咁嘅胸圍好逼架﹖」

男人呢﹖當然是不可以接受，不然市場上就會有一種叫「魔術底褲」的產品了。

男人很明白，要令一個女人滿足，是不應該不斷提升她對你的expectation，而應該降低佢。一個大話，要講，就講一世。那男人為甚麼不願說這種大話，原因就很明顯了，因為全天下的男人見到每個女人，都會先假設她是能夠揭穿這個大話的人。

因此這種大話可免則免。

所以下次閣下如果有幸聽見有男人覺得北京奧組委找代唱是很正確的，那麼作為女士的你就應該小心，因為：

1. 一個支持造假的男人是否信得過，閣下自己心中衡量吧。
2. 我會合理懷疑他平日上街，褲浪裏是否收有一條在city super購買的德國法蘭克福腸。

捷毛的反証

女士都喜歡有長長的眼捷毛，是不需要懷疑的。

這從我身上可以看得出來。

話說我從小眼捷毛就很長，但家中另外兩個女人(媽+妹)的則較短。而根據女士社會一直奉行的「文人相輕」法則(即就算佢地幾羨慕你幾想好似你咁，講到出口都只會變成批評，例如話一個瘦嘅女人得排骨，一個大胸的女人似乳牛，等等)。於是擁有長眼捷毛，得到的評價是：

「d眼捷毛咁長，一睇就知佢懶到出汁啦。」

當一個女人批評你的外表，你應該先思考她的動機，到底是出於厭惡，還是妒忌。這很明顯是後者，因為「懶」，同長眼捷毛是毫無關係的。

我懶因為我夠聰明唔駛溫書都pass，點解你唔講話長眼捷毛表示聰明﹖

所以由此可以反証，女士是喜歡長眼捷毛的。

但你要明白，我係一個男人，男人的賣點，永遠都不是那一排眼捷毛。你幾時有聽過人咁講：

「佢d眼捷毛好長，好man呀~~~」

就算俾你聽到，你都只會懷疑呢個女人係黐線的。

帶眼鏡的時候就更加無奈，因為會頂眼鏡。我又不敢修剪，因為聽說會「倒生」，到時就手尾長。每次妹聽到我這個評語，就會：

「妖！」

其實頂眼鏡的感覺是很難受的，像...

算了，這個比喻太不雅。

聖徒

Padre Nostro, che sei nei cieli,
Sia santificato il tuo nome.
Venga il tuo regno,
Sia fatta la tua volontà,
Come in cielo, così in terra.
Dacci oggi il nostro pane quotidiano,
E rimetti a noi i nostri debiti,
Come noi li rimettiamo ai nostri debitori.
E non ci indurre in tentazione,
Ma liberaci dal male.
Amen

主禱文的意大利版。我不懂意大利文，也沒打算學。我就只會諗這一段意大利文。

事實上我還是一個意大利文也不懂，我只是記下發音而已。

昏暗的教堂，木制的大門中間留了一線的空隙，光線從那裏洩露出來。像一柄利劍，指向高台上的十架像。

教堂內的長廊很長，足夠令原本集中的光失去線的型態。劍就永遠都指不到主基督耶穌的身上。

哪有耶穌會躲在暗處的﹖

「呀……」

我推開門，整個教堂馬上就明亮了。然後我走進去，又再把門緩緩蓋上，留下原本那一線的空隙。

整個教堂又回歸黑暗，只剩下光明的利劍。

我愛到無人的教堂，因為那才是真正的寧靜。等到人一多，就會開始嘈吵。就算他們如何安靜，還是會有呼吸聲，坐下時木質排椅榫位那種咿咿呀呀的摩擦聲，翻動聖經和詩歌集的紙張聲。很吵。

我穿著整齊的西裝，那是習慣。因為木底的皮鞋走在木質的地板上，撞擊的聲音迴蕩，就令教堂更加幽靜。

鳥鳴山更幽，我需要這種昇華了的靜。

我選了一個陰暗的角落，在排椅上坐下，把身體傾前，低下頭，雙手交疊，向著聖基督的十字架像諗主禱文，然後就開始我的默禱。

不，是冥想，虔誠教徒的冥想才可以被稱為默禱。

我以前間中也會在這種時候到禮堂冥想，但這大概是我最後一次的冥想了， 今天之後，我就不會再到這裏。

當人類重新回歸上帝的懷抱，魔鬼就沒有了繼續逗留於世上的理由。

我望向台上的耶穌受難像。聖主耶穌基督，我走後，你會覺得寂寞嗎﹖撒旦走後，耶穌就再沒有敵人。

無敵，很寂寞的。

=====================================

別懷疑，這是一部愛情小說，雖然應該會有很重的宗教成分，正確點說，是基督教/天主教成分。最近忙於工作，回家已經筋疲力盡，所以更新應該會比較慢。

請見諒。

冷感

當大家看奧運開幕禮彷彿在看續集的《滿城盡帶黃金甲》的時候，就像大家今時今日看見李麗珍依然只會想起《蜜桃成熟時》一樣

佢唔想架。

而因此被人批評為「不愛國」

喂，佢真係唔想架。

尤其是當奧運節目在廣告時段完畢之後，主持人第一句是「歡迎大家番番唻為中國加油。」而我即刻將電視關掉

喂，你都諗下人感受丫。

唔一定係中國人先會睇你無線丫，更加唔係每個中國人都想為中國加油丫。尤其當你發現外國的女性選手們個個樣靚身材正，中國漂亮的全部靠了邊站做佈景版，你做觀眾，會支持邊隊﹖

同一個世界，同一個夢想。同一個審美觀好唔好﹖

唔好再咁政治正確次次都「為中國加油」好唔好﹖唔好搞到好似拜年咁一開口就「恭喜發財」，「恭喜中國隊今日又增加了n面金牌」，好唔好﹖

所以我認為，一個人對奧運冷感，跟對性冷感其實是一樣的...

你諗下，世界上邊種人最容易性冷感﹖點解﹖

因為日日做囉。

大家都唔想架。

9A

會考放榜那天，報載可愛的李卓人議員的千金，考了9A，文科。

於是又令我聯想起那位國寶級的女孩子。

當然兩者還是有分別的。前者說只預料自己有4A，9A是意外；後者，據說，由於中文C了而哭了一大場。雖然我不太相信。

是據說，因為會考那年，我己經沒見她四年了。

我還發現，我對旗袍的鍾愛，還是因為我最後見她的那天，她穿著一件旗袍校服，所以到今時今日，我還是覺得女孩子穿旗袍，最好疏個短髮。

看李卓人那個熊樣，想不到他女兒還算是個人物，而且樣貌中上，實在不得不讚嘆造物主的奇妙。

還有衪的幽默感。

已經不愛，但我發現原來我仍然很想，很想，再見見她。

盈利預警

這個星期五應該是不會有文章更新的。因為這次打算寫長一點。

寫小品很吃力，開一篇新開一個新題材。但我人不帥，所以只有一次的戀愛經驗，你想我就算如何無病呻吟，沒有經歷過就是沒有經歷過。

好了，再加上妹的經驗，一共N次好不好﹖還是玩不出甚麼花樣。

好了好了，其實是還有很多花樣的，但花在這個短/長篇裏慢慢玩吧。

寫短/長篇就要有故事結構，還有資料搜集，不知要搞多久。我期望下星期可以開始。我這人三分鐘熱度，再拖下去也許就不會寫。

順道問問，香港有沒有像樣一點的天主/基督教堂﹖像樣的意思，是要有歌德式建築的那種。

幻想下午茶

銀匙叮叮響。

我愛喝奶茶，正確點說，是絲襪奶茶。取這個名字的人實在是太偉大了，他沒有隨便取一個甚麼「紗網奶茶」的三流名稱，絕對是對人類的一大貢獻。讓大家在滿足味覺的同時，還有另一重的幻覺享受。但你要明白，絲襪奶茶這回事，是只可以在香港流行，在外國不可以。

因為外國多的是穿絲襪的女人。

香港沒有女人穿絲襪嗎﹖有。但你望著那對腳，你會有興趣的問題只會是眼前這位女士到底是效力愉園還是南華，而不是廣告上說的甚麼黃金分割的秀麗曲線。很奇怪，香港有美麗雙腿的女士總喜歡穿牛仔褲，會穿絲襪的又只會配西裝，然後裙子把一雙腳包得密密的。難道被別人看到雙腳，會懷孕的嗎﹖

男兒膝下有黃金，女兒呢﹖她們大概以為自己雙腳都是鑲鑽的。

於是男人對絲襪的讚頌，就只能留給奶茶，而不是女人的美腿。雖然你明白其實絲襪奶茶跟絲襪毫無關係。但請女人更加要明白，當一個男人要淪落到捨女人而選奶茶，那是一個多麼艱難的抉擇。

我望著眼前進食中的中環OL們，右手一邊攪動著，思緒像杯中的奶茶，不停運轉。

香港的女人都很笨，她們懂得讓皮膚不哂太陽，懂得買化粧品護膚霜，懂得戴魔術胸圍，但不懂得穿一雙性感的絲襪。她們盡量令自己變得attractive，卻不懂將自己進化成seductive。她們對自己的武器的認識還停留在胃部以上，而完全忽視腰部以下的部位。

但，你去看《蒙娜麗莎的微笑》，真的只會留意她的微笑嗎﹖那達文西為甚麼不只畫一張嘴﹖上帝為甚麼要做全身的你，而不只做上半身﹖

一個聰明的女人懂得將自己當成一件Michael Angelo的雕塑品，將多餘的肥肉琢走，然後再將完美的曲線，靠衣物展現出來。fashionable的衣服不是用來敝體的，女人街十蚊三件T恤可以做到的事，別花三千大洋去做。更何況通常越貴的衣服，布料越少。

所以別再說絲襪是用來保暖的，正如嘴巴不只是用來吃飯的，還可以讓男人可以向你甜言蜜語的。你應該選購舊式在背後有縫口的絲襪，腿要夠長，先天不足的話則應該把裙子縮短，或者簡單點，穿旗袍吧，這種滿州傳來的女性馬上服裝絕對能夠表現閣下美好的身段。重點是當男人的目光跟隨那一條幼細的瑕疵從下而上時，你有足夠的時間讓他培養情緒。

然後又被你的裙腳阻止他進一步的視覺刺激。其實seduction是很簡單的，不一定要眼放生電才算是調情，嚴格地說，那是發情。

在茶餐廳飲一杯奶茶都那麼多聯想，我發現最近自己的腦筋的確出現了點問題。

我想再次專注於奶茶上，卻越來越不自在。堂堂一個男人公眾場合飲絲襪奶茶，我竟然有難堪的感覺。像，大庭廣眾研究起手上的一對絲襪一樣。給人感覺柔弱還是其次，被誤會我是個基佬或者戀足癖就真是無妄之災了。

而且還大談女人穿絲襪的心得...

可惜香港有點情調和尊重私隱的地方，卻只會提供奶茶，而不是絲襪奶茶。例如酒店和高級餐廳。不然，可以在半島酒店開一間套房，拉開向海方向的對簾，一個人靠在椅上，用一只幼薄的白瓷杯載了八成滿的絲襪奶茶。右手執著銀匙，在杯中不經意地攪拌著。像你伸長了的左足，在我的胸口輕輕撩動。有清脆的聲音在你足鍊的銀鈴上發出。

這才算是一個人的浪漫。

但高級的地方大概不屑於將穿在腳上的絲襪和喝進肚裏的飲品拉上關係吧。在床上的時候他們怎麼不這樣想﹖說老實話，哪一個男人會不喜歡懂得穿絲襪的女人﹖

每個人心中都有著原罪，但偏偏很多所謂正人君子都說自己對性感的女性沒有興趣。不是說要認罪的嗎﹖

人類真是偽善的動物。

酒店裏的奶茶，滑是滑了，一點茶香都沒有像喝一杯奶水，完全沒有茶餐廳奶茶那種濃郁的茶味。但闊太們很喜歡飲這種high tea的，對她們來說，high tea的重點，在high，而不是tea，她們還可以食high cake，据high steak，Whatever，總之要high。

會有千金小姐忽然坐在我對面，跟我一起飲絲襪奶茶嗎﹖拿不到電話號碼，至少我可以說服她以後別到酒店飲high tea的。你知道嗎﹖酒店很喜歡做的一件事：叫一杯奶茶，讓顧客自己加奶。真不負責任。如果我點的是蒸魚，你會不會要我自己調校豉油﹖

但茶餐廳畢竟太過市井，稍欠格調，而且茶杯既厚又重，又多崩口，女士拿在手上實在不能說非常舒適。

小姐要飲，又要情調，就由在下到你家中，旁邊先播一隻Richard Strauss的Schlagoberswalzer，然後再給你沖一杯正宗的奶茶。

幻想真是美好的東西，能夠令手中的那杯也輕了起來。

銀匙叮叮響，和酌滿時有沒有不一樣﹖

離貌

快分手的情人，叫貌合神離。那，剛相戀的呢﹖

通常表情都不一樣。

以前你哭的時候，我總是微笑。你說我還笑，我說我不笑怎樣逗你笑﹖

男人最常犯的一種錯誤，是在女友發脾氣的時候跟她講道理。事實是女人發脾氣，十次有九次都只是因為「佢想發脾氣」，餘下的一次是因為你得罪了她。所以你lecture佢跟本毫無用處。這個時候你最好別說話，因為女人發脾氣時通常不會有聆聽的耐性。選用簡單的肢體語言和肌膚接觸，反而容易解決。

我經常說，女孩子拍拖時不應該化濃粧，為甚麼﹖因為那會妨礙男人疼愛你的。溫柔的男人懂得吻向你的面，細味淚與淚之間的甘酸，前題是那沒有混合了你面上的化粧品。也不敢替你抹，怕一抹就破壞了你花了一小時完成的面部裝飾，然後你只會哭得更厲害。於是他就只能袖手旁觀了。女孩子化粧，應以不影響淚水的質素為準則。你總不能叫他一邊愛你一邊要吃下會致癌的毒藥的。

你大笑的時候呢﹖我還是微笑。你說不好笑嗎﹖我說我已經在笑了。

我是不能大笑的，會很難看，像一個白痴。笑這回事，是講天份的。你總愛跟我說你身邊的趣事：公司的事，家裏的事，家人的事，朋友的事。但其實我一個也不認識。我耐心聽著，我聽說這叫做「遷就」，況且我自己也實在沒有甚麼有趣的話題。

...其實有，但男人覺得有趣的話題女人通常不太感興趣。

你微笑的時候﹖我的嘴就會不安份起來。然後你也不安份。也許這一刻我倆的表情是一樣的，但這時的我總會閉上了眼睛，那就不知道到底你是否也閉上了眼睛。事實上我並不介意你愛我的時候有沒有閉上眼睛，斤斤計較的愛情是不會有結果的。

有趣的是很多女孩子很怕在公眾場合擁吻，卻又喜歡看《鐵達尼號》男女主角在船頭的親吻。女孩子到底是喜歡浪漫，還是只喜歡「觀賞」浪漫﹖真是個令男人感到困惑的問題。而男人相反，他們不喜歡看《鐵達尼號》，卻愛做相同的事情，例如畫畫。那同樣令人費解。

所以男人總愛說很難了解女人，我說其實他們連男人也不明白。例如我就很不明白為甚麼街上的豬扒身邊總能夠拖到一個男人。難怪曹操都有知心友，關公都有對頭人。

唉！越來越多問題。懂得越多，不懂的也就越多，愛因斯坦如是說。

我越了解你，就越不了解你。其實我懂得的也不算多，但已經令我不勝負荷。

解決了的數學題，自然被歷史拋諸腦後，人們永遠只會著眼於未解決的難題。

情人的了解，也永遠只會被伴侶忽略，大家只會留意對方不了解自己的地方。

「懂得越多，不懂的也就越多」。為甚麼不可以是「懂得越多，懂得的就越多」﹖無盡的求知慾只適合用於科學研究，而不是愛情。因為宇宙中的黑洞吸去光線；愛情的求知黑洞，則會吸盡戀人的耐性。

Why so serious﹖你永遠「大膽假設」你老公出去滾，然後「小心求證」你老公有沒有出去滾，用自以為科學的方法，例如疲勞審訊，或顧用私家偵探等等。

其實很多感情就是因為太過認真才會完結，而不是有沒有feel的問題。你以為冇feel，事實是你將感情當成習作，將戀愛看成職業，要事事完美不容錯失，把一眾只會催婚的親戚變成催你趕project deadline的老闆。你根本不是跟你的男人談戀愛，你是跟你的工作談戀愛。

Oh my god！你瘋了嗎﹖

你把你在辦公室裏施展的演技，放在拍拖的浪漫場景之中，兩人的樣貌就會融合。因為你在辦公室只會有一種表情。

Poker face。快分手的情人，快離婚的夫婦，都是有樣睇的。所以千萬別在這種時候去問睇相佬你的戀愛運程。三歲小孩都可以看出的事，閣下既然覺得浪費了青春，就別把金錢也浪費掉。回家照照鏡子就是了。

讓我告訴你，那是所謂的「夫妻相」。不知道阿當和夏娃有沒有夫妻相﹖婚姻生活和睦嗎﹖被趕走後感情應該就不太好：

「懵婆！叫左你唔好食架啦！」
「你自己咪一樣﹖淨係識得話我！嗚~~~」

然後一哭二鬧三上吊。你傷心地發現，以前你做錯事，他說的是：

「我邊有嬲丫，錫你都唻唔切啦！」

當然這種情節，先知是不會記載在聖經中的。這種戀愛生活點滴，閣下日後自會經歷，不讀聖經都可以學會。

所以聖經述說的愛情為甚麼不可信﹖因為它缺少了愛情最重要的元素：

淚水。誰在聖經中為愛情哭泣過﹖

又有誰沒有為愛情哭泣過呢﹖

「分手吧」

之後流淚。你。但我無論如何不會哭。那是當然的，一個人哭是愛情，兩個人哭，那叫苦情。

表情又再次不合。但這次我已不敢親吻你面上的淚水，當親密的肢體領域被禁足，我已失去了愛你的路途。

只能任它流下。

Amazon

http://news.cnyes.com/dspnewsS.asp?rno=1&fi=%5CNEWSBASE%5CFNT%5C20080725%5CFNT79&vi=40223&sdt=20080715&edt=20080725&top=50&date=20080725&time=10:02:14&cls=finance_xr

此所以點解我咁睇好佢呢。而且暫時仍然睇唔出有威脅性的潛在對手，應該仲可以壟斷一段時間。

買乜鬼野google丫，人人都google搶到個價高哂，買呢隻次熱門啦。好過買ebay。

而且由kindle帶動嘅電子書銷售而家仲係蝕緊錢，普及後，幾年後將會成為隱定收入，快d趁而家人人都淨係望住隻google嘅時候買呢隻啦。

對話

人說知子莫若母，我說知母莫若子。

今日下午四時五十分，手提電話響起，我知道老佛爺已經回港了。

「喂﹖」

「你做乜搞到我間屋立立亂呀﹖」

第一句，有冇中到top 10 呢﹖Let me see...

「乜呀﹖我特登吸左次塵架喎。」

You know, 佢走左兩個星期半我吸過兩次塵，上一次係因為有朋友來訪。事實上唔係我懶，而係我一個人好少係廳。

「吸你個頭呀﹖又留番哂d野俾我做呀！」

你再唔做下野好快有老人痴呆呀媽，我都係為你好。

「嗯...ok啦，都唔係好多啫。」

「又搵過人番唻呀﹖」

「你預左啦下話。」

「搵左邊個呀﹖」

「咪豬朋狗友囉，乜我仲有好多朋友咩﹖」

其實幾多，不過其他佢應該都唔識。關於「豬朋狗友」一詞的來源，擇日再述。

「你番唻同我執番乾淨佢呀！」

做人現實d，我要自己執，你番之前我就執左啦。共產黨要俾你普選零七年就俾左啦，駛鬼等到二零一七﹖嗰十年留番俾你鬧呀﹖

你要我執屋﹖學民主黨咁慢慢爭取下先啦。

來日方長。

Top 10

今日係home alone的last day，明天，我媽回來會說甚麼話，倒是一個有趣的問題。

Everybody the category of top 10 possible opening sentences my mum'll Say when she arrives.

Ah... number 10:

「你個衰仔搞到我間屋成個狗竇咁呀！」

number 9：

「留番哂d野俾我做你有冇搞錯呀！」

number 8：

「d名牌好平呀。」

What?

number 7：

「我生日喎，你有乜表示呀﹖」

number 6：

「你老豆好麻煩呀！」

You know why I stay here then.

nubmer 5：

「你班豬朋狗友有冇上唻搗亂呀﹖」

number 4：

「哇，我食左好多野呀！」

Well...

number 3：

「有冇掛住我呀﹖」

number 2：

「下次咪搞我呀！」

And the number 1 possible opening sentence my mum'll Say when she arrives：

「你今個月過左錢俾我未呀﹖」

Here you go.

K1

人頭湧湧，晚上的油尖旺，燈火還是亮得跟白晝一樣，一點也沒有誇張。加上嘈吵的環境，幽靜，在香港，是奢侈品。

徹夜不眠的都市，絕不是一個適合女人居住的地方，像經常留連酒吧的酒吧妹，再多的精力都會耗盡，然後衰老。居住在一個年老力竭的城市的女性，如何可以保持年輕﹖

她和友人都抓著一袋袋的化粧品，洗面奶，護膚膏，爽膚水。美容是女人的第一生命，性命排第二。女孩子總希望用一支支的化學品來淡化歲月的痕跡，而無視愛因斯坦認為物理學上時光不可倒流的現實。

今天的收穫很豐富，她們打算晚膳，然後打道回府了。

找餐館的途中，她聽到了熟悉的聲音，然後又有很多其他類似的叮叮聲出現。她引頸張望，找尋著聲音的來源。

那是音樂盒的聲音。

你家有沒有一個音樂盒﹖那軸輪上的一個個小突點劃著旁邊的鐵片，像一隻有長長指甲的手，勾動著你的心弦。

每一下都充滿回響。

她找到了那賣音樂盒的店舖。音樂盒在櫥窗上陳列著，盒上有跳芭蕾舞的女孩在躍動，演繹著不同的旋律。店員在逐個替盒子上鏈，招徠客人。

別的節奏越來越多，原來的聲音就顯得微弱。

她在櫥窗外看著，把玻璃都呼得白濛濛的一片了。

和她逛街的這班朋友都認識很久了，而每個朋友，上過她家的，都知道她有一個音樂盒，放在她的床頭，跟現在眼前的這個播著同一首歌曲。上了鏈，雕像會轉動，淺綠色的草色底盤也會轉動。彷佛整個盒子也在轉動。

那是她的一份禮物，一份不知為甚麼會收到的禮物。

那是初中時代的事。她的生日跟情人節稍近，於是總有害羞的男孩子在她生日時送情人節禮物，或者大意的朋友在情人節時送生日禮物。

於是凡在這兩個日子收禮物，她總要問：「生日定情人節架﹖」

「errrrrrr...」

甚至還沒有想好答案就送禮物的傻仔也大有人在。沒有適合的對白襯托的禮物，像剪去了綠葉的牡丹，花兒再好，也算是白送了。

這份有點奇怪，她收在自己生日和情人節之間。

「生日定情人節架先﹖」這個問題她已經問到口軟。

都不是。他說。

她覺得跟這個男孩子還算熟絡，有時會約食lunch，會一起跟朋友談天，也會一起詛咒討厭的老師。但，好像還沒有收過他的禮物，自己倒是送過生日禮物：兩張書籤給他。

「?﹖」都不是﹖這算是另一個還沒有想好的答案嗎﹖

為甚麼一定要是生日或者情人節禮物呢﹖依節日送禮物其實很愚蠢，因為一，很容易到了節日但還沒有想好要送的禮物；二，遇著好禮物但不是節日，你就錯過一個機會了。他又說。

「女仔鍾意係節日收丫嘛。」真是廢話，那豈不是天下所有在別人生日送生日禮物的都是白痴﹖

最好的禮物，通常都不是在最好的節日出現的。節日是別人定的，但禮物的品質，是自己定的。所以千萬不要被節日左右。他再說。

「?！」

她又望向禮物盒，若有所思，她還在研究那到底是生日禮物還是情人節禮物。

想不通，這種感覺令她很不暢快。她道謝，然後動手拆禮物。

卻被他的手按著了包裝。

「又點呀﹖」開始不耐煩了，她還是第一次如此脾氣暴燥地收禮物。

馬上拆穿，就浪費包裝的功夫了。

「OKOK」她忍耐，到回家，拆了禮物。是一個音樂盒，圓型的轉盤，用雙手捧著的大小，應該不是貴價貨，但有點古舊的味道，放在床頭也不錯，歌曲，是莫扎特的小步舞曲，K1，但走慢板。

之後她一直追問男孩那到底是生日還是情人節禮物，他總是微笑，帶著三分得意，一副「早知你會問」的表情，卻總是給著相同的答案。

「唔講咪唔講囉，好叻咩。」

收到禮物的幾個月後，男孩子就出國留學了。她從此展開了逢人就問的生涯。朋友來訪，會捧著音樂盒到客廳，然後問「你估呢份係生日定情人節禮物丫拿﹖」。她後來想，那是他故意的，故意要她將他送的禮物揚給朋友看。這算是他包裝的功夫嗎﹖但他怎麼知道她會問人﹖也許她只會在疲累時，無聊時才偶然掀起；或者直接將音樂盒扔在床下，由它封塵。

但每次聽這首歌，都總會想起他得戚的表情，她覺得很有趣。因為母親時常說，通常表面自大的人，其實心裡都很自卑的。他很自卑嗎﹖她心想。

朋友忽然在催促，她忽然想起，大家其實都有幾十袋戰利品在手，陪她站在街上看音樂盒實在是有點累。

那音樂的轉動也漸漸慢了，終於停下。

她心知繼續站在街上也不會突然想通的，於是她又收拾心情，和幾個女人邊笑邊走，邊討論著今日的戰果，又悼念著錢包裏陣亡的將士們。她一邊繼續哼著這小步舞曲，，手上的袋子彷彿都沒有了重量，身邊的嘈音又彷彿都靜了下來。

心卻始終有點重。

=======================================

一對年輕情侶走進店內，那女孩多手多腳，把每個音樂盒又都上了鏈。男的忽然走近，拿起了其中一個。同一個盒子，剛才有位女士研究了很久。

女孩把耳湊近，仔細地聆聽這盒的小曲。

男的看了看她，說，送給你吧。

「都唔好聽?，揀過第二個啦。」

不同的，這是Minuet k1，莫扎特第一首正式被紀錄的作品。

「即係點呀﹖」女孩用疑惑的眼光詢問。

這代表了，永恆的起點。

========================================

她卻己經走遠了。燈光繼續明亮，街道依然喧鬧，奼紫嫣紅中，她繼續尋找著答案。

我還年輕，她想。

嘴

我發覺我真的變了。

比著以前，遇著量子那篇《人權與奧運》，還有一篇《民主與普選》，我一定會不留情面數到佢阿媽都唔認得。

幾年前曾經跟一位網上的人士討論過中國的問題，他的意見跟量子實在是非常相似，歸納重點如下：

1. 香港人都不了解中國國情。
2. 承認中國現在有很多問題，但那是「不能改變的事實」，請接受。
3. 中國比很多落後國家都先進。
4. 中國有的問題，美英也有。
5. 認為中國有很多很美好的地方，為甚麼香港人只批評差的，不讚美好的﹖

大致是這些了。

邏輯問題出在哪裏我是不多說了，反正只要香港人不要用這種邏輯思考，其實我不太介意大陸人是如何思考的。

事實是在大陸人面前批評共產黨，有點像在基督徒前面批評基督教會，教訓之慘痛，那是不用再提了。一個百人的小教會我也鬥不過，更何況是全國十三億的人民。

天下間有很多事，不是用一張嘴就可以解決的。

反正又要睇又要唔滿意，像女孩子又要睇鬼片又要驚，自己還真是有點犯賤，也不能全怪他。

於是，由他吧。

笑話

周五，獨自晚膳。

我一邊開著電視機，一邊吃飯，播著的是《東張西望》。我只是想家中有點聲音。一個人住的地方其實不需要太大，兩個人住的地方最緊要張床夠大，三個人以上才真正需要大的居住空間。

這不是重點。重點是該節目約七時三十五分，播放奧運馬術的宣傳短片，旁邊的配樂很有氣勢......
慢著，很熟，記起了，是這首：



這是甚麼﹖Verdi的Requiem Mass：Dies irae

安魂彌撒......

選曲的是哪一位天才﹖辦奧運的時候還不忘悼念四川地震的死難者嘛，簡直是新一代的雷鋒。

還有另一個問題，是月初習近平副主席訪港，人未到中環康樂廣場已經被封了一半搞得原本已經有點嫌窄的道路變得非常窄，在下發脾氣時想到的。事實上我懷疑已經有很多人發現到這個嚴重的問題，而我希望小朋友們沒有發覺。無他，比著十年前好事的我，一定會對住全班同學說：

「胡錦濤主席叫胡總，溫家寶總理叫溫總，咁習近平副主席呢﹖」

「習~~~」

閣下知道問題的所在了。

怪不得最近很多人說新中國正面對一系列的難題，俾著我係佢，真係唔知點算，中國領導人你估真係咁易做呀﹖

搭訕王

著名的蕭sir搞英文搭訕王大賽，蠻有創意的，起碼在母語教學己經徹底失敗的今日，有這種活動，學生們落pub對住鬼妹玲瓏浮凸唔駛口啞啞。

熟讀opening落pub，等如熟讀書本然後入試場，試題是甚麼你是無法得知的，但你會自信，處變不驚，反正溝女的事，跟考試局的無聊試題一樣，萬變不離其宗嘛。

除了說話內容，形體語言也很重要，事實上說話內容只佔impression的百分之十。其餘九成包括表情，動作，打扮，眼神，語氣等等。小朋友千祈咪以為拿住一句金句就可以溝死女，唔係黎明，就咪鬼做金句王。

又，其實塔訕，應該先向女孩身邊的友人埋手，要先解決目標前的障礙物。酒吧中的美女很少單獨一人的。任你開場白再精警，女人前面有八十萬禁衞軍，你好漢都敵不過人多。

我都係覺得呢段最正：

"Say this when you see a group with a girl you like. "Hey, it looks like the party's over here.' Then turn to the girl you want and add, 'If I wasn't gay, you'd be so mine."

"How is that going to help?"

"Once she's attracted to you, it won't matter whether you said you were gay or not."

"But isn't that lying?"

"it's not lying. It's flirting."

參賽者有冇興趣睇睇本The game參考參考﹖

又話時話，有幾多個男人會無端端話自己係gay佬﹖

獨奏

我一個人逛商場。

大堂的正中央，平台上的大三角琴靜靜的躺著，空無一人。

同一座琴，同一個地點。那時我跟你逛同一個商場，有鋼琴師在演奏《夢中的婚禮》。我說我非常喜歡這首歌，你說你也是。

其實每次看見商場中的演奏，我會都有點慨嘆。演奏者努力表演，旁人毫無興趣，彷彿他們從來沒有存在，直行直過。像閣下對待街上的寬頻推銷員一樣。我常常想，如果只是想商場裏有點音樂效果，直接廣播音樂就是了，沒必要這樣侮辱人的。

演奏者應該得到起碼的尊重，但人們總是把他們看成街頭賣藝。偏偏歌星上台咪咀，就萬人空巷。

「難唔難彈架﹖」我問。

那時你搖搖頭，說：「五級之嘛。」

五級，對我來說，很難了。

「我練好，然後在婚禮上彈給你聽吧，好不好﹖」我從後抱著你，在耳邊細細地問。

然後你就不斷傻笑。

這首歌，我覺得用在婚禮上是一個非常好的選擇。但大多數的婚禮，都會播Mendelssohn的A Midsummer Night's Dream: Wedding March，婚禮進行曲，老實講，不看名字，不是聽慣聽熟，我會以為那是一首拿破崙凱旋曲。還有的婚禮會邀請詩班獻唱不知名的聖詩，嗯......其實應該有知名的，只是我對聖詩的認識太少了。但我也沒有打算認識，填中文詞的聖詩大部分都很難聽，難聽得令我覺得那簡直是侮辱了「詩歌」這兩隻字：平仄不分，又不押韻，算甚麼詩﹖至於歌，一首歌十隻字可以十隻都錯音，怪不得香港現在有口的都可以做歌星了。

說到這裏，你黑面，然後一聲不響走了。

我又踩著了主基督耶穌的尾巴了。

但我不是馬戲團裏的小丑，不能只在面上畫個大笑面，然後逗觀眾歡樂就交差的。

如今我望著空琴，有點唏噓。我跟它一樣，寂寞地站著，台上台下，我倆何其相似。

黑白分明的琴鍵，從來都不是它的優點；拉得緊直的鋼弦，也沒有人有心思研究。

我搖了搖頭，想把回憶揮去，心中卻又不由自主地奏起了這首曲子。

這首歌若果叫《夢中的戀愛》，我覺得會更加合適。旋律帶著浪漫，還有少許隱藏著的燥動，彷佛宣示著每段愛情初始一刻的甜蜜。但很多會鋼琴的朋友都不會奏這首歌，不是不會彈，而是神緒總是拿握不好。功力的高低，你聽到第二三小節就已經知道。那是我自己要求過高了。如虛似幻的感覺，我等存在於真實世界的凡人，怎能參透﹖

像戀愛一樣，怎樣才能完滿﹖我不知道。你想得太容易了。

於是我放棄在逛商場時思考這個近乎哲學的命題。

然後離開。留下已經沒有意義了。

當你彈《快樂頌》的時候，可有問過它是否一樣快樂﹖當曲終人散，你可有向它致意﹖

我轉過彎，大三角琴就在我的身後沒去。

我忽然記起，當年有朋友為了「溝女」，特意去學了當時被李雲迪彈得很heat的Fantasie Impromptu，他練了十幾節，在女孩面前演奏，才盡，就攤一攤手，說：「今日就到呢度啦」，女孩因而傾心。我想起Mystery教人落pub溝女的其中一句Opening：「如果我不是個gay佬，我就會喜歡上你了。」，他的理論是，只要令那女孩子喜歡了你，你是否gay佬，根本毫不重要。

想到這裏，我苦笑。

小時候學鋼琴，小提琴，我總是希望，日後若果戀愛，只要她不嫌，我每日都可以為她彈奏，像《一千零一夜》裏的王后，每天為國王說一個故事。

寓有深意，絕不重覆，更不取巧。

而她貓在沙發上，把貝多芬的Moonlight Sonata，化為她私人的Lullaby，邊聽邊睡。

或者莫扎特的Piano Concerto #21 : Andante，作為暴風雨後的撫慰。

雖然事實是她總以為那只是我在引人注目，或發洩情緒的行為，因而生厭。她不知道的是，旋律，是特意為她而奏的；曲子，是特意為她而寫的。其他人如何看待，我根本毫不在乎。

是她太深奧，還是我太膚淺﹖她太成熟，還是我太幼稚。我不知道，我像鋼琴旁的獨奏者，認真的奏著，總盼望能夠偶然引起她的共鳴。

可惜，她偏偏說自己是商場裏的過客。

Home Alone

兩老外訪英國，小弟獨個兒在家生活踏入第四日。

出奇地習慣，除了要煮飯洗衫吸塵拖地之外，其他一齊如常，而且少減兩個人係側邊喧嘩：

媽：「阿仔呀，你老豆打我呀！」
爸：「你睇下你阿媽抓到我流血呀！」
我：「你兩個打完邊個贏左先唻搵我啦！」

近呢幾年我係越唻越明白兩老當年養大我同我妹嘅痛苦，呢d叫報應。

煮飯、洗衫、吸塵、拖地。在煮飯已得到完滿解決後，最大難題變成了洗衫。洗完要掠，掠完要熨，熨完要摺，唔好話要我做，淨係咁樣逐樣寫出唻，我己經覺得好煩。

No pain no gain，真是至理名言。

另一個面對著的大難題是游水，我唔知政府邊一條蛋散忽然想出「全民運動」的絕世好橋，所有游泳池(其實其他康樂設施都係)一律免費三個月。

我多得佢唔少。

公眾泳池是不用說了，免費的，大家自然「執輸行頭慘過敗家」，一於入左去先，唔游都浸下丫。你唔會想像得到一個泳池點解天你得二十五度，會多人過平時三十五度。於是搞到原本去開公眾泳池嘅走去遊私家，咁就連私家嘅都爆埋。

搞呢單野嘅人，應該即刻問責落台。你想搞function，減半價咪算囉，免費

咪俾d阿婆入去卒腳趾囉...

民調

陳方安生不再參選立法會，各政黨各說各睇法。某政黨主席言：「要睇睇民調的結果決定是否派人參選。」我想，如果睇民調做人，當初Barack Obama就不會選美國總統了。一年前的民調，Hillary贏九條街。

香港的政客都很奇怪，只睇民調做人，民調好，信心十足，民調差，這場仗就不用打了。他們做幾十年政客，還未能明白一個事實：一場選舉真正重要的，不是民調結果，而是投票結果。

我經常認為，民眾是容易被煽動的。前屆區議會保皇黨大敗，為什麼﹖民主黨突然新秀群出嗎﹖很明顯不是。保皇黨耆老收山嗎﹖也不是。那是因為民心背向，實際上各區議員的表現，一點都沒有改變過來。北京八月奧運，七月頭的今天已經按捺不住，又沒改記者証件了。可以想像奧運完結後，他們又會將規矩收緊，故態復萌。這種快速的態度轉變，絕對可以是土共的選舉計時炸彈。泛民要想的，應該是如何將這個態度反差擴大，然後到時自己再加鹽加醬，能夠在選舉前的日子組織一次大遊行，借題發揮，我唔信保皇黨有本事贏。

你睇睇奧運傳聖火，中國的國際形象受損到哪個程度，就知這種輿論是非，多麼好用。你肯定個個示威人士都很了解西藏問題嗎﹖我肯定不是。

唔好討論應該讓第二梯隊還是第三梯隊上位的問題了。「唔理黑貓白貓，捉到老鼠就係好貓」，怎麼連小平同志的教誨都忘記了﹖

還有，想想奧巴馬是如何取勝的﹖民主黨的票倉，希拉莉贏了九成，奧巴馬贏的都是共和黨的管轄範圍，但加起來，小數怕長計，就是贏了希拉莉。香港的民主派，永遠將重心放在自己的票倉，而永遠只派炮灰到土共的票倉參選，對強敵應用奇兵，攻敵之不得不守，就算不成功，至少可以打亂對方陣腳。不肯冒失敗的風險，就不能夠擁有成功。

這關乎運用AQ的能力，全世界最出色的政治經濟領袖，都是箇中高手。正確點說，次次打順景波，哪顯得出閣下的能力﹖

但咪俾我睇死，肯定民主派又打救急牌，他們難道沒有聽過「狼來了」的故事嗎﹖

河畔

我在英倫，而你在香港。

我只想縮短我們的距離。我已拼命追趕，時差卻令我們若即若離。科技如何進步，還是那道英倫海峽，那片歐亞大陸，遼闊得令人卻步。

我被豬朋狗友們勸過n次了：「Long D冇好結果架」。真是廢話。同一屋簷下，不見得就是天長地久的保証。但無可否認，以前想起你，我總是歡天喜地，那會令我想起美好的愛情。現在，我會同時想起馬拉松。

見鬼的天氣，下午三時半，天已開始入黑，我胸口忽然有點煩悶，想走走，外面下著微雪，於是我穿起老土的乾濕樓，戴上福爾摩斯式的扣帽，出去。其實我可以穿得很「潮」，然後輕易成為酒吧裏的女孩們的焦點，只要半小時，我就可以令女孩子在床上躺平。但很明顯現在的我沒有這種心情。

孔雀不求偶，就沒有必要開屏。

我緩步走向泰晤士河畔。繁華街上，痴男怨女。今天是甚麼日子了﹖情人節嗎﹖好像是，好像不是。

我沿河畔走著。

冰天雪地的河畔其實並不是散步的理想地點，但人體永遠只能感覺到最痛的地方，忍受著多一分寒冷，胸口就彷彿會舒暢了一點。況且，當你看到很多男孩跟你一樣在河畔，而他們的手裏都拿著一大束鮮花等女友，一面冷得發抖，一面原地跑步跳高來取暖，那不能不說是一種享受。就像幾年前，我跟你在海洋公園看見那隻叫安安的熊貓，把自己胖胖的身體倒吊在樹上，真是可愛。正常人會覺得腦充血，牠們覺得很有趣。然後牠左右搖晃，呯的一聲，摔下樹來。你當時笑得開懷，燦爛像初春的太陽。

我繼續走著。一束玫瑰撲面而來，我閃開。

世人都愛玫瑰，卻又把它的刺削去，這樣的玫瑰怎活得長。可憐他們又不懂花語，滿街都是的紅玫瑰成為他們唯一的選擇，像一個不懂英語的人說英語，唯有不停地「I am a boy. How are you?I am fine, Thank you」。他們不知道最令女孩子尷尬的其中一種場面，就是去party「撞衫」咩﹖

不知不覺，天已全黑，大笨鐘告訴我，現在是下午四時。

我忽然想打給你，宣判我們的死刑。

揭開電話，開始打。長途電話的號碼，很長，足夠令我猶豫。你故意的嗎﹖

當還剩下"59"就能接通的時候，我cut線。

我想起我們以前每次通電話，你都愛叫我Toro san，你說我的聲音像一塊Toro，嫩滑甘香，稍嫌油膩。幸好我們見面時你從不這樣說，否則當我親你的時候，就顯得有點唐突佳人了。

我走得有點累，就停下，找張長椅坐了下來，閉目養神。旁邊是一對情侶，正在擁吻。我希望我沒有打擾他們。

應該沒有，因為我開始聽到有撫摸的聲音。穿著厚厚的大衣撫摸，我有點明白企鵝是怎樣做愛的了。我微張雙眼，看他倆越來越激烈。地上有玫瑰，應該是女孩剛收到的吧。那不是曾經令她心花怒放的禮物嗎﹖

早開的花早凋零。

這是我反對男人送花的原因。送給朋友不妨，送給情人就要三思。太過隨便送花給情人的男人，就像隨便奉獻處女的女人，只會令自己越來越cheap。你的女人，就永遠學不會珍惜你送給她的每份禮物。而且，這種男人送花的開場白永遠只有一句「送俾你」，唉，難道你只是要她幫忙拿著方便閣下跪下綁鞋帶嗎。

「如果上帝只准男人一生送一次花」，我凝視著你，把花束從背後緩緩抽出，「你願意收我的花嗎﹖」你記得我第一次送花給你的時候，你聽見過這句說話嗎﹖你不記得了。你收過太多花，你以為我跟他們一樣，是個性格隨便的人，而且說話比他們油膩。

我自己走開，不想打擾火熱中的情侶。長廊的燭火溫暖了古堡，還是令它更顯得冷清﹖

事實上我還有點擔心椅子會搖晃起來。

我再揭開電話，再打。

漫長的電話鈴聲，固定的頻率，把我和河上的船笛聲分開。

「du......，du......」。

......十......二十......三十。

我記起了，你下班前，是不會接我的電話的。到英國後的一段時間，每次我快要睡覺之前，都會打給你，我打算情話綿綿，你卻在趕吃早餐，準備番工「博殺」，你說我那時候的情話，會令你聯想起你那個麻甩上司，總在女同事面前說著黃色笑話而自以為風趣。

「咪唔好做呢份工囉」
「你養我呀﹖」

我默然，不敢回答。假若河畔現在有富修養的美女走過來攀談，我不能拒絕。然後晚膳，我不能拒絕。然後，我更不能拒絕。在無盡的孤寂，我無力拒絕一夜的浪漫。

那就註定我不能擁有婚姻。我怎能冒令你傷心的風險呢﹖

夜越來越冷，我越來越清醒。

我越來越清楚自己想要甚麼，不想要甚麼。此時此刻，你的節日已經過去，我的節日，又變得遙遠。

我總是祝你幸福。

面譜

上班。

我帶上了面具，走出了門。

要把舒適留在家裏，辦公室從來不是給大家「嘆世界」的地方。開心的情緒會令人放低警惕，放低警惕會令敵人，亦即同事，有機可乘。善守者藏於九地之下，真是半分都放鬆不得。

上地鐵，我換上了劉玄德的面具。

在香港，繁忙時間塔地鐵番中環，是最考驗耐性的行為。車還沒到站，你就要思考如何搶車登陸的問題。要強行突擊，還是迂迴穿插，奇兵制勝﹖怪不得香港多產商業人才，都是從「塔地鐵」學回來的。

我選擇忍讓。倒不是我心性平和，我說過了，那只是面具。在地鐵吵架是吃力不討好的行為，地方狹窄，跟一個男人吵，肯定不到兩句，大家就會有親密的肢體交往。跟女人吵，輿論永遠只會幫助女性。還有那吵耳的廣播聲。「請小心車門，請小心車門(普通話)，please mind the door」，然後是二十下的電子dodo聲，聽到我就驚。毫無韻律的電子聲響實在令我精神衰弱。這還不算，搶灘的勇士們總是把車門撐著，然後車門重開，重關，聲音重播，最高紀錄，門關了七次，單一個車站，我就聽到一百四十下的dodo聲。那次我真的很想將司機的那道門拆開然後將條友拖出唻凌遲。每早上班，我都會質疑n次地鐵管理層的智商，他不知道這些聲音其實毫無警惕作用，而只會令人心煩的嗎﹖

終於到了中環，抗戰大勝利。我走出了車商，除下了劉備的面具，舒一口氣。由地鐵站到公司門口這段路，大可以不戴面具，因為你根本不需要面對任何人。時間，該用來思考，思考今天應該戴哪一個面具上班。在地鐵，大可以每日用同一副面具，因為你幾乎不會遇上重覆的人。辦公室不行，每日相同，很容易被人看穿底牌。

諸葛亮，運籌帷幄，但出師未捷；周公瑾，豁達大度，卻英年早逝；曹孟德﹖不是不好，但公司裏已經有很多了，一山不能藏二虎，何況有n隻。用司馬懿吧，姓曹的，遲早死在我手上。碰巧今天開會，一流。

在辦公室戴面具，是一種習俗，除非閣下自信過人覺得面具很多餘，又或者你皮膚敏感，每次戴面具，都會面容扭曲，或者痕癢，周身唔自在而被迫放棄。極大多數人屬於後者。其實我都係，但每次當我看見國金樓下的警?和警犬，對著那些四十幾五十歲仲係佢地面前扮cute的阿姑依然能夠面不改容，我就同自己講，皮膚敏感，算得d乜丫。

不懂演戲，其實亦無不可，但千萬不要將心比己，以為人人都像你一樣開心見誠就是了。

回到公司，戴上面譜，直接進會議室。本質上，我不抗拒開會這種政治活動，這大概跟我喜歡欣賞李暉女士的表演有關。只是有的人的表現太過拙劣，就實在令人有點意興欄柵。但看著大家像小孩子一樣將一個西瓜波猜個不亦樂乎，我不好意思打擾。怪不得有人話，只要是圓型的物體，男人都會喜歡，喜歡得要將它帶進會議室。

戰況激烈，我退下火線。有我老闆打進攻中場，令人安枕，他永遠控球不超過三秒鐘，被人一逼就大腳斬中。每次看著他，我就很明白，為甚麼碧咸建樹不多，卻是全世界薪金最高的足球員。

走出會議室，又換了一個面具。碧咸﹖不，有Victoria在側，太煩了，我忍受不到，c朗，或者托利斯好像比較著數。年輕的小白臉，極易取得辦公室內的女性支持。跟reception的小姐們勾勾塔塔，賣幾件球衣，又一日。

下班，又塔地鐵，人生又再重覆。

七一

七一，遊行日。

對，並不是回歸日，雖然名義上係，但可惜，「七一」這兩個字，已經被全香港人標籤了為「反政府日」了。事實上香港很少有人會「慶祝回歸」，那等於要人慶祝「毛主席壽辰」，一樣，你會唔會﹖我唔會。

但遊行我也沒有去。這麼多年，從沒有去過。一直以來最值得去的，是零三年的第一屆七一遊行，但那年我等莘莘學子，正在擔心AL的成績，可以說，就算那年不是廿三條，而係共產黨解嚴，我們這些應屆放榜生還是不會有甚麼行動的。

然後就越來越無聊了。今年真是五花八門，挑機主教搞祈禱會，市民反對高通脹高油價，要普選，要求取消「雞隻日日清」...

先講高通脹，通脹不只香港有，現在全世界都面對高通脹，那得感謝聯儲局的伯南克主席，他拼命減息，為共和黨護航，McCain若果贏了選舉，第一個應該致詞感謝的人，就係佢。要解決香港通脹，很簡單，取消聯繫匯率，容許港元自由浮動，或者選擇跟人民幣掛勾。但自由浮動難保香港金融制度隱定，跟人民幣掛勾，則升值太快，大陸的經濟增長速度跟本不是香港可以相比，最後是損害香港出口業，繼而長遠損害香港經濟。除此提高利率之外，沒有其他辦法了，有，阿南哥早就用左，唔駛而家俾全世界仇視了。

所以要示威，你應該向伯南克示威，或者冤有頭債有主，搵佢嘅前任，Greenspan算脹，簡單唻講，你要飛去美國示威，而唔係去維園。

減油稅就更加無聊，那等於叫政府補貼油價，結果如何﹖你看看大陸的油站車龍就知道了。況且，香港的油公司不受政府管制，政府減完稅後，佢大條道理唔減價，因為「要補貼成本」。所以，你要示威，應該去向炒高油價的Hedge fund manager示威，聽日齊齊番國金啦。

再講普選，情況已經很明顯了，話事權不在曾蔭權，而在共產黨。而對共產黨來說，給香港民主，情形就像台灣一樣，跟獨立，沒有分別。共產黨當然不可能容許這種情況發生，別相信他們說20xx容許香港普選，那是廢話。你要示威，應該「吹雞」去中南海，學法輪功一樣，圍住佢，一面運功，一面叫「香港普選好」，或者有d機會。不過，俾共產黨點火燒你然後話你係「引火自焚」，好痛架，冇咁嘅心理準備就最好唔好搞喇，乖乖地做順民啦。

別相信和平的示威可以解決普選問題，十九年前的事實告訴你，跟槍桿子政權談和平，等於跟敵人仁慈，結果只是對自己殘忍。

還有雞。

雞販們，很笨。先是傳出今次禽流感是因為走私雞，俾人嘅感覺係「自找麻煩」；政府提出全面收購，雞販一直話金額唔夠，俾人嘅感覺係「貪得無厭」，一d話願意停業一d話唔好，俾人嘅感覺係「一盤散沙」，而家示威，依然只係「反對日日清」，成個公會連一個共識都冇，你咁點去同人談判﹖

你與其花時間示威，不如請個公關顧問，問下點樣搞好公眾形象先啦。

難得假日，在家涼涼冷氣，重讀Richard Dawkins的《The God Delusion》，增長見識訓練思考，比參加這種遊行更有意義。

指環

女孩的右手拖著男人，去買鑽戒。

這是早就協議好的事。結婚戒指，要一起買，不要無無聊搞甚麼Surprise了。

道理是顯而易見的。男人不跟女朋友一起去買鑽戒，只有兩種情形：1. 他自已買，然後被店內的靚女sales迷到，結果買了次貨。2. 他找另一個女孩一起去「幫下眼」，而通常肯幫忙的女人，對提出請求的男人有一定的情意。

女孩不能忍受對自己來說影響一生的物事竟然要由其他女人來評頭品足，這種事，絕對不能假手於人。於是在兩人感情穩定下來後，就有了這個決議：你想結婚，一起去買戒指，然後再補求婚的情節好了。

「一起買不是問題，但買了戒指，為甚為之後還多此一舉補求婚﹖」
「好呀！你覺得求婚是多此一舉！」

自此男人在這種事上就不再提任何意見。

白灼的光線映入眼廉，女孩知道他們到了。Sales服務周到，馬上如流水一樣介紹最新的出品，如何鑒別等級，等等。而男人耐心的聽著。

唉...

當今世上還有會耐心聽sales說話的人，快絕種了。他甚麼都好，就是天真了一點。女孩隨便逛逛，隨手在櫥櫃中點了一只，隨手戴上。她的目光聚焦在那顆閃鑽上，她希望從裏面找到一點點屬於它的真正品質，而不是外來光線的效果。

那當然是徒勞的，先不論店面光線猛烈如朝陽；鑽石的品質鑒定，先要有一個十倍放大鏡來判斷純度，還要觀察它向下的那個頂尖位的光折線。很明顯自己沒有放大鏡，而且店舖也不會讓你把鑽石拆下來慢慢研究。真是可恨，全香港只有鑽飾店，從沒有一間只賣鑽石的。鑽石的真正品質，早己經被指環緊緊包著，從外面，無論多麼努力，總是看不見，除非你拆開它。

像婚姻。

這種選鑽石的事前功課得自己做，就別指望男人了，男人對買婚戒這回事，還停留在咸豐年男家送聘禮的思想，總之跟足禮數，唔失禮親家就係。他們總是以為鑽石是越貴越好，卻從來不會想那是否合女孩子的心。

「你鍾意呢隻﹖」男人以詢問的眼光看著女孩。

丫，女孩才發現，原來她看了很久了。他以為我喜歡得不捨得放下吧。我喜歡﹖不見得。不喜歡﹖也不見得。在繁華的櫥窗裏，看不到真實，選它，只不過是因為合眼緣。

比他好的大有人在，比他差的多不勝數。

盡責的sales小姐終於閉上了口，完成了一輪嘴公式化推銷服務，她說過甚麼﹖女孩全不記得。她轉眼又望向男人，他也望住她，很緊張。這麼緊張幹嗎﹖這隻很貴﹖她忘了看價錢，也從來沒有打算過要看價錢，那會打亂自己興奮的購物心情的，總之不叫他傾家蕩產就算盡了道義。

全世界待婚的男人，都不懂得陪女伴選婚戒的禮儀：當女人拿著一隻戒指超過一分鐘，就應該「識做」，同sales講「就要呢隻」。女人的時間很矜貴，一分鐘，可能就換一條白髮，女人拿著一隻戒指一分鐘，已經是「明示」你，她喜歡了。不知怎麼，男人總以為這樣慷慨大方，女人就會乘機瘋狂特買。唉，女人一來唔會想要兩隻結婚戒指，二來，要一個男人一次過買幾隻，豈不是告訴他，除了他以外沒有其他男人會願意送鑽戒給我﹖

聰明的女人，手上只會有一隻戒指，蓬畢生輝，留下其餘九指給男人膜拜。要男人替你酌酒，你的杯要留點空間，但不要一點酒漬也沒有，免得他們以為你根本不沾酒。

但很可惜，通常明白這個道理的，都只會是包養二奶的情夫。而丈夫，就像旁邊的這個一樣，永遠緊張得像去相體。

女孩忽然脫下了戒指，「不要了，唔該」，離開。

男人伴隨。

「去第二間﹖」
「唔去喇」
「咁第日再出唻揀過囉﹖」
「唔揀喇」
「咁...咁結婚呢﹖」

女孩一個旋身，然後輕盈步去，眼底彷彿帶了一點狡猾的笑意。

「哈！」

Classical

跟長輩談起古典音樂的問題，他說，指導，很重要。

指導﹖我想起小時候每到週日早上，大約九時，老豆就會開大喇叭，奏莫扎特第二十五交響曲
：

很disturb，尤其你要明白，小朋友是很需要睡眠的。於是那時候，我很討厭所謂古典音樂，太吵了。然後又很討厭那個叫莫扎特的，神童﹖你做神童你嘅事丫，唔好搞著本少爺訓覺......

但人大左，係會變嘅。很不幸地，當年打聽得高明的鄭小姐熱愛聽貝多芬第九交響曲：

於是自己死死地氣走去搵cd唻聽。一聽，頂，乜仲嘈過之前嗰隻。好聽嘅歌都要咁嘈嘅咩﹖

你要明白，有時興趣，就係咁樣逼出唻嘅，好聽d，叫「培養」。逼自己去聽多幾百次，自自然就會鍾意聽。於是咪自己慢慢又搵多d歌唻聽囉。

同一隻歌，你聽多幾個唔同的版本，唔同指揮，唔同樂團，你唔駛人教，都會分得出高低優劣。其實音樂嘅野，好講感覺嘅，你覺得好聽就係好聽，難聽就係難聽，要人教，咪即係夾硬將人地嘅感受加入自己度，咁，邊會有好效果﹖如果你唔係立志做一個指揮，或者演奏家，就無謂花錢要人教你聽音樂喇，何必太大負擔呢﹖

但當然，憑感覺唔代表你可以亂咁唻，我係街聽過有條友話，李雲迪嘅performace好好，真係好「蕭邦」。

吓﹖你想點呀哥仔。

Bill Gates and the world

原本寫好另一篇的，但阿標哥今日quit，作為一個I.T.人，好應該寫寫佢。

沒錯，作為一個「亞洲國際都會」的年青人，應該有一點國際視野，陳德霖係政府「開馬房」這種小事，你聽我講，就算陳德霖自己去快活谷跑番幾圈，都不會對這個世界有一丁點的影響的。反而發明「馬房論」那位仁兄的幽默感，可以花時間揣摩一下。

就算閣下對商業毫無興趣，只喜歡政治，不要緊，Bill Gates依然比曾特首陳先生更值得閣下仿效，你只要想想，全世界的I.T.人一路鬧windows垃圾，一路話microsoft吸血，大家一路繼續用佢，唔用正版都用翻版，Bill Gates由始至終係I.T.界都不是一個受歡迎的人物，但卻是所有I.T.人最想成為的人物，這種手腕才是世界第一等的。

別再花時間看我們的周局長怎樣取締活雞業了...你睇佢係立法會一點官威都沒有，這種政治人才，我沒有興趣研究。

應該花時間研究的，係microsoft以後的方向，它跟google的比拼，facebook的潛力和互聯網的未來發展等等比較對大家生活有影響的課題。當然還有Amazon，在下估計，它會是世界未來出版業的龍頭，它出品的kindle只是第一代，過多兩至三代，這種產品基本上會成熟，然後慢慢取代傳統紙張出版業，這種趨勢在歐美己經越來越明顯，當然還要一段時間，才能將大部分消費者的閱讀習慣改變。

資訊發達下，新聞的價值越來越低，有質素的評論才有價值。你只要想想，閣下去完一個月旅行回來，會不會翻看一個月的報紙，又會不會翻看一個月的subcribed blog，就知喇。

做人，看遠一點，看未來十年會是甚麼光景，就會知道今日應該準備甚麼。當全世界I.T.人都夢想過成為Bill Gates(對，就像小孩子總想成為超人蝙蝠俠一樣)，卻忘記了一個基本常識：一個人寫的program，或者一個人plan的project，大極，有限。可以單保，就算Bill Gates係一個電腦白痴，他依然會成為大富翁的，因為重點不是因為他的電腦天才。

而是眼光，和實踐的勇氣，俾你入到哈佛你夠唔夠薑quit丫。

守紀律

投資講守紀律，「嚴守止蝕」，聽得耳朵生繭。你問人，十個中有九個都會告訴你，他，是一個很守紀律的人。

但事實是否如此呢﹖

今早掛八號風球，天文台預先示警，十二點前就會轉三號了，當時在家的你突然知道下午要上班，是怎樣行動的﹖

1. 天文台還沒有除下八號波時就出門了。不早一點，地鐵巴士人多得發瘋。

2. 穿好鞋襪，天文台一轉三號就撲出門。

3. 天文台轉三號後才沖涼洗頭然後更衣出門。

4. 反正是落波後兩小時回到公司就可以了，那時是lunch time，乾脆吃完才上班。

5. 心存僥倖，期望颱風有回頭的一日，到發現沒有可能時怱怱出門遲大到。

6. 或則訛稱家中水浸，請假一天，又或者直接病假。

若果閣下選5或者6，你最好此生都不要接觸股票這回事。

選3或者4的你，大禍臨頭而不自知，完全缺乏危機意識，專心打好閣下份工啦。

選2的你，還好，你就算輸股票都應該唔會蝕入肉。

選1的你，你有先見之明，不心存僥倖，但，你知道八號風球其實是告訴你上街會有危險，而不是因為見你番工辛苦所以施捨半天假期給你的嗎﹖

年輕之罪

兩個小豆丁在三十四樓的家爬水喉，到街上找食物。

但大家談論的重點不是「小朋友好勇」這個問題，而是「個阿媽廿六歲，個女最大八歲，即係十八歲生啦」，「哎呀，咁唔怪之得啦！」。當一大班師奶聚埋一齊，就只會講人是非，這是物性。

不知由何時開始，年輕的媽媽就暗示著是不盡責的媽媽，正如年輕的政治助理就是「冇料到食公帑」的政治助理，這個世界給予年輕人越來越大的負擔。但事實上，一個二十八歲的媽媽，同樣有機會會疏忽照顧兒童。但師奶們不會說「咁唔怪之得啦」這種說話，他們會懷疑這個母親可能還要工作，「好辛苦」。十八歲生仔，即係十七歲做愛，一個未成年少女進行性行為，好「幼稚」，「唔成熟」，十之八九係「未婚媽媽」，點識教仔丫。

這不，翌日報章馬上出了一個調查，告訴大家平均少女初夜年齡是14.4歲，墮胎率三成。我呆掉：三成墮胎率﹖咁香港做墮胎手術的醫生咪仲發過做律師﹖開刀都開到手軟啦。

那些明光社，各個道德機構，還有政府的高官，請留意，幾百年前，世界上人人，依今日的定義都是「早婚」的，係冇人三十歲先結婚架，唔見得有好多細路係因為「疏忽照顧」而餓死，跌死，凍死。兒童被疏忽照顧，只是家長盡責與否的問題，而負責任的慨念，不見得會隨年齡而增長，你只要睇下OFFICE入面嗰d老野，係咪一條盡責嘅老油條，就知喇。

呢個世界有好多年輕人，好盡責架。

記生日

好友生日，6月22日的那位。

我今年終於記得你的生日，那得感謝偉大的facebook。記得幾年前我也曾經記準了閣下的生日，那次要感謝的是ICQ。相比之下，MSN就冇咁體貼喇。

okok，我係早左幾個鐘send個message俾你，我只係記錯左時差，掉轉左加拿大係快香港十二個鐘......

其實都唔係完全唔記得，但總是不記得是6月22，23，24，25定係26，這幾個日期，看起來都是差不多。這不能怪我，記得我第一次問你幾多號生日，你條友仔係點答我﹖

「我...巨蟹座囉」
「咁即係幾多號啫﹖」
「唏，你自己估下啦」

生日都有得估﹖我得閒走去估六合彩好過啦！到最後(真係好後)知道係6月22，但我只記得6月，就不記得22號了。然後我發現，原來，我對男性朋友的生日日期記錄，都是不清不楚，總是差了那麼一兩天，不止生日，連地址都係，上過n次，依然唔記得粉嶺的那位是住14，15定係16樓......

女性(美麗的)倒是清楚得不得了。區小姐是5月18，鄭小姐是3月31，玲小姐係3月21，弦小姐係5月31(拿，我唔係特登唔買禮物架，我係唔為意嗰日係5月31咋)，瑩小姐係8月16。剩下的，一係你唔夠靚所以我唔記得，一係你太靚但係我唔知你生日。

當然，妹和爸媽的生日是要拼命記住的，不記得，簡直就是找死(兩位女士會找我拼命)。

外國有位數學天才，其大腦對數字的處理係將圖形同數字連結埋一齊，於是他可以馬上告訴閣下一個二十位的數字是否prime number。我懷疑，我嘅大腦係將數字同美女連結左，但同男性好似有少少loose connection。唔知咁樣對計數有冇幫助。

Anyway，畢業及生日快樂，我期望下年今日依然記得閣下的生日。

盡量啦...

思維訓練

這兩天的辯論，令我回想起小時候的思維訓練。

即當年很多學生稱之為「萬惡」的學能測驗。文字推理和數字推理。

文字推理做得不好，因此興趣不大。但數字推理，oh，那簡直是我的樂土，小五暑假的一大本數字推理，很興奮地三日ko(事實上又真係唔難)，比起其他同學的苦口苦面，我係越做越快樂，還有嫌少的感覺(嫌文字推理太多)，彷彿有歐陽鋒「我不怕毒，毒才怕我」的境界(我直到入大學前都不知謙虛為何物)，於是當其他人夏天都到泳池游水溝女的時候，我，做數(當然而家係後悔死)。

思維訓練，就是由那個時候一點一滴積出來的。所以現在學能測驗取消，我覺得，個問題唔係測驗本身，而係學校同家長都太緊張，以致將這個邏輯訓練正面的一面沒殺掉，其實很可惜。

好了，到小六，就真係十分挫敗。文字推理一向沒有甚麼期望，那還罷了。那個數字推理，一份五十條，一個學期總共測十次驗，每次都全班最高，永冇低過四十的。很了不起，是不是﹖豈知隔壁班的那位女王陛下，永遠傳來的成績都係49，49，49，49，49，49，49，49，49，49這個令人吐血的series。即係點﹖即係擺明「每次我都拎滿分好似太串丫，拿，攞少一分，等你地有機會追過我囉」。但我對心中愛慕的女生(簡直係人中之鳯)，豈能心生怨恨﹖於是唯有自己心裏納悶(幸好那時還不會罵髒話)。畢竟一個小學男孩子如果連數學都好唔過人(其他更加唔在講，尤其遇著這種萬年不出的怪物)，你憑乜野追人﹖

現在想來，當然白痴，個女仔冇樣好過你，係你面前邊有尊嚴﹖你又鍾意佢d乜﹖可恨香港的教師，永遠都要你作嘅係類似「中學生應否談戀愛」的無聊題目，而當你想進一步研究「中學生應如何談戀愛」的時候，「stop！」，咁即係唔應該啦。

而家諗番，真係浪費大好光陰呀。

理性討論

如何理性討論，其實是一個很難答的問題。原因係因為，人類，係感情的動物。

甚麼叫理性﹖小時候認為，能夠用一條條數式表達的，就叫理性，而以為理性代表真理。

長大後，才發現，原來一直學習的邏輯主義有所局限，原來這個世界還有經驗主義，形式主義等等，最後，原來一個叫哥德爾的數學家告訴你，只要一個系統足夠複雜，就沒有可能完美。丫，別問我Theorem of incompleteness係講ｄ乜，好明顯我只係拋緊書包，那篇論文我只看了一頁半，己經不敢往下看(其實形式主義我都己經唔係好明)。

重點係，到最後，所謂強調理性，只會是在強調不完美，強調自己是一個理性的人，彷彿在強調自己其實是一個不完美的人，思想上，行為上，還有你的所有。

理性沒有完美，只要你足夠聰明，就可以在一個足夠複雜的命題中找出漏洞，然後指出。人，傾向完美，於是討論最後只會流於感性，而自以為完美。高明的政治家則有本事令群眾在心中自我完美政治家所說的話。細心留意的話，他們，從不會跟閣下說道理的。只有科學家才會講道理。你幾時聽過Barack Obama同你講道理﹖佢只係不斷強調布殊好唔掂(一個係好多美國人心中己經有定案嘅事，即係阿媽係女人嘅野)，然後話俾你聽，如果你選我，就可以Make a change，但how，when，where，change better or change worse等等的問題，有幾多選民知道﹖

但亦當然，這不代表閣下不可以批評別人的不理性，只要別以為自己很理性，又或者期望別人跟你理性理性，就是了，因為咁諗，真係好唔理性。所以我，一係唔數，要數，由開始就言詞狠辣，不留餘地，也不會字字斟酌，冇穿冇爛才寫。你要明白，選攻，就沒有可能守得密不透風，否則你沒開戰就己經贏定，誰會坐閣下的對家﹖恐怕係求和都來不及。

也別指望對方只守不攻，久守必失，天下沒有這等笨人(殺魚腩你自己都冇mood丫係咪﹖)。因此，必須要有對方會乘機反攻的心理準備。一如小弟都好明白「拜得神多自有神庇佑，數得教會多自有教徒問候」的道理，一樣。

這才是真正的所謂「討論」，不想被夾攻，就得思考如何將說話的目標定於一小撮人，小心引起非目標的不必要誤會。你一係選擇唔講，大家相安無事，要講就唔好留，殺佢個措手不及，務求速戰速決。「故兵聞拙速，未睹巧久。夫兵久而國利者，未之有也。」

記住，理性永遠只掌握係勝利者嘅手上。

風度和八婆

身為一個男人，傾向相信，如果你唔想命犯天煞孤星，對女士，應該具備最起碼的風度。最起碼就夠喇，今時今日，紳士實在唔係隨街可以搵到的動物。

但「最起碼的風度」，即是甚麼﹖那就是，不要跟女士斤斤計較。

這不是甚麼大男人主義之下的產物，只係我，好明白女士面對每月一次的苦楚。其實都唔難想像，男士們只要諗下，如果閣下每個月會有一星期會唻月經，於是大熱天時閣下要帶上男性衞生巾，還有經痛，你就大約會知道那是一件多麼令人困擾的事。我認為，女性的一點點脾氣係必然的，而男人應該容忍。比著係個男人，咁樣搞法，早就反哂枱啦，邊會只係發下少少脾氣﹖

但當然，再有風度的男士，都會有對女士發long黎的時候，最常見的情況係以下兩個：

1. 那個對女士來說係好小的問題，對男人來說，不是。其中最常見的係面子問題。女士覺得面子事小，男士卻看得比天還大。如果你問「如果要你冇哂面先上到天堂，但可以好有面咁落地獄，你揀邊個」，對於這種問題，男人一般都唔會猶豫。

這其實只是大自然的定律，全世界的雄性動物，都像孔雀一樣，靠開屏來吸引異性，所以別讓你的男人係人地面前冇面，尤其「人地」中的一員，或數員，是美女。

2. 那個女人，你覺得，而且毫不猶豫，deserve一個叫「八婆」的稱號。咁，男人可以盡情咁鬧，不留餘地，比女人更狠。但當然，定義各有不同。

那麼美麗的八婆又如何﹖傻啦，俾得你叫做八婆嘅女人，你就唔會覺得佢靚。正如一隻著Dior的豬，你唔會話佢著得好睇，你只會覺得佢係侮辱緊同樣著住呢個品牌的女士們，一樣。

如果meet唔到呢兩個requirement，抹左去啦，男人之家唔可以咁小器。

成熟

我自問唔係一個成熟嘅人。

無論你幾大粒，竟然開會之前唔睇定d野，之前開會又遊魂唔聽人講野，然後又係度問番我講過幾次嘅野，再講到好似我好推卸責任咁。事實係係做過嘅兩間公司，都有同事不約而同咁同我講過同一句說話：「Derek呀，即係唔係教你卸膊呀，之但係唔係你應該做嘅野，你千祈唔好唔出聲全部食哂佢呀。」

我越唻越發覺，原來繼續斯斯文文同佢客客氣氣，老虎唔發惡，真係有人會誤會你係一隻病貓。
於是尋日開會，講講下，我黑面。然後用不太禮貌嘅語氣回答問題。這不是我的作風。一路以來我的開會態度都係採取「大家好唻好去」嘅方針。我亦都唔會好aggressive咁challenge人地，因為呢樣野自然會有我老細代辦。

其實我覺得challenge都唔係問題，但永遠你問我野，我會盡量係個會度答(因為我好唔鍾意d野又要拖到下個會)，你就永遠都話「開會之後慢慢傾」，又或者求其俾個答案然後話「咁解答到你嘅問題啦﹖」然後我都未話仲有冇問題佢就一輪咀繼續講落去。即係你嗰句野係疑問，反問定係設問句呢而家﹖

結果可能見到我面越唻越黑，老細幫口「其實阿Derek係之前幾個會都講過好多次架喇，個testing scope同張tracking list嘅分別係......」。雖然我其實唔係太鍾意成日要老細幫口，因為好似自己好無能咁，但佢講完呢句，條友即刻識得收聲，不能否認佢講一句嘅效果真係仲快過打針。

還有另一個同事(我地team係3個人同第二條team開會)趁換房嘅時候靜靜雞同我講「冷靜d，唔駛勞氣...」，你放心，黑面唔代表會發脾氣，老細係度我唔會亂唻，正所謂唔睇僧面都睇佛面，我唔成熟，唔代表我係弱智嘅。

我好感激佢俾我嘅呢一句安慰。

--------------------------------------------------------

今日父親節，到叔叔的餐館跟父親食lunch，期間，他兩兄弟不斷談論餐館的前景問題。

叔叔傾完番去做野後，我彈左句俾老豆：「阿嫲生你地四兄弟，四個都係做生意嘅，你叫我正正經經打份工唔好成日諗做生意﹖」

抬棺示威

一直以來，每次民主派人士抬棺材示威的時候，總有點怪怪的感覺。我一路都唔知點解會有咁嘅感覺，直到今個星期，我睇到呢一張相：

我就明白問題出係邊喇。喂，人地呢d先叫做出殯架嘛，邊有抬棺材嘅係度大叫大嚷架﹖梗係靜靜地，著件黑禮服，木口木面咁架嘛。口號等後面d人幫你叫丫。

正中間呢個，仲要有d吸血鬼嘅感覺，真係入型入格。所以下次議員們抬棺示威， 唔好著哲古華拉啦，佢係打游擊，唔係做殯儀架。正正經經買番件黑西裝，整整齊齊，形象專業，可以順便吸收中產選民丫嘛。一唔係你繼續著哲古華拉喊口號，然後搵幾個鬼妹幫你抬棺。外國有萬聖節，佢地扮起吸血鬼上唻簡直入木三分，問題不大。

所以議員們，下次遊行前，不妨落蘭桂坊，飲番兩杯，識番兩個鬼妹，咁至實際丫。

大禱告日

今時今日，在香港做一個基督徒，除了愛耶穌基督，原來還要愛國。

等如你溝了一個上海妹，天使面孔，魔鬼身材，但她卻告訴你，你除了愛我，還要愛毛主席，早晚唱一篇《爹親娘親不如毛主席親》，記住，係唱，齋讀太唔虔誠。

如此，你就會知道所謂《愛國禱告日》係幾咁無聊。

我去到，係愛國，定愛神好呢﹖你話愛國同愛神好唔一樣，情操唔同，兩樣野根本唔抵觸。我知。但如果係咁，各位女士下次知道你個佬走去滾，就唔好嫌三又嫌四喇。因為一個男人對自己老婆嘅情懷，同對住個妓女的心情，都好唔一樣，一個去滾嘅男人唔代表佢唔愛佢嘅老婆，男人呢種動物，可以將性，同愛，分得好開。

所以你接受《愛國禱告日》，即係你話我知你可以接受同個二奶一齊同你老公開聯歡會。咁你係一個偉大嘅女人，我建議你下屆去幫Hillary助選美國總統，拍擋食(你兩個可以互相share下d經驗丫)。

仲要玩拉力賽，十二個鐘頭祈禱馬拉松。長時間嘅禱告imply d乜野，其實我唔係好清楚，我淨係知道我去聽整首貝多芬第九交響曲，約七十分鐘，我幾鍾意聽，都會想訓。十二個鐘做同一件事，而且唔係好stress嘅工作(例如你番十二個鐘頭工未必會想訓，因為好大壓力)，你唔想訓，我輸乜都得。所以結論係：1. 你十二個鐘頭有十一個鐘係訓晏覺，飲飲食食，吹水打牙骹，放飛標捉圍棋，淨番一個鐘用唻祈禱。2. 如果唔係，你係玩車輪戰，每人祈一分鐘，七百二十人加埋祈左十二個鐘，咁十二個鐘只係一個噱頭。所以，parliamentarily，閣下的說話，係語意上，不太精確。

記憶中，主耶穌基督好似冇教過人要愛國，起碼佢冇話過我知佢好愛尼祿王或者凱撒大帝，亦好似冇咁教過聖約翰，聖伯多祿，或者聖法蘭西亞西西愛國對一個基督徒有幾咁重要。

要紀念地震災民，搞地震禱告默哀三分鐘就是了，標名「愛國」的禱告，其用意實在是不用在下多嘴，學渣打搞馬拉松的用意，除了強身健體，鍛鍊意志之外，在下狹小的腦袋也實在想不出第二個理由。偏偏參加者眾，証明基督徒實在是非常團結，比四十年前的中國最廣大的人民更加團結。

當然，閣下要愛國係閣下的自由，在下管不著，但不知耶穌基督是否跟閣下一樣愛戴中國。咁，你同我講，古以色列人都可以愛古埃及丫，我又真係冇証據反駁你嘅。

之但係如果我冇記錯，中國好似仲係行緊「有社會主義特式的市場經濟」，架囉。

iPhone and E-Reading

Steve Jobs其中一個習慣，就係死都唔俾你估到。

以往幾次係玩神秘，今年，3G iPhone係人都知，佢就玩割價，由US399減到去US199，你真係估佢唔到。但你俾人估到就認輸丫，咁鬼茅，走去減半價，你都諗下之前買落你部野嘅人嘅感受丫，減半價，真係仲慘過買左中石油呀。

買部iPhone變左中石油，好陰功呀......

-----------------------------------------------------

話說尋日寫完e-reading device，今朝番公司依然不停諗住呢樣野，lunch time上網找找，發現這個有齊現在全球己發行和將發行的e-reading device：

eBook device

最新的係Amazon出品的Kindle

感覺：下面嗰排掣好核突(好似blackberry咁)，同埋令成部野大咁鬼多，layout好差，成部計數機咁。黑白介面應該係出於減少用電量的考慮。10.3安士，唔輕部imac幾多。薄度幾好，但唔知用料如何，呢d device拎上手個感覺貼唔貼手好緊要，同埋點樣protect個screen(唔同notebook可以摺埋)，有冇袋送都係問題，套短片完全冇交代，都唔知搞乜。

呢部野乘惠US359，no computer, no cables, no syncing。利用amazon嘅優勢，供應88000本書，100 new york best seller，有書嘅sample，仲有newspaper同magazine，仲可以睇popular blog。可以email，咪即係俾機會人盜版﹖雖然，作為一個香港人，我完全唔反對呢個措施，但amazon係賣書嘅，咁就......

但我估佢醉翁之意不在酒，可能只係想用呢部野呢boost下Amazon嘅主業務。

第二個值得留意嘅係iLiad

感覺：function幾齊，例如可以將自己drop左嘅notes都send俾人，design都算簡單。之但係係今日一對十二嘅匯價底下，503.36EUR，真係......睇到都唔開胃啦，你又唔搞下噱頭。，六千大元，想人買你部野你就要諗諗計啦。

400mhz，64mb ram(兩樣都得sony嘅一半...)，8.1吋mon，128mb accessible flash memory，有audio，15.3安士(小姐你超重喎...)

第三部係SONY嘅出品：

SONY呢d就醒目仔喇，喂，你好好醜醜放係網頁度嗰部都要有d搶眼位先得架，嗱，紅色，仲要大大隻Tiffany's嘅字，咁至叫得起價架嘛。

9安士(ok輕)，可以放160本書，1/3吋厚，一舊電最多可以睇7500頁(唔知佢點計出唻)，6吋display，resolution 170 pixels per inch，8-level grey scale，可以聽歌，cpu 800mhz，128mb ram，hard drive 20mb(......)，有cd-rom(要唻做乜......)，usb1.1(咁咪夠囉......)

US299，唔算貴，但，我覺得好奇怪......同埋好似差減支筆，唔知係咪我睇漏。

last想講呢部cybook：

6.13安士(好野丫你)，0.3吋厚(同sony差唔多)，512mb storage(wo....)，開歌行full speed可以玩3個鐘(夠鬼)，內置e-dic，可以方便學英文，用electronic ink display唔用LCD，佢應該係想咁樣解決LCD望得耐會眼睏嘅問題。但冇touch screen，敗筆，又可能係唔用LCD嘅代價(呢個我估)。166dpi(wu~~~)，screen 6吋，行linux(I like it)，電池支援睇8000頁，16mb ram，512mb storage。支援rss及newspaper。

US350，deluxe US450，貴左d，尤其你係部iphone賣199嘅時候。

------------------------------------------------------------------------

對我唻講，合理價錢係2000至2500(大佬你黑白display呀)，成本貴嘅話，其實可以係用料度著手(冇錯，即係豆腐渣)，我睇死你玩多幾年咪又係幾個月出新款，駛鬼用咁靚料。一定要有touch screen，因為如果唔係嘅話，無論你睇落去幾咁paperlike，寫落去唔係，乜都假，而且而家iphone玩大左，遲早d電話都唔會有keypad，你呢舊新野如果又加番個keypad，就實在冇乜為。同埋，加支筆，可以玩好多fashion野呀。

你睇而家NDS定PSP贏，Wii定PS3贏，就知個世界嘅Trend係點走啦。

A new way for reading

假期跟妹通電，我又職業病發作，大談Yahoo!跟Google嘅生意經。的確係職業病，每次見到一d新嘅invention，我會好自然諗下佢嘅用途同埋發展，需求，或者經營模式嘅問題。

在今期economist看到這篇關於Book publishing的：

Book publishing in America

然後我又諗起上星期睇嘅《星期二檔案》，見而家d學校開始搞電子默書。一大塊電子版俾學生係上面寫寫畫畫。我覺得好奇怪，其實呢種電子寫版用途可以好大，可以出到好多好creative嘅product，偏偏係要用唻做d咁evil嘅野，默書。

其實只要將d課本全部電子化，d學生己經唔駛日日揹十幾廿磅嘅書包番學，舒服好多。然後搵資料又可以電子化，又方便做bookmark，方便drop notes(當然，你話香港嘅吸血教科書出版商肯唔肯咁合作，又係另一個問題)。反正呢個世界都應該冇乜邊個學生鍾意默書，你將佢搞到幾interesting，結果你問d學生「你會唔會因為將默書digitalize而鍾意佢呢﹖」，你估學生會點答﹖何必做d吃力不討好嘅事呢﹖

相反，你用呢個device唻介紹一個series嘅課外書俾學生等佢地可以揀唻睇(課外書，唔好係d乜野陳之藩散文集，永遠個先生鍾意睇一個小學生絕對唔會有興趣嘅書囉唔該...)。作為一個教育工作者，你寧願提高學生對默書嘅興趣好d丫，定提高學生對閱讀嘅興趣好d呢﹖

嗰輯星期二檔案俾我嘅impression係，d家長好緊張仔女成績(好正常)，而默書佔好大比重嘅成績，於是令家長好著緊仔女嘅默書，然後就星期一至日都同個仔女溫默書。你個仔會因為咁樣溫默書而英文變好，我真係輸乜都得。

好嘅英文唔係默番唻架阿嬸...

又話時話，呢d reading device嘅market越唻越大，如果我係出版商，下一步，就應該諗下點樣出一d唔俾人盜版到嘅電子書，其實我一路都唔明，blizzard出嘅online game，由central server 唻check住有冇同一個cd key double log in，係一個好有效嘅防盜版手段，點解冇人學下﹖

一件好事

昨天的《東張西望》(很不巧，吃飯的時候總是撞著這種八婆節目)，訪問成龍先生，問佢對大匯演後的是非的看法，成先生回應全文如下：

「一件好事我們不要把它渲染成壞事，尤其是傳媒業者最好是聽到都不說，也不問，譬如本來真是沒事的，再說下去就變成有事，一樁好事變成壞事，在此真要拜託傳媒，我們己經有太多的是非，本來沒事的，你們不說根本沒事，如果你一說，就變成有事了，然後我再說出來就變成是非了，因為我知道我說些正經的事，你們不會播，偏要我說是非，一說是非就變成頭條，是不是﹖，那我們情願不做頭條，我訪問這個一般的，你們愛登就登，不登就不登。」

大家香港人，實在應該好好學習大哥的思維模式，時時模仿，那麼萬大事其實都是小事一件了。「本來無一物，何處惹塵埃﹖」，幾咁有禪意。

這段說話應用之廣泛，比黃子華那句「搵食啫！犯法呀﹖」，同埋林海峰嗰句「超低能，勁搞笑」，尤有過之。例如：

1. 各位學生哥，考試答錯，可以將呢段說話改一改，同老師講：
「一件好事我們不要把它渲染成壞事，尤其是老師最好係睇到錯都當睇唔到，也不改，譬如本來真係合格的，再改落去就變成唔合格，原本合格變成唔合格，在此真要拜託老師，我們己經有太多人唔合格，本來合格的，你唔改落去根本冇事，如果你一改，就變唔合格了，因為我知道我寫一d特別好的答案，你地唔會加多d分，偏要我唔合格，一唔合格就變成街知巷聞，是不是﹖那我們情願不街知巷聞，我攞一般的分數，你鍾意講俾隔離班聽就講，唔講就唔講。」

2. 新上任副局長及政治助理有外國國藉，人工加三倍，都應該同傳媒咁講，原文照錄，今次係改都唔駛改喇。

3. 各位打工仔，番工做錯野，都可以咁樣同老細講：
「一件好事我們不要把它渲染成壞事，尤其是老細最好是聽到都不說，也不問，譬如本來真是沒事的，再說下去就變成有事，一樁好事變成壞事，在此真要拜託老闆，我們個project己經有太多的問題，本來沒事的，你們不說根本沒事，如果你一說，就變成有事了，然後我再說出來個project就要重頭做過了，因為我知道我做一d對個project好的事，你們不會講，偏要我說錯處，一說錯處就全公司都知，是不是﹖，那我們情願不要全公司都知，我開會提這個一般的，你鍾意揚俾同事知就揚，唔揚就唔揚。」

4. 其實嚴格唻講，你上court，俾人告例如上市公司做假脹，都可以咁樣同個法官講：
「一件好事我們不要把它渲染成壞事，尤其是法官大人最好是聽到都不審，也不問，譬如本來真是沒事的，再說下去就變成有事，一樁好事變成壞事，在此真要拜託法官大人，我們公司盤數己經有太多的問題，本來沒事的，你們不說根本沒事，如果你一說，就變成有事了，然後我再說出來間公司就要清盤了，因為我知道我盤數正確的地方，你們不會審，偏要審我錯的地方，一說錯處就全香港都知，是不是﹖，那我們情願不要全香港都知，我開股東大會提這個一般的，你有問題就問，冇就唔問。」

5. 四川咁多豆腐渣，我諗d建築商建學校的時候應該有咁講：
「一件好事(指建校)我們不要把它渲染成壞事，尤其是測量師最好是睇到都不說，也不問，譬如本來真是沒事的，再說下去就變成有事，一樁好事變成壞事，在此真要拜託專家，我們建的學校己經有太多的結構問題，本來沒事的，你們不說根本沒事，如果你一說，就變成有事了，然後我再說出來間學校就又要重建了，因為我知道我落足料的地方，你們不會讚，偏要我說偷工減料的地方，一說偷工減料國家就唔出批文，是不是﹖那我們情願要份批文，我情願測量這塊有落足料的牆，你們鍾意係度讀書就讀書，不讀就不讀。」

咁即係點﹖大家係咪好似曾相識呢﹖係囉，咪就係阿董太嗰句：「你地唔好淨係識得complain，complain，complain！」

淨係叫人唔好complain，但點解呢﹖佢又唔講。阿董太早就應該請教下成龍大哥啦，咁樣，至少你老公的腳患應該可以推遲幾年。

總括而言，段說話可以寫成為呢個general form：

「一件好事我們不要把它渲染成壞事，尤其是(A)最好是聽到都不說，也不問，譬如本來真是沒事的，再說下去就變成有事，一樁好事變成壞事，在此真要拜託(A)，我們己經有太多的(B)，本來沒事的，你們不說根本沒事，如果你一說，就變成有事了，然後我再說出來就變成(C)，因為我知道我(D)，你們不會講，偏要我講(B)，一講(B)就變成頭條，是不是﹖，那我們情願不做頭條，我做這個一般的，你們愛登就登，不登就不登。」

只要對號入座：A, B, C, D，四個parameter，就解決世上一齊難題喇。

幾咁有智慧。

美國民主黨

希拉莉敗局己定，奧巴馬將代表民主黨出選。

這兩個活寶，幾個月前還在罵得不可開交，現在卻互相吹捧了起來。睇住呢兩位仁兄，你馬上就會明白政治現實的一面。

突然間由「兩個只能活一個」變成「朋友」，之前誓神劈願「唔會做副手」，而家就話「會積極考慮」，嗰d幾個月前支持佢地嘅人，會點諗﹖如果我係美國選民，即刻就會將票投俾McCain。翻面快過翻書，我點知你做左總統之後會唔會對現政策﹖點知你會唔會走去同伊朗議和，同北韓「做朋友」﹖

你而家一做黨代表，就change，我點知你如果做左總統，會唔會又Change，Change we can believe in。

係咪真係當選民傻架呢﹖

六四的迷思

今日六四，就寫這個應景的題目。

每年今日，就會有人高呼「平反六四」，所謂平反，就是要還當年的學生一個公道。要國家平反六四，就是要國家還你一個公道。

十九年過去了，要道歉，早就道歉左，要唔道歉，你除非有本事同胡主席玩俄羅斯輪盤，否則，要佢道歉，就同熊貓生仔一樣，機會好微。

但點解仲要求這個國家呢﹖這件大事，國際早有公論，將來歷史會有定斷。於今時今日這個資訊發達的時代，一個政權再橫蠻，緘不住網絡上悠悠之口。閣下既然是民主義士，又何必一定要爭取一個仍然「一黨專政」的政權的認同﹖

我認為，紀念是應該的，免得在中共舖天蓋地的政治宣傳之下令人遺忘了歷史，免得一個大話講一百次就會變成真話。但請唔好再講「平反」，跟中國二千年的帝制不一樣，而家佢唔係皇帝，你亦唔係奴才，冇乜要一定要佢認同你至訓得安樂。你係一個有獨立主見的人，你自己認為對的事，你自己認同，可以爭取別人的認同，但佢硬是不肯點頭，那就算了，無謂白費心機。一個猶太人，唔會打算去爭取希特拉的認同的，咪玩喇，係佢心中，只係想將你地都關入集中營。

而且「平反六四」，只說平反，卻沒有方向，還記得上年同期那個開行馬力坦克碌豬的人物嗎﹖現在想來，他臨死前「大膽假設，小心求証」的思考實驗，也是想為六四「平反」，只是跟民主派的平反方向不一樣罷了。那麼，支聯會，想同佢做朋友嗎﹖

但政治搞煽情，像奧巴馬一句Change就打贏希拉莉，slogan好重要，要玩不妨玩大佢，下年應該用呢一句：

「地振高崗，一派溪山千古秀；
門朝大海，三河合水萬年流」

但支聯會當然唔敢咁做，他們一邊係香港遊行，一邊說要為大陸同胞爭取民主平反六四，你夠唔夠膽走去天安門示威﹖你唔夠膽，你毫無為民主的付出，而希望有民主的收獲，即係不勞而獲。當然，你仔細老婆嫩要為家人著想，你係以自己生命財產為第一考慮係人之常情，ok fine，但請你唔好每次晚會都戴哂頭巾將自己打扮到好似神風特攻隊有去冇回咁嘅義士模樣，你唔係義士，尤其是那個每年都永遠站在司徒華身邊的那個姓李的叫得最大聲的政治抽油水機，對，跟閣下那部廚房抽油煙機一樣，每次開動都像開動一架美式B-52轟炸機一樣，嘈吵得很，一邊搞工運，一邊搞民主，牆頭草兩邊擺，一腳踏兩條船。

香港人就旨意呢班依然奴才心態的民主派來爭取民主平反六四，假如今日共產黨向民主派招安，有幾多人夠薑say no﹖各位有識之士，千祈唔好同佢地一齊癲，梁山泊上一百零八條好漢係點死嘅，你記唔記得﹖

Email

email原本係好有效率的溝通工具，但d野一快，人類就開始用佢唻做無謂野，浪費時間，就像開法拉利遊車河一樣，只係浪費電油嘅行為。而office，無疑係全世界最無謂嘅地方。

一個簡單嘅問題，大家將責任推唻推去，加加埋埋成幾十封email，都仲係講緊到底邊個做邊樣野嘅問題。這n封嘅email，內容重點不外乎以下幾點：

1. 唔關我事
2. 己經跟足程序做
3. 要開會研究

這種因為email越來越係office普及而進行得越來越efficient的太極運動，基於「個人力量不足以改變大勢」的原則，我從來冇諗過要將佢改變。既然不能撥亂反正，本著「一百次消耗戰不如一次有效的突擊」的方針，我永遠用艱澀的英文來回應公文。

好處係只要稍要面子的人，都不會想在cc俾幾百人的email面前，在英文上被對手比了下去。我寫b級的英文，你寫c級的英文回應，會俾人覺得你好唔掂，所謂獻醜不如藏拙，自然係少講幾句為妙。如是者一次半次之後，他的攻擊茅頭就唔會再指向你，d雞毛蒜皮的問題自然識得另覓可憐的代罪羔羊。

我知，咁樣寫英文並唔係一個good practice，但咁樣用email法都唔見得好effective，既然你鍾意耍太極，我用龍爪功這種霸道武功應對似乎唔係太禮貌，雖然，我有幾次忍唔住，就真係好想用呢句狠狠地send番過去：

"To be, or not to be: that is the question"

你做就做唔做就罷，唔好推唻推去喇好唔好﹖

當然，理智與感情，係辦公室的政治環境裏面，前者永遠應該係首選，所以這句話到今日還是沒有白紙黑字公諸於office。

我唯有係一路做一路"Jesus Christ"的時候，盼望佢唔好再不停咁試我底線。只要有主在你的心中，你的人生就充滿盼望，係咪咁講﹖

Hallelujah

狗跟熊貓

很多人看到四川災民跟熊貓在地震中的待遇差別，慨嘆做人，還不如做熊貓。還有很多人看見名人養著的貴婦狗竟然都穿金戴銀，住大屋，很羨慕，又感觸，做人還不如做狗。

你肯定﹖

正所謂「隔離飯香」，你睇人好，人睇你好，係考慮來生做一隻狗或者一隻熊貓之前，你應該仔細考慮以下的事項：

狗：

1. 你一出世，你的主人可能就會因為免卻麻煩，將你閹左。如果你自覺做太監係人生第一大愉快嘅事，咁我真係唔會阻止你去做狗。

2. 你以後無論幾有錢，日常食糧應該都只係狗糧，狗糧同埋狗糧。你開生日party嘅時候，食嘅唔再係生日蛋糕，而係生日狗糧，即係貴d，好味d嘅狗糧。但你要留意，呢d高級狗糧，全部係罐頭裝嘅。閣下如果真係咁羨慕做富豪隻狗，可以自己買下呢d狗糧唻食，日日幫自己開生日會，好唔好食我就唔知喇，但至少食你唔死，呢點我可以肯定。

3. 你以後再冇人生自由(或者狗生自由)，你唔可以打電話番屋企同阿媽講「阿媽，我今晚同朋友出街食飯，唔駛等我」，因為你冇錢，你除左食你主人買番唻嘅狗糧之外根本毫無選擇，你甚至冇得揀今餐食邊隻狗糧。

4. 你再冇得享受溝女嘅樂趣。原因之一係因為養你嗰隻五十歲以上的暴龍睇見你同隻狗乸flirting，佢會呷醋，然後三日三夜唔俾飽飯你食。

5. 而且，你會發現你嘅生活其實好共產，共產到連配偶，都由政府分配。很可惜的是天下政府做事都是一塌湖塗，那個選狗女的通常都是盲的，總是把最醜的那隻分給自己。人類為甚麼總是分別不到漂亮的狗女跟醜樣的狗女呢﹖

6. 你會成日聽見一個幾十歲嘅八婆好嗲咁叫你做「仔仔」而自稱為「媽咪」，你會好奇怪，你以前做人嘅時候，son of a bitch呢個term乜唔係用唻鬧人嘅咩﹖

7. 你眼看著那個醜你一百倍嘅女人總是戴著GUCCI同LV，而天生麗質的自己卻衣不閉體，結了婚戒指也沒有一隻。當然，你亦永遠都唔可能擁有法拉利同埋陳法拉。

熊貓：

1. 比狗幸福的一點係，基本上所有生存緊嘅熊貓，都唔會有被閹的可能。再直接d講，一隻閹左嘅熊貓，對國家唻講毫無用處。但悲哀嘅係，做為熊貓，你嘅一生，無論吃喝拉睡，時時刻刻都要為國家服務，對國家效忠。其實比溫總胡總還要忙碌。

2. 無論你每天如何精神奕奕地上班，面對觀眾，大家都會繼續話你係「熊貓眼」，這令原本為了工作有好表現而一天睡八小時嘅你時刻感到沮喪。

3. 身為熊貓，你有交配繁殖的義務。於是三不五時，你就會被提到一個籠裏，和一隻雌性熊貓一起培養感情。這種生活想想就知有多累人，在不想做的時候被迫去做，跟做一個AV男優其實沒有分別，而且次次都要打真軍，可不像日本的色情電影那麼多把戲。想下輩子做熊貓的人，很有必要先去東瀛實習一下當男優的生活。

4. 可恨的是，熊貓女優可不像人類的那麼專業，經常東藏西躲，飯又識得照食，糧又照出，戲就唔照演。那麼飼養員也真是的，為甚麼每次都是要上演「純愛」的戲碼﹖下次搞一齣是拍強姦的，把那隻大熊貓五花八綁，老子樂得輕鬆交差嘛。

5. 更可恨的是，那幫飼養員書讀了一大堆卻都是書呆子，想出了甚麼拍熊貓AV給熊貓看來增進繁殖的屎橋，TMD，一個天天拍AV的人看AV還會有反應﹖希治閣睇恐怖片會唔會覺得驚丫﹖

6. 最可恨的是，那些AV千篇一律，一樣的場景，一樣的情節，用一樣的熊貓。喂，我幾鍾意夕樹舞子都好，睇一百次處女宮都唔可能有反應啦。

7. 但不要忘記，熊貓的那話兒，是螺旋型的，而不是像人類一樣是直直的，如何用螺旋型的XX順利做愛，是對智力跟體力的大考驗。論智力，閣下有人唔做想做熊貓，應該不會好到哪裏。但是你想只靠體力嘛，嗯......你先試試唔用螺絲批將一顆3CM長的螺絲釘打進牆裏再說。

---------------------------------------------------

睇到呢度，你仲想唔想做狗或者做熊貓﹖

想﹖好對唔住，閣下嘅智商連豬都不如，做狗同熊貓實在太抬舉閣下了。做好自己本份先諗點樣升LV啦。

大過的價值

那位寫xanga的中一女生，被學校記了大過。

我一直認為，所謂「記過」，係全世界最不公平的事。因為你係學校被accused，你不受普通法保障，burden of proof永遠落在被告身上，你冇得請律師，你冇得係律師唔在場的時候保持緘默，冇陪審團，落口供的時候冇錄影，冇得上訴，冇得要求換法官，冇得要求引渡番屋企受審。最好笑係有教師會基於「有殺錯冇放過」嘅原則，將嫌疑人物一律處罰。正所謂「魔鬼誘惑世人之前都要熟讀聖經」，當年作為一個行為不檢的學生的我，當然有背誦校規的習慣，但我實在記不起手冊哪一頁有記載這條秦國的連坐之法。

然後當你升學，學校就睇住你呢張「覆歷」，判斷你以前的行為操守。我唔知呢個世界由幾時開始，俾做教師嘅有咁大權力。尤其係d訓導主任，佢一講唔過你就發橫，拳頭大過你個頭，做學生的，唯有一邊記住古有韓信受胯下之辱，大丈夫能屈能伸，然後就屈服係佢嘅淫威之下。

因為在網上幸災樂禍而記大過，小弟有疑問如下，想問問那位校長：

1. 我係網上嘅行為點解受校規約束﹖請問香港哪一條法例給與貴校這個權力﹖咁我係英國同個鬼仔打交俾一個同學見到，番到香港係咪都要記過﹖係英女皇定係Gordon Brown拜託過閣下﹖

2. 咁如果下次我見到邊個同學流蚊飯，我即刻表現得極度哀傷，瀟瀟雨歇，仰天長嘯，一面哭爹喊娘，繼而鎚胸頓足，阿校長你頹頹地係咪都應該俾番兩個小功我呢﹖

3. 人地笑四川災民，你又唔係四川災民，你有乜資格追究責任﹖我鬧緬甸軍國政府，胡錦濤都未會捉我去坐監丫，你間學校點解咁唔講道理﹖

4. 個女仔嘲笑災民係有問題，但關心熊貓其實亦值得褒獎。你識得因為佢笑災民記佢大過，點解唔表揚下佢關心熊貓嘅行為﹖係咪你覺得四川災民嘅生命就係生命，熊貓嘅生命就唔係生命﹖點解你身為校長咁唔尊重動物嘅生命﹖

5. 仲有，你唔好忘記，中國奧運五隻吉祥物中就有一隻係熊貓，中國十三億人口，一隻福娃代表緊至少二億五千萬嘅人民。救一個災民係救一個災民，救一隻熊貓，就等如救左二十五萬個人民(中國熊貓有一千隻)。乜話﹖唔可以咁計數﹖好，我問你，一個普通災民同一隻熊貓一齊俾舊大石壓住，d大陸救災隊會救邊個先丫﹖你同我記住，一隻熊貓拎去外國一年值七百萬，七百萬中國人走私去外國一日，人地就會用掃把趕，而且一蚊都唔會俾你。

那個「保良局董玉娣中學」的張家邦校長，冚家富貴，你係咪欠公眾一個合理的交代呢﹖

又買書

中午飯後，路經三聯書店，雖然日前已有斬穫，但逛逛書店，總比回office無所事事說人是非為佳，遂入。

《我在伊朗長大》，這部幾個月前看了電影的書，一直覺得太貴捨不得買，今日發現三聯七折，二話不說就將四大本書抱回公司。同事都表示「唔知乜唻」，我很奇怪，公司係ifc，嗰陣ifc有上呢部戲架，你班友番工唔望下個戲院做乜架咩﹖

四本，$168，我開心得像出門口踢到舊金一樣。

原本仲想買多本易經導讀，但實在睇唔切，可以等下次減價再買。

言論好自由

先有香港中一女生，後有大陸電車女，一起痛駡四川災民，引起輿論圍攻。

這是當然的事，因為這個世界絕大部分人，都只會同情災民，就算唔同情，至少不會落井下石。但結果這兩位女士，一個被迫寫悔過書，一個直接被公安找了去問話。大陸那邊咱們香港人管不著，但在香港，竟然會有人因為這種「政治取向不正確」而要公開道歉，寫悔過書，我不禁慨嘆，香港回歸十一年，跟祖國母親是越來越親近了。

寫悔過書這回事，從來只在大陸聽聞過，小弟實在是孤陋寡聞。然則大家經常掛在口邊的「言論自由」，在這「大是大非」的議題上，不知跑到西天哪一個角落遊埠去了。

所謂言論自由，不是指閣下罵四人幫的時候，可以自由選擇「漢奸」，「走狗」，或者「賣國賊」；又或者評論董特首的時候可以用「老懵董」，「白眉董」又或者「我挺董」。而是在諸如四川地震，納粹獨裁的重大問題上，你依然容得下少數的意見，你可以不認同，可以敬以中指，可以話佢質素低，甚至可以罵對方是豬，但你不可以用一支左輪指住人地個頭，要佢寫一封悔過書，表明關心四川同胞的心情，表明愛黨愛國的立場，站好了隊伍，要在中國最廣大的人民面前表態自己堅決擁護馬列毛思想，決志要持續不斷的進行階級鬥爭，打倒一切反黨反革命，反對修正主義和資本主義的腐朽思想。

而家文革呀﹖

你唔可以話佢講的是錯的就用「行政手段」要佢道歉。甚麼是「民主」﹖假如世界上真理只有一個，那麼在同一個議題上如果有超過一個意見，那麼至少其中一個是錯的(當然亦可能是兩個都錯)，民主的出現，就是因為很多問題其實沒有所謂「對」與「錯」的分別，於是唯有用人數來解決，多數者勝，但這不代表少數的就是錯的。而假如世上的真理不只一個，你憑乜野斷定自己一定是對，而對方一定是錯呢﹖

請問呢個女仔幾多歲﹖識幾多野﹖做教師校長的首先想到的竟然不是循循善誘，慢慢教導她，而是要先保住學校的聲譽，絕不可以讓外界認為自己學校出了一個「敗類」，於是立即要佢寫悔過書。我實在很同情這個小女孩，因為我知道，中一寫悔過書，絕對唔係人生最愉快的經驗。

香港的民主派公民黨，這種平時口口聲聲話大陸箝制言論自由的人，請問有哪一個有站出來，維護一下這個剛升上中學的小女生呢﹖當然冇，因為站於政黨的立場，冇必要為左個三唔識七的女仔同全香港人作對，亦即同選民作對，因為這個女孩唔係叫王丹，柴玲，吾爾開希，李卓人，李柱銘，陳方安生，劉慧卿，梁家傑或者余若薇。

同人唔同命，事實証明所謂「普世價值觀」，只能套用於一少部分人的身上。

雜記

朋友對於小弟在此博客關於宗教的言論，頗感不以為然。

我當然明白，直腸直肚會得罪人。子曰：「六十而耳順，七十從心所慾」，而我的朋友都是二十出頭的熱血青年，當然不能這樣要求，連我自己也不能。

但在自己博客說話還要左閃右避，跟做愛還要帶著安全套一樣，你想想就會知道這是一件多麼「冇癮」的事。

學黃子華咁講：「駛唔駛咁安全呀」。

--------------------------------------------------------

三聯又減價，先係春減，然後夏減，唔知會唔會仲有秋減同冬減。但小弟一於少理，又趁低吸納去也。買了兩本肥佬黎的著作，一新一舊，都是談創業的書藉，一來自己想創業而不得其法，二來就算最後創唔成，學學老闆的思維亦於君有益。

還看中一本叫《Competing in a flat world》，未及細閱，單見書名恐又是另一本老生常談，但見著者有馮國經及馮國綸博士，content一般不特別吸引，英文原版$266(Hard cover)，中文繁體譯版$140(半Hard cover)，我實在不知兩位教授如何解釋這個奇怪的經濟現象。

所以未買。

--------------------------------------------------------

四川地震至今13日，死亡人數過五萬，失踪約三萬，於此災情未定，災民屍骨未寒之際，大陸的輿論又開始歌功頌德起來，溫家寶大有機會成為第二個「人民的好總理」了。

過了13天，能救出活人己經機會渺茫，是開始清算豆腐渣和人渣的時候了吧﹖

Cost Per Action

週三大佬標宣佈微軟發展live search cashback的計劃，提出cost per action的理念。

廣告的發展，最初的收費模式係唔理有冇人睇你個廣告，總之你登廣告，我就收錢。Google的cost per click更進一步，要有人對你嘅廣告有興趣，CLICK左入去先至收錢。cost per action則無異係呢段發展的終點，你因為賣廣告而賺到錢，我先至收錢。好多Wall Street嘅analyst唔睇好佢，當然，技術上有好多野要解決，尤其係你點樣知人地有冇做成單deal，點樣防止fake deal等等。但第二個唔敢包，MS咁鬼有錢，真係有乜問題會解決唔到﹖

呢個方法嘅好處，係將用戶的風險減到最低，於是可以將每個action的收費調高，profit margin可以好大，可以想像，MS如果掂左，GOOGLE一定跟。而且呢一著好聰明，跟住GOOGLE繼續做COST PER CLICK，人地己經食哂個MARKET，你根本唔夠佢打，唯一諗過另一個REVENUE MODEL，先至有著數(一如當初GOOGLE點打YAHOO一樣，又好似最近NINTENDO打贏SONY一樣)。一路以唻INTERNET嘅商業模式都係以CLICK RATE為準，呢個CPA的概念，無視CLICK RATE同人流量，嚴格唻講都可以算係一個突破，反樸歸真，同傳統中間人一樣，做成單DEAL先收佣。

另一個我咁BUY呢樣野嘅原因，係，我都有諗過呢條水囉。今舖Google冇反應至奇。

考驗

緬甸風災，四川地震，於我心有戚戚，頓覺茫茫人間不知何物。

不知是否受心情影響，這幾天Ipod播來播去都是莫扎特的《Requiem》，對平日的摯愛《The marriage of Figaro》竟然完全提不起興趣。畢竟這種時勢，令我很難對喜劇有代入感。Introitus首段一沉一浮的音符，配上一前一後的步伐，瀟雨連綿，才是憂鬱心情的最好寫照。

但這種時候，還是會有中一女生寫xanga，仍會有人選播《Die Entführung aus dem Serail》或者唱《Halleluyah》，也會有人，認為從好的方面想，地震可以凝聚人心，諦造和諧社會，增強愛國教育，鞏固民族意識，係上天的考驗，等等。

古有百家爭鳴，閣下要說甚麼當然是閣下的自由，我就算想唔尊重都唔可以用泥封住你把口，但說來說去，又帶到了個天上，就有點兒問題。因為如果我係個天，我：

1. 根本唔係搞地震。
2. 就算地震，都唔會震四川呢個出名難出難入嘅地方。
3. 就算震四川，都唔會順便震壞哂d路。
4. 就算震爛d路，都唔會震爛咁多樓。
5. 就算震爛咁多樓，都唔會震學校。
6. 就算要震學校，都唔會揀番學時間去震。
7. 就算揀番學時間，都等d小朋友放lunch或者體育堂去哂操場先震。
8. 就算d學生全部係哂班房，都會搵d枱枱凳凳頂住d石屎等唔會壓親d小朋友。
9. 就算壓親小朋友，都唔會要佢地又要据手又要据腳先至出得番唻。
10.就算要個小朋友据斷隻腳先可以執番條命，都唔會等佢出番唻之後要有人同佢講：「小朋友，你爸爸媽媽己經過身喇」。
11. 就算我真係咁做，都唔會要我嘅信徒周圍同人講，「從好的方面想」，「凝聚人心」，「諦造和諧社會」，「增強愛國教育」，「鞏固民族意識」，最後還很有家教，數典不忘祖，說「這是上天的考驗」。

從好的方面想﹖等如d講股佬壞消息當好消息唱，如果你真金白銀買落去你唱好嗰隻股票度，我至少會敬你係一個言行一致嘅好漢。但如果今日，係香港地震，塌左嘅係你住緊幢樓，死嘅係你嘅父母子女，你可唔可以「從好的方面想」﹖

做人唔好得把口講，你即刻入四川，對住個得五歲，冇左隻腳，冇左老豆嘅小朋友，講「從好嘅方面諗」，「凝聚人心」，「增強民族意識」同埋「係上天俾我地嘅考驗」。你做得出，得，你好本事，就當我呢篇野係廢話。否則，就唔該，唔好再自我安慰，傷身呀。

葛福臨

此文完於昨日，因區家閨秀壽辰，為免敗人清興，遂順延一日刊登。

數月前曾寫有關葛福臨佈道大會，瀝血數千字，後覺該文一旦刊出，徒增基督徒朋友心中憤慨之情，敵愾同仇之志，亦想在下人微言輕，所寫殊不足信，乃棄之深谷。

週六閱蘋果日報古德明先生《征服英語》專欄，見其談及葛之為人。想古先生博古通今，中外兼修，所言雖未必要奉為金科玉律，但亦甚有參考價值。原文節錄如下：

「最近，美國葛培里佈道會會長葛福林牧師往訪新中國，稱明反對西藏百姓揭竿起義：「《聖經》明確指出，我們應遵守法律。我絕不會支持任何非法行為。」他似乎不知道rule of law和rule by law的分別，更似乎忘了《聖經．馬太福音》第十二章的故事：有一個安息日，耶穌走進堂，見到有人一手殘廢了。法利賽人認為安息日工作是違法的，就問耶穌：Is it lawful to heal on the Sabbath?（安息日治病，符合律法嗎？）耶穌回答：It is lawful to do good on the Sabbath（安息日行善，何違法之有）。說罷，就用大法力令那人的手復元。也許，葛福林不是沒讀過《聖經》，也不是不懂得of和by的分別，只是心有大欲，所以和許多牧師神父和尚尼姑一樣，只講中共法律，不分人間善惡。」

古先生言論是否正確，當由看倌自行判斷。吾轉載之謹作參考，未敢妄評。

短歌行

青青子衿，悠悠我心。但為君故。沉吟至今。

我還記得，今天是區大小姐的生日。

凌晨時分，想發賀電，手中的電話按完號碼又delete，delete完又打，始終沒有發出dial的command。如此這般來來回回十分鐘，最後放棄。想不到我大好男兒，都有婆婆媽媽的時候。

繞樹三匝，何枝可依﹖

疊高了枕頭，驟覺憂從中來，不可斷絕。

何以解憂，唯有杜康。可惜家中半滴酒水都沒有。

月明星稀，夜就這麼過去。

學琴

朋友提起八級鋼琴，有感而發。

現今的父母，喜歡讓子女學鋼琴。但如果教女，我建議，應該俾佢學小提琴，當然，其實仲可以有其他好多的選擇，但香港父母太過功利，冇得獨奏表演又或者太過偏門冇人識的樂器，父母們根本冇興趣。

鋼琴音色相對圓潤，幾激烈的樂曲，都難脫「柔」的感覺(我個人的感覺，所以我小時候唔鍾意聽鋼琴)，表現的，是一種閒靜(首推Vladimir Horowitz的演奏，實在已經到波瀾不驚的境界)。小提琴音色較尖，每一個音符都有棱有角，表現的，係一種拉丁族群的躍動。這點，各有所好，也難說那一種較好，跟自己個女的性格配合就好。

個人喜好，都幾buy一d威風凜凜的女子(當然前提你個樣要襯)，斯文恬靜唔係唔好，但問心，香港地有幾多個小龍女丫﹖

對女孩子來說，演小提琴得天獨厚有兩大優點：

1. 小提琴比鋼琴要求更大的體力，所以你只會見到有七八十歲老到冇牙的去奏鋼琴，但你從冇見過同一個阿伯仲要去演奏四季，我怕佢連骨頭都散。

女孩子，青春無敵，有機會當然想係演奏台上表現一下自己的年輕活力，肯下苦功的話，十幾廿歲可以登堂入室，但鋼琴就要日積月累，越老越辣，你幾有才華，廿歲出頭，都華唔過一個做得你阿爺的鋼琴家。但，到得你有咁上下功力，你都老喇，花樣年華，已隨流水去......

2. 女小提琴家去演奏，清一色一襲連身長裙，羅衣輕動，演奏時妸娜多姿，躍然於高台，男人照做，扭來扭去，只會俾人話佢發花癲。所以論可觀性，女性奏小提琴永遠高一籌，如果能夠再加上氣質樣貌，真係唔紅就奇。

拉小提琴，唯一要求係要夠高。唔高，著連身長裙唔好睇，你扭左腰彎左腳我都唔覺，咁你都係坐番係度彈鋼琴算數喇。

才女

我後知後覺，到今日先知今年中大出左個超班的miss ccba。



評價：身材，欠奉。樣貌，一般，有點稚氣，可以加分。但普通的美女我唔會寫，我會寫佢的原因，係因為如果網上流傳佢的覆歷屬實：

1.會考十優
2.拔尖
3.DGS
4.讀global business
5.GPA 4.0
6.PE拎A
7.田徑隊
8.danso
9.有錢
10.基督徒

我唔覺得拔尖係一個selling point, 讀邊科可以係自己選，有錢唔係大哂，基督徒嚴格唻講我會認為係缺點多過係優點。雖然，I subjectively prone to believe佢唔會同一般嘅基督徒一般見識。

但除去呢四點不論，佢，己經完全打破左鄭小姐十幾年來係我心目中的形象。唔知佢會唔會好似鄭小姐咁對古典音樂有所鑽研，係，就真係perfect。

同埋我想同佢講：「你快點回去火星吧，地球是很危險的。」

震撼實在太大，謹贊文以記之。

傘兵

當出動到傘兵來救災，大家就知四川災情有多嚴重。

做傘兵，是一件極危險的事，所以你很少聽到有人會用傘兵來救災的。那些還在埋怨「點解咁遲先派解放軍」的人，應該先補習軍事知識。

1. 地震區暴雨連綿，而且大風，閣下武藝超群，不如表演一下點樣係狂風暴雨下跳傘。再加上有行雷的危險，據我所知，傘兵應該沒有裝備避雷針。

2. 跳傘唔同碧咸射波，落點係邊唔係由你話事，所以唔可能直接係災區降落，因為民居密集，而跳傘降落時要用助跑減速，你一個唔覺意跌左係兩橦building中間，一撞埋牆，就一命嗚呼。又或者落左係d倒塌左的樓宇，d鋼筋石屎一支支插出唻，個傘兵一跳落去，衝力極大，即刻開膛而死。

所以落點一定要選平原，但四川乃谷地，平地少，就算有平地，因地形關係，容易積水，這才是最大問題。你平時落大雨見到水窪可以澗水過去，傘兵唔得，唔好睇小一個水窪，過膝的水窪足夠殺死一個傘兵。個傘兵降落係個水窪度，水阻力大，佢助跑唔到，一仆，就成個人訓落個水窪，上面成個降落傘蓋落，個傘一食住d水，任你幾大力都再頂唔番起個傘，於是你就浸死。

同埋唔該仲成日講「天遣論」的人小心，前事不亡後事之師，美國有個叫Jeremiah Wright的牧師講左句God damn America，結果令Obama一身蟻，而且你唔係牧師，有起事來唔可以賴係神的旨意，自己講野自己揹鍋，自是小心為上。況且紅軍根據地係陝西，首都係北京，辦公室係中南海，經濟特區係深圳同上海，行政特區係澳門同香港，我睇唔出有乜野原因個天遣要發生係四川。

唔妥共產黨一回事，乜野都賴個天就同香港的基督徒冇乜分別。再講，溫總七個鐘去到四川救災，你仲想佢點﹖

地震見人心

四川地震，報紙說動物的預感能力驚人，早幾日就趨吉避凶，齊齊大遷徙去也。

跟咱們的奧運火矩手一樣。

地震過了廿四小時，好像還沒有一個火矩手跳出來公開表示自己要捐款，籌款，或者身體力行去振災，跟火矩手名單公佈後那廿四小時各方人士的敏捷反應相映成趣。

當日有份拎住支火矩的人，有邊個而家會挺身而出，說自己有份傳過聖火，而家要身體力行實踐愛國的精神，要去四川親自救助災民，而且會好似呼籲人地去支持聖火傳遞咁，呼籲其他火矩手同埋當時的觀眾一齊參與振災呢﹖還有那時夾道歡迎火矩手的觀眾們，現在當然不會再到處宣揚自己當日的愛國行為了。萬一被紅十字會或宣明會等慈善機構看上了，日日遊說自己捐款振災，就算力保荷包不失，煩都煩死。

証明人之為萬物之靈，不是毫無道理的。至少香港的青蛙老鼠，到今時今日，好像還是沒有反應，靜悄悄的繼續過著平靜的生活。

當然，佢地可以有好多藉口，例如要番工，例如唔應該將奧運同政治混為一談，例如話自己只係火矩手唔適宜干預我國內政，例如話自己老到要坐輪椅實在有心無力，例如話自己只係運動員/藝員/地方官員，自己遠水難救近火云云。

今時今日，國家正值危難之際，仲有人夠膽話自己有份傳過聖火，等如係日本中完兩粒原子彈之後話自己同東條英機私底下好老友一樣，撩交打咩﹖

孝順的男人

唔知由幾時開始，女士們選男人，喜歡選孝順的。趁母親節，男人自然空群而出，一展孝道，誓要令天下女子因自己一時之孝而傾心。

女士們冷靜d，一個孝順的男人，看似好處多多，其實只係掩人耳目的煙霧，令你看不出背後的真相。更甚者，係你眼前呢個男人根本唔係孝順，只係從順，阿媽講乜佢就應乜之徒，嫁俾咁嘅人，真係三生有幸。

男怕入錯行，女怕嫁錯郎，身為女性的你，當然應該慎選男伴，以防中伏，殆誤終身幸福。
1. 男友母子關係良好，日後奶奶對自己都會好d。

個仔越孝順，個阿媽越覺得呢個係好仔，就算佢除左孝順之外一無是處。呢種阿媽一般有戀子情結，成日覺得個仔娶個咁嘅老婆係一朵鮮花插在牛糞上，蝕底哂，你做新抱嘅最好就同個仔一樣對奶奶孝順孝順，三從四德，如果唔係，你呢世人就係咁先喇。

唔好俾電視劇呃到你，d奶奶對新抱冇咁好死架，除非，你大肚啦。

2. 男友對奶奶好，自自然都會對外母好。

你要明白，一個男人同佢外母的關係，就等如大自然裏面老鼠同貓的關係。如果你真係佢地兩個係真心和好的，你應該先搵d老鼠同貓做下實驗，咁快做人體臨床實驗實在係好危險的事，亦都好唔人道。

你男友係孝順仔，理應會對外母遷就，但關係係雙方的，你男友肯讓步，唔等於令壽堂唔會得寸進尺。老鼠同貓的矛盾，關鍵都係係隻貓度，隻老鼠的角色，其實好被動架咋。

3. 男友孝順，佢第日教仔都會教個孝順仔丫。

你老闆對住老闆嘅時候笑到成個烚熟狗頭咁，唔等如佢d手下(即係你)都會對住佢笑到成個烚熟狗頭咁。更大可能係物極必反，你個仔睇你成日對住阿嫲冇哂尊嚴，心生蔑視，同你的關係仲差左。

4. 男友孝順，都會錫小朋友多d丫嘛。

同一個道理，你老闆對住老闆笑到烚熟狗頭咁，唔等於對住你都會笑到成個烚熟狗頭，層次唔同架。更大的可能係佢都會要求個仔好似佢咁孝順，如果撞正你個仔係反叛性格，咁，就有好戲睇咯。

當然，唔係要你特登揀個忤逆的，但孝順都要睇分寸，一個淨係識得聽阿媽話嘅男人會唔會識得幫個老婆爭取下權益呢個問題其實女士們應該心裏有數，如果唔係就唔會有「如果我同你阿媽一齊跌落水你會救邊個先」呢個咁睿智的問題。你應該揀嘅，係一個有d政治手腕的男人，識得平衡權力，左右逢源，唔俾任何一方勢力座大的，像卑斯麥一樣。

乜話﹖你想搵個偏幫老婆刻薄奶奶的男人﹖一個怕老婆的男人同一個怕阿媽的男人有乜分別呢﹖都係怕女人，一個怕女人的男人點樣養妻活兒我好懷疑，你想搵個咁嘅男人，証明你同佢結婚唔係因為你愛佢，你地追求的唔係一段平等的關係，而只係你想過下做老佛爺的癮。

咁我冇野好講喇，祝所有識得你嘅男人好運。

公平

要立法保証公平競爭，原因當然是因為有人認為有不公平的競爭存在。

競爭是甚麼大家都很明白，但何謂公平，就實在是各有各的演繹。香港有好多人人讀書讀上腦，數學成績好，認為所謂公平，同秤天平一樣，總之大家一齊企上個天平度，稱到一模一樣，大家咁高咁大，就叫做公平。所以甘泉的老闆才會在公司停止營業後向傳媒說「被競爭對手打壓」等的說話。

呢個邏輯的問題係邊﹖問題係泰臣練拳練多你二十年，拳頭大過你個頭，手臂粗過你大脾係好自然的事，你上到台同佢打拳先話唔得呀，佢大蝦細呀，佢一鎚打過唻隨時勁過我打廿鎚呀，唔公平呀，然後叫政府插手：「你叫佢用一隻手指同我打就差唔多喇」。

當你覺得競爭對手用既有優勢打贏你的時候，你有冇曾幾何時諗過，人地的優勢係點得來的﹖天跌落唻﹖舊泥入面生出唻﹖人地都係用雙手爭番架。你企到上個擂台度先係咁同個裁判投訴對手拳頭太大手臂太粗，第一，冇人叫你唔知頭唔知路諗住胸懷滿腔熱血就衝上台同人決一死戰，係你自己冇做好資料搜集市場評估收支預算等等。第二，喂，人地都殺到埋身啦，你仲咁多野講咁多野投訴，不如諗下點打落去，或者早d投降算啦，仲細咩。

養兵千日用在一朝，有優勢梗係要盡用唻打擊對手啦，唔通仲要扶你一把，鼓勵你同佢搞對抗﹖如果你真係咁諗，我絕對有理由懷疑你係一個Masochist。你係變態嘅，我唔希望繼續同你交談。
你睇人踢波都知啦，點先算係一場最唔公平的球賽﹖唔係車路士用幾倍錢買人然後係球場上將你蹂躪，而係個球證買左波纜結果偏幫曼聯任得佢插水起飛腳。從來所謂的不公平，原因一定唔會來自參與者，而在監管的那條茂利身上。你而家搞公平競爭法，即係叫個買左對面波纜的球證同你主持公道。

咁同叫西門慶幫手保護你老婆仔女，守住佢地的貞操，有乜分別呢﹖

陰謀報告

唔知大家最近有冇留意新聞，呢幾個月內，香港嘅報紙己經講左幾次同一樣野。

係乜野﹖

就係出左幾次同一個調查報告，個報告話俾廣大的香港市民知道，打工仔，最鍾意嘅，唔係加人工，而係俾老細讚佢well done。

我絕對有理由懷疑呢個報告係個陰謀。

因為大部分公司今年生意都冇上年咁好，但消費指數就不停上升，伙計加薪要求肯定只會高過上年。咁嘅時候，我俾你做老闆，你又唔想加好多人工，又想留人，你會點做﹖梗係出口術啦，因為唔駛錢丫嘛。

但讚得多，人工一蚊都唔加始終都唔係辦法，咁當然要諗諗計，催眠下手下的員工，令佢地覺得俾老細讚一句好過人工加十萬，Paul Goebbels講過，一個大話講一百次，就會變成真話。如此這般，就有左呢d咁嘅所謂調查報告。

但你問我有冇效，我將心比己，會覺得冇。你只要諗下，你讚令壽堂一句靚女，母親節可唔可以唔送禮物丫﹖唔得丫嘛，最多佢收禮物嗰陣開心d嘅啫，咁你做老闆嘅，就更加唔應該存呢d僥倖心理，諗住慳嗰一個幾毫先得架。讚賞呢d野要日子有功，唔係你咁樣煲一煲d新聞就可以解決的問題。

拿，各位打工的不妨留意下，你老細最近有冇讚多左你喇，有，咁恭喜你，你老細今年應該係唔多願意加你人工。保重。

第三個紅人

北京奧運，先紅了一個金晶，然後紅了個王千源，最近又多了個陳巧文。司徒華看在眼裏，不知會否有一丁點兒英雄遲暮的慨嘆。

對於這位陳女士，你問我，她學問見識雖不見得，但膽色過人，不讓蘇眉，加上身材豐滿樣貌娟好，這種女子在下非常願意結交結交。所以講起「起底」，我會覺得，女人，應該只係妒忌，男人去起佢底，我會話呢條友正一豬頭，雖然嚴格來說，你都算係一個對香港人幾有貢獻的豬頭。

唔妥佢起佢底嘅，應該都係一d愛國人士，我假設。咁我想請問呢d愛國人士一個問題：係今時今日咱們偉大的祖國一路高唱「政治同奧運唔好掛勾」的腔調的時候，你將一個人的政見同佢的私生活掛勾，我就真係好想問你一句，你咁樣永無止境咁同國家的政策方向唱反調，「你係咪中國人」唻架﹖雖然，國家的口號廢尤自可，有時自打咀巴又真係唔抵幫，例如那句「同一個天空，同一個夢想」。我成日諗，天空冇錯係同一個，但講到夢想嘛，你中共想「西藏自古係中國的一部分」，但班藏民話唔係，你地點樣同一個夢想﹖又何如我國成日口口聲聲話要和平崛起，但美國好明顯想延續帝國主義式霸權。即係你點樣同一個夢想呢﹖我真係幾有興趣想知道下。

陳小姐的私生活質素，同佢政見的正確性似乎冇乜真接關係，企圖針對佢的私生活而評擊佢政見的人，等如d利用藏獨問題質疑北京成功主辦奧運的能力的人一樣，講來講去，你地都係一家人嘛，駛乜大家鬧來鬧去咁鬼麻煩丫。

政治智慧，冇，可以學，但其實我覺得唔學都唔緊要，呢個世界，能力同紅的程度，其實又係冇乜直接關係的。事實証明，你係一個政治白痴，唔等於你唔會高票當選做議員；twins都係唱歌的白痴，但你不得不承認某程度上佢兩位算係成功的。其實，我覺得俾人知道你鍾意蒲其實冇乜問題，呢個世界去蒲係唔犯法的，你又唔係五十幾歲的高官，唔駛成日自我審查，著衫著到好似中環d OL咁樣黑色一舊舊仲要拿口拿面好似去送殯咁。Come on，後生細女，show下d活力出來，好正常丫，佢唔show quali，你邊有野睇呀。

做人老實d，你係男人唻，就咪咁假，你望住佢d辣身相，唔會突然間孔夫子上身即刻阿彌陀佛四大皆空的，係咪﹖

紙上談兵之家變篇

週日於網路閒逛，偶見友人面對家庭糾紛手足無措有感。

假若令尊跟令壽堂吵大鑊，做為子女的你，正所謂手心又肉手背又肉，可以點做﹖這跟女人愛問的那條「我同你阿媽跌左落水你救邊個﹖」的問題一樣，有時還真是令人為難。可恨的是，你條女同你阿媽同時跌落水的機會實在不大，而你會游水的機會更加微乎其微。但兩老爭執糾紛，就實在多過你屋企的曱甴。想置之不理而不得，實在不勝其煩。

當然，如果你可以好似我咁聰明，第二條問題根本難唔到你嘅時候，第一條問題，當然亦唔例如。想天下至理殊途同歸，齊家，跟平天下，道理其實一樣。總體來說，策略如下：

1. 分則力弱，合則力強，你想兵分兩路將兩老一起解決，唔係唔得，如果你自問身具安邦定國之材。但如果有，我勸你與其浪費時間在這種soap opera的是非問題上(你老豆同老母鬧交，通常都唔會係d好有意義的議題，最多嘅係錢，錢同埋錢。唔係話錢唔重要，但佢地嘈親都只會為左嗰一百幾十)，不如考慮參選英國首相，或者美國總統，又可以考慮下做國家主席同埋總理，無謂浪費閣下大好才華。

根據希特拉的經驗，開闢兩邊戰線的行為實在與自殺無異，閣下咁做之前，最好先買定份人壽，受益人寫我。

2. 當然，若要量力而為，應當幫一個打另一個，選擇的priority可以根據自己的個人喜好，但其實我唔建議閣下咁做，自古成大事者都有大義滅親(即係大利滅親的意思)的本領，棄個人喜惡於不顧，美其名為「大局為重」者。

所以重點係要幫勢弱的一方。幫強的一方你最後只會俾對方吞埋，但幫弱的一方，你在旁吶喊助威，必要時適量助戰(少少好喇，咪搏老命)，來個漁人得利，讓兩人拼老命鬥下去，自己大撈油水，豈不快哉！

你覺得太冇道德﹖這就叫做婦人之仁，曹操唔打孫權就自然會去打劉備，唔通你期望佢會自己左手打右手﹖冇可能的，你老豆同老母一得閒唔互鬧，就會係你身上雞蛋裏面挑骨頭，話你間房唔執張枱咁亂，狗住間房都整齊過你等等，與其自己俾人煩，不如等佢地兩個自己打個飽，消耗元氣，冇氣冇力自然唔會再煩住你。

兩老叫你評理點算﹖你應該表示中立，自稱人微言輕，見識不足，實在不應該在父母的爭執中多提意見云云，總之太極推手渾圓一體，無跡無痕，四兩撥千斤，一d都唔帶上身就係。

真係到時要做和事老都易d丫嘛，想擺和頭酒都要睇實力丫，正如你有冇本事勸掂胡錦濤同達賴喇嘛唔好鬧交丫﹖唔得丫嘛，咪係囉。

3. 你嫌煩，唔想佢地繼續嘈落去，都唔係冇辦法，但秦滅六國，一係你滅人，一係人滅你，你唔係以為秦始皇打完楚國仲會同齊國做朋友吓話。

所以，你應該學學明太祖「高築牆，廣積糧，緩稱王」的策略，先慢慢積存實力，然後逐一擊破。但記著用兵之法，十則圍之，五則攻之，倍則分之，未明敵我形勢者，切忌輕舉妄動，記緊上兵伐謀，其次伐交，其次伐兵，其下攻城，如非必要，千祈唔好硬碰硬，亂咁宣戰加作戰團，兩敗俱傷都係其次，你傷佢唔傷的話，到時我只好幫你祈禱。

記住，對敵人仁慈就係對自己殘忍，心慈手軟，自古取亡之道。祝好運。

奧林聖火令

星期五，香港聖火傳遞之日，早上下著小雨。


公司規矩逢星期五便服日，只要穿有領的衣服便可，於是隨手在衣櫥中拿了一件恤衫(izzue出品)，披在身上出門。走到半路才醒起，今日特殊日子，再望望自己的衣服，心中叫了一聲「仆街喇」，紅色的，真是該死！我這不是變成言行不一的政客了嗎﹖真係水洗都唔清，幸好同事們都沒有看我的blog，不然一定會被恥笑。


然後在中環康樂廣場中走著走著，看著微小的雨，忽然想起，如果傳火的時候仍然下雨，那個名字中有三個雨字的仁兄不知會有何感想。一邊走，一邊想像他到時的表情，結果陰陰嘴的笑了一個上午，直到雨停了為止(上帝真係冇d幽默感)。這小子真有運，如果昨天是黑雨，我肯定會有一大堆人走出來話佢「陀衰家」，你信唔信﹖


真係到時就好戲咯。唉......


奧林聖火FAQ:


Q: 點解曾憲梓坐住輪椅都仲要霸住個位﹖

A: 第一，閣下唔應該歧視殘疾人士，邊個話坐輪椅的唔可以傳聖火﹖你都唔明阿曾生諗乜，人地想學金晶丫嘛，點知香港人咁唔合作，D警察又唔識做放下水，搞到一個搶火矩的人都冇，唉，都冇鬼用嘅。

唔係佢駛乜一路傳一路叫加油丫﹖你見過有人一路同人賽跑緊一路同D啦啦隊講「加油」未﹖


Q: 點解有成十萬人支持咁多﹖

A: 其實我覺得很平常，香港人一向好奇，貪新鮮，火矩今次在香港傳完不知要等到何年何月何日再有機會，當然是先睹為快。如果有日阿曾生係皇后大道度裸跑，就算你係個男人(雖然女人都應該唔多會有興趣)，都會想睇下到底發生左乜野事。

至於話有很多人揮動國旗唱頌國歌，即係我成日覺得，你去得聽演唱會頹頹地都會買番支螢光捧掛，全場齋坐，唔叫，機會微d啦。有十萬人叫即係好多人好支持﹖咁又係呀，如果政府向每個旁觀人士收番幾舊水入場費的話。


Q: 點解運動員冇得跑，演員同政客有得跑﹖

A: 即係好簡單，你睇下李麗珊出場多人叫d，定劉華同陳奕迅出場多人叫d，就明點解運動員冇得跑演員有得跑啦。真係你估政府係傻仔﹖佢都要同阿公交數丫。meet唔到quota，小心曾生俾人炒魷魚呀。打阿爺份工你估易呀﹖

至於政客點解跑﹖你不如問下紅衛兵去抄家點解你跟埋去﹖你D港英餘孽出身已經唔好，你唔去，就會俾人話同反革命同一陣線，你係咪想俾人抄埋一份﹖中國人嘛，最緊要係站對了隊伍，表明愛戴毛主席的心跡。唔去﹖用乜易俾人話你懷有不可告人的目的呀﹖你知啦，香港咁多保皇黨。本身係紅衛兵的，就更加冇可能唔去抄埋一份啦，咁好的娛樂。


Q: 點解要搵十個差佬圍一個女人﹖

A: 咁因為一個差佬圍唔住佢丫嘛，當差嘅啫，學堂應該冇教過草上飛架啵。

咁點解要圍佢﹖喂！男人點解要圍女人你仲要問，你有冇多餘D呀﹖烏蠅點解要嬲蜜糖呀﹖因為佢係藏獨分子﹖朋友，你多慮喇，消防員都鍾意同架反左嘅車影相啦，圍條女你都諗咁多野，你不如去寫小說啦。


Q: 咁陳巧文女士的事件你又點解釋呢﹖

A: 唉，你著住件曼聯波衫走入去車路士個球場，我做「實Q」都叫你走啦，你支持藏獨都唔駛搵條命搏丫小姐。留得青春在，哪怕冇人要﹖傳緊聖火搞出人命，因住鄧竟成俾人改名做鄧東菇呀。


Q: 點解民主派o個日冇哂聲氣﹖

A: 呢樣就要讚政府聰明喇，揀個working day先傳。你諗下，如果揀個weekend，個個打工仔唔駛番工，民主派搞遊行你估會有幾多人參加﹖但而家唔同呀，揀個working day，即係我唔係唔支持民主呀，問題我都要支持住我個飯碗先丫。相反，你睇下去做啦啦隊o個班，有邊個個樣似係要番工架﹖連跑o個d一睇個樣都知係奉旨嗰日唔駛做架啦，唔係點會個個跑得咁輕盈一路跑一路揮手，仲要笑口常開咁﹖你番工放工有冇試過咁開心丫﹖


Q: 點解唔俾人掠衫﹖

A: 你知啦，而家D後生仔著D T恤真係乜鬼圖案都有架嘛，陣間唔知邊件衫上面印左「共產黨」，另外一件印住「大檸樂」，又或者一件印住座雪山，下面嗰件印住隻獅子。俾記者影到，仲得了嘅﹖


希望呢個FAQ解答到大家的疑惑，還有問題的話，請不吝賜教。請呀！

如何愛國

「為甚麼唱歌的和從政的有得傳火矩而咁多運動員冇」這個問題，跟「點解我老細會係我老細而我唔係我老細個老細」一樣，全港幾百萬打工仔問左幾百萬年都冇答案的問題，你去問，勇氣可嘉，但我唔係一個多餘的人，當然唔會做多餘的事。

其實我覺得冇乜野唔妥，當有人一邊說「唔好將奧運同政治混為一談」一邊派一大堆政治人物去傳火矩，我覺得幾好，香港人一向最缺乏的就係幽默感，尤其係呢種黑色幽默，呢次就係一次學習的好機會。

而且，d運動員肯定唔夠我地的土產共產黨員同埋政府高官咁愛國，點可以擔當傳送聖火的重任呀﹖計我話應該唔准運動員跑，然後對呢d運動員從新進行思想建設，實施愛國愛黨的教育，要背默國歌，要朗誦黨訓。三大紀律八項注意佢地識唔識﹖八榮八恥佢地識唔識﹖三個代表論佢地又識唔識﹖全部唔識，你憑乜野拎住把火矩呀先生﹖

話說回頭，新聞報道有擦鞋校長打算明日帶隊去觀看聖火的傳遞，說要加強對學生的「愛國教育」。選去沙田，原因係「嗰度唔係熱門的示威地點」，冇咁危險。

我不知他到底想教他的學生愛哪一個國家。

我國辦奧運與眾不同的地方，正正就係有特別多的示威，你帶班學生去睇一個冇示威的聖火傳送活動，同睇其他的冇分別，咁你點樣令佢地愛國﹖你要帶，應該要帶佢地睇「有社會主義特色的聖火傳送」，正如教經濟，也要教「有社會主義特色的市場經濟」。傳火矩一樣，一定要睇有示威的，要有人擲水彈，燒汽車，然後看著穿藍衣的衛士們跟火矩手(這個火矩手當然不可以是運動員，佢地又唔係共產黨嘅，冇資格做愛國的革命分子)一起「冒著敵人的炮火，前進，前進，前進進」，唔係，而家高官成日話香港太平盛世，學生又點樣身同感受「中華民族到了最危險的時候」呢﹖

怕危險﹖你做為校長，應該教導你的學生，愛國，是要付出代價的，而唔係攤大手板問國家攞著數的，你咁樣，唔係教學生愛國，只係教學生做人大常委，中共委員同埋政府高官。你應該教導你嘅學生，愛國，就係當那個姓曾的共產黨員傳緊聖火的時候俾人擲手榴彈，要「把我們的血肉築成我們新的長城」，抵禦藏獨分子，擋住示威的反革命，要保護住「中國共產黨最親密的朋友」，跟從毛主席的教導，「要到大風大浪中去」，要自告奮勇去最危險的地方，而唔係去和平的沙田駐紮。

所以，呢間小學的學生們，你地都係毛主席的好兒女，革命先烈的接班人，發出你地最後的哮聲，唔好理你地嗰個受資本主義荼毒左幾十年，回歸之後先至轉軚的校長，唔好去沙田，應該去中環，起來，不願做奴隸的學生們。

嗱，咪話哥哥唔提點你呀，愛國唔等如阻住地球轉呀小朋友，唔好lunch time去呀，我約左人食飯呀聽日。

雜記

傳來消息，有朋友獲邀擔任奧運香港區的火矩手了。我忽然覺得，以前罵得這麼兇，有點過份。親疏有別，是我眾多的缺點之一。

如果他是我很親密的朋友，我大概會勸他不如推掉算了。但幸好，我跟他不熟，甚至沒有聯絡，那就不用狂作小人了，免得大家尷尬，唯有祝你跑得順風。

下次說話還是留三分餘地好了。

-------------------------------

原來昨晚貓太郎又出動了，可惜我去左跑步，錯過了一場好戲。而且，據聞鄰居終於按捺不住，走到上下兩層的門口刺探敵情，查查到底是那一家養的大花貓這麼好動活潑同熱愛生命。真係可惜，如果我係度，一定會參加是次的探貓活動的。我最愛小動物架喇。

昨晚媽親自報告(像文革時的大姐一樣無聊八掛)：

「喂，阿仔，你知唔知頭先又有人叫呀。」

「咁點呀﹖」

「好大聲呀今次，呀，呀呀，咁呀。」

「媽你唔駛學俾我聽架啵......你冷靜d先啦你」

然後佢開始報告鄰居的調查行動。

我：「車，咁又點啫，你自己又唔係未叫過，你未叫過唔會有我丫斷估」

媽：「哎呀，唔係咁講呀，聽到都唔好丫嘛」

我：「有幾唔好呀，零晨三四點山邊d狗夠係咁叫春啦，唔見你話唔好﹖」(我屋企隔離係坐山，唔知點解原來d山狗係鍾意零晨搞呢味野)

哎，其實我仲想講，隔鄰的哥哥可唔可以將就一下，你去打貓唔難，我唔想我個《隔壁貓叫日記》寫得一期就要收皮呀......

一百萬人的節目

《一百萬人的故事》自播映以來，DLM之聲不絕。

大家冷靜一點。然後細心諗一下，大家係觀看其他無線節目的時候，有冇曾幾何時，又或者時常發出同樣的聲音。有，咁你根本就唔駛勞氣。因為個節目的target customer根本就唔係你。你係中環做OL一個月搵十幾萬去到間大排擋話人地SERVICE唔好，梗係啦，呢D都唔係你應該去嘅地方。

我回憶起同朋友的一席話：

我：「喂，你地電視台成日俾人話節目質素差，點解你地唔諗下辦法嘅咩﹖成間電視台咁多人唔係一個叻人都冇丫嘛」友：「好明顯就唔係做唔到，而係唔想做啦。你要明白，我地嘅TARGET CUSTOMER係嗰班低收入人士，而唔係你呢D大學畢業生，個節目太深，佢地唔明就唔會睇，睇唔明佢地就會轉台，係唔會同你研究點解個故事會咁講，所以要越簡單越好」

所以呢個《一百萬人的故事》，其實係做俾嗰一百萬人睇架咋，咪塔錯CHANNEL。而事實上，我唔係好明點解大家會去睇呢個節目，由一班平時大魚大肉著名牌坐名車的藝人講貧窮，等於叫鍾欣桐講貞操，董建華教經濟，民建聯談普選時間表一樣，毫無說服力，收睇真係浪費時間。

不過電視台點解做個咁嘅節目我大概都估到。之前報紙傳媒寫得太多邊個邊個炒股一日賺左幾十億，結果俾人話佢淨係公報呢D數字，對社會毫無貢獻。而家個市跌到阿媽都唔認得，就乘機出個講貧窮的節目(個市好嗰陣邊個得閒睇呢D野丫，俾我都轉去睇阿陸叔講股啦)，一唻BALANCE一下，二唻等班假道學冇口實，叫做盡下所謂「傳媒良心」，或者時下興講的「企業責任」，改善企業形象，報道弱勢社群的苦況，仲要無限放大，夠哂盡責啦今次。

閣下睇到呢D節目好不滿，但好多福利團體，窮人組織同埋政客就睇得好高興，因為又係佢地乘機出動大鳴大放的時候。如果閣下同佢地一齊睇得咁有共鳴，睇到眼水鼻涕一齊流而又唔係佢地一份子，我建議你馬上加入，人多好辦事丫嘛，毛主席話。

但如果閣下睇完一肚火，恭喜你，証明閣下係一個心智健全的人，而且，你應該係遠離貧窮的人，實在值得慶祝。Be positive，個節目唔係特登做唻激你嘅，係做唻俾窮人自慰嘅，你唔鍾意睇AV，咪轉台囉，唔駛係都要話人地有傷風化的。

做人唔好太明光社先得架。

擇男

曾經跟當社工的同學傾談，她提到現在香港的離婚率問題，她說，香港的離婚率多達六成，而且，有很多是離多過一次婚的。

這絕對是教育制度出了問題。

因為學校只會教你如何正確戀愛，或如何正確對待性愛(即是如何正確拒絕性愛)，即使你己經年滿十八歲。而不會教你正確了解男/女性的心理。這是當然的，因為出版這種性教育刊物的是諸如明光社或突破青年團這種道德團體，編輯都是五十歲以上的處女(或久旱的女性)或者王老五電車男。

例如他們只會在讓女同學看的版面提及「處女」這個名詞，並告訴他們保護好自己的處女膜比保護熊貓更加緊要。除了她們己經假設成年的處女比熊貓更加罕有之外，我找不到更加好的理由解釋她們為甚麼會有這種教育。而更加脫離現實的一件事，是事實上，男同學，絕對比女同學，更加著緊「處女」這回事。

外國人就比較聰明，懂得將virgin寫在飛機上。

女性的心理很複雜，而男性的心理，就非常簡單：男人的腦裏，只有錢，和女人。但根據聖經的記載，錢是在人類犯罪後才出現，而女人，就是在人類犯罪前己經出現，基於「基督是得勝的」的假設，我有理由相信，一個男人喜歡錢，原因還是他們喜歡女人。當然，對於女人來說，為甚麼男人可以將錢和女人connect埋一齊是一件很難明白的事，不要緊，先記著，像閣下去考會考時一樣。

記著了這點，以後就可以避免很多例如「你鍾意我d乜」，「你最鍾意我邊樣優點」呢d無聊的問題。正如你永遠唔會明白點解你男友會因為鍾意左另一個又姣又妖的狐狸精而選擇同你分手一樣，答案也是一個：女人。佢鍾意你唔係因為鍾意你d乜，而係因為你係個女人，佢鍾意另一個女人係因為另一個女人比你更加女人。至於如何令自己更能夠散發女人味，這個女士們應該會比我更加清楚了。

但我肯定，唔會係一塊處女膜。

至於「我同你媽一齊跌落海你會救邊個先」的問題則不妨一問，聰明的男人會事先教好他母親游水，然後事發時會去救濕身的你。如果佢二話不說會去救媽媽，你就應該小心，因為：

1. 佢講大話唔眨眼，唔知仲有幾多野呃緊你

2. 如果係真話，佢應該係有視覺障礙，睇唔到濕身的你同濕身的母親有乜分別。

3. 如果佢冇視覺障礙，佢應該有思想障礙，唔明白濕身的女友比濕身的母親，更令作為男人的佢想緊緊擁抱。

4. 如果也沒有思想障礙，那麼他只是怕他母親事後報復，秋後算帳。這種男人天生裙腳，應該會係結左婚之後夾埋個奶奶一齊虐待親抱的人。

無論那一種可能性，我都唔建議你繼續同佢交往。

祝帶眼識人。

捉奸

潮流興捉奸，奸者，漢奸是也。尤其是當奧運聖火臨近香江之際，作為中國的一份子，為國家著想，為了報效黨的恩情，當然應該時時警惕，留意最近身邊有沒有形跡可疑的反革命。

但當你留意別人是不是形跡可疑的時候，難免自己也會變得形跡可疑，為免捉奸不成卻被當奸辦，報效國家卻被指叛國，有必要做好一些預防措施，當警察，或者紅衞兵上門抄家時(對待反革命的第一步，當然是抄家)，拿不到口實。

掛國旗：

把國旗準備好，碩大的一面放在大廳中心，每天依時升降，重點是旗必須大，杆必須粗，和長。太短，或太幼的話，肯定是會「嚴重傷害了中國人民的感情」的，尤其是男人。做人不要太家樂福，每天升旗請務必升盡，別升到一半就支持不住降了下來，辜負了祖國的恩情。

唱國歌：

作為中國人，必須把國歌唱好。每天六點準時升旗的時候就要唱，而且必須認真，別唱得有氣無力讓外國人聽到以為香港只有東亞病夫。要記住，關著門做好事是沒有人知道的，唱國歌這種頭等好事，當然應該讓鄰居知道，順便可以把那些仍然沉醉於資本主義的美夢的反革命喚醒。而且，當自己做著愛國行為的時候，竟然還有人可以打鼻鼾，簡直是對馬克思主義的侮辱，對於這種不得人心的行為，當然應該予以糾正。

國歌，除了早上唱，還可以在例如車上，路上，橋上，和床上唱。重點是，除了升旗時唱，降旗時也要唱，別升旗時「興烚烚」，降旗時一聲「早抖」就把被子蓋著頭，這同樣是對祖國的一種侮辱。

用國貨：

把那些日本，德國和美國貨全部丟掉！雖然都是made in china，但把China印得跟螞蟻一樣少，但自己的品牌印得雞乸咁大，這不是我國連他們一間公司都比不上嗎﹖社會主義是開放的，是包容的，是像母親一樣慈愛的，而不是閃閃縮縮的，要告訴他們「中國人民不可侮」，所以，丟！

取而代之就是印有我國奧運標記的貨品，例如家中的牆紙，膠紙，廁紙，銀紙等，還有閣下的襪子，鞋子，褲子，袍子，車子，房子，盤子，筷子，爪子，鬍子，妻子，兒子，孫子，通通都要印上，以示對奧運的支持。

還有那個made in china，china必須放到最大，以揚我泱泱大國的好名聲。

傳聖火：

五月二日香港要傳聖火，據說霍先生的兒子霍先生在定名單時有一點點的煩惱。

其實是不用煩惱的，太多人跑只會花多眼亂，毫無重心。所以，只要請我們香港人的最佳代表曾先生------曾憲梓先生一個人跑就可以了。

甚麼﹖你以為應該是曾蔭權﹖你真係太天真太傻了。

重點是要曾先生跑足全程，那麼全港市民，都一定不會有異議的。

路線不可以縮短，當然了，縮短了可不表示我們怕了藏獨嗎﹖以曾先生的愛國之心，這種事當然是不可以允許的，社會主義的好兒女，必須堅持黨的路線，怎麼可以學資本主義的反革命一樣將我國傳揚聖火的路線隨便縮短﹖

當然，速度也不可以慢，因為社會主義是最好的主義，應該堅定不移地持續推行。社會主義的步伐隱定向前，解放人民的速度要快馬加鞭，簡直是一步也不能慢。

大家是不用擔心曾先生的身體的，在共產黨中，「年富力強」指六七十歲，曾先生就正值壯年，那些甚麼李麗珊的運動員，想當年紅軍在八寶山上打國匪，過鴨綠江擋美帝的時候你還沒有出世喇。

所以，大家若準備介時到現場支持，記緊帶備蕃茄，紅油等帶有火紅色彩的物品，夾道歡迎，以示支持。

奧運萬歲。

男親親女親親

友人跟男友吵架，告訴我「他說love his relatives more than me」

其實閣下是大可以放心的。在這個世界上，很少有不專一的男人，幾乎所有男人，都只會愛錢，和女人，當然，如果他有宗教信仰，那麼他還會很愛耶穌基督，阿拉真主或者釋迦牟尼。但你得明白，這兩種，或三種對象，互不干擾，這世界只有極少數男人會因為愛神或者因為愛錢，而不愛女人的。

所以閣下遇到這種情況不用馬上流眼淚的，你應該冷靜，然後開始分析形勢：

他說他愛他的relatives，而又會威脅到你，原因只有：

1. 他的親戚都很有錢，而且會將錢分給他，而分量足夠他用來找另一個女人。
2. 他的親戚中有女人，重點是他們不介意將來近親通婚。
3. 他的親戚中有女教徒，而你男友又是教徒，重點也是他們不介意將來近親通婚。
4. 他的親戚中有教徒，而你男友又是教徒，而且這個教徒會為你男友介紹更多的女人。
5. 他的親戚中有教徒，而你男友又是教徒，而且這個教徒很有錢，會將錢分給他，而分量足夠他用來找另一個女人。

只有一種例外的可能：

你男友係同性戀，那麼你們還沒有開始就己經是一個錯誤。

如果上述的六個情況沒有一個吻合的話，那麼你就放心好了，他那句話不是認真的。至於他為甚麼這樣說﹖你要明白，男人是一種很奇怪的動物，認為在喜歡的人面前說很喜歡她是很沒面子的一件事，而面子卻是天下男人的第一大事。不信的話，你可以嘗試做一個實驗：帶你的男友去星際，然後問他是否很喜歡那些海報上的女優。

他死都會話唔係嘅。

隔壁貓叫

一天出兩篇文實在不是我的習慣，但意想不到，我也有寫《隔壁貓叫日記》的資格的一日，實在不吐不快，因此破例一次，敬請原諒。

由上週日開始，不知那位親愛的鄰舍的家中，就傳來陣陣的叫春聲。

依聲浪推斷，應該是在播放A片。至於是哪一個國家的作品就不得而知了(這是當然，我又唔係專家)。如是者過了四日，今天，娘親一邊看電視一邊奇怪：明明電視播緊處境劇，點解無端端會有人叫﹖(我媽真是純情)這時，隔壁的一位先生終於按捺不住，出聲呼喝：「喂細聲啲呀！」，於是那位鄰舍(為方便起見，吾命其名曰貓太郎者，因為依常理推斷，應該是獨居的男人，如果是女人就太變態了)就掩旗息鼓，我們都得到了耳根的清靜。

個人覺得，一個男人愛睇av唔係問題，但，唔駛話哂俾全層樓知嘅。你唔顧男，都顧下其他女住客丫。你話係你自己做就話冇得隔音啫。睇電影，加個耳筒都得掛。

嗯，會密切留意事態的發展的，為大家隨時匯報。

愛國與賣國

MSN上越來越多人改名叫「我愛中國」了。不過，很明顯香港有很多人依然非常心繫前宗主國(共產黨正其名曰「港英餘孽」)，所以這句愛國口號，跟咱們的奧運主題曲的歌名一樣，都是用洋文來寫的，雖然話係MSN的符號功能，但用一個「L」字母來表示love，不清楚來龍去脈者，絕對會以為是另一個諧音字。這簡直是侮辱了我們的祖國，閣下寫情信說情話，不會用「I L U」，搞這種爛gag的，是不是﹖

但何謂愛國，正所謂花開兩朵各表一支，定義各有不同，例如香港人就經常被批評為「不愛國」，也有人很喜歡給香港支持民主的人士扣帽子，叫他們「賣國賊」。我不知道為甚麼他們會有這種結論。支持西藏自治是否等於「賣國」，姑且不論，因為「中國最廣大的人民」現在是連基本的邏輯都有問題，實在不太適合談論這種艱深的題目。他們搞不清楚，賣國，像捐錢給東華三院一樣，可以很有意義。

賊者，不問自取也。將不是自己的物品未經對方同意而據為己有的意思。但根據「偉大的領袖」毛主席的教導，中國人民己經「當家作主」。既然作主，那麼全中國，包括香港的市民，理論上都係國家的「股東」之一。所以就算真係「賣國」，也是我把我的那份國家的股份賣出去，沒有偷也沒有搶，其實跟閣下將手頭上的中移動中石油股票賣出去一樣，你，不會認為自己是一個賊吧﹖

那跟愛國有甚麼關係﹖讓我仔細解釋一下。

正如閣下開寵物店賣寵物一樣，不代表你不懂得愛惜那些貓貓狗狗的。一個負責任的店主，應該做的，不是馬上把寵物店關門然後將動物拿回家撫養(你也養不了這麼多，養唔掂反而係虐蓄)，而是應該慎重地選擇買家，你認為手上的寵物由鄺美雲小姐撫養，比起跟你一起捱世界要幸福，你把他賣了，同時也是愛的表現。你眼見大陸的雜攤竟然有一隻貨真價實的清乾隆九紋龍御用青花碗被當普通古董破碗竟然賣十元一只，你低價買了回來，高價賣給一個識貨的富豪，你自己賺了，古碗有了與其身份相稱而又識貨的主人，富豪也有了心頭好，結果是三贏。那個白痴小販不帶眼識碗是他自取其辱，蝕了錢是活該。這種交易，每個人都可以做，心安理得，也實在不見得我跟那隻碗有深仇大恨，係咪﹖

既然閣下可以接受「黑社會都有愛國的」，點解唔可以接受賣國者可以愛國﹖至少，有很多「賣國賊」，不嫖不賭不毒，品行端正，相比起很多「不賣國賊」，絕對是一個值得信任的中間人。我國搞「有社會主義特式的市場經濟」都這麼多年了，這麼點買賣的常識都還沒有，還要扣上「不愛國」的反革命罪名，請問，你怎麼樣「和平堀起」呀﹖定係你想話我知，你一向賣慣假野呢﹖

美人外交

政客總是妄想得到最大的權力來控制社會，卻忘記了古訓：「一個成功男人的背後，都有一個女人」。一個聰明的政客背後，也會有一個女人，一個美女的笑容，單舉手投足就可以幫他左右逢源，逢凶化吉。

所以現在法國向金晶道歉這招，根本不會有用。你要明白，假如你要應付的係金晶一個，憑法國總統連名模都娶了過來的手段當然是心到手到毫無難度。但他得罪了的，其實不是這位英勇的火矩手，而係中國最廣大的網民。新義和團中以男性為主，若用同樣的挑情手段對付，中國基佬雖然不少，但應該不是網絡的主流群眾，這招不但不行，恐怕還會越演越烈。

這就是要依靠賢內助的時候了。請Carla Bruni做親善大使，親自到中國一躺，蝕底一下，跟胡主席溫總理握握手示個好，照個相，送個禮。在大陸萬大事要靠朋友，所以去前還要練習一下打麻雀，方便會後跟胡總夫人溫總夫人進行麻雀外交，去打番三十六圈，其間適時「鬆章」，但不能太水免得夫人們失了興致，後宮外交一旦成功，那就世仇都變朋友了。

為表尊重，去中國就唔好仲著Dior，放心，別看現在中國人個個著西裝戴LV，我國傳統服飾有很多都很有style的，例如最經典的旗袍，配合Bruni的高挑身材簡直一流。馬上請法國的名設計師們設計番十七八件，日日不同去見人好似行cat walk咁。別擔心，Bruni乃名模，論衣著品味絕對會好過閣下手下三十年經驗的外交官。而且系出名門素有教養，斯文淡定談吐有禮，絕不會有辱國體的。

不用擔心「俾人望蝕哂」。中國受兩千年儒家思想荼毒，一般男人早就養成了一個壞習慣：在女人背後可以望得雙眼發直，但當站在美女的前面，我擔保，義和團裏冇人會可以同佢對望超過三秒鐘，然後就會眼神閃爍，甚至垂下了頭望地板。

由女人對付男人，自古有之。《六韜．文伐》云：「養其亂臣以迷之，進美女淫聲以惑之。」。別擔心，淫聲，不是指床上的叫聲，指謅言也。對，就是這樣，用美貌將眼前這幫暴民迷得暈頭轉向的時候，就算告訴他月亮是方的，太陽是三角形的，他們也會點頭稱是的。

對佢地唻講，比起Sarkozy親自到訪，Bruni大駕光臨，會令中國人民覺得自己更有面子。對付中國人，只要解決了面子，和命根子的問題，還有解決不了的事情嗎﹖

跟小弟弟的感情

傳個奧運火矩，紅了一個金晶。她父母還真沒有改壞了名，這不，一雙眼睛水汪汪的，瓜子口面，活脫脫是一個美人胚子。坐著輪椅，不要緊的，依舊溫婉柔麗，隔個海岸東瀛那邊，一個坐著輪椅的女孩，木村拓哉也為之傾心。當然，重點係你要足夠靚。

可惜天高海深，世事難料。這位運動員說錯了話，套句老話，叫「傷害了中國人民的感情」，於是一夜間，她由「女神」，就變成了「賤人」。不知由何時開始，中國人民的感情，就特別容易受到傷害，而那些粗言穢語，幾可斷定乃由網絡上的男人說出，那就更令人奇怪。

對女性我比較包容，女人被男人飛了，感情受到傷害，約深閨密友傾訴心事，或借在下的肩膀靠靠抹抹眼淚(當然前題係你要夠靚)，我完全可以接受。但中國大男人(即所有男性)自古以堅強是美德，持久為表率，有萬大的苦難加諸身上而不動聲色，除了那至親的小弟弟受到傷害之外，根本不會大呼小叫，有辱國體。金庸小說中，這種一巴掌也捱不住，踢兩腳就求饒的人，多數是貪生怕死的小人奸角。但原來今天我們偉大的祖國母親中，「小人坦蕩蕩，君子長戚戚」，小人於網路坦蕩蕩地漫罵，君子長戚戚以避開無日無之的口水飛沫。

還是其實那句「家樂福中都是中國員工」真的是命中了要害，金小姐火矩一掃，就中了萬萬千千憤青們的小弟弟，搞得憤青們每晚跟女友上床時只要想起這句說話就無力舉起，從此絕了子孫﹖但嚴格來說，配合國家的一孩政策，這倒是好事。所以在網絡上抗議金晶，就是質疑國家制定的一孩政策，成為全中國人民的公同敵人，學那個姓胡名佳的做一個反動反革命，是不是﹖

而且，就算真係痛，男人們都唔應該係叫「傷害了中國人民的感情」，應該改為金晶這賤人「傷害了中國人民的小弟弟」，或者如果硬要加上感情元素，可以稱為「傷害了中國人民和他小弟弟之間的感情」：「佢以前一叫就應丫嘛，而家，叫極佢都唔理我呀！嗚~~~」

中國網民的躁動，像深宮中的公公躲在牆角的痛哭聲，越洋萬里，聽得世界都毛骨悚然。

法國大革命

當年紅衞兵沖擊中國傳統文化，史稱「文化大革命」，今日，中國的新一代革命小將們將矛頭改為指向法國佬，可以稱為「法國大革命」。証明四十年o來，中國人一d都冇進步過。

這個命名，跟第一次世界大戰時期德軍將用來轟炸法國的大炮稱為「巴黎大炮」一樣，充滿了活地亞倫式的黑色幽默。九十個年頭過去，古今如一，擁有著坎坷的命運，法國，是一個悲情的民族。

對於這種民族主義抬頭的現象，希特拉這樣解釋：「鼓吹民族主義的功效，其實是分散人民的注意力，使之對準一個共同敵人。」(The effectiveness of the truly national leader consists in preventing his people from dividing their attention, and keeping it fixed on a common enemy)

西藏的情形我不了解，但起碼知道一件事：中國人，連外省人都排斥，更不論對西藏人，新疆人，蒙古人和台灣人。我當你共產黨真係好優惠藏族，等於一個大家族裏面，個老豆係好錫你，但佢d仔，你d阿哥，不停排斥你，我叫你當呢個係你既「家」，你就每日明明係少爺但被迫過著妹仔的生活，俾人暗中mid到手臂又瘀又黑聲都冇得聲，幾十年。你條氣順唔順﹖

自己的問題自己唔解決，走去搵法國佬，喂，好彩家樂福老闆係法國佬o者，萬一係中國人開的法資企業，條友俾人捉左去跪玻璃啦。所以法國總統Nicolas Sarkozy唔出席開幕禮，明智呀，喂，你出席，你老婆都應該會一齊丫。拿，你法國支持自由和平的示威丫嘛，憤青們就示威遊行，到時唔搞法國國旗或者你張相，就淨係拎你老婆o個張陳年裸照出o來，都唔燒呀，就咁繞場一百個圈然後對張相再做d猥褻的行為直至開幕禮完結為止。

真係仲慘情過阿嬌呀。無辜o個下唔抵丫嘛。

P.S. 朋友找來圖片一張：

大雨隨筆

大雨滂沱，久違了的黑雨又再出現，可惜時機不對，不是昨天八點之前。

在家百無了賴，無所事事，書唔想溫之下，又繼續諗下份startup。寫d畫d，把一張a4紙寫了個滿，然後越寫越動搖，越動搖越寫，越諗越多，先至發覺，連生意都未開始就唔識專心，証明Bill生做左首富廿幾年都仲可以專心賣windows係幾咁有毅力的一件事。

公司岩岩續多我半年contract，但條件苛刻，十個老友九個話離哂譜，我發覺自己而家的處境，有d似rich dad poor dad個作者九歲時既處境，分別係佢老板因為教佢而刻薄佢，我個agent因為刻薄我而刻薄我。

今日msn越o來越多人將china加落自己個名度，對我o來講冇可能，因為made in china仍然係全球次貨的代名詞，在下係正貨一件，冇理由自貶身價。所以你問奧運同政治有冇關係，其實希特拉早就話左你知個答案。不過希特拉好聰明，識得搞形象，手腕一流，畢竟希特拉同史太林雖然都係屠夫，但唔能夠簡單咁劃上等號。

繼續寫proposal中。

自殺權

大概有人認為我上篇講得太刻薄，有網友問，如果我有朋友自殺，我會點做。

與其問「我會點做」，不如問「我可以點做」﹖拉，我拉你唔住。勸，我又唔係心理專家。你唔好以為咁易靠把口就可以勸掂一個想死既人。勸唔住都算，最怕係原本你老友只係唔開心，俾你勸勸下就變左想死，咁你就涉嫌教唆他人自殺。我絕對懷疑今次係咁既case，你要勸企左係騎樓的朋友落番o來，警方有專門的心理專家負責，如果你以為真係講下家事時事天下事就可以令佢浪子回頭，我可以肯定，你，睇得太多香港的婆媽劇集喇。

我，涼薄，近乎冷血，俾女飛可以眼淚都唔流一滴直情好似失戀o個個唔係我自己咁，你問我有朋友想自殺我會點﹖

第一，係o個個situation，你朋友係唔會俾你明白點解佢想死架，個對話會係咁樣：
我：「你點解會咁諗架﹖」
佢：「你都唔明」
我：「咁你有乜野唔開心講o來聽下丫」
佢：「講左都係咁架啦」
我：「咁你唔講我點幫你呢」
佢：「我都冇叫你幫我」

對付佢，你唯有一去到就知佢心裡面諗緊乜想要乜，同埋你點樣俾到佢想要既野。所以為錢自殺都仲有計，為情自殺的人，你點勸得住呢﹖即係我有Socrates的口材我會勸囉，咁我冇，這種對我來說，是「挾泰山以超北海」的行為，冇計啦。

第二，如果我朋友想死，作為一個朋友，我會好尊重佢的決定。呢個關乎價值觀的問題。對我o來講，有權利先至有義務，咁冇選擇生存的權利，就冇繼續生存的義務，主耶穌基督管我唔著。唔好話我知生命係好寶貴。即係等如你煮隻三頭網鮑俾我食，但我食完一啖我唔想食喇，呢個時候你話我知隻鮑魚好貴架，唔好浪費呀。喂，我話知你隻鮑魚值幾十萬丫，個問題係我而家食緊呢一隻，好似屎咁難食，係咪因為一個貴字就要我食哂佢丫﹖唔係我落order架嘛。所以，我覺得大家都應該尊重別人想自殺的權利(此所以我係十分支持斌仔的)。

第三，係，死唔可以解決問題，但係，喂，冇人話過要解決問題呀，我只係唔想再面對個問題，對我o來講，我唔駛面對的問題，就唔係問題啦，係咪﹖你個朋友，生前痛苦，死後解脫，生不逢時，死得其所，又唔係要你呢個老友郁手，咪成全佢囉。

所以邊個想自殺又唔想自殺的人(即係自己想自殺然後唱通街搵朋友安慰o個種)，記得唔好搵我，因為，搵完我，你死梗。

是有點涼薄

報紙頭條，有人跳樓，朋友勸服不果，想拉住，結果一齊去了見耶穌基督。

如果大家不明白一個企圖自殺者的心情，不妨多讀斌仔的著作，下次遇著這種事，就不會再做冤大頭，上頭條。我唔知有幾多人覺得佢大好人材，咁樣死好可惜，at least我唔會咁覺得。

當然，閣下想勸服朋友唔好自殺，我贊成。但佢都一隻腳跨左出欄杆，踏左入鬼門關，你仲想拉住佢，就係同閻羅王作對，憑一人之力同一眾牛鬼蛇神扯大纜，我只可以話你好有勇氣，但無謀，死左，難聽d講句，唔抵可憐。

若果閣下遇到呢種情況，但又想勸朋友，切忌以下幾句，基於人類自有意識以來，就有搵藉口既本能，所以其實講乜都冇用，以下是例子：

1. 「要愛惜生命」

呢個世界冇人唔愛惜生命，但我愛惜生命，生命唔愛惜我。喂，我話我好愛陳法拉，但陳法拉唔愛我，冇結果架。你唔好再同佢慢慢elaborate「其實生命都好愛惜你」呢個命題，聽唔入耳架。

2. 「生命誠可貴」

生命唔止誠可貴，係好L貴，今時今日水貴油貴柴貴米貴，對唔住，我買唔起喇。阿媽係女人的道理唔駛你講，三歲細路識得up的slogan唔駛你唱。通脹壓力之下，乜都貴哂，我就係冇聽過人命有貴到。我淨係聽過女人一過三十歲就只會不停咁depreciate，而男人的value就不分年齡，隨住自己身家的波動而波動，即係耶穌基督又唔整隻輪出o來等我玩下引伸波幅，咁成世人咪俾人夾囉。

3. 「你身邊仲有好多人好愛你呀」

呢句野，通常d人自以為對為情企圖自殺者好o岩用。你諗下，係呀，全世界人都愛我呀，但就係我最愛o個個唔愛我丫嘛，我唔想佢理我o個班就係咁話愛我丫嘛。我去生果店買蘋果，你話冇哂喇，不如買十個橙丫。喂，唔同架。(唔好話鑽牛角尖，唔鑽牛角尖的人都唔會為情自殺丫)

4. 「希望在明天呀」

唉，我當你廿歲人，大大話話都叫見過三次股災啦，仲唔學識乜野叫止蝕﹖你話你係投資唔係投機﹖「一命二運三風水，四積陰德五讀書」，你話喇，人生係投資定投機先﹖

仲有千千萬萬不能盡錄，所以呢，你老友想自殺，一係，就你好professional in呢樣野(professional，唔係religiously professional，明啦)，百發百中一定勸得住，如果唔係，都係慳番啖氣啦，真係有心既，白事幫佢做好d，帛金同佢做多d，顧下義氣就係喇。咁樣一命賠一命，學百佳咁買六包紙盒裝維他奶送多六包，喂，生命誠可貴，自己條命就特別矜貴丫嘛，你自己又唔係想自殺，明架﹖

把聖火吹熄

在巴黎的傳遞奧運聖火活動，遇到百般阻撓，中國派出專人夾道護送，示威的人士卻喊打喊殺，矢志要把聖火弄滅。許多人不明白，奧運啊，是全世界的盛事嘛，把奧運辦好，大家臉上都沾光，搞甚麼偏偏要中國蒙羞呢﹖

對於這個問題，那個根正苗紅的北京奧組委新聞宣傳部部長是這樣回答：「奧林匹克聖火屬于全世界人民，極少數人公然挑釁奧林匹克精神的行徑是不得人心的，必將激起愛好和平、擁護奧林匹克宗旨的人們的強烈憤慨，是注定要失敗的。」

所謂「奧林匹克宗旨」，到底是甚麼呢﹖By definition，有四點：團結、和平、友誼和進步。可是現在我們偉大的祖國受四大獨瘤(台獨，藏獨，疆獨，蒙獨)困擾，非常的不團結。暴力事件不斷，也非常不和平。跟世界的友好關係也不過源於中國國力的上升，這種有事鍾無艷的朋友，有常識的人都不會認為那是一段真誠的友誼(事實上在政治上談友誼只是閣下自己笨七)。至於進步，那就見人見智啦，跟小平同志所說的一樣：「讓小部分人先富起來」，小部分人的錢包是進步了不少，可「中國最廣大人民的利益」卻沒有進步，文盲程度沒有進步，言論自由沒有進步，民主發展也沒有進步。

讓這種完全沒有奧林匹克精神的國家舉辦奧運，根據王同志所講，就是完完全全「公然挑釁奧林匹克精神的行徑」，是「不得人心的，必將激起愛好和平、擁護奧林匹克宗旨的人們的強烈憤慨，是注定要失敗的。」。既然閣下注定失敗，那麼那些愛好和平，反對閣下辦奧運的憤慨之士當然是注定成功的了。如漢高祖斬白蛇起義受蒼天庇佑，現在則獲奧林匹克山上的雅典娜女神祝福，他們哪還有不發狂的道理﹖

魔鬼撒旦忽然手執聖經站在十字架下跟大家講解基督耶穌的真理，閣下不會認為他是忽然改過自新的，作為一個虔誠的基督教徒，當然應該二話不說，拔出手槍，呯的一聲，將他手上的聖經和十架打飛，免得他褻瀆了上帝的話語。正所謂「寧可失去百體中的一體，也不能够叫全身下地獄。」寧可玩少一屆奧運會，也不可以令整個奧運精神受侮辱。不要忘記，咱們偉大的毛主席當年說要「打倒一切牛鬼蛇神」的時候，好像也沒有漏掉那個雅典娜，那麼，你憑甚麼要我相信你現在已經改過自新呢﹖

所以，任何一個真正支持奥運精神的人，都應該站出來，「捨得一身剮，敢把奧運火炬手拉下馬」。把聖火吹熄，還全人類，還有那力量與智慧最完美的結合，一點點的尊嚴。

勇者鬥惡龍

全天下的女士，由青春少女到深閨怨婦，都一定曾幾何時做過以下的白日夢：

自己是一個美貌與智慧並重的公主，可惜被囚在一座古老的城堡之中，孤芳自賞，在城堡最高的那座城塔中無所事事(當然，這夢若由男士來做的話，公主絕不可能完好無缺還有這種閒情日致的)，日日泡茶種花，set頭梳髮，穿一襲薄衣依在窗前，輕托香腮，眺望著遠方，一副心事重重的模樣。然後天可憐見，有一日終於出現一個金髮銀瞳，胯下騎一隻純白色獨角俊馬的俊朗王子神劍一揮，把守在堡前的惡龍大卸八块，把自己救出了古堡，從此兩個開始了幸福美滿的婚姻生活。

所以嘛，那時候徐子淇的甚麼童話式婚姻根本就不入流。今時今日，若我是女孩子，要羨慕也不會選她，而會選擇Isabella。

當全世界的大古堡幾乎全部被改成了博物館，恐龍又絕種了幾千萬年的今日，李家二公子硬是有本事像好萊塢的電影製作商一樣，把一片只會在童話中出現的場景從現於各位觀眾的眼前。先天缺憾，俊是不俊啦，但學學亞瑟王倒還可以，拖一把石中劍，帶著八位圓桌武士(由座下專業律師們友情客串)一起宰掉那條姓楊的淫龍，真人版「見龍卸甲」，倒還是威風凜凜，羨煞旁人。

香港人看白雪公主是看得多做得多(即永遠跟外母乸作對，還有在女孩睡得剷也剷不醒的時候才敢偷偷吻著，女孩醒來卻只會雞手鴨腳者)，但勇者鬥惡龍的戲碼，香港地有痴心的男人旺角一個招牌跌下來可以壓死一大片，會妄想的港女更如恆河之沙多不勝數，就是那一條入型入格的惡龍難求。當然還有那一身屠龍的絕技，萬一本事不濟，由屠龍者變成被龍屠者，格林童話變成哈姆雷特，豈不令塔上那望穿了秋水的小羊羔淚濕頸下一片雪白的胸襟。

學賭馬 睇AV 長見識

小時候，我看的是小鹿斑比和神犬拉西，時移世易，今時今日的小朋友，原來喜歡看精英大師和爪黃凌雨。

香港的道德團體倡議禁止馬主帶子女入馬場觀戰，又是老掉牙的理由，認為會「助長賭風」。

他們到底是不知道，還是扮不知道，總之，從沒有人提過，香港，是日間時段毫無禁制地免費直播賽馬的。簡單來說，就是這些道德團體(嗱，我今次真係無意針對基督徒，但有咁o岩得咁嘺，經濟日報寫出o來反對的團體，分別係「監察賭風聯盟」，「工業福音團契」同大名鼎鼎的「明光社」)，係認為直播賽馬不會助長賭風，相反入場睇馬就會。

無論點睇，我都只會覺得，經由電視直播賽馬，影響力點都大過去馬場睇馬丫。等如你准個小朋友個個weekend睇AV，但當個小朋友話想去夜總會現場睇脫衣舞的時候，你個大人就對個小朋友講：「OH NO！小明你仲細個呀，入場睇，會助長歪風呀，夠十八歲爸爸再帶你去啦」。即係咁我係咪有足夠理由相信，你，係弱智既呢﹖

正如曹仁超所講，買樓唔係講location, location, location，而係neighborhood, neighborhood, neighborhood。睇馬亦然。那些馬主子女入去的，都是馬會的專用俱樂部，身邊都是些大有錢佬，個個口叼一支古巴雪茄一副氣定神閒樣，剛剛擲了三百球買重的那隻獨贏跑了個第二，還可以笑咪咪的如坐雲端，正是「泰山崩於前而色不變」也，這種心境，就算幾萬元一個月學費的名牌國際學校，要教也無能為力。一層玻璃，隔了天涯，那些子女就算在上面看多十年馬，也一定不會跟場下的那幫愛國大叔一樣，一邊賭馬一邊叉高一雙二郎腿，左手高舉馬經，右手尾指挖著鼻屎，輸o個廿蚊馬就會換成中指，然後大喝一聲「x你老母呀」。

「居移氣，養移體」。小朋友長大後擁有這種「賭馬輸鑊甘亦貌如常」的心理質素，以後買股賣樓就有保証，股市一日上落千點，不會像那些日日淨係識得打電話問彭偉新郭思治藺常念又或者四叔五叔六叔的炒股師奶們一樣，俾人夾完好倉夾淡倉，體無完膚，然後一把鼻涕一把眼淚係電台度喊：「阿郭生呀，我十九蚊買左隻中石油幾時番家鄉呀，嗚~~~~~~」

The two possibilities

報載，全球回教徒人數首次超越了天主教徒，達十三億。

理所當然，主耶穌基督的忠實徒弟們又是一陣恐慌，驚怕魔鬼的勢力是日益強大，撒旦出世，拉登降臨。咱們身為天主的堅定不移的門徒嘛，要馬上加十二分努力去好好傳教，以免更多世人落入魔鬼的蠱惑之中。果然，梵蒂岡馬上就按捺不住，Monsignor Vittorio Formenti馬上出來解畫：It is true that while Muslim families, as is well known, continue to make a lot of children, Christian ones on the contrary tend to have fewer and fewer.

這位梵帝崗的年報編輯如果不是突然腦中風引致間歇口部發up風而自把自為大放厥詞，At the very least，就等於他們肯定了Richard Dawkins的近作The God Delusion的preface的一句。Dr Dawkins說："If you are religious at all it is overwhelmingly probable that your religion is that of your parents."(p.25, line 11-12)，詳細請看該書charter 9，恕不詳述。

所以只有兩個可能，一是Richard Dawkins的說話絕對正確，各位基督徒以後不用再浪費心血去傳揚福音普渡眾生。以後各位基督徒最最緊要跟從的，不是耶穌基督，而是鼓吹共產主義無神論的毛澤東毛主席，反正閣下「放開肚皮生」就是了。那些甚麼計劃生育人口政策，簡直是魔鬼的陰謀，撒旦的利爪，不斷壓榨剝削著基督徒階級全身充滿了信仰因子的寶貴血液，瓦解細胞內的對主耶穌充滿景仰之情的純種基因。凡我基督徒們必須堅定不移抗爭到底，直至撒旦的毒計倒下為止。

二是那些世界天主教中心的核心成員，凡事信靠主耶穌基督，學識淵博飽讀詩書，被視為對聖經教義有最深刻理解的忠實信徒們，原來只是一窩遇事推三推四，只會推行駝鳥政策的人物。當整個宗教的核心成員的核心價值原來只有這種程度。我想請問一句，這是怎麼的一個宗教呢﹖你，叫人點信你呢﹖

這兩個可能性，請問，Which is it?

西藏的暴力活動搞到今時今日我是有點意外，原本以為很快沒事的。


一邊共產黨指達賴喇嘛煽動，一邊達賴喇嘛又說自己一直主張和平。你問我信邊個，我當然是信達賴喇嘛，因為我好像從沒聽過他說謊，但共產黨嘛，老實講，係誠信這個層面上，我一直將他和李登輝看齊。


身為一個香港人，當看到中國四大毒瘤：台獨，藏獨，疆獨，蒙獨，齊齊發作，應該抱甚麼態度﹖當然是希望越亂越好，越演越烈越好。所謂鷸蚌相爭，漁人得利，中國一方面要對付四大勢力，自然沒有時間跟一塊小小的香港彈丸之地斤斤計較，到時我們偉大的民主派們再下猛一點的藥，用少少的暴力，輕輕的用文火烤烘一下特首辦，熱得要曾蔭權從太師椅上跳彈起來但又不至於將他燒焦，要他焦頭爛額走上北京求救，到時要普選就有普選，要cepa有cepa，要直通車有直通車啦。


即係我唔明，連喜瑪拉雅山邊的那個叫做不丹的小國都可以搞普選，咁點解香港仲會係因為「條件未成熟」所以冇呢﹖計落不丹好過香港既，就係人地國王係英國牛津大學畢業，咁你胡錦濤唔係囉。同埋，即係咁講，你共產黨建國的時候毛澤東個大腦夠未發育成熟啦，我唔見你話「哎呀，咁唔好立國住喇，等我腦筍關埋先啦」。


冇藉口啦大佬，仲要等到2017，我怕連古巴都有普選喇。

生意二談

尋日一行五人去食天下壽司，有感而發。

很多人話做生意最緊要口碑好，自然有人會幫襯。呢間天下壽司，openrice的評語都幾好，去食，我個人覺得係中上，即係起碼好過死人板前。但，重點係，間舖係冇人幫襯的(假期lunch得三枱客...)。証明做生意呢樣野呢，除左質素好，仲要識得搞下噱頭，尤其間舖門口咁僻，擺明唔係行過肚餓會行入去的位置，就更加要係宣傳上下功夫。

再加上見我阿叔係黃大仙開間食肆生意鬼死咁難做，我就覺得，做生意，舖租係唔可以慳既。

話時話，間野算唔錯，除左手卷的紫菜成日整濕之外。

席間有朋友表示想搞網上時裝店。idea唔錯，但有以下問題：

1. 個客揀衫的時候點知著出o來的效果。

2. 貨源。

我既諗法：

1. 最理想你可以寫個system出o來俾人網上試衫，不過咁高技術唔太適合startup。不妨搵個有身材的朋友或者直情請model幫你著衫影相做sample俾人揀，係比較可行的方法(呃到人架都)，列明用料cutting尺寸即可。長遠寫番個試衫sys都有好處，起碼有噱頭，同埋都算實用，再加上你科3d grahpics唔駛白讀。

2. 呢個就唔係問題啦，鴨寮街十蚊三件衫都有人買，你買番o來d辦唔爛得過呢d，就點都有人買既，差在你想做幾好既o者。不過與其自己搵衫賣，不如同d小品牌傾掂數自己淨做中間人收佣仲好啦。

做到既話，都有一定的barrier，我幾buy啵老實講。

難兄難弟

台灣終於選完了總統。

一路我很少提及這個選舉，也不敢預測到底誰會勝選的問題。因為我實在是拿握不準台灣人選總統的準則。

現在塵埃落定，令我最感興趣的人物，不是勝選的馬英九，也不是落選的謝長廷，而是陳水扁和連戰這對難兄難弟。這兩位仁兄，心情現在肯定比謝長廷還複雜。

先說陳水扁。馬英九可以以二百多萬票勝出，這位全台灣最有影響力的國民黨助選員(你冇睇錯我冇打錯，係國民黨)實在是功不可沒。做八年總統，聲名信譽江河日下，絕對比得上阿美利加的殊仔總統。連到最後關頭還要說「不交權力給綠卡持有人」這種有失大體的說話，閣下到底是不是已倒戈到國民黨了﹖

也不是沒有可能，大家心知肚明，國民黨再怎樣說不一黨獨大，追究陳水扁貪污案肯定是不遺餘力的。一來國民黨大可以說關乎大眾利益，二來陳水扁權力已盡失，此時不做牆頭草，依靠權力，更待何時﹖當然，馬英九是否接受是另一回事了。

再說連戰，此君選了兩屆，輸了兩屆。第一屆，三個候選人之中以他最沒有聲勢，輸了是無可厚非。第二屆跟宋楚瑜拍擋食輸二萬票，他今時今日肯定心想，如果當日不是伙拍宋楚瑜，而是拍馬英九，大概今日就是自己去競選連任了。第一次輸是信錯了李登輝，第二次是信錯宋楚瑜，自己的政治生涯，就因為信錯了兩個人所以就此完結，豈不令人唏噓﹖我係佢，今晚會悔恨到嵌頭埋牆。

還有，我很期待李登輝這條老狐狸接下來會說甚麼話。整個台灣最有政治智慧的人，就是他了。

笑貧不笑娼

我是一個尖酸刻薄的人：我會很公式化地鄙視有工作能力而又領綜緩的人；總是用一大堆言之無物的專有名詞寫文章，擺明特登唬你，正式來說是欺世盜名的所謂作家；一邊話自己爭取緊民主一邊係背後搵著數的低能政客；還有那些自己影埋幾百張鹹相，俾人偷影到換衫就喊到眼都腫埋的白痴藝人；打著任何神佛的名號四處招搖撞騙的人就更加不在話下。

但我從來不會歧視娼妓。因為嚴格來說，娼妓這個行業只是需求與供給的結果，資本主義社會下的一種產物，只是這種產物如果不小心處理，會比較容易傳染疾病。至於甚麼道德倫理，其實是不用太放在心上的。倪匡說得好，比起「淫」，「謊」是更加可恥的行為。這個世界說謊的人肯定比當娼的人多，所以那位殺了四個妓女的人，我覺得，閣下要發洩心中怨氣，其實有一大堆人合付資格，給你慢慢折磨，實在沒有必要將火燒到妓女的頭上。

我從小就很明白女人做妓女的人的心態，都只是為了一個錢字。一個錢字，有人覺得市儈庸俗，我覺得因為一個錢字而做事，只要唔會同時直接及蓄意地(即係deliberately, 英文比較簡單......)傷害他人的利益，其實是最高尚不過：因為你己經懂得，甚麼叫忠於自己。懂得承認自己愛錢的人，起碼不會自欺欺人。簡單來說，我會認為你係比較信得過。做妓女有人為富裕的生活，有人為追逐名牌，慘一點的為養家等等，其實亦只是人生的一種追求，一種需要，就個人而言，跟你靠老豆，家住比華利山日日行街要帶幾十萬LV哂行頭其實係冇乜分別，兩者只係客觀環境的不同。

至起碼，閣下去嫖娼，正所謂「真金白肉」，一手交錢一手交歡，肉帛相見童叟無欺，她是不會將你蒙住雙眼之後改用一個吹氣公仔來應付你的。有付出有收穫，非常公道。

歡場盡是義氣雞丫嘛，係咪咁講。

獨立思考

今天中學班聚，才發現原來很多朋友認為我是一個反基督教的人，大家是誤會了，其實我一向很尊重宗教自由。但尊重宗教自由，不代表要對這些宗教事事容忍。我覺得你話我蠢，不是問題，但若果閣下經常因為我的說話係oppose to一個比我蠢的人的說話而因此認為我係一個比佢更蠢的人的話，就關乎尊嚴的問題。就等於當年樓市低潮，任志剛果斷購入國金頂部數層作辦公室的時候被劉慧卿等垃圾議員指佢「亂駛錢」的情形一樣(即係人地國金而家升到一百蚊尺)，正所謂士可殺不可辱，作為一個男人，是絕對沒有容忍的道理。


美國民主黨總統候選人之一Barack Obama番左二十年的那間教會的牧師Jeremiah Wright經常語出驚人，詳情可看這裡：


http://appledaily.atnext.com/template/apple/art_main.cfm?iss_id=20080315&sec_id=15335&subsec_id=15339&art_id=10867896http://www.youtube.com/watch?v=ZHATK4OjnyIhttp://abcnews.go.com/Blotter/story?id=4443788&page=1


看完之後，各位經常認為「牧師的說話都是對的」的人，不妨嘗試回答一個問題：如果"Hillary ain't never been called a Nigger!"係用以質疑Hillary對黑人社會的理解不足的有力理由，咁，如果閣下從來未食過屎，你點知屎難食﹖既然閣下唔知屎好唔好食，咁當有人好誠懇咁宴請閣下食屎的時候，你其實係冇乜理由拒絕這位朋友的好意的，反正自古成功在嘗試，說不定閣下由此開闢出另一片美食的天空，造福人群功德無量。


還有，如果因為Hillary是白人而對黑人社會理解不足，那麼大家也很有理由相信Obama對白人和女人的理解並不足夠，而McCain對黑人和女人的理解也不足夠。那麼選美國總統其實是很兒戲的事嘛，簡簡單單，男性白人都選McCain，男性黑人可以選Obama，女性白人選Hillary，比比人頭誰最多誰就贏啦，閣下的愛徒Obama也不用四出演說，告訴大家I have a dream，世界是多麼美好。至於黑人女性﹖啊，對不起，恐怕大家要自己推舉一個候選人出來了。


當然，這也不等於說牧師的說話都是錯的，所以重點係，請閣下下一次，唔好再用某某傳道人「唔係咁講」這種有理由等於冇理由的理由o來質疑我的說話的準確性。閣下是受過高等教育的人，應該有所謂「獨立思考」，既然有，就請多多運用，我係會給予適當的尊重的(當然何謂適當又係一個好controversial的topic)。


Obama不是蠢材，他是美國史上其中一個口材最了得的政治家，當然跟很多基督徒不能相提並論，他稱Wright"is like an old uncle who says things I don't always agree with"。這是一句很精警的說話，因為don't always，可以係usually，often，sometimes，seldom，rarely甚至never，進可攻退可守，而不會一句實話說死為" I don't agree with"，繼續維持與宗教勢力的關係。你得明白，美國人對宗教這回事非常著緊，你臨到選舉先話同間你番左廿年的教會劃清界線，隨時會令你翻艇。這就是為什麼他年紀輕輕可以選總統，而閣下唔得的理由。


即係各位基督徒朋友，我唔係唔尊重你地呀，但我覺得，被一個聰明人誤導，並不可恥；而被一隻豬誤導，萬一不幸被人傳揚開去，有損家聲呀。

留下買命財

人類從歷史中汲取到唯一的教訓，就是人類永遠不能從歷史中得到任何教訓。

董朝禍政，當年政府搞強積金，七年過去，平均回報仍然慘不忍睹，比買匯豐更不如，幾個月前更被傳媒大數強積金的弊端，是好是壞早有公論。可惜我們偉大的特區政府飽暖又思淫慾，要搞醫療融資。

好聽叫醫療融資，難聽一點，正名應該「強醫金」。強醫金和強積金的共通點，在於一個「強」字，強迫之意。強積金，顧名思義，是強迫閣下存錢的意思。那麼「強醫金」，就是強迫閣下存醫病的錢的意思。但由於香港人的用錢哲學，係俾左出去的錢，最緊要收番同等或更多的著數。所以，強醫金，對香港人來說，就是強迫你醫病的意思。

咁你就會明白這個收費無聊的地方。這種政策傾斜像強積金一樣，只會養肥那些強積金公司，這次就是養肥做醫療保險的公司同埋醫生。以前你睇醫生係因為你有病，以後你睇醫生，就係因為政府搵支槍指住你個頭要你去睇。「你唔想睇﹖唔緊要呀，留低銀包你咪走得囉！」我想講，呢個世界，係真係有好多人身體好健康，好似家母咁十年都唔病一次，日日精神奕奕，根本不需要醫療保險。問題係就算自己買醫療保險，都會因應各個人唔同病歷收費有所不同，而政府就劃一收費，即係我身體好健康，我一個月交二百幾蚊其實應該可以保好多野，但而家你交的兩舊水同一個長期病患的保障範圍係一樣的。就算條款唔一樣都有問題，一個長期病患交二百蚊可以保基本醫療需求，咁一個健健康康的人呢，就要包埋d奇難雜症，伊波拉病毒，愛滋病等等，又或者同一項病賠償會高些，但其實佢幾年都唔會發一次燒，簡單來說，就係倒錢落鹹水海。還有，原本冇能力負擔醫療開支的人同樣冇能力供強醫金，有能力負擔的人早就有公司買齊醫療保險唔會幫襯公家。咁樣供一個基金可以減輕「長遠政府醫療開支」，係可以，但你其實只係將財富由有錢的人轉移落去窮人身上，同抽稅冇分別。

咁多此一舉的政策，到底係邊條牟利提出的﹖

還有，那種減輕開支的理由，亦是很低能的狡辯。因為同一個理由，香港市民除了醫療開支，還可以收管理交通開支，收「強交金」；警隊維持治安開支，收「強警金」；消防開支，要收「強消金」；急症室救護車開支，開「強護金」；人生漫漫長路總有被人打劫的可能，為保險起見，要收「強盜金」；世風日下，女孩子生得花容月貌還有可能被非禮強姦，最好也買個保險，收「強姦金」；以後住屋開支，要收「強住金」；衣著開支，要收「強衣金」；平時上下班坐車塔船，要收「強載金」；生仔開支，要收「強生金」；生完仔要供書教學，收「強學金」；小朋友長大成人，買花氹女，要收「強花金」；買法拉利載女，要收「強車金」；要買股票對抗美滙下跌，收「強股金」；或者買外匯，要收「強匯金」；外遊開支，要收「強遊金」；買東江水費用昂貴，因此食水開支，要收「強水金」；豬肉長升長有，越食越貴，所以要收「強豬金」；還有粟米一年升三成，要收「強粟金」；大豆小麥更勁升八城，要收「強豆金」和「強麥金」；期油就快升破一百一十美元大關，收「強油金」；黃金也到一千關口，收「強黃金」；堆填區越來越唔夠用，建焚化爐，要收「強燒金」；空氣污染，政府要搞環保，多多種樹，收「強樹金」；香港就快冇冬天，為了冬天重臨，要收「強冬金」；一大堆基建項目等著拍板上馬，要收「強建金」；人終有一死，要收「強葬金」；閣下還有可能破產失業，他日要領綜緩度日，所以最緊要收「強緩金」。

開此先例，以後乜你都可以另外收，請問，我交的稅去哂邊﹖

古代的綠林好漢有五言絕句一首曰：「此路是我開，此樹是我栽，想要由此過，留下買路財！」。政府每次出報告都要寫幾隻字做封面，今次不妨用這句：

「醫院是我開，有病係好哀，唔交強醫金﹖準備買棺材！」

包保大家一目了然。

Closet

繼陳冠希之後，咱們歷史悠久的香港大學也有樣學樣，有學生將藏有自家活春宮的thumb drive留在校園圖書館供人賞玩，結局，當然是可以預見的。

此事証明，全香港有興趣並付諸行動，自編自導自演變變變生命力的，除了那個開山始祖陳公冠希之外，還有這許多星斗市民。可以認為，這種其實不是個別事件，而係香港其中一種畸型性文化。香港七百萬人，原來除了有不少closet gay(櫥櫃同性戀者)之外，還有更多closet AV director(櫥櫃AV導演)。

因此，我是越想越不明白，港大為甚麼要開除那位公開片段的學生。陳冠希影鹹相，你可以話「關你x事」。同一件事由香港大學生做，就不可以草草了事。試想港大百年清譽，自創校以來人材輩出，社會上幾多律師醫生教授名人師從此校。今天，這位冒住要坐監的危險都要挺身而出的學生告訴校方，原來該校一時不察，竟然收了這樣一個百年不出的蠢材做學生，差點將校譽毀於一旦。犧牲一個學生，救了整間大學，請問何罪之有﹖

陳冠希單新聞風風火火搞足一個月，閣下還不知警惕，是為其一；同一隻thumb drive內，除左裝有閣下自己的性生態片段，還要放上cv，慌死人唔知道你係個男主角，水洗都唔清，是為其二。這種人，他日踏出社會如果係做個掃街的還可以，萬一真係做律師，醫生，教師，甚至普普通通一個文員，以這種做事態度，搞出人命是等閒事。原本你要弱智，安安份份住係青山冇人會打搞你，偏偏你要拎住港大個金漆招牌招搖撞騙，呃飲呃食，全世界就信哂你，到時仲唔死得人多﹖

這種人，實在是應該讓他嘗嘗「切舟之痛」，以免他以後繼續四處播種，散播他的白痴基因，遺禍後代，增加日後香港綜緩負擔。又可以殺一儆百，因為很明顯像陳冠希那種公開道歉完全無效，此誠「治亂世當用重典」也。罰放片的那個學生，只治標而不治本，更加會繼續縱容這種愛好大自然的另類行為，未見其利，先見其害。

是禍躲不過。大家現在是知道亞視的用心良苦了。遠道去日本將一眾AV女優男優監督編劇燈光化妝場地逐個訪問，務求將最專業的AV拍攝技巧及過程介紹俾大家。各位closet要學，當然要學最專業的，日後閣下的珍貴片段若果有幸被公開，俾人評頭品足樣貌身材，至少唔好俾人捉住話柄，被批評是amateur，就有辱祖宗了。

選總統(之二)

美國人以種族性別取人，台灣人簡單一點，以貌取人。

馬英九為廣大台灣女性所愛戴，本來相貌不錯，作為選舉籌碼的其中之一亦無不可。可惜自取其辱，佢同劉德華一樣，幾十歲人，一個俾人叫「小馬哥」，一個叫「華仔」，甘之如飴。尤其當閣下聽到叫呢幾隻字既人係一個幾十歲既師奶的時候，你就會好自然聯想到一幅類似電影「食神」李兆基係沙灘慢跑的那一幕，係會令人將三日前食既早餐煎雙蛋都嘔埋出o來。由此可見，所謂藝人同政客，其實同AV女優冇乜分別，即係一個av宅男走埋去吉澤明步身邊叫聲「小步步」，佢依然可以笑容滿面繼續同你握手簽名拍照留念。請問阿馬生同劉生，你兩位同佢有乜分別﹖

有，分別係人地二十出頭花樣年華樣貌娟好，這個「小」字，還是擔當得起，但你兩位不妨先照照鏡。敬業﹖NONONONONO，呢個絕對係尊嚴的問題。

所以可以肯定，選馬英九這種小白臉，遇強即屈，一點說「不」的氣魄都欠奉，最後必然是向共產黨投誠的結局。偏你看台灣的女人們，見了馬英九，像蜜蜂見到了蜜糖一樣(尤其係台北的雌蜂們)，要佢唔好選馬英九，等於叫十年前的香港女人見到碧咸唔好尖叫一樣，機會應該好微。

但選謝長廷更糟。

謝長廷一面奸相，未選己經輸左半個馬鼻(台灣應該有不少女人一直認為是這個姓謝的夾埋王金平在「迫害」她們心愛的小馬哥)。雖然說選總統不是選忠臣名將的時候，但有得揀，你都會想揀個劉備多過想揀個曹操。這還不止，謝長廷是一個鐵志的台獨份子，馬英九上台，溫和派主政，共產黨還有點信心可以「和平統一」，畢竟白臉書生，比這種大花臉易應付得多。若果謝長廷上台，中國肯定再沒有之前的耐性，忍完一個陳水扁，又忍一個謝長廷。奧運一過，不馬上先把一百支核彈描準台灣再慢慢跟這個姓謝的「談判」才怪。

戰國強秦築完鄭國渠那一年，馬上揮軍攻韓，開始統一戰爭。現在中國攻台明顯比當年秦國統一來得容易，苦心經營奧運亦有八年之期，假若台灣今後由謝長廷主政，中國會唔會攻台，你話呢﹖

政治，是現實的。以這個結局為假設，為著自己的性命財產著想，雖然娘娘腔了一點，各位台灣同胞們還是選馬英九的好。

選總統(之一)

這邊廂美國民主黨鬧得如火如荼，月尾台灣就要正式選總統。

雖然兩地的選民同樣弱智，但這個世界是很大的，正所謂一種米可以養百種弱智的人，弱智，也分很多種。

先說美國式的弱智。民主黨兩位剩餘的候選人，一個是黑人，一個是女人(排名不分先後)，美國的選民一廂情願的認為，這個代表著弱勢社群的第一個黑人/女人總統，一定會替他們這些弱勢社群(so far我唔係好覺佢地係弱勢，似係長年累月被害妄想症多d)謀福利的。有的甚至期望這位前無古人的總統可以為美國帶來一點變革(transformation)，打救美國。

如果這個邏輯正確，各位美國的選民其實是不用煩惱到底想要女人還是黑人的，去推舉共和黨，現任美國國務卿賴斯(Condoleezza Condi Rice)就是了，又是黑人又是女人，這個一石二鳥的人物，為甚麼不用﹖可見這其實不是黑人還是女人的問題，說到底，都係能力的問題。一個選民如果有正常程度的智商，就當知道最應該著眼的，應該係候舉人及幕僚的能力，撇除所有假大空的口號標語，尤其是那種滿口偉大理想的候選人，最信唔過。係人都知道美國總統係全世界最現實的職位，你有理想﹖不妨去寫小說演話劇。總統重責還是退位讓賢比較好。現實係美國而家係面臨大衰退，正如信報曹仁超其中一句明言叫「熊市弱勢先行」，俾你做總統，搵人開刀，搵邊個先丫﹖仲唔明﹖即係董建華夠好多理想啦。

明未呀﹖

台灣聽日講。

p.s. 話時話，真係有得諗，McCain不如認真考慮一下搵rice拍擋食，反正呢位小姐都叫薄有名氣，應該可以抵銷一下民主黨的所謂「優勢」。

雖然，係就係樣衰左d。

我真係好hurt。

即係當我發現某人原來我同佢以前認真講既野講一百次都係唔入耳唔鍾意聽死唔信邪，但係d唔等駛既我講一次，佢就話我成日講仲可以記到而家，好老實講我都己經唔記得點解會提起呢樣野。

呢d，咪就叫偏見囉。不過係intentionally，unintentionally，occasionally抑或係ecumenically，我就唔深究啦......

雖然我覺得，做為一個香港女性，認識一下這個橫掃日港台的第一婦科聖手都實在唔係乜野過份的事，起碼第日見到成班麻甩佬係度笑淫淫咁，你都叫做知道發生緊乜野事丫嘛。

咁，都唔算係乜野壞事丫。

諗到呢度，我就心中釋然。

木宰羊

美國總統共和民主兩黨提名戰進入尾聲。小弟首先要多謝共和黨的Mccain，因為此君擊敗了對手Huckabee----------兩黨所有提名人當中，我最討厭的一個。

雖然如果我做選民會毫不猶疑投票俾Mccain，但客觀地睇，佢不足以贏Obama或Hillary(Hillary仲未輸，真係令人安慰)。敗因如下：

1. 受殊仔拖累。我會將喬治布殊呢個總統同毛澤東相提並論。毛澤東作為人類歷史上最無能而又最受人民擁戴的首領的典範(當然亦與民智有關，但政治手腕，玩弄陰謀權術的本領亦是一絕)，喬治布殊由第一日選總統都成個低能仔咁，可以做足八年，兩者實有異曲同工之妙。而且，邊個做得佢接班人，或者被人標籤為他的接班人，睇怕都冇乜運行(而民主黨的人實會咁做，寫包單)。

2. 老。唔係歧視老人家(如果唔係我就唔會話投票俾佢啦)，但佢今年七十一歲，美國人選得總統雖然每四年一次，但一做，就會預自己做八年，選民選係預左選八年(如無必要，邊個想成日換總統)，八年後佢係七十九歲，民主黨人亦一定會拎佢既年齡做文章，質疑其拖政能力。

3. 最大問題，佢實在係冇民主黨兩位咁有魅力。這個問題非常嚴重，可能係年紀問題，但佢講野，好明顯不及Hillary的潑婦式高音，也不及Obama的抑揚頓挫(不得不佩服他的演說形態真係一流)。音調太過平隱，一旦兩者上電視對壘，兩者一比之下，非常輸蝕。你難以想像這位老人家惡起上o來個樣會係點，但Obama同Hillary，都唔駛諗啦，佢地都惡過幾十次。

所以，唉，希望天有眼。我揀佢原因得一個，咁多個候選人之中，我相信佢係最了解軍事的一個，亦相信佢係最了解伊拉克的困局的一個。今時今日伊拉克的爛局，其實己經唔容許美國撤軍，美軍一撤，中東必亂。雖然Mccain都話要撤軍，但就死都唔講係幾時，証明其實佢係明白伊拉克局勢的嚴重性。

順便提提，上一期economist談到Mccain將來應如何對付兩位民主黨候選人，認為如果民主黨的nominee的Hillary的話對Mccain會比較著數，原文節錄如下：

"He could crush her simply by asking voters whose character they admire more."
"He is a war hero; she is not. He freely admits mistakes; she is bizarrely incapable of doing so."
"He often takes brave and unpopular stands; she is cautious and poll-driven."(呢點我係好buy架，因為咁先叫有領袖風範)
"He has a reputation for telling the truth; she, to put it mildly, does not."
"He would not need to make any of these charges himself, because a legion of freelance Hillary-haters would do it for him."(呢點好正)

而對Obama則："Devising a strategy to shoot down Mr Obama is much harder."。結論是："Mr McCain will find it dauntingly hard to beat his younger, sexier, honey-tongued rival. But not impossible."。

事實係咪咁﹖我希望係，但美國人short開有條路，真係好難講。

話時話，民主黨提名戰，我個多月前的預測依然有效，估Hillary。

大將之風

不知有多少人有看肥姐的追思會，錯過了不緊要，但欣宜跟鄭少秋一起上台回應鄧光榮的那段，卻值得一睇再睇：

鄧光榮的指控：http://www.youtube.com/watch?v=lsxVRtKGbn4
兩父女的回應：http://hk.youtube.com/watch?v=0iSvF-l9tNU

鄭少秋我唔多講，俾人當住幾千人指住鬧，上到台都仲要咁客氣，你俾少少火得唔得﹖冇火都唔係事事問個女丫，你上去之前就同個女夾定計乜野好講乜野唔好講啦大佬﹖

鄭少秋的說話熟真熟假大家無從得知，但重點不在他身上，在欣宜。因為假設鄭少秋講真話，係老父有越講越激動的趨勢的時候，識得打個完場。第一句「誤會」，免卻雙方尷尬，再加一句「有心人做出o來既野」，以後仲有邊個夠膽係呢件事上面講多半句，就係「有心人」，以後出師無名，只會被人認為乃搞是搞非之徒，由此斷絕以後一切閒言閒話，公關手腕很了不起。

假設鄭少秒講大話，整段講話她面部也沒有絲毫沒有不悅的神色，還幫忙反駁，城府之深更是令人咋舌。

而且成場站姿得體，眼神淡定，你留意佢用字，鄭少秋問佢「呢個係咪我既藉口呀﹖」，欣宜答得好聽，其實既冇話係，又冇話唔係。因為話係，自己老豆難落台，話唔係，鄧光榮難落台。最後再加句「我地自己屋企人知咪得囉」，咁即係點﹖依然係未答。咁識修辭，你話香港有幾多個廿歲出頭的女仔及得上佢﹖

再加上整件事她出奇地高的曝光率(一個人家有喪事好少會咁頻密見傳媒，阿媽幾出名都係咁話)，很明顯想藉此一改形象，洗脫以前「白雪公主」的負面形象。如此懂得善用良機，就不知是出自佢自己的主意，還是一眾世叔伯的提議了。此女已隱有大將之風，將來就算唔靠母蔭，唔玩娛樂圈，有本事自己搞生意，單這份沈著，已足夠令我相信佢唔會失敗。

此所以點解我咁不滿鍾欣桐呢，人地廿歲，你姓鍾的廿七歲，遇大事你睇下人地臨場發揮可以講d乜，你有英皇成班高層度稿度足兩星期，結果又講d乜﹖

民主預算

曾司長的那份新預算案，除了告訴大家庫房水浸之外，還令大家知道為甚麼香港永遠沒有民主。

原因在於，預算案一出，曾司長的支持度由25%升至58%。而今次預算案的重心，係「派錢」，太公分豬肉，人人有份。如果這算是一份「好」的預算案，而且係一份好到令阿司長支持度可以上升幾乎一倍的預算案。我不能想像，壞的，到底是怎樣﹖

所以由此可以得出一個同鄧小平同志「唔理黑貓白貓，捉到老鼠就係好貓」一樣的邏輯：無論係曾司長做的預算案，抑或係唐司長做的預算案，總之有錢派的，大家就覺得呢份係好的預算案。同理，無論係全香港八百萬人選出的特首，定係八百人小圈子選出的特首，總之搞得好經濟的，就係大家都會叫好的特首。

你擺這種姿態俾阿爺睇，你做胡錦濤，會唔會俾香港民主丫﹖唔明﹖即係你用一蚊買到既野，你會唔會俾兩蚊買丫﹖你打經濟牌就可以令香港人滿足，仲會唔會俾埋民主你丫﹖

共產黨都早就睇通睇透，香港人根本唔係要民主，要錢先係真。全中國75%財富掌握於共產黨手中，你香港幾百萬人幾時先食得窮我﹖於是咪到時到候搞下類似QDII的活動，送下錢俾閣下，你點會仲想要民主﹖阿美利加的殊仔總統都搞派錢，你覺得原本諗住投票俾Obama的美國人會唔會因為這個原因轉為投票俾Mccain呢﹖咁你明點解美國有民主香港冇啦。

所以呢，拿，你睇下香港的民主派，有邊幾個話呢份預算案係好的，又或者仲嫌份預算案派得唔夠多(即係話點解人人都有係佢冇，又或者點解人地咁多我咁少咁解)：間接者會同你講份預算案未能令全部港人受惠，又或者令「富者越富，貧者越貧」加劇，直接者就會同你講點解唔加多d綜緩同生果金」，即擺到明貪得無厭者，呢d呢，就係所謂的民主內奸。

邊個係人，邊個係鬼，識分未呀﹖